སྡེ་དགེ་རྫོང་མི་མང་ཚོགས་ཁང་གི་སྒོ་འགྲམ་དུ་བོད་མི་མང་དག་ཅིག་འདུ་འཛོམས་ཀྱིས་སྡེ་དགེ་རྫོང་ཁོངས་ཀྱི་འབྲི་ཆུའི་བཞུར་རྒྱུན་དུ་ཆུ་རགས་གསར་རྒྱག་དང་ཡུལ་མི་གནས་སྤོར་ལ་མོས་མཐུན་མེད་པའི་ངོ་རྒོལ་ལས་འགུལ་སྤེལ།
རྒྱ་ནག་གཞུང་གིས་འབྲི་ཆུར་ཆུ་རགས་གསར་རྒྱག་དང་ཁུལ་དེའི་མི་མང་རྣམས་བཙན་གྱིས་ས་གནས་གཞན་དུ་གནས་སྤོར་བྱ་དགོས་པའི་བཙན་བཀའ་བཏང་དང་གཏོང་གིན་ཡོད་པ་ལྟར། དེ་རིང་སྡེ་དགེ་རྫོང་མི་མང་ཚོགས་ཁང་གི་སྒོ་འགྲམ་དུ། བོད་མི་མང་དག་ཅིག་འདུ་འཛོམས་ཀྱིས་རྒྱ་གཞུང་གི་མགོ་ཁྲིད་རྣམས་ལ། སྡེ་དགེ་རྫོང་ཁོངས་སུ་ཆུ་རགས་གསར་རྒྱག་དང་ཁུལ་དེའི་དགོན་སྡེ་དྲུག་དང་། འབྲི་ཆུ་ཤར་ནུབ་གཉིས་ཀྱི་སྡེ་ཁག་ ༢༥ ཡས་མས་གནས་སྤོར་ལས་གཞི་ལ་མོས་མཐུན་མེད་པས་མཚམས་འཇོག་དགོས་པའི་ངོ་རྒོལ་ལས་འགུལ་ཞིག་སྤེལ་འདུག
དེའི་ཐད་འབྲེལ་ཡོད་བོད་མི་ཞིག་གིས་འདི་གའི་གསར་འགོད་པར། འདས་པའི་ལོ་ཤས་གོང་ནས་རྒྱ་ནག་གཞུང་གིས་སྡེ་དགེ་རྫོང་གི་དབོན་སྟོད་ཤང་གི་འབྲི་ཆུའི་བཞུར་རྒྱུན་དུ་ཆུ་རགས་དང་གློག་ཁང་གསར་རྒྱག་གི་ལས་གཞི་སྤེལ་ནས། ཡུལ་དེའི་དགོན་སྡེ་དང་གྲོང་བརྡལ་གནས་སྤོར་བྱ་དགོས་ཀྱི་ཡོད་ལུགས་འཆད་ཀྱིན་ཡོད་སྐོར་སོགས་འགྲེལ་བརྗོད་གནང་བྱུང་།
ཡང་ཁོང་གིས། རྒྱ་ནག་གཞུང་གིས་སྡེ་དགེ་རྫོང་ཁོངས་སུ་ཆུ་རགས་གསར་རྒྱག་གི་ལས་གཞི་དེའི་ཁྲོད་དུ། དགོན་སྡེ་དྲུག་དང་། འབྲི་ཆུ་ཤར་ནུབ་གཉིས་ཀྱི་སྡེ་ཁག་ ༢༥ ཡས་མས་གནས་སྤོར་བྱ་དགོས་ལུགས་བཤད་ཀྱི་ཡོད་པས། བོད་མི་ཚོས་མི་མང་ཚོགས་ཁང་གི་སྒོ་ཁར་འཛོམས་ནས་ལས་གཞི་དེར་མོས་མཐུན་མེད་པའི་ངོ་རྒོལ་ལས་འགུལ་སྤེལ་ཡོད་སྐོར་སོགས་འགྲེལ་བརྗོད་གནང་བྱུང་།
འདི་གའི་གསར་འགོད་པས་རྒྱུས་ལོན་བྱེད་ཐབས་བྱས་ཀྱང་བོད་ནང་དུ་དམ་དྲག་ཆེ་བའི་དབང་གིས། དེ་རིང་སྡེ་དགེ་རྫོང་མི་མང་ཚོགས་ཁང་གི་སྒོ་འགྲམ་དུ་བོད་མི་རྣམས་ཀྱིས་རྒྱ་ནག་གཞུང་གི་ལས་གཞི་དེར་མོས་མཐུན་མེད་པའི་ལས་འགུལ་སྤེལ་ཡོད་པའི་གནས་ཚུལ་ཙམ་ལས། དེའི་སྐོར་གྱི་ཞིབ་ཕྲའི་གནས་ཚུལ་ཤེས་རྟོགས་གང་ཡང་བྱུང་མ་སོང་།
གསར་འགོད་པ། དཔལ་ལྡན།
![Changpa nomads walk on a rugged path in Ladakh's Chushul valley [Tarushi Aswani/Al Jazeera]](https://tibettimes.net/wp-content/uploads/2026/10/Screen-Shot-2026-10-16-at-2.29.07-PM-360x180.png)
