བོད་མི་ཡེ་ཤེས་རྡོ་རྗེ་ལ་ཞིབ་བཤེར་བྱེད་ཀྱི་འདུག 

རྒྱ་ནག་གཞུང་གིས་དཀར་མཛེས་ཁུལ་རྟའུ་རྫོང་ཉེན་རྟོག་ལས་ཁུངས་ཀྱི་ཉེན་རྟོག་དཔོན་གཞོན་པ་ཟུར་བ་ཡེ་ཤེས་རྡོ་རྗེས་རྒྱ་ནག་དམར་ཤོག་ཚོགས་པའི་ཁྲིམས་སྒྲིག་ལ་འགལ་བ་དང་ལྐོག་རྔན་བླངས་པའི་ཉེས་མིང་འོག་ནས་ཞིབ་བཤེར་བྱེད་ཀྱི་ཡོད་འདུག 

དེ་རིང་ཕྱི་ཚེས་ ༣ ཉིན་བོད་ནང་གི་གསར་འགྱུར་བརྒྱུད་ལམ་ཁག་ཏུ་གནས་ཚུལ་སྤེལ་བ་ལྟར་ན། ཉེ་ལམ་རྒྱ་ནག་གཞུང་གིས་དཀར་མཛེས་ཁུལ་རྟའུ་རྫོང་གི་ཉེན་རྟོག་ལས་ཁུངས་ཀྱི་ཉེན་རྟོག་དཔོན་གཞོན་པ་ཟུར་བ་དང་། ལི་ཐང་རྫོང་གི་ཉེན་རྟོག་ལས་ཁུངས་ཀྱི་ཉེན་རྟོག་དཔོན་དང་ལི་ཐང་རྫོང་སྲིད་གཞུང་གི་རྫོང་དཔོན་གཞོན་པ་བྱས་མྱོང་མཁན་བོད་མི་ཡེ་ཤེས་རྡོ་རྗེ་ཟེར་བ་ཞིག་གིས། རྒྱ་ནག་དམར་ཤོག་ཚོགས་པའི་ཐོག་མའི་བསམ་འདུན་ཟེར་བར་སྣང་མེད་བཞག་ནས་སྒྲིག་འགལ་བྱས་པ་དང་། རྒྱ་སྒོར་ཁྲི་ ༡༥༥ ལྐོག་བཟའ་བྱས་ཡོད་ལུགས་བཤད་ནས་ཞིབས་བཤེར་དང་བརྟག་དཔྱད་བྱེད་མུས་ཡིན་པའི་གནས་ཚུལ་ཐོན་འདུག 

རྒྱ་ནག་གཞུང་ཕྱོགས་ཀྱི་གསར་འགྱུར་ནང་། ཡེ་ཤེས་རྡོ་རྗེས་གཞུང་གི་གླ་ཕོགས་ལེན་དུ་བཅུག་ཡོད་པ་དང་། གཞན་གྱི་ལག་ནས་ཀོ་སྟོད་དང་། ཁ་པར་སོགས་ལྐོག་རྔན་བླངས་ཡོད་པའི་མ་ཚད། ཕྱི་ལོ་ ༢༠༢༠ ལོར་ཁོས་རྒྱ་སྒོར་ཁྲི་ ༡༥༥ ལྷག་ལྐོག་རྔན་བླངས་ནས། དེའི་ ༡༤༠ ལྷག་གིས་དངུལ་བུན་བླངས་ཡོད་ལུགས་དང་། དུས་ཡུན་རིང་པོའི་ནང་རྒྱ་ནག་དམར་ཤོག་ཚོགས་པའི་ནང་ཞུགས་པའི་ཐོག་མའི་བསམ་འདུན་དང་རྒྱ་ནག་གཞུང་གི་ལས་བྱེད་ཀྱི་ཐོབ་ཐང་ཟེར་བ་ཞིག་བརྗེད་དེ། སྒྲིག་ལམ་དང་ཁྲིམས་ཀྱི་འདུ་ཤེས་ཟེར་བ་ཉམས་ཡོད་ལུགས་སོགས་བཤད་འདུག 

ཡེ་ཤེས་རྡོ་རྗེ་ནི་ཕྱི་ལོ་ ༡༩༧༣ ལོའི་ཟླ་ ༥ ནང་བོད་རྟའུ་རུ་སྐྱེས་ཤིང་། ཕྱི་ལོ་ ༢༠༠༦ ལོར་རྒྱ་ནག་དམར་ཤོག་ཚོགས་པར་ཞུགས། ཁོང་གིས་དཀར་མཛེས་ཁུལ་རྟའུ་རྫོང་གི་ཉེན་རྟོག་དཔོན་གཞོན་པ་དང་། ལི་ཐང་རྫོང་གི་ཉེན་རྟོག་ལས་ཁུངས་ཀྱི་ཉེན་རྟོག་དཔོན་དང་ལི་ཐང་རྫོང་སྲིད་གཞུང་གི་རྫོང་དཔོན་གཞོན་པ་སོགས་ཀྱི་ལས་ཀ་གཉེར་མྱོང་། ཕྱི་ལོ་ ༢༠༢༡ ལོའི་ཟླ ༤ ནང་དཀར་མཛེས་ཁུལ་སྒྲིག་ཨུད་ཀྱི་སྒྲིག་བཤེར་ཨུ་ལྷན་གྱི་སྒྲིག་ཁྲིམས་ཞིབ་བཤེར་ཐོག་མ་བྱེད་མགོ་བཙུགས། ༢༠༢༡ ལོའི་ཟླ་ ༩ པར། ཡེ་ཤེས་རྡོ་རྗེས་ཏང་གི་སྒྲིག་ཁྲིམས་ལས་ཚབས་ཆེན་འགལ་བ་དང་སྒྲིག་འགལ་ཁྲིམས་འགལ་གྱི་ཉེས་གསོག་གི་དོགས་གཞི་ཡོད་པས། རྒྱ་ནག་དམར་ཤོག་ཚོགས་པའི་སྐྱིད་སྡུག་དང་གཞུང་གི་ལས་གནས་ནས་ཕྱིར་འབུད་བྱས་འདུག 

ཕྱི་ལོ་ ༢༠༡༢ ལོ་ནས་རྒྱ་ནག་དམར་ཤོག་ལས་བྱེད་ (ཏང་ཡོན) ཀྱིས་བྱ་མི་ཆོག་པའི་དོན་ཚན་ ༨ ཅེས་པ་གཏན་འབེབས་བྱས་ཡོད་ཅིང་། གཅིག སྒྲིག་སྲོལ་ལས་འགལ་ཏེ་གཞུང་དངུལ་སྤྱད་ནས་བཟའ་བཏུང་དང་། ཡུལ་སྐོར། མཐོ་རིམ་འཛད་སྤྱོད་རོལ་རྩེད་ལུས་སྦྱོང་བྱེད་སྒོར་ཞུགས་གཏན་ནས་མི་ཆོག་པ་དང་། གཉིས། གཞུང་དངུལ་སྤྱད་ནས་ལོ་གསར་རྟེན་འབྲེལ་ཁུག་དམར་དང་ཤོག་སྦག་སོགས་གཏན་ནས་ཉོ་མི་ཆོག གསུམ། གཞུང་དངུལ་སྤྱད་ནས་སྣེ་ལེན་འཚམས་འདྲི་དང་ཡུལ་སྐོར་སོགས་གཞུང་དོན་མ་ཡིན་པའི་བྱེད་སྒོ་གཏན་ནས་སྤེལ་མི་ཆོག བཞི། གཞུང་འཁོར་སྒེར་སྤྱོད་དམ་སྒེར་འཁོར་གཞུང་གསོའི་རིགས་གཏན་ནས་བྱེད་མི་ཆོག ལྔ།  སྒྲིག་སྲོལ་ལས་འགལ་ནས་ལག་རྟགས་དངོས་པོ་དང་། དངུལ། འཛད་སྤྱོད་ཁུག་དམར་སོགས་གཏན་ནས་ལེན་མི་ཆོག དྲུག སྒེར་གྱི་སྤྲོ་རྩེད་འདུ་ཁང་ནང་གཏན་ནས་འཛུལ་མི་ཆོག བདུན། སྒྲིག་སྲོལ་ལས་འགལ་བའི་ཐོག་ནས་གཉེན་སྟོན་དང་འདས་མཆོད་སོགས་ལ་ཁ་གཡར་ནས་རྒྱུ་ནོར་ལེན་ཐབས་གཏན་ནས་བྱས་མི་ཆོག བརྒྱད། ཡུལ་གྲོགས་འདུ་ཚོགས་དང་། སློབ་གྲོགས་འདུ་ཚོགས། འཐབ་གྲོགས་འདུ་ཚོགས་ལ་གཏན་ནས་ཞུགས་མི་ཆོག་པ་བཅས་རེད་འདུག

གསར་འགོད་པ། དཔལ་ལྡན།