བདུན་ཕྲག་འདིའི་ནང་ཨ་རིའི་ནོར་སྲིད་ལས་ཁུངས་ཀྱི་གནད་ཡོད་མི་སྣ་ལྔ་རྒྱ་ནག་ཏུ་བསྐྱོད་ནས་ཨ་རྒྱ་གཉིས་ཀྱི་ཚོང་འབྲེལ་མཉམ་ལས་གོང་མཐོར་གཏོང་ཐབས་བྱ་རྒྱུ་ཡིན་འདུག
དེ་རིང་རེས་གཟའ་མིག་དམར་ཉིན་རྒྱལ་སྤྱིའི་གསར་འགྱུར་བརྒྱུད་ལམ་ཁག་ཏུ་གནས་ཚུལ་ཐོན་པ་ལྟར་ན། བདུན་ཕྲག་འདིའི་ནང་ཨ་རིའི་ནོར་སྲིད་ལྷན་ཁང་གི་དྲུང་འཕར་སྐུ་ཞབས་ཇེ་ཤམ་བྷག (Jay Shambaugh ) ལགས་ཀྱིས་སྣེ་འཁྲིད་པའི་ཨ་རིའི་ནོར་སྲིད་གནད་ཡོད་མི་སྣ་ལྔ་དང་། རྒྱ་ནག་གཞུང་གི་ཚོང་དོན་མི་སྣའི་བར་ཐུག་འཕྲད་བྱ་རྒྱུ་ཡིན་ཞིང་། སྐབས་དེར་འཛམ་གླིང་གི་ཚོང་དོན་ལྟེ་གནས་ཆེ་ཤོས་སུ་གྱུར་བའི་ཨ་རྒྱ་གཉིས་ཀྱི་མུ་མཐུད་ཚོང་འབྲེལ་མཉམ་ལས་ཀྱི་ནུས་པ་ཇེ་ཆེར་གཏོང་རྒྱུའི་ཐད་གྲོས་མོལ་བྱ་རྒྱུ་ཡིན་འདུག
ཨ་རིའི་ནོར་སྲིད་ལྷན་ཁང་གི་གཞུང་འབྲེལ་མི་སྣས་ནེའུ་ཡོག་དུས་བབ་ལ་ད་ལྟ་གཞུང་འབྲེལ་ཐོག་ནས་ཕྱོགས་སྐྱོད་དེ་ཡོངས་གྲགས་གསལ་བསྒྲགས་བྱས་མེད་ཀྱང་། ཉིན་གྲངས་གཉིས་རིང་རྒྱ་ནག་གི་ཅ་དངོས་བཟོ་བསྐྲུན་བྱེད་ཕྱོགས་སོགས་ཚུད་པའི་ཨ་རྒྱ་གཉིས་ཀྱི་ཚོང་དོན་གྱི་ཐད་ནས་གྲོས་མོལ་བྱ་རྒྱུ་ཡིན། ཞེས་བརྗོད་འདུག
ད་ལྟའི་ཆར་ཨ་རིའི་ནོར་སྲིད་ལྷན་ཁང་གི་གནད་ཡོད་མི་སྣ་ལྔ་རྒྱ་ནག་ཏུ་གཞུང་འབྲེལ་ཕྱོགས་སྐྱོད་བྱ་རྒྱུ་ཡིན་པའི་གནས་ཚུལ་ཐོན་པ་ཙམ་ལས། ཨ་རིའི་གནད་ཡོད་མི་སྣ་གཞན་བཞི་པོ་སུ་ཡིན་མིན་གསལ་ཁ་གང་ཡང་མེད་ཀྱང་། ལྷན་ཚོགས་དེའི་ཐོག་ཨ་རྒྱ་གཉིས་ཀྱི་ཚོང་འབྲེལ་རྒྱ་སྐྱེད་གཏོང་ཐབས་ཚུད་པའི་ཕྱོགས་གཉིས་ཀྱི་མ་འཇོག་དང་། ཚོང་དོན་མཉམ་ལས། གོ་ལའི་གནམ་གཤིས་འགྱུར་ལྡོག་སོགས་ཀྱི་ཐད་ལའང་གྲོས་མོལ་བྱ་རྒྱུ་ཡིན་འདུག
འདས་ལོའི་ཕྱི་ཟླ་ ༡༡ ཚེས་ ༡༥ ཉིན་ཨ་རིའི་སྲིད་འཛིན་སྐུ་ཞབས་རྗོ་བྷའེ་ཌིན་མཆོག་དང་རྒྱ་ནག་གི་མགོ་ཁྲིད་ཞི་ཅིན་ཕིང་གཉིས་ཐུག་འཕྲད་བྱས་ཏེ། ་ཨ་རྒྱ་གཉིས་ཀྱི་ཚོང་དོན་གོང་འཕེལ་དང་། གོ་ལའི་གནམ་གཤིས་འགྱུར་ལྡོག དེང་རབས་ཀྱི་ཚན་རྩལ་དར་རྒྱས་གོང་འཕེལ་གྱི་སྐོར། དེ་བཞིན་དཀྱིལ་ཤར་ཨེ་ཤ་ཡའི་ནང་འབྱུང་མུས་ཡིན་པའི་དམག་འཁྲུག་གི་སྐོར་དང་། ཨུ་རུ་སུས་ཡུ་ཁེ་རིན་ལ་བཙན་འཛུལ་བྱེད་མུས་ཡིན་པའི་གནད་དོན་སོགས་ཀྱི་སྐོར་ལ་གླེང་མོལ་བྱས་ཡོད་པ་མ་ཟད། ལྷག་པར་ཨ་རྒྱ་གཉིས་ཀྱི་འབྲེལ་ལམ་སྲ་བརྟན་དང་། ཚོང་དོན་འབྲེལ་ལམ། དམག་དོན་སོགས་ཀྱི་ཐད་ལ་གྲོས་མོལ་བྱས་ཡོད་འདུག
སྤྱིར་རྒྱ་ནག་ནས་མཆེད་པའི་ཏོག་དབྱིབས་གཉན་རིམས་ཀྱི་རྐྱེན་གྱིས། འཛམ་གླིང་ཁྱོན་ཡོངས་ཀྱི་ཚོང་འབྲེལ་ཚུད་པའི་དཔལ་འབྱོར་ཉམས་ཉེས་ཆེན་པོ་བྱུང་དང་འབྱུང་མུས་ཡིན་ཞིང་། ལྷག་པར་འདས་པའི་ལོ་ཤས་རིང་རྒྱ་ནག་གི་དཔལ་འབྱོར་ལ་ཉམས་ཉེས་ཤུགས་ཆེན་ཕྱིན་ཡོད་ལ། གནད་དོན་དབྱེ་ཞིབ་པ་མང་པོ་ཞིག་གིས། རྒྱ་ནག་གིས་རྒྱལ་སྤྱིའི་ཁྲིམས་སྒྲིག་དང་འགལ་ནས་ཚོང་འབྲེལ་ཉེས་དོན་བསགས་པ་དེས། རྒྱ་ནག་གི་ཚོང་ཤག་ཆེ་ཤོས་སུ་གྱུར་བའི་ཡུ་རོབ་མཐུན་ཚོགས་ཀྱི་ཚོང་འབྲེལ་ལ་དོ་ཕོག་བཟོ་སྲིད་པའི་ཚོད་དཔག་བྱས་ཡོད་ཀྱང་། བདུན་ཕྲག་སྔ་མར་རྒྱལ་སྤྱིའི་ཊམ་ཀའི་ཐེབས་རྩ་ཁང་ (International Monetary Fund ) གིས་ཞིབ་འཇུག་བྱས་པ་བརྒྱུད། ཕྱི་ལོ་ ༢༠༢༤ ལོར་རྒྱ་ནག་གི་ཕྱོགས་ཡོངས་ཀྱི་དཔལ་འབྱོར་གྱི་གནས་བབ་དེ་བརྒྱ་ཆ་༤།༦ ལ་འཕར་ནས། འདས་པའི་ལོ་ཤས་རིང་གི་དཔལ་འབྱོར་གྱི་འཕར་ཚད་དང་བསྡུར་ན་ཇེ་མགྱོགས་སུ་ཕྱིན་ཡོད་ཀྱང་། རྒྱ་ནག་གི་ཚོང་དོན་གྱི་ཁ་ཕྱོགས་བརྗེ་བསྒྱུར་མ་བྱས་ཚེ། སླར་ཡང་ཚོང་འབྲེལ་ལ་དོ་ཕོག་ཕྱིན་ནས་དཔལ་འབྱོར་ཉམས་ཆག་འགྲོ་སྲིད་པའི་ཉེན་བརྡ་བཏང་ཡོད་འདུག
གསར་འགོད་པ། དཔལ་ལྡན།
རྩོམ་སྒྲིག་པ། པདྨ་མཚོ།
