བོད་ཀྱི་གཞས་མ་འཇམ་དབྱངས་སྒྲོལ་མ་ཞུ་གཏུག་བྱས་ཡོད་འདུག

རྒྱ་ནག་གི་རོལ་དབྱངས་ཁེ་གཉེར་ཁང་ཞིག་དང་བོད་ཀྱི་གཞས་མ་འཇམ་དབྱངས་སྒྲོལ་མ་གཉིས་ལ་རྒྱ་སྒོར་ ༧༥༠༠༠ ཡི་ཉེས་ཆད་བཅད་ཡོད་ལུགས་བསྒྲགས་འདུག

རྒྱ་ནག་གི་རྒྱལ་ས་པེ་ཅིན་དུ་རྟེན་གཞི་བྱས་པའི་རོལ་དབྱངས་འཕེལ་རྒྱས་ཚོང་གཉེར་ཁང་ཟེར་བ་ཞིག་གིས། རྒྱ་ནག་ཧུའུ་པེའི་ཞིང་ཆེན་གྱི་རིག་གནས་ཚོང་གཉེར་ཁང་ཞིག་དང་བོད་ཀྱི་གཞས་མ་འཇམ་དབྱངས་སྒྲོལ་མ་ལགས་གཉིས་ནས་རྒྱ་ནག་གི་གཞས་པ་གྲགས་ཅན་ཏའོ་ལང་གི་ནུབ་མཚོའི་མཛའ་གཞས་ཞེས་པའི་གླུ་གཞས་ཤིག་ཆོག་མཆན་མེད་པར་བཀོལ་སྤྱོད་བྱས་པ་ཁྲིམས་གཏུག་བྱས་ཏེ། ཧུའུ་པེ་རིག་གནས་ཚོང་གཉེར་ཁང་དང་འཇམ་དབྱངས་སྒྲོལ་མ་གཉིས་ཐུན་མོང་ཐོག་རྒྱ་སྒོར་ ༧༥༠༠༠ ཡི་གུན་ཚབ་འཇལ་དགོས་བྱུང་ཡོད་ལུགས་བསྒྲགས་འདུག

དེ་འབྲེལ་རྒྱ་ནག་གི་དྲ་ལམ་ཁག་ཏུ་གནས་ཚུལ་ཐོན་པ་ལྟར་ན། ལོ་འགའི་གོང་ལ་རྒྱ་ནག་ཧུའུ་པེའི་ཞིང་ཆེན་གྱི་རིག་གནས་ཚོང་གཉེར་ཁང་ཞིག་གི་གཙོ་སྒྲུབ་བྱས་པའི་གྲགས་ཅན་གཞས་པ་གཞས་མའི་གླུ་གཞས་དགོང་ཚོགས་ཟེར་བ་ཞིག་གི་སྟེང་། བོད་ཀྱི་གཞས་མ་འཇམ་དབྱངས་སྒྲོལ་མས་ནུབ་མཚོའི་མཛའ་གཞས་ཞེས་པའི་གླུ་ཆོག་མཆན་མེད་པར་བཏང་བས། གླུ་གཞས་དེའི་བདག་དབང་གཉེར་མཁན་པེ་ཅིན་རིག་གནས་ཚོང་གཉེར་ཁང་གིས། དབྱི་ཁྲང་གྲོང་ཁྱེར་འབྲིང་རིམ་མི་དམངས་ཁྲིམས་ཁང་གི་འདྲི་གཅོད་དང་པོ་དང་ཧུའུ་པེ་ཞིང་ཆེན་མཐོ་རིམ་མི་དམངས་ཁྲིམས་ཁང་གི་འདྲི་གཅོད་གཉིས་པ་བརྒྱུད། འཇམ་དབྱངས་སྒྲོལ་མ་དང་ཧུའུ་པེའི་རིག་གནས་ཚོང་གཉེར་ཁང་གཉིས་གླུ་གཞས་ཀྱི་བདག་དབང་ལ་གནོད་སྐྱོན་བཟོས་ཡོད་པས། ཐུན་མོང་ཐོག་རྒྱ་སྒོར་ ༧༥༠༠༠ ཡི་གུན་ཚབ་འཇལ་དགོས་པའི་བཀོད་ཁྱབ་བཏང་ཡོད་ལུགས་བསྒྲགས་འདུག

གླུ་གཞས་ཀྱི་བདག་དབང་དང་འབྲེལ་བའི་ཁྲིམས་དོན་གྱོད་གཞི་དེའི་ཐད། ནུབ་མཚོའི་མཛའ་གཞས་གཏོང་མཁན་རྒྱ་ནག་གི་གཞས་པ་གྲགས་ཅན་ཏའོ་ལང་གིས། ནུབ་མཚོའི་མཛའ་གཞས་དང་ལག་མཐིལ་དུ་འཁྱིལ་བའི་དྲོད་ཁོལ། ཆར་ཟིམ་ཁྲོད་ཀྱི་དྲན་པ་ཞེས་པའི་གླུ་གཞས་གསུམ་ལུང་འདྲེན་བྱས་པ་དང་སྦྲགས། དབང་ཆ་སྤྲད་པ་གཏན་འཁེལ་དང་གསལ་བསྒྲགས་ཡི་གེའི་ནང་གོང་གསལ་གྱི་རོལ་དབྱངས་བརྩམས་ཆོས་གསུམ་རང་ཉིད་ནས་འཇམ་དབྱངས་སྒྲོལ་མར་འཁྲབ་སྟོན་བྱ་རྒྱུའི་དབང་ཆ་སྤྲོད་མྱོང་མེད་ཅེས་འཁོད་ཡོད་འདུག

ཨེ་ཕོག་དུས་བབ་ཀྱིས་གནས་ཚུལ་སྤེལ་བ་ལྟར་ན། ཕྱི་ལོ་ ༢༠༠༨ ལོར་འཇམ་དབྱངས་སྒྲོལ་མ་ལགས་ཀྱིས། རྒྱ་ནག་གི་རྒྱལ་ས་པེ་ཅིན་དུ་རྒྱལ་ཡོངས་གླུ་གཞས་འགྲན་སྡུར་ཞིག་གི་སྟེང་ནུབ་མཚོའི་མཛའ་གཞས་ཞེས་པའི་གཞས་དེ་བཏང་ནས་འགྲན་སྡུར་ཁྲོད་ཨང་དང་པོ་ལོན་པ་མ་ཟད། གླུ་གཞས་སྒྱུ་རྩལ་གྱི་གར་སྟེགས་ཁྲོད་ཁོང་མོའི་མཚན་སྙན་རྒྱ་ནག་རྒྱལ་ཡོངས་སུ་སྐད་གྲགས་ཆགས་བཞིན་པའི་སྐབས་སུ། ཏའོ་ལང་གིས་གླུ་གཞས་དེ་རང་ཉིད་ཀྱི་ཡིན་པ་དང་། ཁྲིམས་གཏུག་བྱས་ཏེ་གླུ་གཞས་ཀྱི་བདག་དབང་རྩོད་རྙོག་དང་འབྲེལ་ནས་རྒྱ་སྒོར་ཁྲི་ ༢༥ ཡི་གུན་ཚབ་སྤྲོད་པའི་དགོས་འདུན་བཏོན་ཡོད་པ་དང་། འཇམ་དབྱངས་སྒྲོལ་མ་ལགས་དང་ཏའོ་ལང་གཉིས་བར་ཁྱོན་ཁྲིམས་གཏུག་རིམ་པ་ ༤༢ བྱས་ཤིང་། བརྒྱུད་རིམ་དེའི་ཁྲོད་འཇམ་དབྱངས་སྒྲོལ་མ་ལགས་ཀྱིས་རང་ཉིད་གླུ་གཞས་སྒྱུ་རྩལ་གྱི་གར་སྟེགས་ལས་ཕྱིར་ཐོན་ཏེ་སྤྲོ་སེམས་འཁོར་བའི་ཁྱིམ་ཚང་སྐྱོང་འདོད་ཡོད་པའི་གསལ་བསྒྲགས་སྤེལ་མྱོང་འདུག་ལ། འདི་ལོར་སླར་ཡང་ཁོ་མོར་གླུ་གཞས་དེའི་བདག་དབང་དང་འབྲེལ་ནས་རྒྱ་སྒོར་ ༧༥༠༠༠ ཉེས་ཆད་བཏང་ཡོད་སྐོར་སོགས་བརྗོད་འདུག

སྤྱིར་ནུབ་མཚོའི་མཛའ་གཞས་དང་ལག་མཐིལ་དུ་འཁྱིལ་བའི་དྲོད་ཁོལ། ཆར་ཟིམ་ཁྲོད་ཀྱི་དྲན་པ་ཞེས་པའི་གླུ་གཞས་གསུམ་དེ་རྒྱ་ནག་གི་གཞས་པ་གྲགས་ཅན་ཏའོ་ལང་གི་གཞས་ཡིན་པ་དང་། ཏའོ་ལང་གིས་རོལ་དབྱངས་དེ་དག་གི་བདག་དབང་པེ་ཅིང་གི་རོལ་དབྱངས་རིག་གནས་འཕེལ་རྒྱས་ཚོང་གཉེར་ཁང་ཞིག་ལ་སྤྲད་ཡོད་ཅིང་། བདག་དབང་སྤྲོད་པའི་དུས་བཀག་ནང་རོལ་དབྱངས་བརྩམས་ཆོས་དག་ཚོང་གཉེར་ཁང་དེ་ཉིད་གཅིག་པུར་ལོངས་སུ་སྤྱོད་དབང་ཡོད་པའམ་ཡང་ན་བདག་དབང་སྤྲོད་གཞན་ལ་སྤྲོད་མིན་ལ་དོ་དམ་བྱེད་དབང་ཡོད་པ་མ་ཟད། ཚོང་གཉེར་ཁང་དེས་རང་ཉིད་ཀྱི་མིང་ཐོག་ནས་ཁྲིམས་ལྟར་ཁེ་དབང་སྲུང་སྐྱོང་བྱེད་དབང་ཡང་ཡོད་སྐོར་སོགས་གསལ་ཡོད་འདུག

བོད་དུ་མིང་གྲགས་ཆེ་བའི་གླུ་མ་འཇམ་དབྱངས་སྒྲོལ་མ་ནི་ཕྱི་ལོ་ ༡༩༨༤  ལོར་ཁམས་སྡེ་དགེ་པར་ཁང་ཆོས་མཛོད་ཆེན་མོའི་ཉེ་འདབས་ཀྱི་ཞིང་པར་ཁྱིམ་ཚང་དཀྱུས་མ་ཞིག་ཏུ་སྐྱེས། ཆུང་དུས་ནས་དམངས་ཁྲོད་ཀྱི་གླུ་གཞས་ལ་ཐུན་མིན་གྱི་དུངས་ཞེན་ལྡན་པ་མ་ཟད་མགྲིན་པའི་སྐད་ངག་ནས་གླུ་སྙན་མོ་ངག་ལ་གྱེར་རྒྱུའི་ལྷན་སྐྱེས་ཀྱི་མགྲིན་ངག་ཡོད་ཅིང་། ཕ་མའི་བཀའ་དྲིན་གྱིས་ཆུང་དུས་ནས་སློབ་གྲྭ་རིག་པའི་སྒོ་མོར་ཞུགས་ཏེ་རྒྱ་ཡིག་དང་བོད་ཡིག གྲངས་རིག་སོགས་ལ་སྦྱོང་བ་བྱེད་རྒྱུའི་གོ་སྐབས་ཐོབ། རང་ལོ་ཉི་ཤུ་ཙམ་ནས་གླུ་གཞས་སྒྱུ་རྩལ་གྱི་གར་སྟེགས་སྟེང་བུད་དེ། གདོང་ལེན་དང་དཀའ་ཚེགས་ལ་མ་འཛེམས་པར་གླུ་གཞས་སྒྱུ་རྩལ་གྱི་འགྲན་སྡུར་མང་པོར་ཞུགས་ཤིང་། ཕྱི་ལོ་ ༢༠༠༥ ལོར་ཁོ་མོ་མཛེས་སྡུག་ལྡན་པའི་ཁམས་པ་ཞེས་པའི་བྲོ་གར་འཁྲབ་སྟོན་དུ་ཞུགས་ནས་བྲོ་གར་འཁྲབ་སྟོན་དེ་ལ་སི་ཁྲོན་ཞིང་ཆེན་གྱི་སྐབས་ལྔ་བའི་གྲངས་ཉུང་མི་རིགས་སྒྱུ་རྩལ་དུས་ཆེན་གྱི་གླུ་དབྱངས་འཁྲབ་སྟོན་ཁྲོད་དུ་བྱ་དགའ་ཨང་དང་པོ་ཐོབ།  ཕྱི་ལོ་ ༢༠༠༦ ལོར་སྐབས་གསུམ་པའི་རྒྱལ་ཡོངས་གྲངས་ཉུང་མི་རིགས་ལྷན་འཛོམས་འཁྲབ་སྟོན་དུ་ཞུགས་ཏེ་ཁེར་གླུ་ཞིག་དབྱངས་ལ་གྱེར་པས་སྐབས་དེའི་འཁྲབ་སྟོན་ཁྲོད་དུ་གསེར་གྱི་རྟགས་མའི་བྱ་དགའ་བླངས། ཁོ་མོས་ད་སྔ་བར་རི་འདི། ཆུ་འདི།  ཤར་ཕྱོགས་མོ་བཟའ་རྒྱལ་མོ། ཞེས་པ་སོགས་ཀྱི་ཆེད་སྒྲིག་འོད་སྡེར་དང་།  བཀྲ་ཤིས་པའི་མཆོད་མེ་དང་ཕ་མ་རིགས་བཟང་བུ་སྲིང་། གསེར་མདོག་གི་འབོད་སྒྲ་དང་ཨ་མ་དྲན་གླུ གངས་ལྗོངས་ཀྱི་གླིང་གེ་སར་རྒྱལ་པོ་སོགས་གྲགས་ཆེ་བའི་རོལ་དབྱངས་བརྩམས་ཆོས་མི་ཉུང་བ་ཞིག་སྤེལ་མྱོང་བ་རེད།

གསར་འགོད་པ། སྐལ་བཟང་སྦྱིན་པ།