༧རྒྱལ་དབང་སྐུ་ཕྲེང་བཅུ་གསུམ་པ་ཆེན་པོ་མཆོག་གིས་ཆུ་གླང་རྩ་ཚིག་ཆེན་མོའི་བསྒྲགས་གཏམ་སྤེལ་ནས་མི་ལོ་ཧྲིལ་པོ་ ༡༡༡ འཁོར་བའི་དུས་དྲན་སྲུང་གཙིའི་མཛད་སྒོ་དང་བསྟུན་བོད་དོན་ལས་འགུལ་བ་ཐུབ་བསྟན་ཆོས་ཉིད་ལགས་སུ་ཐུགས་རྗེ་ལེགས་གསོལ་གྱི་ཆེ་བསྟོད་གཟེངས་རྟགས་དབུལ་རྒྱུ་ཡིན་འདུག
འདས་ལོའི་གསུམ་བཅུའི་དུས་དྲན་ནས་བཟུང་ཨ་རིའི་ཧྥི་ལཱ་ཌལ་ཧྥི་ཡ་གྲོང་ཁྱེར་དུ་གནས་སྡོད་བྱེད་མཁན་བོད་དོན་ལས་འགུལ་བ་ཐུབ་བསྟན་ཆོས་ཉིད་ལགས་ཀྱིས་ལོ་ངོ་གཅིག་རིང་བོད་རང་བཙན་ཁུངས་སྐྱེལ་དང་རྒྱབ་སྐྱོར་འཚོལ་ཆེད་ཀྱི་བོད་དོན་ལས་འགུལ་སྤེལ་གྱི་ཡོད་པ་ལྟར། ཨ་རིའི་ཕྱི་ཚེས་ ༡༣ ཉིན་གྱི་ཞོགས་པའི་ཆུ་ཚོད་ ༩།༣༠ སྟེང་ནེའུ་ཡོག་དང་ནེའུ་འཇར་སིའི་ས་གནས་བོད་རྒྱལ་ཡོངས་རང་བཙན་ལྷན་ཚོགས་ཀྱིས་ཧྥི་ལཱ་ཌལ་ཧྥི་ཡའི་རང་བཙན་ཚོགས་ཁང་གི་མདུན་ཐང་དུ། ༧རྒྱལ་དབང་སྐུ་ཕྲེང་བཅུ་གསུམ་པ་ཆེན་པོ་མཆོག་གིས་ཆུ་གླང་རྩ་ཚིག་ཆེན་མོའི་བསྒྲགས་གཏམ་སྤེལ་ནས་མི་ལོ་ཧྲིལ་པོ་ ༡༡༡ འཁོར་བའི་དུས་དྲན་སྲུང་གཙིའི་མཛད་སྒོ་དང་བསྟུན། བོད་དོན་ལས་འགུལ་བ་ཐུབ་བསྟན་ཆོས་ཉིད་ལགས་སུ་ཐུགས་རྗེ་ལེགས་གསོལ་གྱི་ཆེ་བསྟོད་གཟེངས་རྟགས་དབུལ་རྒྱུ་ཡིན་འདུག
ཁ་སང་ཕྱི་ཚེས་ ༡༢ ཉིན་ཨ་རིའི་ཧྥི་ལཱ་ཌལ་ཧྥི་ཡ་ (Philadelphia) གྲོང་ཁྱེར་གྱི་རང་བཙན་ཚོགས་ཁང་མདུན་དུ། བོད་དོན་ལས་འགུལ་བ་ཐུབ་བསྟན་ཆོས་ཉིད་ལགས་ཀྱིས་གཏམ་བཤད་ཅིག་སྤེལ་བའི་ནང་། དེ་རིང་ངས་འདིར་ཆོས་དབྱིངས་མཁས་གྲུབ་ལགས་ཀྱི་སྐུ་པར་ཞིག་དམིགས་བསལ་གདན་འདྲེན་ཞུས་ཡོད། ཁོང་ནི་བོད་ནང་གི་བཙོན་ཁང་དུ་ལོ་ངོ་ ༢༣ རིང་བཙོན་འཇུག་མནར་གཅོད་མྱངས་དང་མྱོང་མུས་རེད། ངས་འཛམ་གླིང་ཡོངས་སུ་ཁོང་གི་སྐུ་པར་བཀྲམ་སྟེ་བོད་ཀྱི་ལོ་སར་སྲུང་གཙི་བྱེད་བཞིན་ཡོད། ཁོང་དང་ཁོང་འདྲ་བ་ཚོ་བོད་ཀྱི་ལོ་སར་རོལ་རྒྱུ་ཕར་བཞག ཉིན་གཅིག་ལ་ཞལ་ལག་ཡག་པོ་ཞིག་ཀྱང་ཡོད་པ་མ་རེད། ཉིན་གཅིག་དང་། ཟླ་གཅིག ལོ་གཅིག་ཙམ་མིན་པར་ཚེ་བཙོན་གྱི་ཁྲིམས་ཐག་འོག་བཙོན་ཁང་དུ་མནར་གཅོད་མྱོང་བཞིན་ཡོད་པ་རེད། དེར་བརྟེན། ངས་དེ་རིང་ཁོང་གི་སྐུ་པར་གདན་འདྲེན་ཞུས་ཡོད། ཅེས་དང་། ཁོང་གི་སྐུ་པར་འདི་བོད་གཞིས་བྱེས་གཉིས་ལྷན་འཛོམས་མ་བྱུང་བར་དུ་ལོ་མི་སར་བའི་ལས་འགུལ་སྤེལ་མཁན་ཆབ་སྲིད་བཙོན་ཟུར་བསྟན་པ་དར་རྒྱས་ལགས་བརྒྱུད་ནས་རྙེད་སོན་བྱུང་བ་རེད། ཅེས་བརྗོད་འདུག
ཁོང་གིས། བོད་ནང་དུ་ཉིན་འཁྱོལ་ཡང་མཚན་མ་འཁྱོལ་བའི་གདུག་རྩུབ་མནར་གཅོད་མྱོང་བཞིན་པའི་ཆབ་སྲིད་བཙོན་པ་གྲངས་ལས་འདས་པ་ཡོད། ད་དུང་ཆབ་སྲིད་བཙོན་པ་མང་པོ་ཞིག་གར་སོང་ཆ་མེད་དུ་གྱུར་ཡོད་པ་རེད། དཔེར་ན། ༧ཆུང་སྲིད་ཀུན་གཟིགས་པཎ་ཆེན་རིན་པོ་ཆེ་མཆོག་དགུང་ལོ་དྲུག་ཐོག་འཛིན་བཟུང་བྱས་ཡོད་ཅིང་། ཁོང་དང་ཁོང་གི་ཕ་མ་དགེ་རྒན་སོགས་གར་སོང་ཆ་མེད་དུ་གྱུར་བ་རེད། ད་ལྟ་བར་དུ་མཉམ་འབྲེལ་རྒྱལ་ཚོགས་དང་། འཛམ་གླིང་གི་སྟོབས་ཆེན་རྒྱལ་ཁབ་ཨ་རི་སོགས་ཀྱིས་ཀྱང་གནད་དོན་དེའི་ཐོག་ལ་གང་ཡང་གནང་ཐུབ་མེད་པ་རེད། གཞན་ཡང་། རྒྱ་ནག་གཞུང་གིས་བོད་མི་འབུམ་ཕྲག་མང་པོ་བསད་པ་དང་། དགོན་སྡེ་སྟོང་ཕྲག་མང་པོ་གཏོར་བཤིག་བཏང་ཡོད་པ་མ་ཟད། དངོས་ཤུགས་བརྒྱུད་གསུམ་ནས་ཐབས་ལམ་ཡོད་རྒུ་བཏོན་ཏེ་བོད་མི་རིགས་ཤུལ་མེད་རྩ་མེད་གཏོང་བཞིན་ཡོད་པའི་ཐོག ང་ཚོའི་བྱིས་པ་ལོ་ ༥ ནས་ཕ་མ་དང་ལོ་མང་པོ་ཐུག་འཕྲད་བྱེད་འཇུག་གི་མེད་པ་རེད། ཅེས་སོགས་བརྗོད་འདུག
ཡང་ཁོང་གིས། རྒྱ་ནག་གུང་ཁྲན་ཏང་གི་བྱ་སྤྱོད་ལ་བརྟེན་ནས་འཛམ་གླིང་ཡོངས་སུ་ཤུགས་རྐྱེན་ངན་པ་འཇོག་བཞིན་ཡོད་ཀྱང་། གུང་ཁྲན་ཏང་གི་བྱ་སྤྱོད་ངན་པ་དེ་ལམ་ལྷོངས་ཡོང་གི་མ་རེད། རྒྱུ་མཚན་ནི་འཛམ་གླིང་མི་མང་གཉིད་སད་ཡོད་པ་དང་། གུང་ཁྲན་ཏང་ལ་བདེན་པ་སྤུ་ཙམ་ཡང་མེད། རྒྱ་ནག་ནི་སྐྱག་རྫུན་གྱི་ཁེངས་པའི་རྒྱལ་ཁབ་ཅིག་ཆགས་ཡོད་པར་བརྟེན། རྒྱ་མི་རིགས་ཀྱི་ཤེས་ཡོན་ཅན་མང་པོ་ཞིག་ཕྱི་རྒྱལ་དུ་བྲོས་འགྲོ་ཡི་ཡོད་པ་རེད། ཤེས་ཡོན་མེད་མཁན་རྣམས་རྒྱ་གཞུང་གི་མགོ་སྐོར་འོག་ཚུད་ཀྱི་ཡོད་ལ། མི་དེ་འདྲའི་རིགས་ལ་གོ་གནས་དང་། རྒྱུ་ནོར་སོགས་སྤྲོད་པ་མ་ཟད། འཛེམ་ཟོན་སྤུ་ཙམ་ཡང་མེད་པར་དམར་གསོད་སོགས་གཏོང་གིན་ཡོད་པ་རེད། ཅེས་དང་། དེང་སྐབས་ང་ཚོ་རྒྱ་ནག་གཞུང་གི་མགོ་སྐོར་འོག་ཚུད་དེ། བརྙན་འཕྲིན་ནང་བོད་ནང་དུ་ཁྲ་ཁྲ་ཟང་ཟིང་གིས་ཁེངས་ཡོད་པ་དང་། བོད་ནང་གི་བོད་མི་དེ་དག་གླུ་དང་གར་གྱི་འཚོ་བར་རོལ་བསྡད་པ་སྟོན་གྱི་ཡོད་ཀྱང་། དོན་དངོས་སུ་བོད་ནང་དུ་ཕར་འགྲོ་ཚུར་འོང་གི་རང་དབང་མེད་པ་རེད། བོད་མི་རིགས་ནི་སངས་རྒྱས་བཅོམ་ལྡན་འདས་ཀྱི་ཆོས་ལ་དད་པ་བྱེད་མཁན་གྱི་མི་རིགས་ཤིག་ཡིན་ཡང་། ང་ཚོ་སོ་སོའི་དགོན་པའི་ནང་དུ་ཆོས་བྱེད་པའི་རང་དབང་མེད། གལ་ཏེ་དགོན་སྡེ་ཁག་ལ་མཆོད་མཇལ་དུ་འགྲོ་དགོས་བྱུང་ཚེ། རྒྱ་གཞུང་ལ་ཆོག་མཆན་ཞུ་དགོས་པ་སོགས་དམ་དྲག་ཤུགས་ཆེན་བྱེད་ཀྱི་ཡོད། འཛམ་གླིང་ས་ཕྱོགས་གང་སར་གནས་སྟངས་དེ་འདྲ་མེད་པ་དང་། བོད་ནང་གི་དངོས་ཡོད་གནས་ཚུལ་ཁྱབ་བསྒྲགས་བྱེད་པར་ཉེན་ཁ་ཆེན་པོ་ཡོད་ལ། རྒྱལ་སྤྱིའི་གསར་ཁང་ཚད་ལྡན་གྱི་གསར་འགོད་པ་ཚོའང་བོད་ནང་དུ་འགྲོ་ཐུབ་ཀྱི་མེད་པ་མ་ཟད། བོད་ནང་དུ་ཉིན་འཁྱོལ་ཡང་མཚན་མ་འཁྱོལ་བའི་གནས་སྟངས་བྱུང་གི་ཡོད་སྟབས། དེ་ནི་ཕྱི་རྒྱལ་དུ་ཡོད་པའི་བོད་རིགས་ཡོད་དོ་ཅོག་གིས་ཤེས་དགོས་ཀྱི་ཡོད་པ་རེད། ཅེས་བརྗོད་སོང་།
གསར་འགོད་པ། བྱམས་པ་ཚེ་རིང་།
