སྲིད་སྐྱོང་མཆོག་གིས་རྒྱ་གར་ལྷོ་ཕྱོགས་བྷེང་ལོར་དུ་གཞུང་འབྲེལ་ཕྱོགས་སྐྱོད་གནང་མགོ་བཙུགས་ནས་བོད་དོན་ཐད་གཏམ་བཤད་དང་གནད་ཡོད་མི་སྣ་མཇལ་འཕྲད་གནང་གིན་ཡོད་འདུག
ཕྱི་ཟླ་ ༡ ཚེས་ ༢༢ ནས་ཟླ་ཕྱེད་རིང་བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་མཆོག་གིས་སྦལ་ཌིག་(Baltic States) རྒྱལ་ཁབ་གསུམ་དང་། ཧྥིན་ལེན་ཌི། དབྱིན་ཡུལ། སྦེལ་ཇམ་དང་རྒྱ་གར་ལྷོ་ཕྱོགས་བཅས་སུ་གཞུང་འབྲེལ་སྐོར་སྐྱོད་གནང་བཞིན་ཡོད་པ་ལྟར། ཟླ་འདིའི་ཕྱི་ཚེས་ ༦ ཉིན་སྲིད་སྐྱོང་མཆོག་གིས་རྒྱ་གར་ལྷོ་ཕྱོགས་བྷེང་ལོར་ཁུལ་དུ་རྒྱ་གར་གྱི་ཕྱི་སྲིད་དྲུང་ཆེ་ཟུར་པ་ལྕམ་སྐུ་ནི་རུ་པ་མ་རའོ་ལགས་དང་། གསར་འགོད་པ་སོགས་ལ་ཐུག་འཕྲད་གནང་ནས་བོད་ནང་གི་དངོས་ཡོད་ཀྱི་གནས་སྟངས་ཐད་བཀའ་མོལ་གནང་ཡོད་འདུག
ཉིན་དེར་སྲིད་སྐྱོང་མཆོག་གིས་བྷེང་ལོར་ Mount Carmel མཐོ་སློབ་ཏུ་བོད་མཐོ་སྒང་གི་གོ་ལའི་གལ་གནད་དང་། བོད་རྒྱ་གཉིས་ཀྱི་ལོ་རྒྱུས་ཀྱི་གལ་གནད། ས་བབ་ཆགས་ཚུལ་སོགས་ཀྱི་ཐད་ནས་བོད་མཐོ་སྒང་ནི་འཛམ་གླིང་གི་འབྱུང་ཁམས་ཆ་སྙོམས་གནས་ཐབས་སུ་གལ་གནད་ཆེ་ཤོས་ཀྱི་ས་ཚིགས་སུ་གྱུར་ཡོད་པའི་སྐོར། བོད་ཀྱི་ཆོས་རིག་སོགས་ཀྱི་སྐོར་ལ་དྲི་བ་དྲི་ལན་དང་གཏམ་བཤད་སྤེལ་ཡོད་པ་མ་ཟད། མཐོ་སློབ་དེའི་དགེ་ལས་ལྷན་གྲོས་མོལ་གནང་ཡོད་འདུག
ཡང་ཉིན་དེར་སྲིད་སྐྱོང་མཆོག་གིས་རྒྱ་གར་གྱི་བང་ཆེན་གསར་པ་(New Indian Express) གསར་ཁང་གི་གསར་འགོད་པ་བཱ་ལཱ་ཅོ་ཧཱན་ (Bala Chauhan) ལགས་ཀྱིས་བོད་ཀྱི་རང་དབང་ལས་འགུལ་སྐོར་ལ་བཅར་འདྲི་བྱས་པར་དང་ལེན་གནང་ཡོད་འདུག
ཟླ་འདིའི་ཕྱི་ཚེས་ ༤ ཉིན་སྲིད་སྐྱོང་སྤེན་པ་ཚེ་རིང་མཆོག་སྦེལ་ཇམ་ནང་ཕེབས་འབྱོར་བྱུང་སྟེ། སྦེལ་ཇམ་ཨན་ཌེ་ཝབ་ས་གནས་བོད་རིགས་མི་མང་རྣམས་འདུ་འཛོམས་གནང་བའི་ཐོག སྲིད་སྐྱོང་མཆོག་ནས་བོད་མིའི་སྒྲིག་འཛུགས་ཀྱི་སྲིད་ཇུས་དང་བོད་དོན་གྱི་དཀའ་ངལ་སེལ་ཐབས་སོགས་ཀྱི་སྐོར་ལ་གསུང་བཤད་གནང་ཡོད་པ་མ་ཟད། སྦེལ་ཇམ་གྱི་གཞོན་སྐྱེས་བོད་དོན་ཞུ་གཏུག་པ་རྣམས་ལ་ཐུག་འཕྲད་གནང་སྟེ། འཛམ་གླིང་ཐོག་གི་བོད་མཐོ་སྒང་གི་གལ་གནད་ (Global Significance of the Tibetan Plateau) ཅེས་པའི་བརྗོད་གཞིའི་ཐོག་གསུང་བཤད་དང་དྲི་བར་ལན་འདེབས་གནང་ཡོད་འདུག
འདས་པའི་བདུན་ཕྲག་གཉིས་ལྷག་གི་རིང་སྲིད་སྐྱོང་མཆོག་གིས་སྦལ་ཌིག་(Baltic States) རྒྱལ་ཁབ་གསུམ་དང་། ཧྥིན་ལེན་ཌི། དབྱིན་ཡུལ། སྦེལ་ཇམ་བཅས་ཡུ་རོབ་ནང་གི་རྒྱལ་ཁབ་དྲུག་ལ་ཕྱོགས་སྐྱོད་གནང་ནས། བོད་ནང་གི་དངོས་ཡོད་ཀྱི་གནས་སྟངས་དང་། བོད་མིའི་འགྲོ་བ་མིའི་ཐོབ་ཐང་། བོད་ཀྱི་ཁོར་ཡུག་སོགས་ཀྱི་ཐད་གཏམ་བཤད་དང་། རྒྱལ་ཁབ་དེ་དག་གི་གནད་ཡོད་མི་སྣ་དང་། སློབ་གསོ་བ། གསར་འགོད་པ་སོགས་ལ་ཐུག་འཕྲད་གནང་ཡོད་པ་རེད།
གསར་འགོད་པ། དཔལ་ལྡན།
