རྒྱ་ནག་གིས་འབྲུག་གི་ས་མཚམས་ཁུལ་དུའང་གྲོང་གསེབ་གསར་རྒྱག་བྱས་ཏེ་རྙོག་དྲ་སློང་གི་ཡོད་འདུག

རྒྱ་ནག་དང་འབྲུག་རྒྱལ་ཁབ་གཉིས་ཀྱི་བར་ལ་མཐའ་མཚམས་དང་འབྲེལ་བའི་གནད་དོན་ཐོག་ལ་གླེང་སློང་བྱེད་བཞིན་ཡོད་ཀྱང་། རྒྱ་ནག་གཞུང་གིས་རྩོད་རྙོག་ཆེ་བའི་འབྲུག་གི་མཐའ་མཚམས་ས་ཁུལ་དུ་གྲོང་གསེབ་གསར་རྒྱག་བྱས་ཏེ་ད་བར་མཐའ་མཚམས་ཀྱི་གྲོང་གསེབ་ ༣ འཛུགས་སྐྲུན་བྱས་ཚར་ཡོད་འདུག

རྒྱ་ནག་གཞུང་གིས་མཐའ་མཚམས་བརྟན་སྲུང་ཞེས་པའི་སྲིད་ཇུས་འོག་འབྲུག་ཡུལ་དང་རྒྱ་གར་གྱི་ས་མཚམས་ཁུལ་དུ་གྲོང་ཚོ་གསར་རྒྱག་གི་ལས་གཞི་རྒྱ་ཆེར་སྤེལ་བཞིན་ཡོད་པ་མ་ཟད། རྒྱ་ནག་དང་འབྲུག་ཡུལ་གཉིས་ཀྱི་བར་ལ་རྩོད་རྙོག་ཡོད་པའི་མཐའ་མཚམས་ས་ཁུལ་ (Tamalung) ཞེས་པ་རུ། དེ་སྔ་ཁྱིམ་ཚང་ ༧༠ ཙམ་ལས་མེད་ཀྱང་ད་ལྟ་གྲོང་གསེབ་དེ་ལྡབ་གཅིག་ལྷག་འཛུགས་སྐྲུན་རྒྱ་སྐྱེད་བཏང་སྟེ་ཁྱིམ་ཚང་ ༢༣༥ ཙམ་གནས་སྤོར་བཏང་ཡོད་པ་དང་། འདས་ལོའི་ཕྱི་ཟླ་ ༡༢ ཚེས་ ༢༨ ཉིན་གྲོང་གསེབ་གསར་པ་དེའི་ནང་བོད་གཞིས་ཀ་རྩེ་ནས་ཡིན་པའི་ཁྱིམ་ཚང་ ༣༧ གནས་སྤོ་རུ་བཅུག་ཡོད་འདུག་ལ། རིམ་གྱིས་གྲོང་གསེབ་དེ་དག་གྲོང་ཁྱེར་ཅན་དུ་བསྒྱུར་འཆར་ཡོད་སྐོར་ཡང་བསྒྲགས་འདུག

ཧོང་ཀོང་དུ་རྟེན་གཞི་བྱས་པའི་རྒྱ་ནག་ལྷོ་རྒྱུད་ཞོགས་པའི་ཆ་འཕྲིན་ (South China Morning Post) གྱིས་དེ་འབྲེལ་གནས་ཚུལ་སྤེལ་བའི་ནང་། འདས་ལོའི་ཕྱི་ཟླ་ ༡༢ ནང་གཞིས་ཀ་རྩེ་ནས་ཡིན་པའི་ཁྱིམ་ཚང་དེ་དག་གནས་སྤོ་མ་བྱས་གོང་གི་ཉིན་གྲངས་ ༧ ཙམ་གྱི་སྔོན་ལ་ཨ་རིར་རྟེན་གཞི་བྱས་པའི་འཕྲུལ་ལས་ཁང་ (Maxar Technology) གིས་མཁའ་དབྱིངས་འཁོར་སྐར་ (satellite) གྱི་པར་རིས་བརྒྱུད། རྒྱ་ནག་གཞུང་གིས་རྒྱ་ནག་དང་འབྲུག་གཉིས་ཀྱི་མཐའ་མཚམས་ས་ཁུལ་ (Tamalung) གྲོང་གསེབ་ཏུ་ཁང་པ་གསར་པ་ ༡༤༧ གསར་འཛུགས་བྱས་པའི་གནས་ཚུལ་གསལ་སྟོན་བྱས་ཡོད་པ་རེད། གྲོང་གསེབ་དེའི་ཤར་ཕྱོགས་སུ་ (Gyalaphug) ཞེས་པའི་གྲོང་གསེབ་ཅིག་ཀྱང་གསར་རྒྱག་བྱས་ཏེ། ཁང་པ་ ༡༥༠ ལྷག་དང་། རྒྱ་ནག་དམར་ཤོག་ཚོགས་པའི་སྤྱི་ཁང་དང་དཔེ་མཛོད་སོགས་གསར་རྒྱག་བྱས་ཡོད་འདུག

དེ་འབྲེལ་རྒྱ་ནག་གི་གཞུང་འབྲེལ་གསར་འགྱུར་བརྒྱུད་ལམ་ཁག་ཏུ་གནས་ཚུལ་ཐོན་པའི་ནང་། ཕྱི་ལོ་ ༢༠༠༧ ལོར་ (Gyalaphug) ཟེར་བའི་ས་ཁུལ་དུ་ཆུ་དང་གློག་གི་མཐུན་རྐྱེན་སོགས་གང་ཡང་མེད་པའི་ཁང་པ་ ༢ ཙམ་ལས་མེད་པ་རེད། ཕྱི་ལོ་ ༢༠༡༦ ནས་ ༢༠༡༨ བར་དུ་དབུལ་ཕོངས་ཇེ་ཉུང་དུ་གཏོང་ཐབས་ཀྱི་སྲིད་ཇུས་ལག་བསྟར་གྱིས། ཁུལ་དེར་དཔལ་འབྱོར་གྱི་གནས་སྟངས་རན་པོ་ཡར་རྒྱས་གཏོང་སླད་གྲོང་གསེབ་དེ་རྒྱ་སྐྱེད་བཏང་ཡོད་ལུགས་བརྗོད་འདུག་ལ། རྒྱ་ནག་མི་མང་ཉིན་རེའི་གསར་ཤོག་གིས་དེ་འབྲེལ་གནས་ཚུལ་སྤེལ་བའི་ནང་། རྒྱ་ནག་གི་མགོ་ཁྲིད་ཞི་ཅིན་ཕིང་གིས་ལམ་སྟོན་ལྟར་ས་མཚམས་ཁུལ་དུ་དཔལ་འབྱོར་གྱི་གནས་སྟངས་རན་པོ་ཡོད་པའི་གྲོང་གསེབ་གསར་རྒྱག་གི་ལས་གཞི་སྤེལ་མགོ་བཙུགས་ཡོད་སྐོར་དང་། མི་མང་ལ་དེང་དུས་ཅན་གྱི་ཁང་པ་མཁོ་སྤྲོད་དང་། མཐའ་མཚམས་སྲུང་སྐྱོབ་སླད་གྲོང་གསེབ་གསར་རྒྱག་གི་ལས་གཞི་སྤེལ་བ་ཞིག་ཡིན་སྐོར་སོགས་བརྗོད་འདུག

India opposes any effort to shift location of tri-junction, a demand made by China.

འདས་ལོའི་ཕྱི་ཟླ་ ༡༠ པའི་ནང་རྒྱ་ནག་དང་འབྲུག་གཉིས་ཀྱི་ས་མཚམས་རྩོད་རྙོག་དང་འབྲེལ་བའི་གྲོས་མོལ་ཐེངས་ ༢༥ བྱས་ཡོད་པ་མ་ཟད། ས་མཚམས་ཀྱི་རྩོད་རྙོག་ཞི་བའི་སླད་ཕྱོགས་གཉིས་ཀྱི་འབྲེལ་ཡོད་མི་སྣ་ས་མཚམས་ཁག་ཏུ་དངོས་སུ་ཕྱིན་ཏེ། རྒྱལ་ཁབ་སོ་སོའི་ས་མཚམས་ས་ཐིག་ཁ་གསལ་བཟོས་ཏེ་རྙོག་གླེང་མེད་པ་བཟོ་རྒྱུའི་གྲོས་མཐུན་བཞག་ཡོད་ཀྱང་རྒྱ་ནག་ཕྱོགས་ནས་རྙོག་དྲ་སློང་གི་ཡོད་འདུག ཡིན་ནའང་། ད་ལྟའི་ཆར་འབྲུག་རྒྱལ་ཁབ་ཀྱི་ཕྱོགས་ནས་དེའི་ཐད་གླེང་སློང་ལན་འདེབས་གནང་བའི་གནས་ཚུལ་གོ་ཐོས་མི་འདུག

ཕྱི་ལོ་ ༢༠༡༧ ནས་བཟུང་རྒྱ་ནག་གཞུང་གིས་རྒྱ་དཀར་ནག་གི་རྩོད་གཞིར་གྱུར་བའི་བོད་ཧིན་མཐའ་མཚམས་སུ་ལམ་ཀ་བཟོས་པ་དང་བསྟུན། འབྲུག་རྒྱའི་རྩོད་རྙོག་ཁུལ་དུའང་གྲོང་གསེབ་དང་ལམ་ཀ་བཟོས་ཏེ། འབྲུག་གི་མཐའ་མཚམས་ཁུལ་དུ་ཧམ་འཛུལ་གྱིས་ལས་གཞི་བརྩམས་ཟིན་ཡོད་འདུག་ལ། འབྲུག་དང་རྒྱ་ནག་བར་ས་མཚམས་རྩོད་རྙོག་ཐད་གྲོས་མོལ་བྱས་ཡོད་ཀྱང་། འབྲུག་རྒྱའི་རྩོད་རྙོག་ཆེ་བའི་འབྲོག་ལམ་ཁུལ་དུ་གྲོང་གསེབ་སོགས་འཛུགས་སྐྲུན་བྱས་པ་སོགས་ཀྱིས་དཀའ་རྙོག་དེ་ཐག་གཅོད་མ་ཐུབ་པར་གནས་སྟངས་ཛ་དྲག་ཏུ་ཕྱིན་པར་བརྟེན། འབྲུག་གཞུང་གིས་རྒྱ་གཞུང་གིས་ལམ་ཀ་གསར་རྒྱག་གི་ལས་གཞི་དེ་འབྲུག་རྒྱ་གཉིས་ཀྱི་མཐའ་མཚམས་གྲོས་ཆོད་དང་འགལ་གྱི་ཡོད་པར་བརྟེན། ལས་གཞི་དེ་མཚམས་འཇོག་དགོས་པའི་འབོད་སྐུལ་ཞུས་འདུག འབྲོག་ལམ་ (Doklam) ཁུལ་ནི་འབྲེལ་མཚམས་གསུམ་གྱི་ཐག་ཉེ་སར་ཡོད་པའི་འབྲུག་རྒྱ་གཉིས་ཀྱི་རྩོད་རྙོག་ཅན་གྱི་ས་ཆ་ཞིག་ཡིན་པ་མ་ཟད། དེ་འབྲེལ་རྒྱ་ནག་གི་ཕྱི་འབྲེལ་མགྲིན་ཚབ་པ་ལི་ཁང་གིས། འདས་པའི་ལོ་རྒྱུས་ནས་བཟུང་འབྲོག་ལམ་ས་ཁུལ་དེ་རྒྱ་ནག་གི་མངའ་ཁོངས་ཡིན་ཚུལ་དང་། ས་ཁུལ་དེ་འབྲུག་གི་ཁོངས་སུ་གཏོགས་ཀྱི་མེད་ལ། རྒྱ་གར་ལའང་འབྲེལ་བ་གང་ཡང་མེད་སྐོར་སོགས་བརྗོད་འདུག སྤྱིར་བཏང་རྒྱ་ནག་དང་འབྲུག་གཉིས་ཀྱི་ས་ཁོངས་ལ་དབྱེ་མཚམས་གསལ་པོ་མེད་ཀྱང་། ཕྱོགས་གཉིས་ནས་ཞི་མོལ་གྱི་ཐབས་ལམ་ལ་བརྟེན་ནས་མཐའ་མཚམས་གནད་དོན་ཐག་གཅོད་བྱེད་པར་འབད་བརྩོན་བྱེད་བཞིན་ཡོད་པ་རེད།

གསར་འགོད་པ། བསྟན་འཛིན་ཕུར་བུ།

རྩོམ་སྒྲིག་པ། པདྨ་མཚོ།