བོད་མིའི་སྒྲིག་འཛུགས་ཀྱི་ཁྱིམ་ཐོ་གྲངས་བཤེར་ཆེད་ཕྱི་ཟླ་གཉིས་པ་ནས་བཟུང་རྒྱ་གར་ལྷོ་ཕྱོགས་དང་། སུ་ལུ་གྷུ་རི། པོན་ཌར། དྷ་རམ་ས་ལ། ལ་དྭགས་བཅས་སུ་ཟབ་སྦྱོང་ཐེངས་བདུན་འཚོག་རྒྱུ་ཡིན་འདུག
དེ་རིང་སྔ་དྲོའི་ཆུ་ཚོད་ ༡༠།༠༠ ཐོག་བོད་མིའི་སྒྲིག་འཛུགས་ཕྱི་དྲིལ་ལྷག་པ་ཚེ་རིང་དྲན་རྟེན་ཚོགས་ཁང་དུ། བོད་མིའི་སྒྲིག་འཛུགས་ནང་སྲིད་དྲུང་ཆེ་དཔལ་ལྡན་དོན་གྲུབ་ལགས་དང་། ཆོས་རིག་དྲུང་ཆེ་འཆི་མེད་ཚེ་དབྱངས་ལགས། འཕྲོད་བསྟེན་དྲུང་འཕར་ཚེ་རིང་གཡུ་སྒྲོན་ལགས། ཤེས་རིག་དྲུང་འཕར་བསོད་ནམས་བཟང་པོ་ལགས་བཅས་ལྷན་འཛོམས་ཐོག ཕྱི་ལོ་ ༢༠༢༤ ལོའི་བོད་མིའི་སྒྲིག་འཛུགས་ཀྱི་ཁྱིམ་ཐོ་གྲངས་བཤེར་གྱི་ལས་གཞི་དང་འབྲེལ་བའི་གསར་འགོད་གསལ་བསྒྲགས་སྤེལ་ཡོད་ཅིང་། འདི་ལོའི་ཕྱི་ཟླ་གཉིས་པ་ནས་རྒྱ་གར་ལྷོ་ཕྱོགས་དང་། སུ་ལུ་གྷུ་རི། པོན་ཌར། དྷ་རམ་ས་ལ། ལ་དྭགས་བཅས་སུ་ཟབ་སྦྱོང་ཐེངས་བདུན་འཚོག་འཆར་ཡོད་འདུག
གསར་འགོད་པ་ཁག་ཅིག་གིས། ཁྱིམ་ཐོ་གྲངས་བཤེར་གྱི་ཁེ་ཕན་སོགས་ཀྱི་སྐོར་ལ་བཅར་འདྲི་བྱས་པར་ནང་སྲིད་དྲུང་ཆེ་དཔལ་ལྡན་དོན་གྲུབ་ལགས་ཀྱིས། ཕྱི་ལོ་ ༡༩༦༠ ནས་བཟུང་བོད་མིའི་སྒྲིག་འཛུགས་ཀྱི་སྤྱི་ཚོགས་ཞབས་ཞུའི་ལས་ཁུངས་བཞི་ནས་ལས་ཀ་མང་པོ་ཞིག་བྱས་པ་རེད། ཡིན་ནའང་། འདས་པའི་ལོ་འདི་དག་ནང་དུ་ལས་ཀ་བྱས་ཡོད་ཟེར་བ་ལས་གྲངས་ཐོ་མེད་པ་རེད། མ་འོངས་ལས་ཀ་བྱེད་སྐབས་དུས་ཐོག་གི་ལས་ཀ་མ་གཏོགས་འཆར་གཞི་ལྡན་པ་ཞིག་བྱ་ཐབས་མེད་པ་རེད། ཕྱི་ལོ་ ༢༠༡༧ ནས་བཟུང་འཕྲོད་བསྟེན་ལས་ཁུངས་ཀྱིས་གྲངས་ཐོ་བསྡུས་པས་མི་མང་པོ་ཞིག་སུན་སྣང་སྐྱེས་པ་རེད། ད་ལྟ་བལྟས་ཡོང་ཚེ་འཕྲོད་བསྟེན་ལས་ཁུངས་ཀྱི་ལས་གཞི་འོག་ལས་དོན་ཧ་ཅང་མང་པོར་འཆར་གཞི་བསྒྲུབ་ཐུབ་ཡོད། དཔེར་ན། འཕྲོད་བསྟེན་ལས་ཁུངས་ནས་སྨན་ཞབས་པའི་ས་གནས་སྐོར་བསྐྱོད་དང་། ཕྲུ་གུ་ལོ་ལྔ་མན་གྱི་འགོག་ཁབ། བུད་མེད་ཀྱི་ནད་གཞི་གོ་རྟོགས་སོགས་ཀྱི་འཆར་གཞི་ཇི་ལྟར་སྤེལ་ཐུབ་རེད་ཟེར་ན། ཁྱིམ་ཐོ་གྲངས་བཤེར་བྱས་པའི་རྒྱུ་རྐྱེན་ལ་བརྟེན་ནས་བྱུང་བ་རེད། དེ་ནི་སྤྱི་ཚོགས་ཞབས་ཞུའི་སྡེ་ཚན་ཚང་མར་དགོས་པ་ཞིག་རེད། ཅེས་འགྲེལ་བརྗོད་གནང་སོང་།
སྐབས་དེར་ནང་སྲིད་དྲུང་ཆེ་དཔལ་ལྡན་དོན་གྲུབ་ལགས་ཀྱིས། དེ་རིང་བོད་མིའི་སྒྲིག་འཛུགས་ཀྱི་ཆོས་རིག་ལས་ཁུངས་དང་། ནང་སྲིད་ལས་ཁུངས། ཤེས་རིག་ལས་ཁུངས། འཕྲོད་བསྟེན་ལས་ཁུངས་བཅས་ཀྱི་སྤྱི་ཚོགས་ཞབས་ཞུ་ལས་ཁུངས་ཁག་ནས་གསལ་བསྒྲགས་ཞུ་བཞིན་ཡོད། འདས་པའི་ལོ་ ༦༠ རིང་རྒྱ་བལ་གཉིས་ཀྱི་ནང་བོད་མིའི་གཞིས་ཆགས་དང་། སློབ་གྲྭ སྨན་ཁང་བཅས་སུ་མཐུན་རྐྱེན་དང་རོགས་རམ་མང་པོ་ཞིག་སྦྱོར་བཞིན་ཡོད་པའི་གྲངས་ཐོ་ཕལ་ཆེ་བ་མེད་པ་རེད། འཛམ་གླིང་གི་འགྱུར་ལྡོག་དང་བསྟུན་ནས་ཁྱིམ་ཐོ་གྲངས་བཤེར་བྱ་རྒྱུ་གལ་ཆེན་བརྩི་བཞིན་ཡོད། རྒྱ་གར་ལ་མཚོན་ན་མངའ་སྡེ་ཁག་ཏུ་ཁྱིམ་ཐོ་གྲངས་བཤེར་བྱེད་མུས་རེད། ཕྱི་ལོ་ ༢༠༢༢ ཟླ་ ༥ ནང་བོད་མིའི་སྒྲིག་འཛུགས་ཀྱི་སྤྱི་ཚོགས་ཞབས་ཞུའི་ལས་ཁུངས་བཞིའི་དྲུང་ཆེའི་ཚོགས་འདུ་ཐོག ཁྱིམ་ཐོ་གྲངས་བཤེར་གྱི་གལ་གནད་ཀྱིས་སྤྱི་ཚོགས་ཞབས་ཞུ་ཚད་ལྡན་ཞིག་བསྒྲུབ་ཐུབ་པའི་དོ་སྣང་བྱུང་བ་དང་། དེའི་དཔེ་ཡང་རྒྱལ་ཁབ་དང་མངའ་སྡེ་ཁག་ནས་ཉམས་མྱོང་བཟང་པོ་ལེན་དགོས། ཕྱི་ལོ་ ༢༠༡༧ ནས་ ཕྱི་ལོ་ ༢༠༢༢ བར་དུ་བོད་མིའི་སྒྲིག་འཛུགས་འཕྲོད་བསྟེན་ལས་ཁུངས་ཀྱི་ངོས་ནས་ཁྱིམ་ཐོ་ཞིབ་བཤེར་ཐེངས་གཉིས་བྱས་ཡོད། འགྲོ་གྲོན་སོགས་ཀྱི་ཐད་ནས་ཆ་རྐྱེན་ཡག་པོ་མེད་ཀྱང་། གྲངས་ཚད་དང་བསྡུར་ན་ཡག་པོ་བྱུང་ཡོད་པས། ཕྱི་ལོ་ ༢༠༢༢ ནས་བཟུང་ཁྱིམ་ཐོ་གྲངས་བཤེར་གྱི་དངུལ་བསྡུ་རུབ་བྱས་ཡོད། སྐབས་དེར་འཕྲོད་བསྟེན་ལས་ཁུངས་ཀྱི་སྨན་པ་བློ་བཟང་ལགས་ཀྱིས་འཆར་འགོད་གཙོ་བོ་གནང་ཡོད་པ་དང་། བསྐྱར་ཞིབ་བྱེད་མཁན་ནི་དེ་སྔའི་འཕྲོད་བསྟེན་ལས་ཁུངས་གློག་ཀླད་ཚན་པའི་བསྟན་འཛིན་སྒྲོལ་མས་གནང་ཡོད། རྗེས་སུ་ལས་ཁུངས་བཞིའི་ལས་གཞི་རྒྱ་ཆེན་པོ་ཆགས་ཀྱི་ཡོད་པས། ཨ་རིའི་རོགས་ཚོགས་བརྒྱུད་ནས་རྒྱ་གར་གྱི་མངའ་སྡེའི་ཁྱིམ་ཐོ་གྲངས་བཤེར་ཚོགས་པ་ཞིག་དང་མཉམ་དུ་ལས་ཁུངས་སོ་སོའི་དགོས་མཁོ་དང་བསྟུན། ཁྱད་ལས་བའི་ལམ་སྟོན་འོག་འདི་ལོའི་ཕྱི་ཟླ་གཉིས་པའི་ཟླ་ཕྱེད་ཙམ་ནས་མགོ་བཙུགས་རྒྱུ་ཡིན། ཞེས་བརྗོད་སོང་།
ཁྱིམ་ཐོ་གྲངས་བཤེར་ཟབ་སྦྱོང་སྐོར་ལ་ཁོང་གིས། ཕྱི་ཟླ་ ༢ ནས་བཟུང་རྒྱ་གར་རྒྱལ་ཡོངས་དང་བལ་ཡུལ་གྱི་ཁྱིམ་ཐོ་གྲངས་བཤེར་ཆེད་ཟབ་སྦྱོང་ཐེངས་ ༧ གོ་སྒྲིག་བྱ་རྒྱུ་ཡིན། དེ་དག་ནི་རྒྱ་གར་ལྷོ་ཕྱོགས་སུ་ཟབ་སྦྱོང་ཐེངས་གཉིས་དང་། སུ་ལུ་གུ་རིར་ཟབ་སྦྱོང་ཐེངས་གཉིས། པོན་ཌར་ཟབ་སྦྱོང་ཐེངས་གཅིག དྷ་རམ་ས་ལར་ཟབ་སྦྱོང་ཐེངས་གཅིག ལ་དྭགས་སུ་ཟབ་སྦྱོང་ཐེངས་གཅིག་འཚོག་རྒྱུ་ཡིན། ཟབ་སྦྱོང་ཐོག་ཁྱད་ལས་པས་གྲངས་ཐོ་བསྡུ་མཁན་གྱི་གཞོན་སྐྱེས་རྣམས་ལ་ཟབ་ཁྲིད་བྱ་རྒྱུ་མ་ཟད། དེའི་མཉམ་དུ་ས་གནས་མགོ་འཛིན་དང་ལས་དྲུང་ངམ་རྩིས་དྲུང་གང་རུང་ཞིག་བཅར་གྱི་ཡོད། དབུས་བོད་མིའི་སྒྲིག་འཛུགས་ནས་ནང་སྲིད་ལས་ཁུངས་ཀྱི་ལས་བྱེད་རྒན་པ་ཞིག་དང་། ས་གནས་ཀྱི་རྩིས་པ་གཅིག་བཅས་ཟབ་སྦྱོང་དུ་ཚོགས་བཅར་བྱ་རྒྱུ་ཡིན། ཞེས་བརྗོད་སོང་།
དེ་བཞིན་ཁོང་གིས། ད་ལན་བོད་མིའི་སྒྲིག་འཛུགས་ཀྱིས་ཐེངས་དང་པོར་ཁྱིམ་ཐོ་ཞིབ་བཤེར་བྱེད་ཀྱི་ཡོད། ལས་གཞི་འདིའི་ནང་རྒྱ་བལ་གྱི་བོད་མི་ཚང་མ་མཉམ་རུབ་ཀྱི་ཐོག་ནས་འཛུལ་ཞུགས་བྱ་རོགས་གནང་། གལ་སྲིད་ལས་གཞི་འདིར་འཛུལ་ཞུགས་མ་བྱས་ཚེ། བོད་མིའི་སྒྲིག་འཛུགས་ཀྱི་ལས་ཁུངས་ཁག་སོ་སོའི་ལས་གཞི་སྒྲིག་པའི་སྐབས་སུ། ལས་དོན་གང་ཞིག་གལ་ཆེན་ཡིན་པ་དང་། ལས་གཞི་གང་གིས་སུ་ལ་ཕན་ཐོགས་ཀྱི་ཡོད་མེད་ཚོད་དཔག་ཐུབ་ཀྱི་མི་འདུག ཞེས་བརྗོད་སོང་།
ཆོས་རིག་དྲུང་ཆེ་འཆི་མེད་ཚེ་དབྱངས་ལགས། ཁྱིམ་ཐོ་གྲངས་བཤེར་ནི་གལ་ཆེན་པོ་ཆགས་ཀྱི་འདུག ང་ཚོས་ལས་ཀ་གང་འདྲ་ཞིག་བྱེད་སྐབས་ཁྱིམ་ཐོའི་གྲངས་ཀ་མ་རག་པར་རྗེས་ལུས་ཀྱི་གནས་སྟངས་ཤིག་ཆགས་ཡོང་གི་འདུག ཐེངས་འདིའི་ཁྱིམ་ཐོ་ཞིབ་བཤེར་གྱི་ལས་འཆར་བརྒྱུད་ནས་གྲངས་ཐོ་གང་ཡོད་གནང་ཐུབ་ཚེ། མ་འོངས་བར་ལས་གཞི་གང་འདྲ་བྱེད་སྐབས་ཁྱིམ་ཐོའི་གྲངས་གཞི་ཐོག་ནས་ལས་འཆར་སྒྲིག་པར་ཐུགས་ཕན་གསོ་ཐུབ་པས། བོད་མི་ཚང་མས་མཉམ་ཞུགས་བྱེད་རོགས་གནང་ཞེས་འབོད་སྐུལ་ཞུས་སོང་།
གསར་འགོད་པ། བྱམས་པ་ཚེ་རིང་།
