བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་མཆོག་གིས་སྦལ་ཌིག་(Baltic States) རྒྱལ་ཁབ་གསུམ་དང་། ཧྥིན་ལེན་ཌི། དབྱིན་ཡུལ། སྦེལ་ཇམ་བཅས་ཀྱི་ནང་གཞུང་འབྲེལ་ཕྱོགས་སྐྱོད་ལེགས་པར་གྲུབ་སྟེ་རྒྱ་གར་ལྷོ་ཕྱོགས་སུ་ཕེབས་ཀྱི་ཡོད་འདུག
ཕྱི་ཟླ་ ༡ ཚེས་ ༢༢ ནས་ཟླ་ཕྱེད་རིང་བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་མཆོག་གིས་སྦལ་ཌིག་(Baltic States) རྒྱལ་ཁབ་གསུམ་དང་། ཧྥིན་ལེན་ཌི། དབྱིན་ཡུལ། སྦེལ་ཇམ་སོགས་སུ་གཞུང་འབྲེལ་སྐོར་སྐྱོད་གནང་བཞིན་ཡོད་པ་ལྟར། ཟླ་འདིའི་ཕྱི་ཚེས་ ༤ ཉིན་སྲིད་སྐྱོང་སྤེན་པ་ཚེ་རིང་མཆོག་སྦེལ་ཇམ་ནང་ཕེབས་འབྱོར་བྱུང་སྟེ། སྦེལ་ཇམ་ཨན་ཌེ་ཝབ་ས་གནས་བོད་རིགས་མི་མང་རྣམས་འདུ་འཛོམས་གནང་བའི་ཐོག སྲིད་སྐྱོང་མཆོག་ནས་བོད་མིའི་སྒྲིག་འཛུགས་ཀྱི་སྲིད་ཇུས་དང་བོད་དོན་གྱི་དཀའ་ངལ་སེལ་ཐབས་སོགས་ཀྱི་སྐོར་ལ་གསུང་བཤད་གནང་ཡོད་པ་མ་ཟད། སྦེལ་ཇམ་གྱི་གཞོན་སྐྱེས་བོད་དོན་ཞུ་གཏུགས་པ་རྣམས་ཐུག་འཕྲད་གནང་སྟེ། འཛམ་གླིང་ཐོག་གི་བོད་མཐོ་སྒང་གི་གལ་གནད་ (Global Significance of the Tibetan Plateau) ཅེས་པའི་བརྗོད་གཞིའི་ཐོག་གསུང་བཤད་དང་དྲི་བར་ལན་འདེབས་གནང་ཡོད་འདུག
ཕྱི་ཚེས་ ༣ ཉིན་དབྱིན་ཡུལ་གྱི་ཝར་ཝི་ཁི་གཙུག་ལག་སློབ་གཉེར་ཁང་དུ། ཕྱི་ལོ་ ༢༠༢༤ ལོའི་དཔལ་འབྱོར་གླེང་སྟེགས་(Warwick Economics Summit)ཉིན་གཉིས་པའི་ཐོག སྲིད་སྐྱོང་སྤེན་པ་ཚེ་རིང་མཆོག་གིས་བོད་ཀྱི་རང་དབང་འཐབ་རྩོད་དང་གདོང་ལེན་ཞེས་པའི་བརྗོད་གཞིའི་ཐོག་གསུང་བཤད་གནང་ཡོད་པ་དང་། སྐབས་དེར་སྲིད་སྐྱོང་མཆོག་གིས་རྒྱ་ནག་གཞུང་གིས་རྒྱལ་སྤྱིའི་ཁྲིམས་ལུགས་རྩིས་མེད་རྡོག་རོལ་བཏང་སྟེ། བོད་ནང་གདུག་རྩུབ་མནར་གཅོད་གཏོང་བཞིན་ཡོད་ཀྱང་། བོད་མི་ཚོས་ཞི་བདེའི་ཐོག་ནས་གདོང་ལེན་བྱེད་མུས་ཡིན་པའི་སྐོར་དང་། རྒྱ་རིགས་སློབ་མ་ཁག་ཅིག་ལ་བོད་ཀྱི་ལོ་རྒྱུས་ཀྱི་སྐོར་ནས་ལན་འདེབས་གསལ་བཤད་གནང་ཡོད་འདུག དེ་བཞིན་སྲིད་སྐྱོང་མཆོག་ནས་དབྱིན་ཡུལ་ཁུལ་གྱི་མན་ཆེ་སི་ཌར་དང་། བྷིར་མེང་ཧེམ། ཝི་རལ་བཅས་ཀྱི་ས་གནས་བོད་རིགས་མི་མང་ལ་ཐུག་འཕྲད་གནང་སྟེ། སྐབས་བཅུ་དྲུག་པའི་བཀའ་ཤག་གི་ཕུགས་དམིགས་ཡིག་ཆའི་སྐོར་ལ་གསུང་བཤད་དང་དྲི་བ་དྲིས་ལན་གནང་ཡོད་འདུག
ཕྱི་ཚེས་ ༢ ཉིན་སྲིད་སྐྱོང་མཆོག་གིས་དབྱིན་ཡུལ་བོད་དོན་རྒྱབ་སྐྱོར་བ་དང་ཆེད་མཁས་པ་ཁག་ཅིག་དང་ལྷན་དུ་ཚོགས་འདུ་འཚོགས་ཡོད་ཅིང་། སྲིད་སྐྱོང་མཆོག་ནས་དབྱིན་ཡུལ་དང་རྒྱལ་སྤྱིའི་ཐོག་བོད་རྒྱའི་དཀའ་རྙོག་སེལ་ཐབས་ཀྱི་ཐད་གླེང་སློང་གནང་དགོས་པའི་སྐོར་གསུངས་ཡོད་འདུག ཉིན་དེའི་ཕྱི་དྲོར་སྲིད་སྐྱོང་མཆོག་གིས་བོད་མིའི་སྒྲིག་འཛུགས་དང་ཟུང་སྦྲེལ་གྱིས་བོད་དོན་ཞུ་གཏུགས་གནང་མཁན་གྱི་ཚོགས་པ་ཁག་དང་། དབྱིན་ཡུལ་གྱི་བོད་རིགས་ལྷན་ཚོགས་ཀྱི་ཚོགས་མི་རྣམས་དང་མཇལ་འཕྲད་གནང་འདུག
དེ་བཞིན་ཕྱི་ཚེས་ ༡ ཉིན་སྲིད་སྐྱོང་མཆོག་ལི་ཐུ་ནི་ཡཱ་ནང་ཕྱོགས་ཕེབས་གནང་སྐབས། ཡུལ་དེའི་གྲོས་ཚོགས་ཀྱི་ཚོགས་གཞོན་རཊ་ཝི་ལེ་ (Radvilė Morkūnaitė-Mikulėnienė )མཆོག་གི་དབུས་པའི་གྲོས་ཚོགས་འཐུས་མི་ཁག་ཅིག་དང་། ཕྱི་སྲིད་ལས་ཁུངས་ཀྱི་གནད་ཡོད་མི་སྣ་ཁག་ཅིག་བཅས་ལ་མཇལ་འཕྲད་གནང་ཡོད་འདུག སྐབས་དེར་སྲིད་སྐྱོང་མཆོག་གིས་ལི་ཐུ་ནི་ཡཱའི་གཞུང་ནས་ཉེ་ཆར་འཛམ་གླིང་མཉམ་འབྲེལ་རྒྱལ་ཚོགས་ཀྱིས་རྒྱ་ནག་ནང་གི་འགྲོ་བ་མིའི་ཐོབ་ཐང་ཐོག་དུས་བཀག་བསྐྱར་ཞིབ་གནང་བའི་སྐབས་བོད་དོན་ཐོག་རྒྱབ་སྐྱོར་གནང་བ་མ་ཟད། ཁོང་ལ་ལི་ཐུ་ནི་ཡཱའི་རྒྱལ་ཁབ་ཏུ་ཕེབས་བསུ་སྣེ་ལེན་ཞུས་པར་ཐུགས་རྗེ་ཆེ་ཞུས་ཡོད་འདུག
གསར་འགོད་པ་བྱམས་པ་ཚེ་རིང་གིས་བོད་མིའི་སྒྲིག་འཛུགས་ལས་བཏུས།
རྩོམ་སྒྲིག་པ། པདྨ་མཚོ།
