བོད་སྡེ་དགེ་རྫོང་ཁོངས་སུ་སྲིད་
བོད་སྡེ་དགེ་རྫོང་དབོན་པོ་སྟོད་ནས་རྒྱ་ནག་གཞུང་གི་བཙན་བཀའ་ཟློག་ཐབས་སུ་ཞི་བའི་རེ་སྐུལ་གནང་མཁན་སེར་སྐྱ་མང་པོ་འཛིན་བཟུང་བཙན་འཁྲིད་བྱས་ཏེ། གོང་རིམ་གྱི་བཀའ་རྒྱ་དང་ལེན་མ་བྱས་པ་དང་སྤྱི་ཚོགས་ནང་དཀྲུག་རྐྱེན་བསླངས་བ་ཟེར་བ་སོགས་ཀྱི་ཉེས་མིང་གཡོག་གིན་ཡོད་འདུག་ལ། ཕྱི་ལོ་ ༢༠༢༢ ཟླ་ ༣ ཚེས་ ༧ ཉིན་བོད་སྡེ་དགེ་རྫོང་མི་དམངས་ཁྲིམས་ཁང་དང་། སྡེ་དགེ་རྫོང་མི་དམངས་ཞིབ་དཔྱོད་ཁང་། སྡེ་དགེ་རྫོང་ཉེན་རྟོག་ཁང་། སྡེ་དགེ་རྫོང་ཁྲིམས་འཛིན་ཁང་ཟེར་བ་བཅས་མཉམ་འབྲེལ་ཐོག བདེ་འཇགས་དོ་དམ་གྱི་ཆད་གཅོད་བཅའ་ཁྲིམས་དང་། འདུ་ཚོགས་ཁྲོམ་སྐོར་རྔམ་སྟོན་བཅའ་ཁྲིམས། ཡིག་སྐུར་ངོ་གཏུག་གི་སྲོལ་ཡིག་ཟེར་བ་སོགས་གཞིར་རྩར་བཟུང་སྟེ། མི་མང་མཉམ་རུབ་ཀྱིས་སྤྱི་ཚོགས་སྒྲིག་ལམ་དཀྲུགས་པའི་ཁྲིམས་འགལ་ཉེས་གསོག་བྱ་སྤྱོད་ཟེར་བ་ཞིག་ལ་ཁྲིམས་ལྟར་ཐག་གཅོད་བྱ་རྒྱུ་སྐོར་གྱི་བརྡ་ཁྱབ་དོན་ཚན་དགུ་ཅན་གྱི་ཡིག་ཆ་ཞིག་བཀྲམ་སྟེ། མི་མང་མཉམ་རུབ་ཀྱིས་སྲིད་གཞུང་གི་ལས་དོན་ལ་འགོག་རྐྱེན་བཟོ་བ་དང་སྤྱི་ཚོགས་ལ་དཀྲུག་རྐྱེན་བསླངས་ན། ལས་འགུལ་སྣེ་འཁྲིད་མཁན་ལ་ལོ་ ༥ ནས་ ༡༠ བར་དང་། མཉམ་ཞུགས་བྱེད་མཁན་ལ་ལོ་ ༥ བཙོན་འཇུག་ཁྲིམས་ཐག་གཅད་རྒྱུ་དང་། བཙན་ཉར་ལས་བསྐུལ་དང་རྩིས་སྤྲོད་དོ་དམ། ཆབ་སྲིད་ཀྱི་ཁེ་དབང་འཕྲོག་རྒྱུ་ཡིན་པ་སོགས་གཏན་འབེབ་བྱས་ཏེ། ལོ་དེའི་ཕྱི་ཟླ་ ༣ ཚེས་ ༧ ཉིན་ནས་དངོས་སུ་ལག་བསྟར་བྱས་པའི་བཀའ་ཁྱབ་བསྒྲགས་འདུག
ཁྲིམས་ཆད་བཀའ་ཁྱབ་དེའི་དོན་གནད་དང་པོའི་ནང་། སྲིད་གཞུང་གི་ལས་ཁུངས་རིམ་པ་ཁག་གི་གཞུང་དོན་སྒྲུབ་སའི་ནང་ལོགས་དང་མཐའ་སྐོར་དུ་ཁྲིམས་འགལ་གྱིས་འདུ་འཛོམས་བྱེད་པ་དང་། ཡང་ན། སྲིད་གཞུང་གི་ལས་ཁུངས་ཁག་གི་རྒྱལ་སྒོའི་མཐའ་བསྐོར་བ། རྒྱལ་ཁབ་ཀྱི་ལས་ཁུངས་རིམ་པ་ཁག་གི་གཞུང་ལས་སྒྲུབ་སར་རྡབ་རྡེག་བཏང་བ། གཞུང་སྒེར་གྱི་རྒྱུ་ནོར་རྡུང་གཅོག་དང་གཏོར་བརླག་བྱེད་པ། འཁོར་ལོའི་རིགས་ལམ་བར་དུ་འགོག་པ་དང་འཇབ་སྡོད་བྱེད་པ། རྒྱུ་ཆ་སྦྱར་བ་དང་འགྲེམ་སྤེལ་བྱེད་པ། འབོད་ཚིག་འབོད་པ། འཕྲེད་འགེལ་སྦྱར་ཡིག་འཐེན་པ། ཁྲིམས་དང་མི་མཐུན་པའི་ལྭ་བ་གྱོན་པ། གཏུག་བཤེར་ཞུ་ཡིག་འབྲི་ཤོག་སྟོན་པ། རང་བསྟོད་རང་སྨད་དང་། རང་ལུས་རང་སྐྱོན། རང་སྲོག་རང་གཅོད་སོགས་ཀྱི་བྱ་སྤྱོད་ལ་བཀག་སྡོམ་བསླབ་བྱ་དང་། སྐྱོན་བརྗོད། སློབ་གསོ་བྱས་ཀྱང་ཕན་འབྲས་མ་ཐོན་པར་བྱ་སྤྱོད་སྤེལ་མཁན་གྱི་གནས་ཚུལ་དང་། ནུས་པ་ཆེ་ཆུང་། དེ་བཞིན་གནོད་འཚེ་ཆེ་ཆུང་བཅས་ལ་གཞིགས་ནས་རྡུང་རྡེག་གཏོང་དགོས་སྐོར་དང་། མི་མང་མཉམ་རུབ་ཀྱིས་རིམ་པ་ཁག་ལ་རྡུང་རྡེག་གཏོང་དུ་ཡོང་བར་རྩ་འཛུགས་དང་ཇུས་འགོད་བྱེད་པ། ཡང་ན་ཧུར་ཐག་གིས་སྲིད་གཞུང་གི་བྱ་བ་བསྒྲུབ་ཐབས་མེད་པ་བཟོས་ཏེ་གྱོང་གུད་ཚབས་ཆེན་བྱུང་ན། ཉེས་ཅན་གཙོ་བོར་ལོ་ ༥ ནས་ ༡༠ བར་གྱི་བཙོན་འཇུག་དང་། མཉམ་ཞུགས་བྱེད་མཁན་ལ་ལོ་ ༥ མན་གྱི་བཙོན་འཇུག་དང་། བཙན་ཉར་ལས་བསྐུལ་དང་རྩིས་སྤྲོད་དོ་དམ་ཡང་ན། ཆབ་སྲིད་ཀྱི་ཁེ་དབང་འཕྲོག་རྒྱུ་ཡིན་པ་བཀོད་འདུག
ཁྲིམས་ཆད་དོན་གནད་གཉིས་པའི་ནང་། སྤྱི་པའི་འདུ་གནས་དང་མི་མང་འདུ་འཛོམས་བྱེད་སའི་འགྲོ་ལམ་སོགས་ལ་རྒྱུ་ཆ་སྦྱར་བ་དང་འགྲེམས་པ། འབོད་ཚིག་གཏོར་བ། འཕྲེད་འགེལ་གྱི་ཡི་གེ་འཐེན་པ། ཁྲིམས་འགལ་གྱི་གོས་གྱོན་པ། མྱ་ངན་རོལ་མོ་གཏོང་བ། གཏུགས་གཤེར་ཞུ་ཡིག་འབྲི་ཤོག་སྟོན་པ། ཡང་ན་ཆུ་ནང་མཆོངས་པ། ཐོག་ཁང་ནས་མཆོངས་པ། ཟམ་པ་ནས་མཆོངས་བ་སོགས་ཀྱི་བྱ་སྤྱོད་ཀྱིས་སྤྱི་ཚོགས་ལ་ཤུགས་རྐྱེན་ངན་པ་བཟོ་ཡི་ཡོད་པས། དེ་རིགས་ལ་བཀག་འགོག་དང་སྐྱོན་བརྗོད། སློབ་གསོ་བརྒྱབ་ཀྱང་མ་ཕན་པར་གནས་ཚུལ་བྱུང་ན་ཁྲིམས་ལྟར་རྡུང་རྡེག་གཏང་རྒྱུ་ཡིན་སྐོར་དང་། དེ་འབྲེལ་ཁྲིམས་ཆད་དོན་ཚན་དང་པོ་དང་གཉིས་པའི་ནང་གསལ་བ་ལྟར་ན། སྲིད་གཞུང་གི་བདེ་འཇགས་དོ་དམ་པས་ལས་འགན་སྒྲུབ་པར་མཁྲེགས་བཟུང་དང་། བཀག་འགོག་བྱས་ཏེ་ཉེས་གསོག་ཆུང་བའི་རིགས་བྱུང་ན། སྤྱི་ཚོགས་ཀྱི་སྒྲིག་ལམ་དཀྲུགས་པའི་ཐ་ཚིག་བསྒྲག་རྒྱུའམ། ཡང་ན་སྒོར་ ༢༠༠ མན་གྱི་དངུལ་ཆད་གཅད་རྒྱུ། ཉེས་ཚབས་ཅུང་ཆེ་རིགས་ལ་ཉིན་ ༨ ནས་ ༡༠ བར་བཀག་ཉར་དང་སྒོར་ ༨༠༠ མན་གྱི་དངུལ་ཆད། ཉེས་ཅན་གཙོ་བོ་ཉིན་ ༡༠ ནས་ ༡༨ བར་བཀག་ཉར་དང་། སྒོར་ ༡༠༠༠ མན་གྱི་དངུལ་ཆད་གཅད་རྒྱུ། ཉེས་ཚབས་ཆེན་པོ་བྱུང་ཚེ་ཉེས་ཅན་གཙོ་བོར་ལོ་༨ བར་གྱི་བཙོན་འཇུག་ཁྲིམས་ཆད་དང་། བཙན་ཉར་ལས་བསྐུལ། རྩིས་སྤྲོད་དོ་དམ། ཡང་ན་ཆབ་སྲིད་ཀྱི་ཁེ་དབང་འཕྲོག་རྒྱུ་ཡིན་འདུག
ཁྲིམས་ཆད་དོན་ཚན་གསུམ་པ། མི་མང་གིས་ལས་ཁུངས་རིམ་པ་སོ་སོའི་མཐའ་སྐོར་བ་དང་འགྲིམ་འགྲུལ་བགྲོད་ལམ་ལ་བཀག་འགོག ཡང་ན། འགྲིམ་འགྲུལ་སྒྲིག་ལམ་ལ་གཏོར་བཤིག་ཟེར་བའི་ཉེས་མིང་ཕོག་ཚེ། ནག་ཉེས་ཆུང་རིགས་ལ་ཐ་ཚིག་སྒྲོག་པའམ། ཡང་ན། སྒོར་ ༢༠༠ མན་གྱི་ཆད་པ་གཅོད་རྒྱུ། ཉེས་ཚབས་ཅུང་ཆེ་རིགས་ལ་ཉིན་ ༨ ནས་ ༡༠ བཀག་ཉར་དང་། སྒོར་ ༥༠༠ མན་གྱི་དངུལ་ཆད། ཉེས་ཅན་གཙོ་བོར་ཉིན་ ༡༠ ནས་ ༡༨ བར་བཀག་ཉར་བྱ་རྒྱུ་དང་། སྒོར་ ༡༠༠༠ མན་གྱི་དངུལ་ཆད། ཉེས་ཚབས་ཆེ་རིགས་ལ་ལོ་ ༣ བར་བཙོན་འཇུག་ཁྲིམས་ཆད་དང་། བཙན་ཉར་ལས་བསྐུལ་དང་རྩིས་སྤྲོད་དོ་དམ། ཡང་ན་ཆབ་སྲིད་ཀྱི་ཁེ་དབང་འཕྲོག་རྒྱུ་ཡིན་འདུག
ཁྲིམས་ཆད་དོན་ཚན་བཞི་པ། ངན་སྐུལ་རྒྱག་པ་དང་། ཁྲིམས་དང་མི་མཐུན་པའི་འདུ་ཚོགས་ཇུས་འགོད་བྱེད་པ། རྔམ་སྟོན་བཅས་བྱེད་པར་བཀག་སྡོམ་བསླབ་བྱ་བརྒྱབ་ཀྱང་མ་ཉན་ན། ཉིན་ ༡༠ ནས་ ༡༥ མན་བཀག་ཉར་བྱེད་པ་དང་། འདུ་ཚོགས་དང་རྔམ་སྟོན་ཁྲོམ་སྐོར་གྱི་བྱེད་སྒོ་སྤེལ་བར་གཙོ་སྐྱོང་ལས་ཁུངས་ནས་ཆོག་མཆན་མ་ཐོབ་པའམ་ཐོབ་ཡོད་ཀྱང་ལས་ཁུངས་དེའི་དམིགས་ཡུལ་དང་འབོད་ཚིག དུས་ཚོད་སོགས་ལ་བརྒལ་སོང་བ་དང་། སྤྱིའི་བདེ་དོན་ལ་གནོད་འཚེ་གཏོང་བ་དང་སྤྱི་ཚོགས་ཀྱི་སྒྲིག་ལམ་གཏོར་བཤིག་གཏོང་བའི་གནས་ཚུལ་བྱུང་བར་བཀག་འགོག་བསླབ་བྱ་དང་ཁ་འཐོར་དུ་གཏོང་བར་མ་ཉན་ན། བཙན་ཤེད་ཀྱིས་ཁ་བྲལ་བའམ། ཡང་ན། འཕྲལ་དུ་བཀག་སྐྱིལ་བྱས་ཏེ། འགན་འཁུར་མཁན་ལ་ཐ་ཚིག་སྒྲོག་པའམ། ཡང་ན། ཉིན་ ༡༨ མན་གྱི་བཀག་ཉར་བྱ་རྒྱུ་དང་། སྤྱི་ཚོགས་ཀྱི་སྒྲིག་ལམ་ལ་གཏོར་བཤིག་བཏང་བ་ཚབས་ཆེ་ན་ལོ་ ༥ མན་གྱི་བཙོན་འཇུག་བྱ་རྒྱུ། གྲི་སོགས་མཚོན་ཆ་དང་འབར་རྫས་རིགས་ཁྱེར་ནས་བྱེད་སྒོའི་ནང་མཉམ་ཞུགས་བྱེད་མཁན་ལ་བཙོན་འཇུག་ལོ་ ༢ མན་བཙོན་འཇུག་དང་། དེ་བཞིན་བཙན་ཉར་ལས་བསྐུལ་དང་རྩིས་སྤྲོད་དོ་དམ། ཡང་ན་ཆབ་སྲིད་ཀྱི་ཁེ་དབང་འཕྲོག་གི་ཡོད་འདུག
ཁྲིམས་ཆད་དོན་ཚད་ལྔ་པ། ལས་ཁུངས་རིམ་པ་ཁག་གི་ལས་བྱེད་པས་ལས་འགན་སྒྲུབ་པར་འགོག་རྐྱེན་བཟོ་བ་དང་། ཛ་དྲག་ཆེ་བའི་ལས་འགན་སྒྲུབ་མཁན་མེ་གསོད་རླངས་འཁོར་དང་། སྨན་བཅོས་སྲོག་སྐྱོབ་རླངས་འཁོར། ལས་གྲྭའི་ཉེན་ཁ་མྱུར་སེལ་རླངས་འཁོར། ཉེན་རྟོག་པའི་རླངས་འཁོར་སོགས་ལ་འགོག་རྐྱེན་ཆུང་ཆུང་བཟོས་ན། ཐ་ཚིག་སྒྲོག་པའམ། ཡང་ན་སྒོར་༢༠༠ མན་གྱི་དངུལ་ཆད་གཅད་རྒྱུ་དང་། ཉེས་ཚབས་ཆེ་རིགས་ལ་ཉིན་ ༤ ནས་ ༡༠ མན་བཀག་ཉར་གྱི་ཆད་པ་གཅད་རྒྱུ་དང་། དངུལ་ཆད་སྒོར་ ༥༠༠། མི་མང་ཉེན་རྟོག་པས་ལས་དོན་སྒྲུབ་པར་བཀག་འགོག་བྱེད་མཁན་ལ་ཁྲིམས་ལྟར་ཆད་པ་ལྗིད་པོ་གཅད་རྒྱུ། དྲག་ཤུགས་དང་འཇིགས་སྣང་སྐུལ་བའི་བྱེད་ཐབས་ལ་བརྟེན་ནས་ལས་དོན་སྒྲུབ་པར་བཀག་འགོག་བཟོས་ན། ལོ་༣ མན་གྱི་བཙོན་འཇུག་དང་། མི་མང་ཉེན་རྟོག་པར་འཇབ་རྒོལ་བྱས་ན་བཙོན་འཇུག་ལོ་ ༣ མན་དང་བཙན་ཉར་ལས་བསྐུལ། རྩིས་སྤྲོད་དོ་དམ་གྱི་ཉེས་ཆད་གཅད་རྒྱུ་དང་། མེ་མདའ་དང་། གྲི་སོགས་བེད་སྤྱད་ནས་མིའི་བདེ་འཇགས་ལ་ཉེན་ཁ་ཚབས་ཆེན་བཟོས་རིགས་ལ་བཙོན་འཇུག་ལོ་ ༣ ནས་ལོ་ ༧ བར་གྱི་ཉེས་ཆད་གཅད་རྒྱུ་ཡིན་འདུག
ཁྲིམས་ཆད་དོན་ཚན་དྲུག་པ། ཡིག་སྐུར་ངོ་གཏུག་སྣེ་ལེན་བྱེད་ཡུལ་རིམ་པ་ཁག་དང་སྲིད་གཞུང་གི་ལས་ཁུངས་ཀྱི་ལས་དོན་བྱེད་ཡུལ་དུ་ཟིང་ཆ་ཆུང་རིགས་བསླངས་བ་ལ་ཐ་ཚིག་སྒྲོག་པའམ་ཡང་ན། དངུལ་ཆད་སྒོར་ ༣༠༠། ཉེས་པ་ཅུང་ཆེ་རིགས་ལ་ཉིན་ ༢ ནས་ ༡༠ མན་བཀག་ཉར་དང་། དངུལ་ཆད་སྒོར་ ༣༠༠། ཉེས་པ་ཆུང་རིགས་ཀྱི་ཉེས་ཅན་གཙོ་བོར་ཉིན་ ༡༠ ནས་ ༡༥ མན་བཀག་ཉར་དང་དངུལ་ཆད་སྒོར་ ༡༠༠༠། མི་མང་མཉམ་རུབ་ཀྱིས་སྲིད་གཞུང་གི་ལས་ཁུངས་ཀྱི་ལས་དོན་སྒྲུབ་མི་ཐུབ་པ་བྱུང་ནས་གྱོང་གུད་ཚབས་ཆེན་བྱུང་ན། ཉེས་ཅན་གཙོ་བོར་ལོ་ ༣ ནས་ལོ་ ༡༠ བར་གྱི་བཙོན་འཇུག་དང་། མཉམ་ཞུགས་བྱེད་མཁན་ལ་ལོ་ ༥ མན་བཙོན་འཇུག་དང་། བཙན་ཉར་ལས་བསྐུལ་དང་རྩིས་སྤྲོད་དོ་དམ་ཡང་ན། ཆབ་སྲིད་ཀྱི་ཁེ་དབང་འཕྲོག་པའི་ཉེས་ཆད་གཅོད་ཀྱི་ཡོད་འདུག
ཁྲིམས་ཆད་དོན་ཚན་བདུན་པ། མི་མང་འདུ་སར་འདས་མཆོད་མེ་ཏོག་ཕྲེང་བ་དང་། རུས་ཐལ་སྒམ། འདས་པོའི་འདྲ་པར། མཆོད་རྫས་སོགས་བཤམས་པ་དང་མྱ་ངན་གྱི་རོལ་མོ་གཏོང་བ། འདས་མཆོད་དངུལ་སྒོར་བསགས་པར་བཀག་འགོག་བྱས་ནའང་མ་ཉན་ཚེ། ཉེས་པ་ཆུང་རིགས་ལ་ཉེན་བརྡ་གཏོང་བའམ་ཡང་ན། སྒོར་ ༢༠༠ མན་ཆད་ཀྱི་དངུལ་ཆད། གནས་ཚུལ་ཆེན་པོ་བྱུང་ན་ཉིན་ ༥ ནས་ ༡༠ བར་བཀག་ཉར་བྱས་ཏེ། དངུལ་ཆད་སྒོར་ ༨༠༠། དེ་ནས་ཉེས་ཅན་གཙོ་བོར་ཉིན་ ༡༠ ནས་ ༡༨ བར་བཀག་ཉར་དང་། དངུལ་ཆད་སྒོར་ ༡༠༠༠། ནག་ཉེས་ཚབས་ཆེན་བྱུང་ན། ཉེས་ཅན་གཙོ་བོར་ལོ་ ༣ ནས་ ༧ བར་བཙོན་འཇུག་དང་། མཉམ་ཞུགས་བྱེད་མཁན་ལོ་ ༣ བཙོན་འཇུག དེ་བཞིན་མི་ཚོགས་བསྡུས་ནས་སྲིད་གཞུང་གི་ལས་ཁུངས་ལ་གནོད་སྐྱེལ་བའི་བྱ་སྤྱོད་སྤེལ་ཚེ། ཉེས་ཅན་གཙོ་བོ་ལ་བཙོན་འཇུག་ལོ་ ༥ ནས་ ༡༠ བར་དང་། མཉམ་ཞུགས་བྱེད་མཁན་ལ་ལོ་ ༥ མན་བཙོན་འཇུག དེ་བཞིན་བཀག་ཉར་ལས་བསྐུལ། རྩིས་སྤྲོད་དོ་དམ། ཡང་ན་ཆབ་སྲིད་དབང་ཆ་འཕྲོག་རྒྱུ་ཡིན་འདུག
ཁྲིམས་ཆད་དོན་ཚན་བརྒྱད་པ། ཁྲིམས་འགལ་གྱིས་རིམ་པ་བརྒལ་ནས་འཕྲིན་གཏུག་བྱས་ཤིང་། ལས་ཁུངས་ཀྱི་སྒྲིག་ལམ་དཀྲུགས་པའམ་ཡང་ན། སྤྱི་པའི་འདུ་རའི་སྒྲིག་ལམ་གཏོར་བཤིག་བཏང་ན། ནག་ཉེས་ཆུང་རིགས་ལ་ཉེན་བརྡ་གཏོང་བའམ་ཡང་ན། སྒོར་མོ་ ༢༠༠ མན་ཆད་དངུལ་ཆད་དང་། གནས་ཚུལ་ཚབས་ཆེན་བྱུང་ན་ཉིན་ ༥ ནས་ ༡༠ བར་བཀག་ཉར་དང་། དངུལ་ཆད་སྒོར་ ༥༠༠། ཉེས་ཅན་གཙོ་བོ་ལ་ཉིན་ ༡༠ ནས་ ༡༨ བར་བཀག་ཉར་དང་། དངུལ་ཆད་སྒོར་༡༠༠༠ གཅོད་ཆོག་ཀྱང་། པེ་ཅིང་སོགས་གནད་ཆེ་སའི་ས་ཁུལ་ཡང་ན། ཚབས་ཆེ་བའི་ས་ཁུལ་དུ་འུར་རྒྱག་ཅིང་དོན་རྐྱེན་བསླངས་ན། ཉིན་ ༥ ནས་ ༡༠ བར་བཀག་ཉར་དང་། དངུལ་ཆད་སྒོར་༨༠༠། གནས་ཚུལ་ཅུང་ཚབས་ཆེ་བྱུང་ན་ཉིན་ ༡༠ ནས་ ༡༥ བར་བཀག་ཉར་དང་། དངུལ་ཆད་སྒོར་ ༡༠༠༠། གནས་ཚུལ་ཚབས་ཆེན་བྱུང་ན་ལོ་ ༥ བར་བཙོན་འཇུག ཐེངས་མང་པོར་བསྙད་བརྐོ་ཟིང་ཆ་སློང་ཞིང་སྤྱི་ཚོགས་སྒྲིག་ལམ་ཚབས་ཆེ་དཀྲུགས་ན་ལོ་ ༥ ནས་ ༡༠ བར་བཙོན་འཇུག་དང་དངུལ་ཆད་གཅད་རྒྱུ་ཡིན་འདུག
ཁྲིམས་ཆད་དོན་ཚན་དགུ་པ། གོང་གསལ་ནང་མ་ཚུད་པའི་ཁྲིམས་
གསར་འགོད་པ། དཔལ་ལྡན། བྱམས་པ་ཚེ་རིང་།
རྩོམ་སྒྲིག་པ། པདྨ་མཚོ།
