༧སྐྱབས་རྗེ་ཡོངས་འཛིན་གླིང་མཆོག་སྤྲུལ་རིན་པོ་ཆེ་བལ་ཡུལ་དུ་ཆིབས་སྒྱུར་གྱིས་བལ་ཡུལ་དགེ་ལྡན་ཆོ་འཕྲུལ་སྨོན་ལམ་ཆེན་མོ་སྐབས་སོ་གཉིས་པར་དབུ་བཞུགས་གནང་ཡོད་འདུག
ཁ་སང་ཕྱི་ཚེས་ ༢༡ ནས་ ༢༥ བར་ཉིན་གྲངས་ལྔའི་རིང་བལ་ཡུལ་དགེ་ལྡན་ཆོ་འཕྲུལ་སྨོན་ལམ་ཚོགས་པའི་ (Nepal Gelug Monlam Committee) གོ་སྒྲིག་འོག བལ་ཡུལ་ཀོ་པན་འོག་མིན་བྱང་ཆུབ་ཆོས་གླིང་དགོན་དུ་བལ་ཡུལ་དགེ་ལྡན་ཆོ་འཕྲུལ་སྨོན་ལམ་ཆེན་མོ་སྐབས་སོ་གཉིས་པའི་ཚོགས་མགོན་དུ་༧སྐྱབས་རྗེ་ཡོངས་འཛིན་གླིང་མཆོག་སྤྲུལ་གླིང་རིན་པོ་ཆེ་ཆིབས་སྒྱུར་བསྐྱངས་ཏེ། སང་ཉིན་ཕྱི་ཚེས་ ༢༣ ཉིན་གཞུང་ཆེན་འདུལ་མཛོད་དབུ་ཕར་རབ་འབྱམས་པའི་སློབ་མ་གྲངས་ ༦༠ ཙམ་དང་། བལ་ཡུལ་དགེ་ལྡན་དགོན་ཁག་བཅུའི་སློབ་མ་རྩེ་ཕུད་གྲངས་ ༡༢ ཙམ་ལ་ཕྱག་འཁྱེར་གནང་རྒྱུ་ཡིན་འདུག
གླིང་རིན་པོ་ཆེ་མཆོག་གི་ཕྱག་མཛོད་བསྟན་འཛིན་མཁྱེན་བརྩེ་ལགས་ཀྱིས་འདི་གའི་གསར་འགོད་པར། ༧སྐྱབས་རྗེ་ཡོངས་འཛིན་གླིང་མཆོག་སྤྲུལ་རིན་པོ་ཆེ་བལ་ཡུལ་དུ་ཕེབས་པའི་དམིགས་ཡུལ་གཙོ་བོ་ནི། བལ་ཡུལ་དགེ་ལྡན་ཆོ་འཕྲུལ་སྨོན་ལམ་ཚོགས་པའི་སྨོན་ལམ་གྱི་དབུ་བཞུགས་ལ་གདན་ཞུ་གནང་བ་ལྟར། བལ་ཡུལ་སྨོན་ལམ་ཆེན་མོར་དབུ་བཞུགས་ཐོག་སྨོན་ལམ་ཆེན་མོའི་བྱུང་རིམ་སྐོར་དང་སྐྱེས་རབས་གསུང་ཆོས་གནངས་དང་གནང་མུས་ཡིན་སྐོར་གསུངས་བྱུང་།
མཛད་འཆར་ལྟར་ན། ཉིན་གྲངས་ལྔའི་རིང་གི་སྨོན་ལམ་ལེགས་འགྲུབ་བྱུང་རྗེས། གླིང་རིན་པོ་ཆེ་མཆོག་བཙུན་དགོན་མཁའ་སྤྱོད་དགའ་འཁྱིལ་གླིང་དགོན་དང་། བཀྲ་ཤིས་རབ་བརྟན་གླིང་དགོན། དེ་བཞིན་འཕགས་ཤིང་སྒོ་སོག་ཕུན་ཚོགས་ཆོས་གླིང་དགོན་དང་སྐྱིད་གྲོང་བཙུན་དགོན་ཐུགས་རྗེ་ཆོས་གླིང་དགོན་བཅས་སུ་ཆིབས་སྒྱུར་གནང་རྒྱུ་དང་། སྐྱིད་གྲོང་བསམ་གཏན་གླིང་དགོན་དུ་རྒྱལ་སྲས་ལག་ལེན་སོ་བདུན་མའི་བཀའ་ཆོས་དང་དད་ལྡན་སེར་སྐྱ་མི་མང་རྣམས་ལ་རྒྱལ་བ་ཚེ་དཔག་མེད་ཀྱི་སྒོ་ནས་ཚེ་དབང་བཀའ་དྲིན་བསྩལ་རྒྱུ། ཤེལ་དཀར་ཆོས་སྡེ་དགའ་ལྡན་ལེགས་བཤད་གླིང་དགོན་དུ་སློབ་གཉེར་མཐར་སོན་པ་རྣམས་ལ་ཕྱག་འཁྱེར་གནང་བའི་མཛད་སྒོར་དབུ་བཞུགས། བལ་ཡུལ་གྱི་ཇོ་ལ་ཁེལ་གཞིས་ཆགས་སུ་མི་མང་རྣམས་ལ་བཀའ་སློབ་གནང་འཆར་ཡོད་འདུག གཞན་ཡང་། གནས་མཆོག་ཡང་ལེ་ཤོད་སོགས་སུ་གནས་གཟིགས་གནང་འཆར་ཡོད་འདུག
ཟླ་འདིའི་ཕྱི་ཚེས་ ༡༨ ཉིན་༧སྐྱབས་རྗེ་གླིང་མཆོག་སྤྲུལ་རིན་པོ་ཆེ་བལ་ཡུལ་གྱི་རྒྱལ་ས་ཀ་ཐ་མན་གྲུ་རྒྱལ་སྤྱིའི་གནམ་ཐང་དུ་ཞབས་སོར་འཁོད་ཡོད་པ་དང་། སྐབས་དེར་བལ་ཡུལ་དགོན་པ་ཡར་རྒྱས་ཚོགས་པའི་ཚོགས་གཙོ་དང་། བལ་ཡུལ་དགེ་ལྡན་ལྷན་ཚོགས། སྐྱིད་གྲོང་བསམ་གཏན་གླིང་། ཀོ་པན་འོག་མིན་བྱང་ཆུབ་ཆོས་གླིང་དགོན། ཤེལ་དཀར་ཆོས་སྡེ་དགའ་ལྡན་ལེགས་བཤད་གླིང་། ཤྲཱི་ཆུ་བཟང་བསམ་གཏན་ཡང་རྩེ་དགོན། ཆུ་དབར་འགྲོ་ཕན་གླིང་། སྒོ་སོག་ཕུན་ཚོགས་ཆོས་གླིང་དགོན། དགའ་ལྡན་བྱམས་མགོན་གླིང་། གྲུབ་དགོན་ཐུགས་རྗེ་ཆོས་གླིང་། ཀོ་པན་བཙུན་དགོན་མཁའ་སྤྱོད་དགའ་འཁྱིལ་གླིང་། བཙུན་དགོན་ཐུགས་རྗེ་ཆོས་གླིང་། བལ་ཡུལ་བླ་མ་དགོན། རོང་ཤར་ཆུ་དབར་དགའ་ལྡན་འགྲོ་ཕན་གླིང་སོགས་དགོན་པ་ཁག་དང་། བལ་ཡུལ་ལྷ་ལྡན་སྨོན་ལམ་ཆེན་མོའི་ཚོགས་གཙོ་དང་ཚོགས་གཞོན། དེ་བཞིན་དགོན་པ་ཁག་གི་མཁན་རིན་པོ་ཆེ་དང་། ཕྱག་མཛོད། དགེ་འདུན་པ་དང་མི་མང་བཅས་ནས་ཕེབས་བསུའི་སྣེ་ལེན་གཟབ་རྒྱས་ཞུས་ཡོད་འདུག
གསར་འགོད་པ། བསྟན་འཛིན་ཕུར་བུ།
རྩོམ་སྒྲིག་པ། པདྨ་མཚོ།
