བོད་རྒྱལ་ལོ་ ༢༡༥༠ ལོར་༧གོང་ས་མཆོག་ནས་མཇལ་འཕྲད་གནང་བའི་གནད་ཡོད་མི་སྣ།
ཨོ་གླིང་གྲོས་ཚོགས་འོག་མའི་ཚོགས་གཞོན་ལྕམ་སྐུ་ཤཱ་རོན་ (Sharon Claydon) མཆོག་དང་། གྲོས་ཚོགས་གོང་མའི་འཐུས་མི་ལྕམ་སྐུ་ཇེ་ནེ་ཊི་ཨེ་ལི་ཛེ་བྷེ་ཐི་ར་ཡི་སི་ (Janet Elizabeth Rice) ལགས། གྲོས་ཚོགས་འོག་མའི་འཐུས་མི་སོ་ཧྥེ་ཨན་ན་ (Sophie Anna Scamps) ལགས། གྲོས་ཚོགས་འོག་མའི་འཐུས་མི་སུ་སན་རེ་ཡེ་ཊམ་པལ་མན་ (Susan Raye Templeman) ལགས་བཅས་ལས་གྲུབ་པའི་སྐུ་ཚབ་ཚོགས་ཆུང་ཞིག་གིས། ཕྱི་ལོ་ ༢༠༢༣ ཟླ་ ༤ ཚེས་ ༡༨ ཉིན་བཞུགས་སྒར་རྒྱལ་བའི་ཕོ་བྲང་དུ་༸གོང་ས་རྒྱལ་བ་རིན་པོ་ཆེ་མཆོག་ལ་མཇལ་བཅར་ཞུས་ཡོད་འདུག
ཧྥ་རན་སིའི་གྲོས་ཚོགས་འཐུས་མིའི་བོད་དོན་རྒྱབ་སྐྱོར་ཚོགས་པའི་ཚོགས་གཙོ་ལྕམ་སྐུ་ཇེ་ཁེ་ལིན་ (Jacqueline Eustache-Brinio) མཆོག་དང་། ཧྥ་རན་སིའི་གྲོས་ཚོགས་གོང་མིའི་འཐུས་མི་ལྕམ་སྐུ་ཨེལ་སེ་ཇོ་སེ་ཧྤི་ (Else Joseph) ལགས་དང་། སྐུ་ཞབས་ཨུ་ལི་ཝིར་རི་ཌི་མན་ (Olivier Rietmann) ལགས། ལས་བྱེད་སྐུ་ཞབས་ཐེ་རེ་མུ་ནིར་ (Thierry Munier) ལགས་བཅས་ཚོགས་མི་བཞི་ལས་གྲུབ་པའི་སྐུ་ཚབ་ཚོགས་ཆུང་ཞིག་གིས། ཕྱི་ལོ་ ༢༠༢༣ ཟླ་ ༤ ཚེས་ ༢༠ ཉིན་བཞུགས་སྒར་རྒྱལ་བའི་ཕོ་བྲང་དུ། ༧གོང་ས་རྒྱལ་བ་རིན་པོ་ཆེ་མཆོག་ལ་མཇལ་བཅར་ཞུས་ཡོད་པ་དང་། སྐབས་དེར་༧གོང་ས་རྒྱལ་བ་རིན་པོ་ཆེ་མཆོག་ནས། ང་ཚོས་འཛམ་གླིང་ཞི་བདེ་ལེགས་འགྲུབ་ཡོང་བར་བསམ་བློ་གཏོང་དགོས་ཀྱི་འདུག དཀའ་ངལ་གྱི་འབྱུང་ཁུངས་གཅིག་ནི་ངའི་རྒྱལ་ཁབ་དང་། ངའི་ཆོས་ལུགས་ཀྱི་དབྱེ་འབྱེད་ལས་འབྱུང་གི་ཡོད། ད་ལྟའི་དུས་ལ་ང་ཚོས་འགྲོ་བ་མི་གཅིག་པ་ཡིན་པར་བསམ་བློ་གཏོང་དགོས་ཀྱི་འདུག འཛམ་གླིང་ནང་མི་གྲངས་ཐེར་འབུམ་བདུན་བརྒྱད་ཡོད་པ་ཚང་མ་གཅིག་པ་རེད། ངོས་རང་ཞོགས་པ་ཡར་ལངས་དུས་ནས་ང་ཚོ་ཚང་མ་འགྲོ་བ་མི་གཅིག་པར་བསམ་བློ་གཏོང་གི་ཡོད། ཅེས་སོགས་བཀའ་སློབ་བསྩལ།
རྒྱ་གར་གཅེར་བུ་བའི་བླ་ཆེན་ཨཱ་ཅཱརྱ་ལོ་ཀེཤ་མུ་ནི་ (Acharya Dr. Lokesh Muni) མཆོག་དང་། ཧིན་དྷུའི་བླ་ཆེན་མཱ་ཧཱ་མཾཌེལཥ་ཝར་མཱ་ཧནྟ་ན་ཝལ་ཀི་ཤོར་དྷས་ (Maha Mandleswar Mahant Naval Kishore Das) མཆོག སིག་གི་བླ་ཆེན་ཇཱ་ཐེ་ཌིར་ཇཱི་ནི་རཱན་ཇི་ཏི་སེངྷ་(Jathedar Giani Ranjit Singh)་མཆོག་བཅས་ཕྱི་ཟླ་ ༥ ཚེས་ ༤ ཉིན་བཞུགས་སྒར་རྒྱལ་བའི་ཕོ་བྲང་དུ་༧གོང་ས་རྒྱལ་བ་རིན་པོ་ཆེ་མཆོག་ལ་མཇལ་བཅར་ཞུས་ཡོད་པ་མ་ཟད། རྒྱ་གར་གྱི་རྒྱལ་ས་ལྡི་ལི་རུ་ཆོས་ལུགས་མཐུན་འབྲེལ་གྱི་ཚོགས་ཆེན་འཚོག་གཏན་འཁེལ་ཡོད་པ་ལྟར། ༧གོང་ས་རྒྱལ་བ་རིན་པོ་ཆེ་མཆོག་ཚོགས་མགོན་དུ་ཆིབས་སྒྱུར་བཀའ་དྲིན་སྐྱོང་གནང་ཡོང་བའི་གསོལ་འདེབས་ཞུས་ཡོད་པ་རེད།
ཨ་རིའི་རོགས་ཚོགས་ཀྱི་འཛིན་སྐྱོང་འགན་འཛིན་གཞོན་པ་ཨི་སོ་བེལ་ཀོལ་མན་ (Isobel Coleman) ལགས་དང་། འཛིན་སྐྱོང་ལས་རོགས་མའེ་ཀལ་སི་ཧི་ཧྥར་ (Michael Schiffer) ལགས། ཨ་རིའི་རོགས་ཚོགས་ཀྱི་རྒྱ་གར་ཁུལ་གྱི་ཆེད་གཉེར་དོན་གཅོད་ལས་ཚབ་ཀ་རེན་ཀི་ལི་མུ་སི་ཀི་ (Karen Klimowski) ལགས། འཛིན་སྐྱོང་འགན་འཛིན་གཞོན་པའི་དམིགས་བསལ་ལས་རོགས་ཨི་མི་ལི་གྷི་རིན་ (Emily Green) ལགས། ལས་བྱའི་གཙོ་འཛིན་གཞོན་པ་སོ་ན་ལི་ཀོར་ཊེ་ (Sonali Korde) ལགས། འཛིན་སྐྱོང་འགན་འཛིན་གཞོན་པའི་སློབ་སྟོན་པ་རྒན་པ་སོ་ཕི་ཡ་ལ་ལ་ནི་ (Sophia Lalani) ལགས་བཅས་ཀྱིས། ཕྱི་ལོ་ ༢༠༢༣ ཟླ་ ༦ ཚེས ༡༤ ཉིན་བཞུགས་སྒར་རྒྱལ་བའི་ཕོ་བྲང་དུ། ༧གོང་ས་རྒྱལ་བ་རིན་པོ་ཆེ་མཆོག་ལ་མཇལ་བཅར་ཞུས་ཡོད་པ་རེད།
ཕྱི་ལོ་ ༢༠༢༣ ཟླ་ ༧ ཚེས་ ༩ ལ་ཉིན་རྒྱ་གར་གྱི་རྒྱལ་ས་ལྡི་ལི་རུ། ཨ་རིའི་བོད་དོན་དམིགས་བསལ་འབྲེལ་མཐུད་པ་ལྕམ་ཨུ་ཛི་རཱ་ཛེ་ཡཱ་(Uzra Zeya)་མཆོག་གིས་སྣེ་ཁྲིད་པའི་ཨ་རིའི་ལྡི་ལིའི་གཞུང་ཚབ་ཆེན་མོ་ཨེ་རི་ཁི་གྷར་སེ་ཌ་ཌི་(Eric Garcetti) ལགས་དང་། ཨ་རིའི་རོགས་དངུལ་ཐེབས་རྩ་ཁང་གི་ཨེ་ཤ་ཡའི་སྡེ་ཚན་འགན་འཛིན་ཨན་ཇཱ་ལི་ཀཱ་ལུ་ (Anjali Kaul) ལགས་སོགས་ཀྱི་ཨ་རིའི་ཆེས་མཐོའི་སྐུ་ཚབ་ཚོགས་ཆུང་ཞིག་གིས། ༧གོང་ས་རྒྱལ་བ་རིན་པོ་ཆེ་མཆོག་ལ་མཇལ་བཅར་ཞུས་ཡོད་པ་རེད།
ཕྱི་ལོ་ ༢༠༢༣ ཟླ་ ༩ ཚེས་ ༢༢ ཉིན་གྱི་སྔ་དྲོར་བཞུགས་སྒར་རྒྱལ་བའི་ཕོ་བྲང་དུ། རྒྱ་གར་རྒྱལ་ཡོངས་སྤྱི་ཚོགས་ཞབས་ཞུ་ཚོགས་པ་ (Rashtriya Swayamsewak Sangh) དང་། རྒྱ་གར་བོད་དོན་རྒྱབ་སྐྱོར་ཚོགས་པ་ (Bharat Tibbat Sangh) གཉིས་ཀྱི་ཚོགས་མི་ཁག་ཅིག་ལས་གྲུབ་པའི་སྐུ་ཚབ་ཚོགས་ཆུང་ཞིག་གིས་༧གོང་ས་མཆོག་ལ་མཇལ་བཅར་ཞུས་ཡོད་འདུག
ཕྱི་ལོ་ ༢༠༢༣ ཟླ་ ༡༡ ཚེས་ ༢༠ ཉིན་བཞུགས་སྒར་རྒྱལ་བའི་ཕོ་བྲང་དུ། ཡུ་རོབ་གྲོས་ཚོགས་ཀྱི་ཚོགས་གཙོ་ཟུར་བ་འབུམ་རམས་པ་ཧན་སི་གྷར་ཊི་པོ་ཊི་རེན་ལགས་ཀྱིས་༧གོང་ས་རྒྱལ་བ་རིན་པོ་ཆེ་མཆོག་ལ་མཇལ་བཅར་ཞུས་ཡོད་པ་དང་། མཇལ་ཁའི་སྐབས་འབུམ་རམས་པ་ཧན་སི་གྷར་ཊི་པོ་ཊི་རེན་ (Dr. Hans-Gert Pottering) ལགས་ཀྱིས། ལོ་ངོ་བཅོ་ལྔའི་རྗེས་ནས་ང་སྐུ་ཉིད་དང་མཇལ་རྒྱུ་བྱུང་བར་ཧ་ཅང་དགའ་པོ་བྱུང་། སྐུ་ཉིད་ཕྱི་ལོ་ ༢༠༠༨ ལོའི་ཟླ་ ༡༢ ཚེས་ ༤ ཉིན་ཡུ་རོབ་གྲོས་ཚོགས་སུ་ཕེབས་པ་རེད། ང་ཚོར་མཇལ་བཅར་གནང་བར་ཐུགས་རྗེ་ཆེ་ཞུ་རྒྱུ་ཡིན། ཞེས་ཞུས་པ་དང་བསྟུན། སྐུ་ཞབས་ཁོང་གི་མི་ཚེ་ལོ་རྒྱུས་འཁོད་པའི་དཔེ་དེབ་ཅིག་༧གོང་ས་མཆོག་ལ་ངོ་སྤྲོད་ཞུས་ཏེ། ང་རང་ཡུ་རོབ་གྲོས་ཚོགས་ཀྱི་སྲིད་འཛིན་ཡིན་དུས། ངེད་གཉིས་ངའི་ལས་ཁུངས་སུ་ཐུག་པ་དང་། སྐབས་དེར་སྐུ་ཉིད་ནས་ངེད་གཉིས་བློ་མཐུན་ཡིན་གསུངས་བྱུང་། ངས་ང་བློ་མཐུན་གྲོགས་ལ་དགའ་པོ་མེད། ངེད་གཉིས་གྲོགས་པོ་ཡིན་ལབ་ནས་ངེད་གཉིས་གྲོགས་སུ་གྱུར་བ་རེད། ཅེས་སོགས་ཞུས་འདུག
ཕྱི་ལོ་ ༢༠༢༣ ཟླ་ ༡༢ ཚེས་ ༦ ཉིན་གྱི་ཞོགས་པར་བཞུགས་སྒར་རྒྱལ་བའི་ཕོ་བྲང་དུ། རྒྱ་གར་གྱི་གློག་བརྙན་འཁྲབ་ཁྲིད་པ་གྲགས་ཅན་ཨ་བྷི་ཤེཀ་དྷུ་དྷེ་ཡཱ་(Abhishek Dudhaiya)ལགས་དང་། གློག་བརྙན་བཟོ་སྐྲུན་པ་རྗེ་པ་ཊེལ་(Jay Patel) ལགས་གཉིས་ཀྱིས་༧གོང་ས་རྒྱལ་བ་རིན་པོ་ཆེ་མཆོག་ལ་མཇལ་བཅར་ཞུས་ཡོད་པ་དང་། སྐབས་དེར་ཁོང་གཉིས་ཀྱིས་མ་འོངས་བར་རྒྱ་ནག་གཞུང་གིས་༧ཀུན་གཟིགས་༧པཎ་ཆེན་རིན་པོ་ཆེ་མཆོག་ཇི་ལྟར་བཙན་ཁྲིད་བྱས་པའི་སྐོར་གྱི་དངོས་བྱུང་གློག་བརྙན་ཞིག་དང་། ༧གོང་ས་རྒྱལ་བ་རིན་པོ་ཆེ་མཆོག་གི་སྐོར་གྱི་མུ་འབྲེལ་གློག་བརྙན་(web series) ཞིག དེ་བཞིན་བོད་དང་འབྲེལ་བའི་གཏམ་རྒྱུད་གློག་བརྙན་(Feature Film) ཞིག་བཅས་བཟོ་འཆར་ཡོད་སྐོར་སྙན་སེང་ཞུས་འདུག
ཕྱི་ལོ་ ༢༠༢༤ ཟླ་ ༢ ཚེས་ ༩ ཉིན་བོད་ཀྱི་དུས་བབ་གསར་ཁང་གི་གསར་འགོད་པ་བྱམས་པ་ཚེ་རིང་གིས་ཕྱོགས་སྒྲིག་བྱས་ཏེ་སྤེལ།
