ཁ་སང་ཕྱི་ཚེས་ ༡ ཉིན་གྲྭ་རིན་ཆེན་ཚུལ་ཁྲིམས་ལགས་ཀློད་གྲོལ་བཏང་སྟེ་རང་ཁྱིམ་དུ་འབྱོར་ཡོད་ཀྱང་ད་ལྟ་ད་དུང་ལྟ་རྟོག་འོག་བཞག་ཡོད་འདུག
ཁ་སང་སྟེ་ཕྱི་ཟླ་ ༢ ཚེས་ ༡ ཉིན་དེ་སྔོན་ཕྱི་ལོ་ ༢༠༡༩ ལོར་རྒྱལ་ཁབ་ཁ་བྲལ་དང་སྤྱི་ཚོགས་ཟིང་འཁྲུག་བསླངས་པའི་ཉེས་མིང་འོག་ལོ་ངོ་བཞི་དང་ཕྱེད་ཀའི་བཙོན་མཇུག་ཁྲིམས་ཐག་བཅད་པའི་རྔ་བ་སྣང་ཞིག་དགོན་པའི་དགེ་འདུན་པ་རིན་ཆེན་ཚུལ་ཁྲིམས་ལགས་རྒྱ་ནག་ཁྲིན་ཏུའུ་མེན་ཡང་བཙོན་ཁང་ནས་བཙོན་མཇུག་དུས་ཡུན་ཚང་ནས་ཀློད་གྲོལ་བཏང་ཡོད་པ་རེད།
དེ་འབྲེལ་འདི་གའི་གསར་འགོད་པར་མིང་བརྗོད་འདོད་མེད་པའི་བོད་མི་ཞིག་གིས། ཁ་སང་ཕྱི་ཚེས་ ༡ ཉིན་གྱི་བོད་ནང་གི་ཆུ་ཚོད་ ༥ ཙམ་གྱི་སྟེང་གྲྭ་རིན་ཆེན་ཚུལ་ཁྲིམས་ལགས། ཀློད་གྲོལ་ཐོབ་སྟེ་ཁཱ་ཤུལ་སྡེ་བའི་རང་ཁྱིམ་དུ་འབྱོར་ཡོད་ཀྱང་། འཕྲོད་བསྟེན་གྱི་གནས་བབ་དང་ཞིབ་ཕྲའི་གནས་སྟངས་ཀྱི་སྐོར་བཤད་པར་ཞེ་སྣང་ཡོད་པ་དང་། ད་ལྟ་ཁོང་རང་ཁྱིམ་དུ་ལྟ་རྟོག་འོག་བཞག་ཡོད་སྐོར་སོགས་བརྗོད་བྱུང་།
གྲྭ་ཚུལ་ཁྲིམས་ལགས་འཛིན་བཟུང་བྱས་པའི་གནས་ཚུལ་དང་འབྲེལ་ནས་དེ་སྔ་མིང་བརྗོད་འདོད་མེད་པའི་དྷ་སར་གནས་སྡོད་འབྲེལ་ཡོད་ཅིག་གིས་འདི་གའི་གསར་འགོད་པར་འགྲེལ་བརྗོད་གནང་བ་ལྟར་ན། ཕྱི་ལོ་ ༢༠༡༨ ལོར་རྒྱ་ནག་གཞུང་གི་ཉེན་རྟོག་པས་གྲྭ་རིན་ཆེན་ཚུལ་ཁྲིམས་ལགས་ཀྱི་སྐད་འཕྲིན་ནང་སྔོག་བཤེར་བྱས་པ་བརྒྱུད། ཁོང་གིས་ཕྱི་ལོགས་ཀྱི་བོད་མི་ཁག་ཅིག་དང་མཉམ་དུ་བོད་དོན་གླེང་སློང་བྱས་ཡོད་སྐོར་ཉེས་འཛུགས་བྱས་ཏེ། ཁོང་དང་ཁོང་གི་ནུ་བོ་ནོར་བུ་ཚེ་རིང་ཐེངས་གཉིས་ལ་འཛིན་བཟུང་བྱས་ཡོད་པ་དང་། སྐབས་དེར་རིན་ཆེན་ཚུལ་ཁྲིམས་ལགས་ཀྱི་སྐད་འཕྲིན་ཡང་བཀོལ་སྤྱོད་མི་ཆོག་པ་བཟོས་ཡོད་འདུག དེ་བཞིན་རྒྱ་ནག་གཞུང་གིས་གྲྭ་རིན་ཆེན་ཚུལ་ཁྲིམས་ལགས་ཀྱིས་ཕྱི་ལོ་ ༢༠༡༩ ལོའི་༧ཀུན་གཟིགས་པཎ་ཆེན་སྐུ་ཕྲེང་བཅུ་གཅིག་པ་མཆོག་གི་སྐུའི་འཁྲུངས་སྐར་ཉིན། ཕྱི་རྒྱལ་ན་ཡོད་པའི་བོད་མི་ཞིག་དང་མཉམ་དུ་དུས་ཚོད་གཉིས་ལྷག་ལ་ཁ་པར་བརྒྱུད་ཁ་བརྡ་བྱས་ཡོད་ལུགས་ཀྱི་བརྒྱུད་རིམ་ཆ་ཚང་སྒྲ་འཇུག་བྱས་ཡོད་འདུག
གཞན་ཡང་། རྒྱ་ནག་གཞུང་གིས་གྲྭ་རིན་ཆེན་ཚུལ་ཁྲིམས་ལགས་ཀྱིས་སྦྲག་ཁང་བརྒྱུད་ཕྱི་ལོགས་ནས་འབྱོར་བའི་དཔེ་ཆ་གནད་འགག་ཅན་མང་པོ་ཞིག་བོད་ནང་གི་ས་ཆ་གང་མང་ལ་འགྲེམས་སྤེལ་བྱས་ཡོད་ལུགས་དང་། སྒེར་གྱིས་གཙོ་གཉེར་བྱས་པའི་ཆད་ལྟ་བ་ཞེས་པའི་རྩོམ་རིག་དྲ་ཚིགས་ནང་བོད་སྐད་ཡིག་གི་བདག་དབང་དང་བོད་དོན་དང་འབྲེལ་བའི་རྩོམ་ཡིག་མང་པོ་ཞིག་སྤེལ་ཡོད་པའི་ཉེས་འཛུགས་བྱས་ཏེ་དྲ་ཚིགས་དེ་གཏན་དུ་སྒོ་བརྒྱབ་ཡོད་པ་དང་། དེ་བཞིན་རྒྱ་གར་དུ་ཡོད་པའི་གཅེན་མོ་ཀུན་བཟང་སྒྲོལ་མ་ཤེས་ཡོན་དང་འབྲེལ་བའི་ཚོགས་འདུ་ཁག་ལ་ཞུགས་པའི་འདྲ་པར་ཁག་ཁོང་གི་སྐད་འཕྲིན་རྒྱབ་ལྗོངས་སུ་བཞག་པ་དག་ཀྱང་ཆབ་སྲིད་ལ་འབྲེལ་བ་ཡོད་པའི་ནག་ཉེས་གཡོགས་ཡོད་འདུག
གྲྭ་རིན་ཆེན་ཚུལ་ཁྲིམས་ལགས་ནི་ཁཱ་ཤུལ་སྡེ་བའི་གཉེར་བ་ཚང་ཞེས་པའི་ཞིང་པའི་ཁྱིམ་ཚང་དཀྱུས་མ་ཞིག་ཏུ་སྐྱེས་ཤིང་། ད་ལྟ་རང་ལོ་ ༣༢ ཡིན་པ་དང་ཁོང་དགུང་ལོ་དྲུག་ཙམ་ནས་རྔ་ཡུལ་གྱི་བོན་དགོན་ཆེ་ཤོས་སྣང་ཞིག་དགོན་པར་ཆོས་ཞུགས་བྱས་ཏེ་སྔགས་ཀྱི་འཛིན་གྲྭར་ཐོན་ཡོད་འདུག ཁོང་གི་ཕ་མིང་ལ་བཀྲ་ཤིས་དོན་གྲུབ་དང་ལོ་ ༦༨ ཡིན་ཞིང་། མ་མིང་ལ་མཚོ་མོ་ཟེར་ཞིང་ལོ ༥༧ ཡིན་འདུག ཁོང་ལ་ཀུན་བཟང་སྒྲོལ་མ་ཚུད་པའི་ཕ་མ་གཅིག་གི་སྤུན་མཆེད་ ༥ ཡོད་འདུག
གསར་འགོད་པ། སྐལ་བཟང་སྦྱིན་པ།
