མ་འོངས་པར་བོད་ནང་དུ་གཏེར་ཁ་བསྔོག་འདོན་ཤུགས་ཆེན་བྱ་འཆར་ཡོད་འདུག

རྒྱ་ནག་གི་ཙི་ཅིན་གཏེར་ལས་ཚོང་གཉེར་ཁང་གིས་བོད་ཀྱི་མལ་གྲོ་གུང་དཀར་རྫོང་རྒྱ་མ་ཡུལ་ཚོར་ཡོད་པའི་ཅུས་ལོང་ཟངས་གཏེར་བསྔོག་འདོན་ཁང་དེ་འཛམ་གླིང་གི་ཟངས་གཏེར་འདོན་ཁང་ཆེ་ཤོས་སུ་བསྒྱུར་རྒྱུ་ཡིན་ལུགས་བསྒྲགས་འདུག

ཟླ་འདིའི་ཕྱི་ཚེས་ ༢༣ ཉིན་རྒྱ་ནག་གི་ཙི་ཅིན་གཏེར་ལས་ཚོང་གཉེར་ཁང་གིས་གསལ་བསྒྲགས་བྱས་པ་ལྟར་ན། བོད་ཀྱི་མལ་གྲོ་གུང་དཀར་རྫོང་དུ་ཡོད་པའི་ཅུས་ལོང་ཟངས་གཏེར་བསྔོག་འདོན་ཁང་དང་མཉམ་ལས་བྱས་ཏེ། བོད་ནང་གི་ཟངས་ཀྱི་གཏེར་ཁ་བསྔོག་འདོན་གྱི་ལས་གཞི་རྒྱ་བསྐྱེད་ཤུགས་ཆེན་གཏོང་པར་རྒྱ་ནག་གཞུང་ནས་ཆོག་མཆན་སྤྲད་ཡོད་པ་མ་ཟད། མ་འོངས་པར་འཛམ་གླིང་ཐོག་གི་ཟངས་ཀྱི་གཏེར་ཁ་བསྔོག་འདོན་ཁང་ཆེ་ཤོས་སུ་བསྒྱུར་རྒྱུ་ཡིན་འདུག

དེ་འབྲེལ་གསལ་བསྒྲགས་ནང་དུ། ཅུས་ལོང་ཟངས་གཏེར་བསྔོག་འདོན་ཁང་གིས་ལོ་རེར་ཟངས་ཏོན་ ༡༥༠།༠༠༠ བསྔོག་བཏོན་བྱེད་བཞིན་ཡོད་པའི་ཐོག ལས་གཞི་གསར་པའི་ཆེད་ལོ་རེར་ཟངས་ཏོན་ ༢༠༠།༠༠༠ གདོན་ཚེ། ཁྱོན་ལོ་རེར་ཟངས་ཏོན་ ༣༥༠།༠༠༠ ཆགས་རྒྱུ་ཡིན་འདུག  ཕྱི་ལོ་ ༢༠༢༥ ལོའི་ལོ་མཇུག་བར་དུ་རིམ་པ་གཉིས་པའི་ལས་གཞིའི་འཛུགས་སྐྲུན་ལེགས་འགྲུབ་བྱུང་རྗེས། ལོ་རེའི་ནང་ཟངས་ཏོན་ས་ཡ་ ༡༠༠ གདོན་འཆར་ཡོད་སྟབས། ཅུས་ལོང་ཟངས་གཏེར་བསྔོག་འདོན་ཁང་དེ་རྒྱ་ནག་ནང་གི་ཟངས་གཏེར་བསྔོག་འདོན་ཁང་ཆེ་ཤོས་སུ་འགྱུར་རྒྱུ་ཡིན་འདུག མ་འོངས་པར་ཙི་ཅིན་གཏེར་ལས་ཚོང་གཉེར་ཁང་གིས་རིམ་པ་གསུམ་པའི་ལས་གཞི་འཛུགས་སྐྲུན་བྱ་འཆར་ཡོད་པ་མ་ཟད། ལས་གཞི་དེའི་ནང་དུ་ལོ་རེར་ཟངས་ཏོན་ས་ཡ་ ༢༠༠ གདོན་འཆར་ཡོད་སྟབས། དེ་ནི་འཛམ་གླིང་ཐོག་ཟངས་ཀྱི་ཚོང་གཉེར་ཁང་ཆེ་ཤོས་སུ་འགྱུར་རྒྱུ་ཡིན་འདུག རྒྱ་ནག་གཞུང་གིས་མལ་གྲོ་གུང་དཀར་རྒྱ་མ་ཡུལ་ཚོའི་ཅུས་ལོང་ཟངས་གཏེར་བསྔོག་འདོན་ཁང་གིས་མ་འོངས་ལོ་ ༣༦ རིང་གཏེར་ཁུངས་དེ་བེད་སྤྱོད་གཏོང་ཆོག་པའི་ཆོག་མཆན་ཡང་སྤྲད་ཡོད་འདུག

ཅུས་ལོང་ཟངས་གཏེར་བསྔོག་འདོན་ཁང་ནི་བོད་ཀྱི་མལ་གྲོ་གུང་དཀར་རྫོང་རྒྱ་མ་ཡུལ་ཚོའི་ནང་ཡོད་ཅིང་། ཕྱི་ལོ་ ༡༩༨༠ ནང་ནས་རྒྱ་གཞུང་གིས་ས་གནས་དེར་བརྟག་དཔྱད་བྱས་ཏེ་གཏེར་ཁ་བསྔོག་འདོན་བྱ་མགོ་བཙུགས་ཡོད་པ་མ་ཟད།  ཕྱི་ལོ ༢༠༠༧ ནས་བཟུང་གཏེར་ཁ་བསྔོག་འདོན་ལས་གཞི་རྒྱ་བསྐྱེད་བཏང་རྐྱེན། ས་གནས་ཀྱི་ཁོར་ཡུག་ལ་འབག་བཙོག་ཐེབས་ནས་མི་ཕྱུགས་གཉིས་ཀར་དཀའ་ངལ་འཕྲད་དེ། ས་གནས་མི་མང་གིས་རྒྱ་གཞུང་ལ་གཏེར་ཁ་བསྔོག་འདོན་གྱི་ལས་གཞི་མཚམས་འཇོག་དགོས་པའི་རེ་སྐུལ་ཞུས་ཀྱང་། བཟང་ཕྱོགས་ཀྱི་ཡ་ལན་གང་ཡང་མ་བྱུང་བར་མི་མང་ལ་གཅར་རྡུང་བཏང་སྟེ་དམ་དྲག་ཤུགས་ཆེན་བྱས་ཡོད་པ་རེད། འདས་ལོའི་ཕྱི་ཟླ་ ༥ ཚེས་ ༡༤ ཉིན་ཅུས་ལོང་ཟངས་གཏེར་བསྔོག་འདོན་ཁང་གི་ལས་བཟོ་བ་མི་གྲངས་དྲུག་གཏེར་ཁུང་ནང་ནས་བོར་བརླག་ཕྱིན་ཡོད་པའི་གནས་ཚུལ་ཐོན་ཡོད་པ་རེད། དེ་བཞིན་ཕྱི་ལོ་༢༠༡༣ ཟླ་༣ ཚེས་༢༩ ཉིན་ཡང་ཅུས་ལོང་གཏེར་ཁུང་དུ་ལས་བཟོ་བ་མི་གྲངས་ ༨༣ རྐྱེན་འདས་སུ་ཕྱིན་ཡོད་པ་དང་། དེའི་ཁྲོད་དུ་བོད་མི་ ༢ ཀྱང་ཡོད་པ་རེད།

ཕྱི་ལོ་ ༢༠༡༣ ཟླ་ ༤ ཚེས་ ༡ ཉིན་བོད་མིའི་སྒྲིག་འཛུགས་ཀྱིས་དེ་འབྲེལ་གྱི་གནས་ཚུལ་ཞིག་སྤེལ་བའི་ནང་། རྒྱ་མའི་གཏེར་ཁ་བསྔོག་འདོན་ལས་གཞི་དེ་མིག་དཔེ་ལྡན་པ་ཞིག་བཟོ་རྒྱུ་ལྟ་ཞོག གཏེར་ཁ་སྔོག་འདོན་བྱས་པའི་ཉེར་ལེན་ལ་བརྟེན་ནས། ཁོར་ཡུག་དང་སྤྱི་ཚོགས་སོགས་ལ་གནོད་འཚེ་ཧ་ཅང་ཕོག་པའི་བོད་ཀྱི་ས་ཁུལ་ཁག་ ༢༠༠ ལྷག་ཡོད་པའི་ནང་ནས་གཅིག་རྒྱ་མ་གཏེར་ཁ་སྔོག་འདོན་གྱི་ས་ཁུལ་དེ་ཆགས་ཡོད། དེར་བརྟེན་བོད་མིའི་སྒྲིག་འཛུགས་ཁོར་ཡུག་ཚན་པས་རྒྱ་ནག་གཞུང་གིས་ཐེངས་འདིར་རྒྱ་མའི་ནང་གཏེར་ཁ་སྔོག་འདོན་བྱེད་མཁན་རྒྱ་མི་སྒེར་གྱི་བཟོ་གྲྭ་ཧྭ་ཐེ་ལོང་གཏེར་ལས་ཡར་རྒྱས་ཚོང་གཉེར་ཁང་ (Hua tai long Mining Development Co. Ltd) གི་ལས་གཞིའི་འོག་གོད་ཆག་བྱུང་བའི་དངོས་ཡོད་གནས་ཚུལ་གང་ཡིན་དང། གོད་ཆག་བྱུང་དགོས་པའི་རྒྱུ་རྐྱེན་གཙོ་བོ་གང་ཡིན་རྣམས་སྦས་གསང་མེད་པའི་ཐོག་ནས་གསལ་བཤད་གནང་རྒྱུ་མ་ཟད། རྒྱ་ནག་གཞུང་གིས་བོད་ཀྱི་ས་ཁུལ་ཁག་ཏུ་སྲིད་ཇུས་ཇི་འདྲ་ཞིག་ལག་བསྟར་བྱེད་སྐབས། ས་གནས་བོད་རིགས་རྣམས་ལ་སྤྱི་ཚོགས་དང་ཁོར་ཡུག་སོགས་ཀྱི་གནད་དོན་ཐོག་ཐག་གཅོད་བྱ་རྒྱུའི་ཐོབ་ཐང་སྤྲོད་དགོས་པ་དང། རྒྱ་རིགས་གནས་སྤོར་མཚམས་འཇོག་དང་ཁོར་ཡུག་གཏོར་བཤིག་འཕྲལ་མར་མཚམས་འཇོག་བྱེད་དགོས་པ་སོགས་ཀྱི་རེ་འདུན་བཏོན་འདུག

གསར་འགོད་པ། བྱམས་པ་ཚེ་རིང་།

རྩོམ་སྒྲིག་པ། པདྨ་མཚོ།