ཕྱི་ལོ་ ༢༠༡༡ ལོར་བོད་བསྟན་སྲིད་ཆེད་སྐུ་ལུས་མེར་སྲེག་གནང་མཁན་རྔ་བ་ཀིརྟི་དགོན་གྱི་དགེ་འདུན་པ་བློ་བཟང་དཀོན་མཆོག་ལགས་དང་བློ་བཟང་སྐལ་བཟང་ལགས་རྣམ་གཉིས་ཀྱི་སྐུ་གཟུགས་གནས་སྟངས་དང་འབྲེལ་བའི་སྐུ་པར་གསར་པ།
ཕྱི་ལོ་ ༢༠༡༡ ལོར་བོད་བསྟན་སྲིད་ཆེད་སྐུ་ལུས་མེར་སྲེག་གནང་མཁན་རྔ་བ་ཀིརྟི་དགོན་གྱི་དགེ་འདུན་པ་བློ་བཟང་དཀོན་མཆོག་ལགས་དང་། དགེ་འདུན་པ་བློ་བཟང་སྐལ་བཟང་ལགས་རྣམ་གཉིས་རྒྱ་ནག་གཞུང་གིས་ལོ་ངོ་ ༧ ཙམ་ལ་བཀག་ཉར་བཙོན་འཇུག་བྱས་རྗེས། ཕྱི་ལོ་ ༢༠༡༧ ཟླ་ ༣ ཚེས་ ༢༨ ཉིན་དགེ་འདུན་པ་བློ་བཟང་སྐལ་བཟང་ལགས་ཀློད་གྲོལ་བཏང་ཡོད་པ་དང་། ལོ་དེའི་ཕྱི་ཟླ་ ༧ ཚེས་ ༣༠ ཉིན་ཁོང་གི་རོགས་པ་གྲྭ་བློ་བཟང་དཀོན་མཆོག་ལགས་ཀྱང་སི་ཁྲོན་མེན་ཡཱང་བཙོན་ཁང་ནས་ཀློད་གྲོལ་བཏང་ཡོད་པ་རེད། ཡིན་ནའང་། ཁོང་རྣམ་པ་གཉིས་བཙོན་གྲོལ་བཏང་རྗེས་སྐུ་གཟུགས་གནས་སྟངས་སོགས་གང་ཡང་ཤེས་རྟོགས་ཐུབ་མེད་པ་རེད།
ཕྱི་ལོ་ ༢༠༡༡ ཟླ་ ༩ པའི་ཚེས་ ༢༦ ཉིན་གྱི་བོད་ནང་གི་སྔ་དྲོའི་ཆུ་ཚོད་ ༡༠ པ་ཡས་མས་སུ། དགེ་འདུན་པ་བློ་བཟང་སྐལ་བཟང་ལགས་དང་། གྲྭ་བློ་བཟང་དཀོན་མཆོག་ལགས་གཉིས་ཀྱིས་རྔ་བ་རྫོང་གི་ཁྲོམ་གཞུང་དུ། ༧རྒྱལ་བ་རིན་པོ་ཆེ་སྐུ་ཚེ་ཁྲི་ལོར་བརྟན་པར་ཤོག བོད་ལ་ཆོས་དད་རད་དབང་དགོས་སོགས་ཀྱི་སྐད་འབོད་གནང་བཞིན་སྐུ་ལུས་མེར་སྲེག་གནང་ཡོད་པ་དང་། ཅུང་ཙམ་ལས་མ་འགོར་བར་རྒྱ་གཞུང་གི་ཉེན་རྟོག་པ་དང་དྲག་ཆས་དམག་མི་བསླེབས་ནས་མེ་བསད་དེ་ཁོང་རྣམ་གཉིས་བཙན་འཁྲིད་བྱས་ཡོད་པ་རེད།
ཕྱིས་སུ་ཁོང་གཉིས་ལྟ་སྲུང་ནན་པོའི་འོག་སྨན་ཁང་ཞིག་ཏུ་སྨན་བཅོས་བྱས་ཡོད་པའི་གནས་ཚུལ་ཐོན་ཡོད་པ་མ་ཟད། རྒྱ་ནག་གཞུང་གིས་ཚེ་སྲོག་སྐྱོབ་རྒྱུར་ཁ་གཡར་ཏེ་དགེ་འདུན་པ་བློ་བཟང་དཀོན་མཆོག་ལགས་ཀྱི་ཞབས་གཉིས་གཏུབ་ཡོད་པ་དང་། བཟའ་བཏུང་ཡང་སྦུ་གུ་དྲངས་ནས་གནང་དགོས་པའི་གནས་སྟངས་ཛ་དྲག་ཆགས་ཡོད་པའི་གནས་ཚུལ་ཐོན་ཡོད་པ་རེད། ཡིན་ནའང་། བོད་ཀྱི་ཆབ་སྲིད་བཙོན་པ་སྤྱི་མཚུངས་ལྟར་ཁོང་རྣམ་པ་གཉིས་ལྟ་སྲུང་དང་དམ་དྲག་ནན་པོའི་འོག་བཞག་ཡོད་སྟབས། བཙོན་ཁང་དུ་བཞུགས་པའི་རིང་གི་གནས་སྟངས་དང་བཙོན་གྲོལ་ཐོབ་རྗེས་ཀྱི་གནས་སྟངས་སོགས་ཤེས་རྟོགས་ཐུབ་ཁག་པོ་ཆགས་འདུག
ཕྱི་ལོ་ ༢༠༠༩ ཟླ་ ༢ ཚེས་ ༢༧ ཉིན་རྔ་བ་ཀིརྟི་དགོན་གྱི་དགེ་འདུན་པ་བཀྲ་བྷེ་ལགས་ཀྱིས་རྔ་བའི་དཔའ་བོའི་སྲང་ལམ་དུ་བོད་བསྟན་སྲིད་ཆེད་སྐུ་ལུས་མེར་སྲེག་གནང་བ་ནས་བཟུང་། ད་ལྟ་བར་དུ་བོད་ནང་དུ་སེར་སྐྱ་ཕོ་མོ་ཉུང་མཐར་ ༡༥༧ ལྷག་གིས་བོད་བསྟན་སྲིད་ཆེད་སྐུ་ལུས་མེར་སྲེག་གནང་ཡོད་པ་དང་། དེའི་ཁྲོད་ནས་སེར་སྐྱ་ཕོ་མོ་གྲངས་ ༡༧ ལྷག་གིས་སྐུ་ལུས་མེར་སྲེག་གནང་རྗེས་རྒྱ་ནག་ཉེན་རྟོག་པས་བཙན་འཁྲིད་བྱས་ཏེ་ཤི་གསོན་གང་ཡིན་གྱི་གནས་ཚུལ་ཙམ་ཡང་ཤེས་རྟོགས་ཐུབ་ཀྱི་མེད་པ་རེད།
![AfD party members celebrate victory in Saxony-Anhalt on Sunday [Matthias Schrader/AP]](https://tibettimes.net/wp-content/uploads/2026/09/WhatsApp-Image-2026-09-11-at-4.20.04-PM-360x180.jpeg)
