རྒྱ་ནག་གཞུང་གིས་ནང་སོག་རང་སྐྱོང་ལྗོངས་མཐོ་རིམ་མི་དམངས་ཁྲིམས་ཁང་ཟེར་བའི་དམར་ཤོག་མགོ་འཁྲིད་ཟུར་པ་ཧུའུ་དབྱི་ཧྥེང་ཟེར་བ་ཞིག་གིས་རྒྱ་སྒོར་ཁྲི་ ༥༡༨༡ གི་ལྐོག་རྔན་བླངས་ཡོད་པའི་ནག་ཉེས་འོག་ལོ་ ༡༤ ཡི་ཁྲིམས་ཐག་བཅད་ཡོད་འདུག
ཞི་ཅིན་ཕིན་གཞུང་གིས་སྟག་དང་སྦྲང་མ་ལེབ་རྡུང་གི་སྲིད་ཇུས་ཟེར་བའི་མིང་འོག་ནས་རྒྱ་ནག་དང་། རྒྱའི་བཙན་བཟུང་འོག་ཡོད་པའི་བོད་དང་ལྷོ་སོག ཡུ་གུར་སོགས་ཀྱི་དཔོན་རིགས་མང་པོ་ཞིག་ལ་ལྐོག་ཟ་རུལ་སུངས་དང་ལྐོག་རྔན་བླངས་བ། དམར་ཤོག་གཞུང་ལ་བློ་སེམས་མི་དཀར་བ་སོགས་ཀྱི་ནག་ཉེས་འོག་ཁྲིམས་ཆད་ཕོག་གི་ཡོད་པ་ལྟར། ཉེ་ཆར་ཧྲན་ཞི་ཞིང་ཆེན་གྱི་ཞིན་ཀྲོའུ་གྲོང་ཁྱེར་གྱི་འབྲིང་རིམ་མི་མང་ཁྲིམས་ཁང་ཟེར་བས། ནང་སོག་རང་སྐྱོང་ལྗོངས་མཐོ་རིམ་མི་དམངས་ཁྲིམས་ཁང་ཟེར་བའི་དམར་ཤོག་དྲུང་ཆེ་དང་འགན་འཛིན་ཟུར་པ་ཧུའུ་དབྱི་ཧྥེང་ཟེར་བས། ལྐོག་རྔན་རྒྱ་སྒོར་ཁྲི་ ༥༡༨༡ བླངས་པའི་ནག་ཉེས་བཙུགས་ཏེ་མི་ལོ་ ༡༤ ལ་བཙོན་འཇུག་ཁྲིམས་ཐག་དང་། རྒྱ་སྒོར་ས་ཡ་གསུམ་དང་འབུམ་གཉིས་ཀྱི་ཉེས་ཆད་བཅད་ཡོད་འདུག
དེའི་སྐོར་ལ་རྒྱ་ནག་ཧྲན་ཞི་ཞིང་ཆེན་ཞིན་ཀྲོའུ་གྲོང་ཁྱེར་འབྲིང་རིམ་མི་དམངས་ཁྲིམས་ཁང་གིས། ཧུའུ་དབྱི་ཧྥེང་གིས་ཕྱི་ལོ་ ༡༩༩༧ ནས་ཕྱི་ལོ་ ༢༠༡༨ལོའི་བར་དུ་ནང་སོག་རང་སྐྱོང་ལྗོངས་ཀྱི་དམར་ཤོག་སྲིད་ཁྲིམས་ཀྱི་དྲུང་ཡིག་གཞོན་པ་དང་། ནང་སོག་རང་སྐྱོང་ལྗོངས་མི་དམངས་འཐུས་ཚོགས་རྒྱུན་ལས་ཀྱི་དྲུང་ཆེ། ནང་སོག་རང་སྐྱོང་ལྗོངས་མཐོ་རིམ་མི་དམངས་ཁྲིམས་ཁང་གི་དམར་ཤོག་ཚོགས་པའི་དྲུང་ཡིག སོགས་གཞུང་འབྲེལ་གྱི་གོ་གནས་བེད་སྤྱོད་ལོག་པར་བཏང་སྟེ། ལས་གནས་དང་། མི་སྒེར་གྱི་ཁེ་ལས། ལས་གྲྭ་འགན་ལེན། གོ་གནས་སྤར་བ། གྱོད་གཞི་མཐུན་སྦྱོར་སོགས་བྱས་ཡོད་སྐོར་དང་། ཕྱི་ལོ་ ༢༠༡༩ ལོར་རྒན་ཡོལ་ཞུས་རྗེས་ཀྱང་སྔོན་མའི་གོ་གནས་བེད་སྤྱོད་བྱས་ཏེ་ལྐོག་དངུལ་རྒྱ་སྒོར་ཁྲི་ ༢༠༠ བླངས་ཡོད་པ་སོགས་ཀྱི་ནག་ཉེས་བཙུགས་འདུག
ཧུའུ་དབྱི་ཧྥེང་ནི་ཕྱི་ལོ་ ༡༩༥༤ ལོར་ལྷོ་སོག་ཏུ་སྐྱེས་ཡོད་ཅིང་། ཕྱི་ལོ་ ༡༩༧༦ ལོར་རྒྱ་ནག་དམར་ཤོག་ཚོགས་པའི་ནང་དུ་ཞུགས་འདུག ཕྱི་ལོ་ ༡༩༨༢ ལོར་ནང་སོག་མཐོ་སློབ་ཀྱི་དཔལ་འབྱོར་རིག་པའི་ཚན་ཁག་ནས་སློབ་མཐར་ཕྱིན། ཕྱི་ལོ་ ༡༩༩༦ ལོར་རྒྱ་ནག་དབུས་དམར་ཤོག་མཐོ་སློབ་ནས་མགོ་ཁྲིད་ཚན་པའི་དཔལ་འབྱོར་དོ་དམ་གྱི་ཆེད་སྦྱོང་བྱས། ཕྱི་ལོ་ ༢༠༠༣ ལོར་ནང་སོག་རང་སྐྱོང་ལྗོངས་དམར་ཤོག་རྒྱུན་ལས་ཀྱི་དྲུང་ཡིག་གཞོན་པ་དང་། ཕྱི་ལོ་ ༢༠༠༨ ལོར་ནང་སོག་རང་སྐྱོང་ལྗོངས་ཀྱི་མི་མང་འཐུས་ཚོགས་ཀྱི་དྲུང་ཡིག ཕྱི་ལོ་ ༢༠༡༡ ནང་སོག་རང་སྐྱོང་ལྗོངས་མི་དམངས་མཐོ་རིམ་ཁྲིམས་ཁང་གི་འགན་འཛིན། ཕྱི་ལོ་ ༢༠༡༣ ལོར་རྒྱ་ནག་མི་དམངས་ཚོགས་ཆེན་གྱི་འཐུས་མི་སོགས་བྱས་ཡོད་འདུག ཕྱི་ལོ་༢༠༢༢ ཟླ་ ༤ ཚེས་ ༢༢ ཉིན་རྒྱ་ནག་དབུས་ཁྲིམས་ཞིབ་ཁང་གིས་ཁྲིམས་བཤེར་མགོ་བཙུགས་ཏེ། རྒྱ་ནག་དམར་ཤོག་ཚོགས་པའི་ཚོགས་མི་ནས་ཕྱིར་ཕུད་བཏང་སྟེ་བཀག་ཉར་འོག་བཞག་ཡོད་འདུག
དེ་བཞིན་བོད་རང་སྐྱོང་ལྗོངས་ཟེར་བའི་སྲིད་གྲོས་ཀྱི་མགོ་ཁྲིད་གཞོན་པ་ཟུར་བ་ཅང་ཅེ་ཟེར་བ་དང་། ཀན་སུའུ་ཞིང་ཆེན་ཅིང་ཡོན་རྡོ་སོལ་ལས་རིགས་ལྷན་ཚོགས་ཀྱི་མགོ་འཛིན་ཟུར་པ་དབྱང་ཞན་ཁྲུན་གཉིས་ཀྱིས་ལྐོག་རྔན་བླངས་པའི་དོགས་གཞིའི་འོག རྒྱ་ནག་ལྟ་ཞིབ་ལྷན་ཁང་གིས་ཞིབ་འཇུག་བྱས་ཡོད་པ་མ་ཟད། ཆེས་མཐོའི་མི་དམངས་ཞིབ་དཔྱོད་ཁང་གིས་ལྐོག་རྔན་བླངས་པའི་ནག་ཉེས་བཙུགས་ཏེ་འཛིན་བཟུང་བྱ་རྒྱུ་ཐག་གཅོད་བྱས་ཡོད་འདུག
ཅང་ཅེ་ནི་ཕྱི་ལོ་ ༡༩༦༥ ལོར་ཧྲན་ཏུང་ཅོ་ཀྲུའུ་རུ་སྐྱེས་ཡོད་པ་དང་། ཧྲན་ཏུང་མཐོ་སློབ་ནས་སློབ་མཐར་ཕྱིན་འདུག ཕྱི་ལོ་ ༡༩༨༥ ལོར་རྒྱ་ནག་དམར་ཤོག་ཚོགས་པའི་ནང་དུ་ཞུགས་འདུག ཧྲན་ཏུང་ཆིན་ཏོ་གྲོང་ཁྱེར་གྱི་ཉིན་རེའི་ཚགས་པར་གྱི་གསར་འགོད་པ་དང་། དེའི་གའི་གྲོང་ཁྱེར་གཞུང་དོན་ཁང་གི་དྲུང་ཡིག་སོགས་བྱས། ཕྱི་ལོ་ ༢༠༡༣ ལོ་ནས་བཟུང་བོད་རང་ལྗོངས་ཟེར་བའི་སྲིད་གྲོས་མགོ་ཁྲིད་གཞོན་པ་དང་། དམར་ཤོག་ཚོགས་པའི་རྒྱུན་ལས། དྲིལ་བསྒྲགས་ཚན་པའི་འགན་འཛིན་སོགས་བྱས་ཡོད་འདུག ཕྱི་ལོ་ ༢༠༢༣ ལོའི་ཟླ་ ༧ པར་ཞིབ་བཤེར་བཀག་ཉར་འོག་བཞག་འདུག
གསར་འགོད་པ། བྱམས་པ་ཚེ་རིང་།
རྩོམ་སྒྲིག་པ། པདྨ་མཚོ།
