མགོན་པོ་སྐྱབས།
རྨི་ལམ་དང་པོ།
དེ་རིང་བོད་ཟླ་བཅུ་གཉིས་པའི་ཚེས་བརྒྱད་ཉིན་གྱི་ཆུ་ཚོད་གསུམ་ཡས་མས་ཞིག་ལ་ང་ལ་རྨི་ལམ་འདི་འདྲ་ཞིག་རྨིས་སོང་། སྐྱབས་རྗེ་བླ་མ་བཟོད་པ་རིན་པོ་ཆེ། ངེད་ཀྱི་ཨ་ཞང་གི་བུ་བཀྲ་ཤིས་ཚང་ལ་ཕེབས་ནས་དེར་བཞུགས་འདུག་པ་དང་། བླ་མ་བཟོད་པ་རིན་པོ་ཆེས་ང་ཚོ་ལ་འདི་ལྟར་གསུངས། ང་འཆི་དགོས་པ་རེད་ལ། དེ་ལ་ཅི་ཡང་མི་སྐྱོན་མོད། ཡིན་ན་ཡང་ང་ལ་དད་པ་ཡོད་པའི་སེམས་ཅན་ཐམས་ཅད་སྙིང་རེ་རྗེ་གསུངས་ནས་སེམས་ཅན་ཐམས་ཅད་ལ་ཐུགས་སྙིང་རྗེ་ཆེན་པོ་ཚད་མེད་གནང་། དེའི་སྐབས་སུ་ང་ལ་སྐྱབས་རྗེ་བླ་མ་བཟོད་པ་རིན་པོ་ཆེ་མི་ཕྱེད་པའི་དད་པ་ཐོབ་ནས་ཡར་ལངས་ནས་ཕྱག་གསུམ་འཚལ་བ་དང་དད་པའི་སྟོབས་ཀྱིས་མིག་ཆུ་རང་དབང་མེད་པར་ཤོར་ཀྱི་འདུག དེའི་སྐབས་སུ་ངའི་ཕ་མ་གཉིས་དང་ནུ་བོ་སྐྱབས་རྗེ་དམ་པ་བླ་མ་བཟོད་པོ་རིན་པོ་ཆེ་ང་ཚོའི་མཉམ་ཏུ་སྒྲ་ལེན་འཕྲུལ་འཁོར་ནས་གསུང་ཆོས་ཞིག་ལ་ཉན་བཞིན་འདུག ངའི་སེམས་ལ་ངའི་ནང་མི་རྣམས་དང་སྐྱབས་རྗེ་བླ་མ་བཟོད་པ་རིན་པོ་ཆེ་ལྷན་སྐུ་དཔར་ཞིག་བསྒྲོན་ཐུབ་ན་སྐལ་བ་བཟང་པ་བསམ་ནས་ཐེངས་གཉིས་ཙམ་ལ་ཁ་པར་ལས་སྐུ་དཔར་ལེན་པའི་ཐབས་ཤེས་བྱས་ན་ཡང་ལེན་ཐུབ་མ་སོང་། དེ་ནས་ང་གཉིད་སད།
རྨི་ལམ་གཉིས་པ།
རས་གུར་ཞིག་གམ་གནས་ཚང་ཆུང་ཆུང་ཞིག་ནང་སྐྱབས་རྗེ་བླ་མ་བཟོད་པ་རིན་པོ་ཆེ་བཞུགས་འདུག་ལ། དེ་ནས་ཁོང་གིས་ང་ལ་གསུངས་རྒྱུར། མགོན་པོ་སྐྱབས། ཁྱེད་ཀྱིས་མ་འོངས་པར་ཆོས་ཁྲིད་བྱོས་གསུངས་བྱུང་། ངས་སྐྱབས་རྗེ་མཆོག་ལ་ངའི་ཆོས་ཁྲིད་ཅི་ཡང་ཤེས་ཀྱི་མ་རེད་ལགས། མྱི་ནག་མི་སྐྱ་ནང་ཆོས་ལ་ཐོས་བསམ་སྒོམ་གསུམ་གང་ཡང་བྱས་མེད་པས་ཅི་ཡང་ཤེས་ནི་མ་རེད་ཅེས་ནན་ཞུ་བྱས། སྐབས་དེར་ངའི་འགྲམ་གྱི་གཡས་ཕྱོགས་སུ་བཞུགས་ཡོད་པའི་དགེ་སློང་གྲྭ་བ་དེ་ཁོང་ཚང་ལ་བསྟན་ནས། ངས་སྐྱབས་རྗེ་མཆོག་ལ་ཞུ་རྒྱུར། སྐྱབས་རྗེ་མཆོག་ང་ལས་དགེ་སློང་འདིས་ཆོས་ཁྲིད་གནང་ན་བཟང་པ་དང་། ཁོང་ལ་ཆོས་ཀྱི་ཤེས་རྒྱ་ཆེན་པོ་ཡོད་རེད་ཅེས་ཞུས་ན་ཡང་། སྐྱབས་རྗེ་བླ་མ་བཟོད་པ་རིན་པོ་ཆེ་མཆོག་གིས་ང་ལ་ཁྱེད་ཀྱིས་ངེས་པར་དུ་ཆོས་ཁྲིད་བྱེད་ཐུབ་ནི་རེད་ཅེས་བཀའ་ནན་གྱིས་ཕེབས། དེ་ནས་ཞོགས་པ་ཡར་ལངས་ཏེ་ཐབ་ཚང་ནང་སོང་ནས་ཞོགས་ཇ་འཐུང་བཞིན་པའི་སྐབས་། ངའི་བཟའ་ཟླ་སྐས་འཛེགས་ལས་མར་བབས་ཡོང་ནས་ང་ལ་བཤད་རྒྱུར། སྐྱབས་རྗེ་བླ་མ་བཟོད་པ་རིན་པོ་ཆེ་སྐུ་ཞིང་ལ་ཕེབས་འདུག་ཟེར། ང་ཅུང་སྟབས་སྟབས་པོ་ཆགས་ནས་ཡང་བསྐྱར་ཁོ་མོར་དྲིས་པས། སྐྱབས་རྗེ་མཆོག་གི་དགོན་པའི་ངོ་དེབ་ཐོག་གསར་འགྱུར་བཀོད་པའི་གནས་ཚུལ་རྣམས་ཁོ་མོས་ང་ལ་ཡང་བསྐྱར་བཤད་པས། དེ་ནས་ངའི་སེམས་ལ་མདང་དགོང་གི་རྨི་ལམ་རྣམས་ཤར། དེ་མ་ཐག་ངའི་སྐྱབས་རྗེ་བླ་མ་བཟོད་པ་རིན་པོ་ཆེ་མཆོག་རྨི་ལམ་རྨིས་པ་ཁོ་མོར་བཤད། ཁོ་མོ་ཅུང་ཡ་མཚན་ཡང་སྐྱབས་རྗེ་མཆོག་གིས་ཁྱེད་ལ་བྱིན་གྱིས་རླབས་པ་དང་། མ་འོངས་བར་ཁྱེད་ཀྱིས་ཀྱང་ཆོས་ཁྲིད་བྱེད་ཐུབ་པའི་རྟེན་འབྲེལ་ཡིན་སྲིད་ཟེར། སྐྱབས་རྗེ་བླ་མ་བཟོད་པ་རིན་པོ་ཆེ་རྨི་ལམ་ནང་མཇལ་བ་དང་། སྐུ་ཞི་བར་གཤེགས་པའི་རྐྱེན་གྱིས་སེམས་ལ་སྐྱོ་གདུང་ཚད་མེད་ཅིག་སྐྱེས་ལ་རང་དབང་མེད་པར་མིག་ཆུ་ལྷུང་། ངའི་སྐྱབས་རྗེ་དམ་པ་བླ་མ་བཟོད་པ་རིན་པོ་ཆེ་ཡི་མདུན་ནས་ཆོས་ཁྲིད་སོགས་ཞུ་མྱོང་མེད་ལ། དམིགས་བསལ་གྱིས་ཆོས་ཀྱི་འབྲེལ་བ་གང་ཡང་མེད་ན་ཡང་། སྐྱབས་རྗེ་བླ་མ་བཟོད་པ་རིན་པོ་ཆེ་མཆོག་གིས་མི་མངོན་ཆོས་སྐུའི་དབྱིངས་སུ་གུས་པ་ལ་བྱིན་གྱིས་རླབས་བཞིན་པ་ནི་ཅི་ལ་མིན་།
རྨི་ལམ་གསུམ་པ།
ཉིན་འགའི་སྔོན་ཡང་ང་ལ་རྨི་ལམ་འདི་ལྟར་རྨིས། ངས་ནང་ཆོས་ཀྱི་དཔེ་ཆ་མང་པོ་ཞིག་ཀློག་གི་འདུག་ལ། དེའི་ནང་སྔ་འགྱུར་རྙིང་མ་བའི་བླ་མ་ཁ་ཤས་ཀྱི་ཕྱག་དཔེ་དང་ཨ་ནེ་བསྟན་འཛིན་པད་མོའི་ཕྱག་དཔེ། སྐྱབས་རྗེ་བླ་མ་བཟོད་པ་རིན་པོ་ཆེའི་ཕྱག་དཔེ་ཁ་ཤས་ལ་མཇལ་བ་དང་། དེའི་ནང་ནས་སྐྱབས་རྗེ་བླ་མ་བཟོད་པ་རིན་པོ་ཆེའི་ཕྱག་དཔེ་དེའི་ཁ་ཕྱེས་ནས་བལྟས་པས། དེའི་ནང་དུ་འདི་ལྟར་བྲིས་འདུག ང་ཚོའི་ལུས་ཀྱི་རྩའི་གྲུབ་ལུགས་སྡོང་པོ་འདི་གཉིས་ཀྱི་གྲུབ་ལུགས་གཅིག་ཡིན་ལ། སྡོང་པོ་འདི་ཡང་རིམ་བཞིན་སྐྱེས་ནས་ཡལ་འདབ་རྣམས་ཕྱོགས་བཞིར་རྒྱས་པ་བཞིན་ང་ཚོའི་མིའི་ལུས་ཀྱི་རྩ་འདབ་རྣམས་ཡང་རིམ་གྱིས་རྒྱས་ནས། སྡོང་བོ་འདི་གཉིས་ལྟ་བུ་གྲུབ་པ་རེད་ཅེས་བྲིས་འདུག དེའི་སྐབས་སུ་ངའི་རྨི་ལམ་ནང་སྡོང་པོའི་ལོ་འདབ་ཧ་ཅང་རྒྱས་པ་འཕྲེད་གྱིས་སྐྱེས་འདུག་པ་ཞིག་རྨིས། འདི་ནི་སྐྱབས་རྗེ་བླ་མ་བཟོད་པ་རིན་པོ་ཆེ་ཞིང་གཤེགས་དམ་པ་ཁོང་ངས་རྨི་ལམ་རྨིས་པ་ཐེངས་གསུམ་པ་དེ་ཡིན།
ངས་སྐྱབས་རྗེ་བཟོད་པ་རིན་པོ་ཆེ་དངོས་སུ་མཇལ་བའི་སྐལ་བཟང་དེ་ནི། སྔོན་རྒྱ་གར་ན་ཡོད་པའི་སྐབས་སུ་ངའི་སར་བོད་ཀྱི་བསྐུ་མཉེ་བྱེད་དུ་ཡོང་མཁན་ཡོ་རོབ་སི་བུའི་ཀྲན་ནས་ཡིན་པའི་སྐྱེས་མ་ངོ་ཤེས་པ་ཞིག་ཡོད་ལ། ཉིན་ཞིག་ཁོ་མོ་ངས་རྩར་བསྐུ་མཉེ་བྱེད་དུ་ཡོང་ནས། ཁོ་མོས་བཤད་རྒྱུར། དགའ་ལྡན་ཆོས་ཚོགས་ནང་སྐྱབས་རྗེ་བླ་མ་བཟོད་པ་རིན་པོ་ཆེའི་གསུང་ཆོས་ཞུ་བཞིན་ཡོད་ལ། ཁྱེད་རང་སྐྱབས་རྗེ་བླ་མ་བཟོད་པ་རིན་པོ་ཆེ་ལ་མཇལ་ཁ་ཞུ་འདོད་ཡོད་ན།་དགའ་ལྡན་ཆོས་ཚོགས་ནས་སང་ཉིན་མཇལ་ཁ་ལོན་ནི་རེད་ཟེར། དེའི་ཕྱི་ཉིན་ང་དང་སྐྱེས་མ་དེ་ངེད་གཉིས་དགའ་ལྡན་ཆོས་ཚོགས་ལ་བླ་མ་བཟོད་པ་རིན་པོ་ཆེ་ལ་མཇལ་ཁ་ཞུ་བར་སོང་བ་ཡིན། སྟབས་ལེགས་པ་ཞིག་ལ་ཉིན་དེར་བླ་མ་བཟོད་པ་རིན་པོ་ཆེ་རི་མགོར་བསང་གསོལ་ལ་ཕེབས་པའི་སྐབས་དང་ཐུག་འདུག་ལ། དེ་ནས་ང་དང་མི་ཁ་ཤས་ཀྱིས་ལམ་གྱི་གཡས་གཡོན་ནས་བླ་མ་བཟོད་པ་རིན་པོ་ཆེ་ཕེབས་ལམ་ནས་ཕེབས་སྒུག་ཞུས་ནས་བསྡད་པ་ཡིན། ཅུང་མ་འགོ་བར་སྐྱབས་རྗེ་མཆོག་ཞབས་ཐང་ལ་ཕེབས་བྱུང་ལ་། ང་ཚོ་ལམ་འགྲམ་ན་ཡོད་པ་རྣམས་ཀྱི་སར་ཁོང་ཚང་ཕེབས་ཡོང་སྟེ་ཐུགས་བརྩེ་བ་ཆེན་པོས་ངང་ནས་རེ་རེ་བཞིན་མཇལ་ཁ་གནང་བ་དང་། ངའི་རྩར་ཕེབས་ནས་ང་ལ་ཕྱག་མཇལ་གནང་བ་དང་ངས་སྐྱབས་རྗེ་མཆོག་ལ་བསྒྲོན་པའི་ཁ་བཏགས་སྐྱབས་རྗེ་མཆོག་གིས་ཕྱིར་ངའི་སྐེ་ལ་བསྐོན། ངའི་སྐལ་བཟང་གི་གོ་སྐབས་དེ་དང་བསྟུན། སྐྱབས་རྗེ་མཆོག་ལ་ང་ལ་རྟེན་སྐལ་ཞིག་གནང་རོགས་ཞུ་ཞེས་ཞུས་སྐབས། སྐྱབས་རྗེ་མཆོག་ནས་ཁྱེད་ཀྱིས་ངའི་ཞབས་ཕྱི་བ་ལ་འབྲེལ་བ་བྱོས་དང་། ཁྱེད་ལ་རྟེན་སྐལ་གནང་དགོས་གསུངས། དེ་ནས་ངའི་ཁ་པར་ཨང་གྲངས་སྐྱབས་རྗེ་མཆོག་གི་ཞབས་ཕྱི་བ་ཕུལ་བ་དང་། ཞབས་ཕྱི་བས་ང་ལ་འབྲེལ་བ་བྱེད་ཡོང་གསུངས། འདི་ནི་སྐྱབས་རྗེ་བླ་མ་བཟོད་པ་རིན་པོ་ཆེ་ལ་མི་ཚེ་འདིར་ཐེངས་གཅིག་མཇལ་བའི་སྐལ་བཟང་གི་ཉིན་མོ་དེ་ཡིན་ལ། སྐྱབས་རྗེ་བླ་མ་བཟོད་པ་རིན་པོ་ཆེ་མཇལ་བ་མཐའ་མ་དེ་ཡང་ཡིན།
ཐེངས་གསུམ་གྱི་རྨི་ལམ་གང་ལ་བརྟག་ན་ཡང་སྐྱབས་རྗེ་བླ་མ་བཟོད་པ་རིན་པོ་ཆེ་མི་འགྱངས་བར་མི་མངོན་ཆོས་དབྱིངས་ཕོ་བྲང་ནས་མི་བཞུགས་པར་བདག་འདྲའི་ཉམ་ཐག་སྐྱེ་འགྲོའི་མགོན་དཔུང་དུ་ངེས་པར་ཕེབས་པ། མི་སྐྱ་ནོར་རྫི་བདག་འདྲའི་རྨི་ལམ་ལ་ཡང་སྐྱབས་རྗེ་མཆོག་གིས་བྱིན་གྱིས་རླབས་ན། གཞན་གནམ་གྱིས་ས་བཀབས་པ་ལྟ་བུའི་རྒྱལ་སྲས་བྱང་ཆུང་སེམས་དཔའ་རྣམས་ཀྱི་སྣང་ངོར་སྐྱབས་རྗེ་བླ་མ་བཟོད་པ་རིན་པོ་ཆེ་མཆོག་དག་ཞིང་གང་དུ་བཞུགས་མིན་དང་། དུས་ནམ་ཞིག་ཡུལ་གང་ཞིག་ལ་སླར་ཡང་འགྲོ་བའི་དོན་ལ་མྱུར་བར་མྱུར་དུ་བྱོན་པ་མཁྱེན་མཁྱེན་པའོ། བཀྲ་ཤིས་པར་གྱུར་ཅིག།
བོད་ལོ་༢༡༥༠་ཟླ་༡༢་ཚེ་བརྒྱད་དང་སྤྱི་ལོ་༢༠༢༤་ཟླ་༡་ཚེས་༡༨་ཞོགས་པ་རྨི་ལམ་རྨིས་རྗེས་བྲིས་པ་དགེ་ལེགས་འཕེལ།
