བོད་རྔ་བ་ཁུལ་འབར་ཁམས་གྲོང་ཁྱེར་གྱི་མགོ་ཁྲིད་གཞོན་པ་དང་རྔ་བ་ཁྱུང་ཆུ་རྫོང་གི་ཉེན་རྟོག་དཔོན་ཉི་ཡུང་གིས་རྒྱ་ནག་གི་ཁྲིམས་སྒྲིག་འགལ་ཡོད་ལུགས་བཤད་ནས་དམར་ཤོག་ཚོགས་པ་ནས་ཕྱིར་ཕུད་བྱས་འདུག
རྔ་བ་ཁུལ་འབར་ཁམས་གྲོང་ཁྱེར་དམར་ཤོག་ཚོགས་པའི་ཚོགས་མི་དང་། གྲོང་ཁྱེར་གྱི་མགོ་འཛིན་གཞོན་པ། གྲོང་ཁྱེར་ཉེན་རྟོག་ཁང་གི་དྲུང་ཡིག ཉེན་རྟོག་དཔོན་པོ་ཉི་ཡུང་གིས་ཁྲིམས་འགལ་ཚབས་ཆེན་བྱས་པ་དང་ལྐོག་རྔན་བླངས་བའི་ཉེས་མིང་འོག ཉེ་ཆར་རྔ་བ་ཁུལ་སྒྲིག་ཁྲིམས་ཞིབ་བཤེར་ལས་ཁུངས་ཀྱིས་འདྲི་ཞིབ་བྱས་པ་བརྒྱུད། མགོ་ཁྲིད་ཀྱི་གོ་གནས་བླངས་ཏེ་དམར་ཤོག་ཚོགས་པའི་ཚོགས་མི་ལས་ཕྱིར་ཕུད་བཏང་ཡོད་པའི་གནས་ཚུལ་ཐོན་ཡོད་འདུག
ཟླ་འདིའི་ཕྱི་ཚེས་ ༤ ཉིན་རྔ་བ་ཁུལ་སྒྲིག་ཁྲིམས་ཞིབ་བཤེར་ལས་ཁུངས་ཟེར་བ་ཞིག་གིས། ཉི་ཡུང་ཞེས་པ་དེར་སྒྲིག་ཁྲིམས་ཀྱི་འདུ་ཤེས་ཟེར་བ་ཞན་པ་དང་། ལྐོག་འབྲེལ་གྱིས་ཞིབ་བཤེར་ཟེར་བ་ལ་ཁ་གཏད་བཅག་པ། གཏན་འབེབས་དོན་ཚན་བརྒྱད་ཟེར་བ་དང་འགལ་བ། གོ་གནས་བེད་སྤྱོད་བྱས་ཏེ་མི་གཞན་ལ་ཉེས་ཆད་བཅད་པ། རྒྱུ་དངོས་འབོར་ཆེན་གྱི་ལྐོག་རྔན་བླངས་ཡོད་ལུགས་སོགས་བསྒྲགས་འདུག
ཉི་ཡུང་ནི་ཕྱི་ལོ་ ༡༩༧༦ ལོར་ཨན་ཧེ་རུ་སྐྱེས་ཡོད་ཅིང་། ཕྱི་ལོ་ ༢༠༠༢ ལོར་རྒྱ་ནག་དམར་ཤོག་ཚོགས་པའི་ཁོངས་སུ་ཞུགས་ཡོད་པ་དང་། ཕྱི་ལོ་ ༢༠༡༥ ནས་ ༢༠༢༠ བར་གཟི་ཚ་སྡེ་དགུ་དང་འབར་ཁམས་སུ་རིམ་པ་དང་པོའི་ཉེན་རྟོག་པའི་ལས་ཀ་བྱས་ཡོད་འདུག ཕྱི་ལོ་ ༢༠༢༠ ནས་ ༢༠༢༣ བར་ཁྱུང་ཆུ་རྫོང་གི་རྫོང་དཔོན་གཞོན་པ་དང་ཉེན་རྟོག་རུ་དཔོན་བྱས། ཕྱི་ལོ་ ༢༠༢༣ ཟླ་ ༤ ནས་འབར་ཁམས་གྲོང་ཁྱེར་གྱི་དཔོན་པོ་གཞོན་པ་དང་། གྲོང་ཁྱེར་ཉེན་རྟོག་རུ་དཔོན་བཅས་བྱས་ཡོད་འདུག འདས་ལོའི་ཕྱི་ཟླ་ ༡༡ པ་ནས་རྔ་བ་ཁུལ་སྒྲིག་ཁྲིམས་ཞིབ་བཤེར་ཁང་གིས་ལྐོག་རྔན་བླངས་བའི་དོགས་གཞིའི་འོག་འདྲི་ཞིབ་བྱས་ཡོད་འདུག
རྒྱ་ནག་གཞུང་གིས་ཕྱི་ལོ་ ༢༠༢༣ ལོ་གཅིག་པུར་གཏན་འབེབས་དོན་ཚན་བརྒྱད་ཟེར་བ་དང་འགལ་བའི་ཉེས་མིང་འོག མི་གྲངས་ ༡༥༣༦༦༢ ལ་ཞིབ་བཤེར་བྱས་ཡོད་པའི་ཁྲོད། མི་གྲངས་ ༡༠༨༦༩༥ ལ་ཉེས་ཆད་བཅད་ཡོད་འདུག་ལ། འདས་པའི་ལོ་ཤས་རིང་རྒྱ་ནག་གཞུང་གིས་ཉེས་མེད་དཔོན་རིགས་རྣམས་ལ་ནག་ཉེས་སྣ་ཚོགས་གཡོགས་ཀྱིན་ཡོད་པ་མ་ཟད། སྟག་རྒན་ཞེས་པའི་མིང་ཐོག་ནས་ཞི་ཅིན་ཕིན་གྱི་བསམ་བློ་དང་མི་མཐུན་པ་རྣམས་འབུར་འཇོམས་བཏང་དང་གཏོང་མུས་ཡིན་པ་རེད།
གསར་འགོད་པ། བྱམས་པ་ཚེ་རིང་།
རྩོམ་སྒྲིག་པ། པདྨ་མཚོ།
