ཐའེ་ཝན་དུ་ཇོ་ནང་འཛམ་གླིང་ཞི་བདེའི་སྨོན་ལམ་ཆེན་མོ་ཐེངས་དང་པོ་འཚོགས། 

ཐའེ་ཝན་དུ་ཇོ་ནང་རྒྱལ་ཚབ་རིན་པོ་ཆེ་དབུ་བཞུགས་ཐོག་བོད་བརྒྱུད་ནང་བསྟན་དང་རྒྱ་བརྒྱུད་ནང་བསྟན་མཉམ་འབྲེལ་ཐོག་ཇོ་ནང་འཛམ་གླིང་ཞི་བདེའི་སྨོན་ལམ་ཆེན་མོ་ཐེངས་དང་པོ་འཚོགས་གནང་ཡོད་འདུག

ཟླ་འདིའི་ཕྱི་ཚེས་ ༢༤ ཉིན་ཏེ་བོད་ཟླ་དང་པོའི་ཚེས་བཅོ་ལྔ་ཉིན་ཐའེ་ཝན་གྱི་དཔལ་ཇོ་ནང་ཐེག་གསུམ་ཆོས་གླིང་དུ་ཐའེ་ཝན་ཇོ་ནང་འཛམ་གླིང་ཞི་བདེའི་སྨོན་ལམ་ཆེན་མོ་ཐེངས་དང་པོ་འཚོགས་ཡོད་པ་དང་། སྐབས་དེར་རྒྱ་བརྒྱུད་ནང་བསྟན་མཐུན་ཚོགས་ཀྱི་ཚོགས་གཙོ་དང་དགེ་འདུན་པ། བོད་བརྒྱུད་ནང་བསྟན་གྱི་ཆོས་བརྒྱུད་ཁག་གི་དགེ་འདུན་པ་དང་བཙུན་མ། དེ་བཞིན་མི་སྐྱ་ཕོ་མོ་བཅས་འཛོམས་ཡོད་འདུག

སྨོན་ལམ་ཆེན་མོའི་ཐོག་ཇོ་ནང་རྒྱལ་ཚབ་རིན་པོ་ཆེ་མཆོག་གིས། དེ་རིང་ང་ཚོས་ཐའེ་ཝན་ཇོ་ནང་འཛམ་གླིང་ཞི་བདེའི་སྨོན་ལམ་ཆེན་མོ་དབུ་འཛུགས་གནང་བ་རེད། སྤྱིར་བཏང་གི་ཆ་ནས་སྔོན་མ་ནས་ང་རང་གི་ཀུན་སློང་གཙོ་བོ་ནི་ཞི་བདེ་དང་མཐུན་སྒྲིལ་ཡིན། གཞི་རྩའི་ཆ་ནས་ཞི་བདེ་ཡོང་བར་སངས་རྒྱས་ཀྱི་བསྟན་པ་སྤྱི་དང་། དེའི་ནང་གི་བྱམས་པ་དང་སྙིང་རྗེ་ཆགས་ཀྱི་ཡོད་པ་རེད། དེའི་ནང་ནས་ནང་པ་སངས་རྒྱས་པའི་བསྟན་པ་སྤྱི་དང་། བྱེ་བྲག་ཏུ་དེང་སང་གི་ཆོས་བརྒྱུད་ཆེན་པོ་གསུམ་སྟེ་རྒྱ་བརྒྱུད་དང་ལྷོ་བརྒྱུད། བོད་བརྒྱུད་བཅས་རེད། ཅེས་དང་། ཚང་མས་གཅིག་གྱུར་གྱི་ཐོག་ནས་སྤྱིར་སྐྱེ་འགྲོ་སེམས་ཅན་དང་། ལྷག་པར་དུ་༧གོང་ས་རྒྱལ་བ་རིན་པོ་ཆེ་མཆོག་གི་ཐུགས་བསྐྱེད་དམ་བཅའ་བཞི་སྟེ་འགྲོ་བ་མིའི་བཟང་སྤྱོད་གོང་སྤེལ་དང་། ཆོས་ལུགས་མཐུན་འབྲེལ་ལ་སོགས་པ་དགོངས་དོན་ནང་བཞིན་འགྲུབ་ཐུབ་ཐབས་ཞུ་དགོས་པ་དེ་གལ་ཆེན་ཡིན་སྐོར་སོགས་བཀའ་སློབ་གནང་འདུག

ཡང་རྒྱལ་ཚབ་རིན་པོ་ཆེ་མཆོག་གིས། སྤྱིར་ཇོ་ནང་གི་སྨོན་ལམ་ནི་གནའ་སྔ་མོ་ལོ་ངོ་ ༦༠༠ དང་ ༧༠༠ གོང་ནས་ཀུན་མཁྱེན་དོལ་པོ་སངས་རྒྱས་མཆོག་གི་སྐབས་ནས་བྱུང་བ་ཞིག་རེད། འོན་ཀྱང་། སྐབས་དེར་སྨོན་ལམ་ནི་དེང་རབས་ཀྱི་སྨོན་ལམ་ལྟར་གྲ་རྒྱས་པོ་སོགས་དམིགས་བསལ་མེད་པ་རེད། རིམ་གྱིས་དགོན་སྡེ་ཁག་གི་ནང་རྒྱུན་དུ་ནས་སྨོན་ལམ་འཚོག་གི་ཡོད་པ་རེད། དེང་སང་གི་དུས་སུ་བོད་ནང་དུ་དགོན་པ་ཁག་ཅིག་མཉམ་འབྲེལ་གྱིས་སྨོན་ལམ་འཚོག་བཞིན་པ་རེད། རྒྱ་གར་འཕགས་པའི་ཡུལ་དུ་ནུབ་ཕྱོགས་རྡོ་རྗེ་གདན་ནས་ཇོ་ནང་སྨོན་ལམ་ཆེན་མོ་འཛམ་གླིང་ཕན་བདེའི་གྲུ་ཆར་འཚོག་བཞིན་པ་རེད། ཅེས་དང་། ཐའེ་ཝན་དུ་ཆོས་བརྒྱུད་རིས་སུ་མ་ཆད་པའི་ཆོས་བརྒྱུད་རྣམས་ཀྱིས་སྨོན་ལམ་རྒྱས་པོ་དང་ཕུན་སུམ་ཚོགས་པ་འཚོགས་དང་འཚོག་མུས་ཡིན་པ་མ་ཟད། ཇོ་ནང་གི་ངོས་ནས་ཀྱང་སྨོན་ལམ་འཚོག་ཐུབ་ན་བསམ་པའི་ཀུན་སློང་དེ་སྔ་ནས་ཡོད་པ་ལྟར། ད་ལོ་ཐའེ་ཝན་དུ་བོད་བརྒྱུད་ནང་བསྟན་དང་རྒྱ་བརྒྱུད་ནང་བསྟན་མཉམ་འབྲེལ་གྱི་ཐོག་ནས་ནང་པ་སངས་རྒྱས་པའི་དགེ་འདུན་དང་། བཙུན་མ། དགེ་བའི་བཤེས་གཉེན་སོགས་མཉམ་འཛོམས་ཀྱིས། སྤྱིར་འཛམ་གླིང་ཞི་བདེ་དང་། ལྷག་པར་ཐའེ་ཝན་ལ་སོགས་པའི་སྐྱེ་འགྲོ་སེམས་ཅན་ཡོད་དོ་ཅོག་ལ་ཞི་བདེ་ཡོང་སླད་དང་། སངས་རྒྱས་ཀྱི་བསྟན་པ་དར་ཞིང་རྒྱས་པའི་ཆེད་དུ་ཇོ་ནང་འཛམ་གླིང་ཞི་བདེའི་སྨོན་ལམ་ཆེན་མོ་འདི་འཚོགས་ཐུབ་པ་བྱུང་བ་སོགས་གསུངས་སོང་།

གསར་འགོད་པ། བསྟན་འཛིན་ཕུར་བུ།

རྩོམ་སྒྲིག་པ། པདྨ་མཚོ།