རྒྱ་ནག་རྒྱལ་ཡོངས་རྐང་སྤོལ་མཐུན་ཚོཊ་ཀྱི་འགན་འཛིན་ཟུར་པ་ཁྲིན་ཞེ་ཡན་ལ་ཞིབ་བཤེར་བྱེད་ཀྱི་འདུག

ཉེ་སྔོན་ཕྱི་ཟླ ༡༢ ཚེས་ ༢༩ ཉིན།  ཧུའུ་པེ་ཞིང་ཆེན་ཧོང་ཧྲི་གྲོང་ཁྱེར་འབྲིང་རིམ་མི་དམངས་ཁྲིམས་ཁང་ཟེར་བས་རྒྱ་ནག་རྒྱལ་ཡོངས་རྐང་རྩེད་སྤོ་ལོའི་མཐུན་ཚོགས་ཀྱི་འགན་འཛིན་ཟུར་པ་ཁྲིན་ཞེ་ཡན་གྱིས་ལྐོག་རྔན་རྒྱ་སྒོར་ཁྲི་ ༨༡༠༣ བླངས་པའི་ཉེས་མིང་འོག་ཞིབ་བཤེར་བྱེད་མགོ་བཙུགས་འདུག

ཧོང་ཧྲི་གྲོང་ཁྱེར་མི་དམངས་ཞིབ་དཔྱོད་ཁང་གིས། ཕྱི་ལོ་ ༢༠༡༠ ནས་ ༢༠༢༣ བར་ཁྲིན་ཞེ་ཡན་གྱིས་ཧྲང་ཧའེ་རྒྱལ་སྤྱིའི་གྲུ་དོན་མ་རྐང་ཚད་ཡོད་ཚོང་གཉེར་ཁང་གི་སྤྱི་འདོམས་པ་དང་འགན་འཛིན། ཀྲུང་གོ་རྐང་རྩེད་སྤོ་ལོའི་མཐུན་ཚོགས་ཀྱི་སྐབས་བརྗེའི་གྲ་སྒྲིག་ཚོགས་ཆུང་གི་འགན་འཛིན། ཀྲུང་གོ་རྐང་རྩེད་སྤོ་ལོའི་མཐུན་ཚོགས་ཟེར་བའི་འགན་འཛིན་སོགས་བྱས་ཡོད་ཅིང་། སྐབས་དེར་ཁོས་གོ་གནས་སྤྱད་ནས་ཚོགས་པ་དང་མི་སྒེར་ལ་མ་འཇོག་གཉེར་རོགས་དང་། མི་གཞན་གྱི་ས་ནས་ཁྲིམས་འགལ་ངང་རྒྱ་སྒོར་ཁྲི་༨༡༠༣ ལྷག་གི་ལྐོག་རྔན་བླངས་ཡོད་པའི་དོགས་གཞིའི་འོག་ནས་ཞིབ་བཤེར་བྱེད་ཀྱི་ཡོད་ལུགས་བསྒྲགས་འདུག་ལ། ཁྲིན་གྱིས་ལྐོག་རྔན་བླངས་པའི་ནག་ཉེས་ངོས་ལེན་བྱས་ཡོད་ལུགས་བསྒྲགས་འདུག

ཟླ་འདིའི་ཕྱི་ཚེས་ ༢༦ ཉིན་པེ་ཅིང་གྲོང་ཁྱེར་འབྲིང་རིམ་མི་དམངས་ཁྲིམས་ཁང་གསུམ་པས་རྒྱལ་ཁབ་གསར་སྤེལ་དངུལ་ཁང་ཟེར་བའི་མགོ་འཛིན་གཞོན་པ་ཟུར་པ་ཧོ་ཤིང་ཞང་གིས་ལྐོག་རྔན་བླངས་པ་དང་། སྒྲིག་སྲོལ་ལས་འགལ་ཏེ་དངུལ་རྩའི་འཛིན་ཡིག་སྤྲད་པ། ཁྲིམས་འགལ་གྱིས་དངུལ་བུན་བཏང་བ། མངའ་ཁོངས་ཕྱིའི་བཅོལ་དངུལ་སྦས་སྐུང་བྱས་པའི་ནག་ཉེས་འོག་ལོ་ཉི་ཤུའི་བཙོན་འཇུག་ཁྲིམས་ཐག་བཅད། དེ་བཞིན་ཕྱི་ཟླ་དང་པོའི་ཚེས་ ༡༠ ཉིན་ཧྲན་ཞི་ཞིང་ཆེན་གྱི་ཞི་ཨན་གྲོང་ཁྱེར་གྱི་འབྲིང་རིམ་མི་མང་ཁྲིམས་ཁང་ཟེར་བས། བོད་རང་སྐྱོང་ལྗོངས་མི་དམངས་སྲིད་གཞུང་ཟེར་བའི་འགན་འཛིན་གཞོན་པ་ཟུར་པ་ཀྲང་ཡུང་ཙེ་ཟེར་བས། ལྐོག་རྔན་རྒྱ་སྒོར་ཁྲི་ ༥༡༨༡ བླངས་པའི་ནག་ཉེས་བཙུགས་ཏེ་མི་ལོ་ ༡༤ ལ་བཙོན་འཇུག་ཁྲིམས་ཐག་དང་།  རྒྱ་སྒོར་ས་ཡ་ལྔས་ཆད་པ་བཅད་ཡོད་འདུག

རྒྱ་ནག་གཞུང་གིས་ཕྱི་ལོ་ ༢༠༢༣ ལོ་གཅིག་པུར་གཏན་འབེབས་དོན་ཚན་བརྒྱད་ཟེར་བ་དང་འགལ་བའི་ཉེས་མིང་འོག མི་གྲངས་ ༡༥༣༦༦༢ ལ་ཞིབ་བཤེར་བྱས་ཡོད་པའི་ཁྲོད། མི་གྲངས་ ༡༠༨༦༩༥ ལ་ཉེས་ཆད་བཅད་ཡོད་འདུག་ལ། འདས་པའི་ལོ་ཤས་རིང་རྒྱ་ནག་གཞུང་གིས་ཉེས་མེད་དཔོན་རིགས་རྣམས་ལ་ནག་ཉེས་སྣ་ཚོགས་གཡོགས་ཀྱིན་ཡོད་པ་མ་ཟད། སྟག་རྒན་ཞེས་པའི་མིང་ཐོག་ནས་ཞི་ཅིན་ཕིན་གྱི་བསམ་བློ་དང་མི་མཐུན་པ་རྣམས་འབུར་འཇོམས་བཏང་དང་གཏོང་གིན་ཡོད་པ་རེད།

སྤྱིར་འདས་ལོའི་ཕྱི་ཟླ་ ༦ ནང་མཐོང་ཐོས་མེད་པར་གྱུར་བའི་ཕྱི་སྲིད་བློན་ཆེན་ཆིན་ཀང་དང་། ཕྱི་ཟླ་ ༨ པའི་ནང་གར་སོང་ཆ་མེད་དུ་གྱུར་བའི་རྒྱལ་སྲུང་བློན་ཆེན་ལི་ཧྲང་ཧྥོའུ་གཉིས་གློ་བུར་དུ་བློན་ཆེན་གྱི་ལས་གནས་ནས་གནས་དབྱུང་བཏང་བ། འདས་ལོའི་ཕྱི་ཟླ་ ༨ ཚེས་ ༡ ཉིན་མེ་ཤུགས་འཕུར་མདའི་དམག་སྤྱི་ལི་ (Li Yuchao) དང་དམག་སྤྱི་གཞོན་པ་ཀྲང་ཀྲན་ཀྲོང་(Zhang Zhenzhong)། དེ་བཞིན་འབྲེལ་ཡོད་ལིའུ་(Liu Guangbin)བཅས་ལ་དབུས་སྒྲིག་ཁྲིམས་ཞིབ་བཤེར་ཁང་གིས་ལྐོག་ཟ་རུལ་སུངས་ཀྱི་དོགས་གཞིའི་འོག་འདྲི་གཅོད་བྱེད་བཞིན་ཡོད་སྐོར་བསྒྲགས་ཡོད་ཅིང་། གནད་དོན་དབྱེ་ཞིབ་པ་མང་པོ་ཞིག་གིས། དེ་ནི་ནང་ཁུལ་གྱི་ཆབ་སྲིད་འཁྲུག་རྩོད་དང་དམིགས་བསལ་དམག་དོན་ཐད་ཀྱི་དཀའ་རྙོག་མངོན་གསལ་ཆེ་ཤོས་ཤིག་ཏུ་འགྱུར་མུས་ཡིན་པ་ངོས་འཛིན་བྱེད་ཀྱི་ཡོད་འདུག

གསར་འགོད་པ། དཔལ་ལྡན།

རྩོམ་སྒྲིག་པ། པདྨ་མཚོ།