རྒྱ་ནག་ཧི་ནན་ཞིང་ཆེན་དུ་ཡོད་པའི་གཞི་རིམ་གཏན་སྡོད་སློབ་གྲྭ་ཞིག་ལ་མེ་སྐྱོན་ཤོར་རྐྱེན་མི་གྲངས་ ༡༣ རྐྱེན་འདས་སུ་ཕྱིན་འདུག
དེ་རིང་རྒྱལ་སྤྱིའི་གསར་འགྱུར་བརྒྱུད་ལམ་ཁག་ཏུ་གནས་ཚུལ་ཐོན་པའི་ནང་། ཁ་སང་ཕྱི་ཚེས་ ༡༩ ཉིན་གྱི་དགོང་མོར་རྒྱ་ནག་ཧི་ནན་ (Henan) ཞིང་ཆེན་ནང་གི་ཧྥན་ཁྲང་ (Fangcheng) རྫོང་ནཱན་ཡཱང་ (Nanyang) གྲོང་ཁྱེར་དུ་རྟེན་གཞི་བྱས་པའི་ཡཱིན་ཚའེ་ (Yincai School) གཞི་རིམ་གཏན་སྡོད་སློབ་གྲྭ་ཞིག་ལ་གློ་བུར་དུ་མེ་སྐྱོན་ཤོར་བར་བརྟེན། སློབ་ཕྲུག་ཚུད་པའི་མི་གྲངས་ ༡༣ རྐྱེན་འདས་སུ་ཕྱིན་ཡོད་འདུག
ད་ལྟའི་ཆར་ས་གནས་དཔོན་རིགས་ཚོས་མེ་སྐྱོན་གྱི་དོན་རྐྱེན་ཇི་ལྟར་བྱུང་མིན་ཐད་རྟོག་ཞིབ་བྱས་དང་བྱེད་མུས་ཡིན་ཞིང་། ས་གནས་ཉེན་རྟོག་པས་སློབ་གྲྭའི་འགན་འཛིན་བཀག་སྐྱིལ་བྱས་ཏེ་འདྲི་རྩད་བྱེད་བཞིན་ཡོད་སྐོར་བསྒྲགས་འདུག
དེ་འབྲེལ་རྒྱ་ནག་གི་གསར་འགྱུར་བརྒྱུད་ལམ་ཁག་གི་ནང་། ཁ་སང་གི་མཚན་མོར་སློབ་གྲྭ་དེར་མེ་སྐྱོན་གྱི་དོན་རྐྱེན་བྱུང་སྟེ། མེ་གསོད་རུ་ཁག་གིས་མཚན་གྱི་ཆུ་ཚོད་ ༡༡།༣༨ ཡས་མས་ཤིག་ལ་མེ་གསོད་ཐུབ་པ་བྱུང་བ་དང་། དོན་རྐྱེན་དེའི་ཁྲོད་མི་གཅིག་ལ་རྨས་སྐྱོན་ཚབས་ཆེན་ཕོག་སྟེ། ད་ལྟའི་ཆར་སྨན་ཁང་དུ་སྨན་བཅོས་བྱེད་བཞིན་ཡོད་འདུག་ལ། མི་གྲངས་ ༡༣ ཙམ་རྐྱེན་འདས་སུ་ཕྱིན་ཡོད་ཀྱང་། དེའི་ཁྲོད་སློབ་མ་ཇི་ཙམ་ཡོད་པ་ཁ་གསལ་མེད་སྐོར་སོགས་བཀོད་འདུག
རྒྱ་ནག་གི་སྤྱི་ཚོགས་དྲ་ལམ་ཝེ་པོ་ (Weibo) རུ་དོན་རྐྱེན་དེ་དང་འབྲེལ་བའི་བརྙན་ཐུང་ཁྱབ་སྤེལ་ཤུགས་ཆེན་ཕྱིན་པ་མ་ཟད། དེའི་སྟེང་མཆན་འདེབས་མཁན་ཡང་མང་པོ་བྱུང་འདུག དེ་འབྲེལ་མཆན་འབྲི་མཁན་ཞིག་གིས། སློབ་མ་ ༡༣ འཕྲལ་དུ་འདས་གྲོངས་ཕྱིན་པ་དེ་འཇིགས་སྣང་སྐྱེ་འོས་པ་ཞིག་དང་། ནག་ཉེས་ཅན་ལ་ཁྲིམས་ཆད་དྲག་པོ་གཅོད་དགོས་སྐོར་སོགས་བྲིས་འདུག
ཕྱི་ལོ་ ༡༩༩༥ ལོར་ཡཱིན་ཚའེ་སློབ་གྲྭ་ (Yincai School) གསར་འཛུགས་བྱས་ཡོད་ཅིང་། སློབ་གྲྭ་དེ་ནི་སྒེར་གཉེར་གཏན་འཇགས་སློབ་གྲྭ་ཞིག་ཡིན་འདུག དེའི་ནང་དུ་སྔོན་འགྲོ་དང་གཞི་རིམ། འབྲིང་རིམ་བཅས་ཀྱི་སློབ་སྦྱོང་སྤྲོད་ཀྱི་ཡོད་པ་དང་། སློབ་ཕྲུག་མང་ཆེ་བ་ཉེ་འཁྲིས་གྲོང་གསེབ་ནས་ཡིན་འདུག
རྒྱ་ནག་ནང་བདེ་འཇགས་ཀྱི་གནས་སྟངས་ཞན་པ་དང་ལྷོད་དྲགས་པའི་རྐྱེན་གྱིས། མེ་སྐྱོན་དང་གློ་བུར་གྱི་ཆག་སྒོ་སོགས་མང་པོ་འབྱུང་གི་ཡོད་པ་རེད། དེ་ཡང་འདས་ལོའི་ཕྱི་ཟླ་ ༡༡ ཚེས་ ༡༦ ཉིན་རྒྱ་ནག་ཧྲན་ཞི་ (Shanxi) ཞིང་ཆེན་དུ་ཡོད་པའི་ལས་ཁུངས་ཤིག་ལ་མེ་སྐྱོན་ཤོར་ནས་མི་གྲངས་ ༢༦ རྐྱེན་འདས་སུ་ཕྱིན་ཡོད་པ་རེད། ད་དུང་འདས་ལོའི་ཕྱི་ཟླ་ ༤ པའི་ནང་རྒྱ་ནག་པེ་ཅིན་གྱི་སྨན་ཁང་ཞིག་ཏུ་མེ་སྐྱོན་བྱུང་རྐྱེན་འོག ནད་པ་ཚུད་པའི་མི་གྲངས་ ༢༩ རྐྱེན་འདས་དང་། ཉེན་རྟོག་པས་མི་གྲངས་ ༡༢ འཛིན་བཟུང་དང་འདྲི་རྩད་སོགས་བྱས་ཡོད་འདུག
གསར་འགོད་པ། བསྟན་འཛིན་ཕུར་བུ།
རྩོམ་སྒྲིག་པ། སྐལ་བཟང་སྦྱིན་པ།
