བོད་རྒྱལ་ལོ་ ༢༡༥༠ ལོར་༧གོང་ས་རྒྱལ་བ་རིན་པོ་ཆེ་མཆོག་ལ་ཕུལ་བའི་གཟེངས་རྟགས་དང་བརྟན་བཞུགས།

དབྱིན་ཡུལ་གྱི་ཐེབས་རྩ་ཁང་ཞིག་ནས་གསེར་གྱི་གཟེངས་རྟགས་ཕུལ།

ཕྱི་ལོ་ ༢༠༢༣ ཟླ་ ༤ ཚེས་ ༡༤ ཉིན་༧གོང་ས་རྒྱལ་བ་རིན་པོ་ཆེ་མཆོག་ལ་དབྱིན་ཡུལ་གྱི་(Scheherazade)ཐེབས་རྩའི་གསེར་གྱི་གཟེངས་རྟགས་ཤིག་དབྱིན་ཡུལ་སྐུ་ཚབ་དོན་གཅོད་བརྒྱུད་ཕུལ་ཡོད་ཅིང་།  གསེར་གྱི་གཟེངས་རྟགས་དེ་ནི་༧གོང་ས་རྒྱལ་བ་རིན་པོ་ཆེ་མཆོག་ནས། སྐུ་ཚེ་ཧྲིལ་བོར་གཞན་ཕན་གྱི་མཛད་འཕྲིན་བསྐྱངས་པ་དང་། ཆོས་ལུགས་མཐུན་སྒྲིལ། འཛམ་གླིང་ཞི་བདེ་སོགས་ཀྱི་མཛད་འཕྲིན་རླབས་པོ་ཆེ་བསྐྱངས་དང་སྐྱོང་མུས་ཡིན་པར་གུས་བཀུར་མཚོན་སླད་དུ་ཕུལ་བ་ཞིག་ཡིན་འདུག གཟེངས་རྟགས་དེ་ནི་འཛམ་གླིང་ནང་བུད་མེད་ནུས་སྟོབས་གོང་སྤེལ་དང་འབྲེལ་བའི་ལས་དོན་སྒྲུབ་མཁན་དང་། རིགས་རུས་སྣ་ཚོགས་འདུས་ཤིང་འཆམ་མཐུན་ལྡན་པའི་གོ་ལའི་སྤྱི་ཚོགས་ཤིག་བསྐྲུན་པར་འབད་བརྩོན་གནང་མཁན། འཛམ་གླིང་ཞི་བདེ་དང་ཆོས་ལུགས་མཐུན་སྒྲིལ་སོགས་ཀྱི་ལས་དོན་སྒྲུབ་མཁན་རྣམས་ལ་ཕུལ་སྲོལ་ཡོད་ཅིང་། དེ་སྔ་གཟེངས་རྟགས་དེ་བྱམས་བརྩེའི་བདག་མོ་ཊུ་རེ་ས་(Mother Teresa)ལགས་དང་། ནལ་སན་མན་ཌ་ལ་(Nelson Mandela)ལགས། བྷི་བྷི་སི་གསར་ཁང་གི་དོ་དམ་པ་རྒན་པ་ (Sir David Attenborough) ལགས། དབྱིན་ཇིའི་བརྩམས་སྒྲུང་རྩོམ་པ་པོ་གྲགས་ཅན་ལྕམ་ཌོ་རེ་སི་ (Doris Lessing)ལགས་སོགས་འཛམ་གླིང་གི་གནད་ཡོད་མི་སྣ་རྐྱང་རྐྱང་ལ་ཕུལ་མྱོང་ཡོད་འདུག

ཧྥི་ལི་པིན་རཱ་མོན་མཱག་སའེ་སའེ་གཟེངས་རྟགས་དངོས་སུ་ཕུལ།

ཕྱི་ལོ་ ༢༠༢༣ ཟླ་ ༤ ཚེས་ ༢༦ ཉིན་གྱི་སྔ་དྲོར་བཞུགས་སྒར་རྒྱལ་བའི་ཕོ་བྲང་དུ། ༧གོང་ས་རྒྱལ་བ་རིན་པོ་ཆེ་མཆོག་ནས་ཧྥི་ལི་པིན་རཱ་མོན་མཱག་སའེ་སའེ་གཟེངས་རྟགས་ཐེབས་རྩའི་ཚོགས་གཙོ་ལྕམ་སྐུ་སུ་སན་ནཱ་བྷེ་ཨ་ཧྥེན་(Susanna B.Afan) ལགས་དང་། ཚོགས་མི་ཨེ་མི་ལི་ཨ་ཨ་བྷི་རེ་རཱ་ (Emily A.Abrera) ལགས་བཅས་ཚོགས་མི་ཁག་ཅིག་ལ་མཇལ་མོལ་གནང་ཡོད་པ་དང་། སྐབས་དེར་༧གོང་ས་མཆོག་ལ་རཱ་མོན་མཱག་སའེ་སའེ་གཟེངས་རྟགས་ཕུལ་ཏེ་ལོ་ངོ་ ༦༤ འཁོར་བའི་དུས་དྲན་སྲུང་གཙི་དང་བསྟུན་གཟེངས་རྟགས་དེ་དངོས་སུ་ཕུལ་ཡོད་འདུག ༧གོང་ས་རྒྱལ་བ་རིན་པོ་ཆེ་མཆོག་ནས་འཁྲུག་པ་རྒྱག་པ་ནི་ཞེ་སྡང་། ང་རྒྱལ། ཕྲག་དོག་བཅས་ཀྱི་རྐྱེན་གྱིས་ཡོང་བཞིན་འདུག གལ་སྲིད་ང་ཚོས་གཅེན་གཅུང་གི་འདུ་ཤེས་ཀྱི་སྟེང་ནས་འཚོ་བ་བསྐྱལ་བ་ཡིན་ན། ནང་སེམས་སུ་ལྷོད་པོ་ཆགས་ནས་བྱམས་བརྩེ་དང་ཞི་བདེའི་ངང་གནས་ཐུབ། ཀུན་སྤྱོད་ངན་པས་གཟུགས་པོའི་བདེ་ཐང་ལའང་གནོད་པ་བྱེད་ཀྱི་ཡོད། ཅེས་སོགས་གསུངས་འདུག ཕྱི་ལོ་ ༡༩༥༩ ཟླ་ ༨ ཚེས་ ༣༡ ཉིན་རཱ་མོན་མཱག་སའེ་སའེ་གཟེངས་རྟགས་ཐེབས་རྩ་ཚོགས་པས་༧གོང་ས་རྒྱལ་བ་རིན་པོ་ཆེ་མཆོག་ལ་གཟེངས་རྟགས་དེ་ཕུལ་ཡོད་ཅིང་། སྐུའི་གཅེན་པོ་རྒྱལ་ལོ་དོན་གྲུབ་མཆོག་ནས་༧གོང་ས་མཆོག་གི་སྐུ་ཚབ་ཞུས་ནས་ཧྥི་ལི་པིན་གྱི་རྒྱལ་ས་མཱ་ནེ་ལཱ་རུ་བཞེས་ཡོད་འདུག

གཞིས་བྱེས་བོད་མི་ཡོངས་ཀྱིས་བརྟན་བཞུགས་བསྟར་འབུལ་ཞུས།

ཕྱི་ལོ་ ༢༠༢༣ ཟླ་ ༣ ཚེས་ ༡༥ ཉིན་བཞུགས་སྒར་ཐེག་ཆེན་ཆོས་གླིང་གཙུག་ལག་ཁང་དུ། བོད་མིའི་སྒྲིག་འཛུགས་བཀའ་ཤག་གིས་བོད་གཞིས་བྱེས་གཉིས་ཀྱི་ལྷ་མི་ཡོངས་ཀྱི་ཚབ་བྱས་ཏེ་༧གོང་ས་རྒྱལ་བ་རིན་པོ་ཆེ་མཆོག་ལ་བརྟན་བཞུགས་བསྟར་འབུལ་ཞུས་ཡོད། སྐབས་དེར་༧གོང་ས་རྒྱལ་བ་རིན་པོ་ཆེ་མཆོག་ནས།  དེ་རིང་འདིར་བོད་རྒྱ་ཆེ་མི་མང་གི་ཚབ་བྱེད་མཁན་གྱི་མི་མང་ཚོ་དང་། དེ་བཞིན་གནས་ཆུང་ཆོས་སྐྱོང་དང་མཁའ་འགྲོ་ཚོ་མཚོན་པའི་གཟུགས་མེད་ཀྱི་ལྷ་ཚོས་ཀྱང་རེ་འདུན་ཆེན་པོ་བྱེད་སྡོད་ཀྱི་ཡོད་དུས། ངོས་རང་གི་གཟུགས་པོ་བདེ་ཐག་ཆོད་ཡོད། ད་དུང་མུ་མཐུད་ནས་སྤྱིར་སངས་རྒྱས་ཀྱི་བསྟན་པ་དང་ཡང་སྒོས་བོད་གངས་ཅན་ལྗོངས་ཀྱི་ཆོས་དང་རིག་གཞུང་། ཧི་མ་ལ་ཡའི་རི་རྒྱུད་ཀྱི་ས་ཁུལ་གྱི་མི་མང་དེ་དག་གིས་ངོས་རང་ལ་ཆོས་དང་རིག་གཞུང་གི་ཐོག་ནས་དད་པ་རྩེ་གཅིག་ཏུ་ཡོད་པར་བརྟེན། དེ་དག་གི་རེ་འདོད་བསྐོང་ཐུབ་རྒྱུ་ཞིག་དང་། གང་ལྟར་སྐྱེས་པའི་དགོས་དོན་ནི་གཞན་ལ་ཕན་པ་བསྒྲུབ་རྒྱུ་རེད། ད་ལྟའི་ངོས་རང་གི་ལུས་རྟེན་འདིའི་ཐོག་ནས་མི་ལ་ཕན་པ་ཏན་ཏན་སྒྲུབ་ཐུབ་ཀྱི་འདུག དེར་བརྟེན། ཕན་པ་སྒྲུབ་ཐུབ་མཁན་གྱི་ལུས་རྟེན་འདི་རིང་པོར་འཚོ་ཐུབ་པར་ངོས་རང་གིས་ཀྱང་སྨོན་ལམ་བརྒྱག་གི་ཡིན། ཕན་པ་གཏོང་གི་ཡིན། ཁྱེད་རང་ཚོས་ཐུགས་སྨོན་གནང་ནས་དེ་རིང་འདིར་བརྟན་བཞུགས་གནང་བ་རེད། ཐུགས་རྗེ་ཆེ་ཞུ་ཡི་ཡིན། ཞེས་སོགས་གསུངས་འདུག

མ་སུ་རི་གཏན་སློབ་དང་། བོད་ཁྱིམ། པན་ཆ་མ་རི་གཏན་སློབ་བཅས་ཀྱིས་བརྟན་བཞུགས་བསྟར་འབུལ་ཞུས།

ཕྱི་ལོ་ ༢༠༢༣ ཟླ་ ༤ ཚེས་ ༥ ཉིན་བཞུགས་སྒར་ཐེག་ཆེན་ཆོས་གླིང་གཙུག་ལག་ཁང་དུ། མ་སུ་རི་གཏན་སློབ་དང་བོད་ཁྱིམ་དགེ་ལས་སློབ་ཕྲུག་དང་སློབ་ཟུར། དེ་བཞིན་པན་ཆ་མ་རི་གཏན་སློབ་དང་ལག་ཤེས་སྦྱོང་བརྡར་ལྟེ་གནས་ཁང་གི་སློབ་ཟུར་བཅས་ཀྱི་གོ་སྒྲིག་འོག ༧གོང་ས་རྒྱལ་བ་རིན་པོ་ཆེ་མཆོག་ལ་༧གོང་ས་ལྔ་པ་ཆེན་པོའི་དག་སྣང་ཚེ་དཔག་མེད་དྭངས་མ་བཅུད་འདྲེན་གྱི་སྒོ་ནས་བརྟན་བཞུགས་བསྟར་འབུལ་ཞུས། ༧གོང་ས་མཆོག་ནས་བརྟན་བཞུགས་དང་འབྲེལ་བའི་བཀའ་སློབ་གནང་སྐབས། དེ་རིང་འདིར་བརྟན་བཞུགས་ཤིག་གནང་བཞིན་ཡོད་པ་རེད།  འདིར་ལུས་པོ་ཡོད་བསྡད་པ་བཙན་བྱོལ་བ་ཉུང་ཤས་ཤིག་ཆགས་བསྡད་ཡོད། ཡིན་ནའང་བསམ་བློའི་ཐོག་ནས་བོད་ཆོལ་ཁ་གསུམ་གྱི་བོད་མི་ས་ཡ་དྲུག་གིས་ངོས་ལ་བློ་སེམས་གཏད་བཞིན་ཡོད། བོད་རྒྱ་ཧོར་གསུམ་གྱི་ས་ཁུལ་ནང་དུ་༧རྒྱལ་བ་རིན་པོ་ཆེ་ལ་དགའ་མོས་བྱེད་མཁན་དང་། ཚེ་རིང་པོ་ཡོང་བར་གསོལ་བ་འདེབས་ཀྱི་ཡོད་ཅིང་། སྔོན་ཆད་བོད་རྒྱ་ཧོར་གསུམ་གྱི་ནང་དུ་སངས་རྒྱས་ཀྱི་བསྟན་པ་དར་ཞིང་། བར་སྐབས་ཏོག་ཙམ་ཉམས་ཆག་སོང་ཡོད་པར་ཉམས་པ་སོར་ཆུད་དང་མི་ཉམས་གོང་འཕེལ་བྱུང་བའི་རེ་བ་རྩེ་གཅིག་ཏུ་བྱེད་ཀྱི་ཡོད། ཧི་མ་ལ་ཡའི་རི་རྒྱུད་ནང་དུའང་ངོས་ལ་དད་མོས་དང་དགའ་ཞེན་རྩེ་གཅིག་ཏུ་བྱེད་མཁན་མང་པོ་འདུག ཅེས་གསུངས།

ཀཿཐོག་དགོན་གྲོང་གཉིས་ནས་བརྟན་བཞུགས་བསྟར་འབུལ་ཞུས།

ཕྱི་ལོ་ ༢༠༢༣ ཟླ་ ༤ ཚེས་ ༡༢ ཉིན་༧གོང་ས་རྒྱལ་བ་རིན་པོ་ཆེ་མཆོག་ལ་བཞུགས་སྒར་རྒྱལ་བའི་ཕོ་བྲང་དུ། འཕགས་ཡུལ་རྙིང་མ་ཀཿཐོག་དགོན་པ་དང་། ཁམས་ཀཿཐོག་བོད་མིའི་གཞིས་ཆགས་གཉིས་ཀྱི་མི་གྲངས་ ༡༡༣ ལྷག་གིས་ཀཿཐོག་གཞིས་བྱེས་གཉིས་ཀྱི་ཚབ་བྱས་ཏེ། ཕྱི་ཟླ་ ༣ ཚེས་ ༥ ནས་ཟླ་ ༣ ཚེས་ ༣༠ བར་ཉིན་གྲངས་ ༢༥ རིང་ཀཿཐོག་དགོན་པའི་དབུ་འཛིན་རྒྱ་ཤོད་སྐྱབས་སྤྲུལ་རིན་པོ་ཆེ་དང་། མཁན་ཆེན་རྫི་བླ་བརྩོན་འགྲུས་རྒྱ་མཚོ་རིན་པོ་ཆེ་མཆོག་དབུ་བཞུགས་ཐོག་མཁན་སློབ་གྲངས་ ༧༠ ལྷག་གིས། གཏེར་ཆེན་རིག་འཛིན་བདུད་འདུལ་རྡོ་རྗེ་དང་། གཏེར་ཆེན་རིག་འཛིན་ཀློང་གསལ་སྙིང་པོ་གཉིས་ཀྱི་གསུང་ཚེ་སྒྲུབ་ཁག་ ༡༡ གཞུང་ལྟར་གནད་སྨིན་སྒྲུབ་ཞག་གིས། ༧གོང་ས་རྒྱལ་བ་རིན་པོ་ཆེ་མཆོག་ལ་བརྟན་བཞུགས་བསྟར་འབུལ་ཞུས་ཡོད་འདུག

བླ་མ་བཟོད་པ་རིན་པོ་ཆེའི་ཐེབས་རྩ་ནས་བརྟན་བཞུགས་བསྟར་འབུལ་ཞུས།

ཕྱི་ལོ་ ༢༠༢༣ ཟླ་ ༥ ཚེས་ ༢༤ ཉིན་དྷ་ས་ཐེག་ཆེན་ཆོས་གླིང་གཙུག་ལག་ཁང་དུ། བླ་མ་བཟོད་པ་རིན་པོ་ཆེ་མཆོག་དམ་པའི་ཐེག་ཆེན་སྲོལ་རྒྱུན་མི་ཉམས་རྒྱུན་འཛིན་ཐེབས་རྩ་ཁང་(the Foundation for the Preservation of the Mahayana Tradition) གིས་ཇི་ལྟར་གསོལ་བ་བཏབ་པ་ལྟར། ༧གོང་ས་རྒྱལ་བ་རིན་པོ་ཆེ་མཆོག་ལ་བརྟན་བཞུགས་བསྟར་འབུལ་ཞུས་ཡོད་ཅིང་། སྐབས་དེར་༧གོང་ས་རྒྱལ་བ་རིན་པོ་ཆེ་མཆོག་ནས་ལུང་སྡེ་སྣོད་གསུམ་ལ་ཉམས་ལེན་མ་བྱས་པར་ཆོས་གོས་རྣམ་གསུམ་གྱོན་པ་ཙམ་གྱིས་བསྟན་པ་འཛིན་མཁན་རྣལ་མ་ཞིག་ཆགས་ཀྱི་མེད་པས། བཅོམ་ལྡན་འདས་ཀྱི་རྗེས་འབྲངས་རྣལ་མ་ཞིག་ཡིན་པའི་མིག་དཔེ་སྟོན་པར་ཧུར་ཐག་འབད་ཐག་དགོས་སྐོར་བཀའ་སློབ་བསྩལ།

བོད་མཛོད་དགེའི་སེར་སྐྱ་མི་མང་ཡོངས་ཀྱིས་བརྟན་བཞུགས་བསྟར་འབུལ་ཞུས། 

ཕྱི་ལོ་ ༢༠༢༣ ཟླ་ ༧ ཚེས་ ༥ ཉིན་བཞུགས་སྒར་རྒྱལ་བའི་ཕོ་བྲང་དུ། ༧གོང་ས་རྒྱལ་བ་རིན་པོ་ཆེ་མཆོག་ལ་བོད་མཛོད་དགེའི་སེར་སྐྱ་མི་མང་ཐུན་མོང་ནས་བརྟན་བཞུགས་བསྟར་འབུལ་ཞུས་ཡོད་ཅིང་། སྐབས་དེར་༧གོང་ས་མཆོག་ནས་རང་རྒྱལ་གཞན་ཕམ་གྱི་ཐོག་ནས་གོ་མཚོན་བེད་སྤྱོད་མང་པོ་བྱེད་ཀྱི་ཡོད་པ་དང་།  འཛམ་གླིང་གི་དམག་ཆེན་དང་པོ་དང་གཉིས་པ་བརྒྱབ་པ་རེད། མི་མང་པོ་བསད་ཡོད་རེད། གང་ལྟར་འཛམ་གླིང་གི་དཀའ་ངལ་ཕྲན་བུ་ཕྲན་བུ་དེ་དག་ང་ཚོས་སྐད་ཆ་བཤད་ནས་སེལ་རྒྱུ་མ་གཏོགས་གསོད་རེས་བྱས་ནས་དོན་དག་འགྲུབ་ཐུབ་རྒྱུ་རྩ་བ་ཉིད་ནས་ཡོད་པ་མ་རེད། དེར་བརྟེན། འཛམ་གླིང་འདི་དངོས་གནས་དྲང་གནས་ཀྱི་ཞི་བདེ་དང་གོ་མཚོན་མེད་པ། མི་གསོད་རེས་བྱེད་མི་དགོས་པར་ཚང་མར་མཛའ་མཐུན་དགོས་པ་དང་། འཛམ་གླིང་གི་མི་དུང་ཕྱུར་བདུན་བརྒྱད་ཡོད་པ་ཚང་མ་མི་རིགས་ཀྱི་སྤུན་ཟླ་ཤ་སྟག་རེད། ཅེས་སོགས་བཀའ་སློབ་བསྩལ།

གནས་མཆོག་རྡོ་རྗེ་གདན་དུ་བརྟན་བཞུགས་བསྟར་འབུལ་ཞུས།

ཕྱི་ལོ་ ༢༠༢༤ ཟླ་ ༡ ཚེས་ ༡ ཉིན་གནས་མཆོག་རྡོ་རྗེ་གདན་གྱི་དུས་འཁོར་དབང་ཆེན་གསུང་ཆོས་ར་བ་རུ། ཝཱ་རཱ་ཎ་སཱི་དབུས་བོད་ཀྱི་གཙུག་ལག་སློབ་གཉེར་ཁང་དང་ཝཱ་རཱ་ཎ་སཱི་སློབ་ཟུར་ཐུན་མོང་། སྤོན་ཊ་ཆོལ་གསུམ་བོད་མིའི་གཞིས་ཆགས་དང་དཔལ་ཞ་ལུ་དགོན་པ། ལྷ་ལྡན་ཆོ་འཕྲུལ་སྨོན་ལམ་ཆེན་མོའི་དགེ་རྩ་དང་དགེ་ལྡན་སྤྱི་ལས་ཁང་བཅས་ཀྱི་གོ་སྒྲིག་འོག ༧གོང་ས་རྒྱལ་བ་རིན་པོ་ཆེ་མཆོག་ལ་ཚེའི་ལྷ་མཆོག་སྒྲོལ་དཀར་ཡིད་བཞིན་འཁོར་ལོའི་ཆོ་གའི་སྒོ་ནས་བརྟན་བཞུགས་བསྟར་འབུལ་ཞུས་ཡོད་ཅིང་། བརྟན་བཞུགས་ཐོག་དཔལ་ས་སྐྱ་༧སྐྱབས་མགོན་༧གོང་མ་ཁྲི་ཆེན་རྡོ་རྗེ་འཆང་ཆེན་པོ་མཆོག་དང་། དགའ་ལྡན་ཁྲི་པ་བརྒྱ་དང་བཞི་པ་༧རྗེ་བཙུན་བློ་བཟང་བསྟན་འཛིན་དཔལ་བཟང་པོ་མཆོག ས་སྐྱ་ཁྲི་འཛིན་མཆོག ཇོ་ནང་རྒྱལ་ཚབ་རིན་པོ་ཆེ། བྱང་རྩེ་ཆོས་རྗེ། ཀུན་བདེ་གླིང་རིན་པོ་ཆེ། གླིང་རིན་པོ་ཆེ། ཀིརྟི་སྐྱབས་མགོན་རིན་པོ་ཆེ། རྣམ་གྲྭ་མཁན་རིན་པོ་ཆེ། བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་མཆོག བོད་མི་མང་སྤྱི་འཐུས་ཚོགས་གཙོ་མཁན་པོ་བསོད་ནམས་བསྟན་འཕེལ་མཆོག་སོགས་ཀྱིས་གཙོས་སེར་སྐྱ་སྟོང་ཕྲག་མང་པོ་ཆེད་བཅར་གནང་ཡོད་འདུག སྐབས་དེར་༧གོང་ས་མཆོག་གིས་ཕྱི་ལོའི་ལོ་གསར་འཚམས་འདྲི་དང་སྦྲགས། མི་གཅིག་གྱུར་གྱི་འདུ་ཤེས་ཐོག་ཕན་ཚུན་འཆམ་མཐུན་གནང་དགོས་སྐོར་བཀའ་སློབ་བསྩལ།

ཕྱི་ལོ་ ༢༠༢༤ ཟླ་ ༢ ཚེས་ ༥ ཉིན་བོད་ཀྱི་དུས་བབ་གསར་ཁང་གི་གསར་འགོད་པ་བྱམས་པ་ཚེ་རིང་གིས་ཕྱོགས་སྒྲིག་བྱས་ཏེ་སྤེལ།