དམར་ཤོག་ཚོགས་ཆེན་ཐོག་བོད་ཀྱི་གཙང་གསུམ་མགོ་ཁོངས་སུ་ཞིབ་འཇུག་བྱ་དགོས་པའི་གྲོས་གཞི་བཏོན། 

རྒྱ་ནག་མི་མང་འཐུས་མིའི་ལོ་འཁོར་ཚོགས་ཆེན་སྐབས་བོད་ཁུལ་གྱི་འཐུས་མིས་བོད་ཀྱི་གཙང་གསུམ་མགོ་ཁོངས་སུ་རྒྱལ་ཁབ་སྤྱི་གླིང་ཟེར་བ་གསར་འཛུགས་བྱས་པ་དེས་བོད་ཀྱི་རང་བྱུང་ཁོར་ཡུག་ལ་གནོད་འཚེ་ཇི་ཙམ་གཏོང་གི་ཡོད་མེད་ཐད་ཞིབ་འཇུག་བྱ་དགོས་པའི་གྲོས་གཞི་བཏོན་ཡོད་འདུག

ཟླ་འདིའི་ཕྱི་ཚེས་ ༥ ནས་ ༡༡ བར་རྒྱ་ནག་གི་རྒྱལ་ས་པེ་ཅིན་དུ། སྐབས་བཅུ་བཞི་པའི་རྒྱ་ནག་དམར་ཤོག་གཞུང་གི་འཐུས་མིའི་ཚོགས་ཆེན་ཐེངས་གཉིས་པ་འཚོག་བཞིན་ཡོད་པ་དང་བསྟུན། བརྒྱུད་ལམ་ཁག་ཏུ་གནས་ཚུལ་ཐོན་པ་ལྟར་ན། ཕྱི་ལོ ༢༠༢༤ ལོར་རྒྱ་ནག་གཞུང་གིས་དམག་དོན་སྔོན་རྩིས་བརྒྱ་ཆ་ ༧།༢ སྤར་ཏེ་སྔར་ལས་དམག་དོན་ཐོག་ཤུགས་སྣོན་བརྒྱག་རྒྱུ་དང་། བོད་ཀྱི་གཙང་གསུམ་མགོ་ཁོངས་སུ་རྒྱ་ནག་གིས་ཁོར་ཡུག་ལ་གནོད་འཚེ་ཇི་ཙམ་ཐེབས་ཡོད་མེད་ཞིབ་འཇུག་ཚད་ལྡན་བྱ་དགོས་སྐོར་གླེང་སློང་བྱས་ཡོད་འདུག 

ཚོགས་ཆེན་སྒོ་འབྱེད་སྐབས་སྲིད་བློན་ལི་ཆང་གིས། རྒྱ་ནག་གཅིག་གི་སྲིད་ཇུས་ཀྱི་འོག་ནས་ཐའེ་ཝན་དེ་རྒྱ་ནག་གི་རང་སྐྱོང་ས་ཚིགས་ཀྱི་ངོ་བོའི་ཐོག་ནས་དམ་དྲག་དང་ནང་འགྲིག་ཡོང་ཐབས་བྱ་རྒྱུ་དང་། ཚོང་དོན་དང་དཔལ་འབྱོར་གོང་འཕེལ་གྱི་དམིགས་ཚད་བཟུང་ཡོད་སྐོར་སོགས་བཤད་ཡོད་ཅིང་། འདི་ལོར་རྒྱ་ནག་གི་དམག་དོན་རྒྱ་སྐྱེད་སླད་སྔོན་རྩིས་བརྒྱ་ཆ་ ༧།༢ སྤར་གྱི་ཡོད་འདུག་ལ། དེ་ནི་ཕྱི་ལོ་ ༢༠༡༥ རྗེས་རྒྱ་ནག་གིས་དམག་དོན་ཆེད་དངུལ་འབོར་གཏོང་ཐེངས་ཆེས་མང་ཤོས་དེ་ཡིན་ཞིང་། དེའི་ཆེད་དུ་ཨ་སྒོར་ཐེར་འབུམ་ ༢༢༢ གཏང་འཆར་ཡོད་པ་མ་ཟད། རྒྱ་ནག་གཞུང་གིས་ཕྱོགས་ཡོངས་ནས་ཨེ་ཤ་ཡའི་མཚོ་གླིང་རྒྱལ་ཁབ་ཁག་ཏུ་དབང་ཤུགས་སྐྱེད་ཐབས་དང་ཨ་རི་གཙོས་དམངས་གཙོའི་རྒྱལ་ཁབ་ཀྱི་ཁ་གཏད་དུ་ལངས་སླད་དམག་དོན་གྱི་ནུས་པ་ཇེ་ཆེར་གཏང་འཆར་འདུག་ལ། ཕྱི་ལོ་ ༢༠༢༤ ལོའི་རྒྱ་ནག་གི་དཔལ་འབྱོར་གྱི་འཕེལ་ཚད་ཇེ་མགྱོགས་ལ་དམིགས་ནས་ཕྱོགས་ཡོངས་ནས་ཚོང་དོན་གྱི་ནུས་པ་སྔར་ལྷག་འཕེལ་རྒྱས་གཏང་རྒྱུ་དང་། གྲོང་ཁྱེར་ཁག་ཏུ་ལས་མི་ས་ཡ་ ༡༢ ལ་ལས་གནས་སྟེར་རྒྱུ། མིས་བཟོས་རིག་ནུས་ཚུད་པའི་འཕྲུལ་ལས་རིག་པ་དང་། དེང་རབས་འཕྲུལ་ཆས་ཀྱི་ལས་རིགས་གོང་མཐོར།  དེ་བཞིན་མ་འོངས་པར་གཞོན་སྐྱེས་རྣམས་ལ་ལས་རིགས་གང་མང་སྤྲད་འཆར་ཡོད་འདུག

སྤྱིར་རྒྱ་ནག་ཏུ་ཏོག་དབྱིབས་རིམས་ནད་མཆེད་སྐབས་དང་། ཏོག་དབྱིབས་གཙང་སེལ་གྱི་སྲིད་ཇུས་ཟེར་བའི་ཐོག་ནས་བཀག་རྒྱ་བསྡམས་རྗེས། ཚོང་དོན་ཚུད་པའི་དཔལ་འབྱོར་ལ་ཉམས་ཆག་ཆེན་པོ་ཕྱིན་པ་མ་ཟད། རྒྱ་ནག་གི་ཚོང་ཤག་ཆེ་ཤོས་སུ་གྱུར་བའི་ཡུ་རོབ་མཐུན་ཚོགས་ཀྱི་རྒྱལ་ཁབ་ཁག་དང་ཚོང་གི་འབྲེལ་ལམ་ཇེ་ཆུང་དུ་ཕྱིན་ཡོད་ལ། ཕྱི་ལོ་ ༡༩༩༡ ལོ་ནས་ཕྱི་ལོ ༢༠༡༡ ལོ་བར་དུ་ལོ་རེར་དཔལ་འབྱོར་འཕེལ་ཚད་བརྒྱ་ཆ ༡༠ དང་ཕྱེད་ཀ་རེ་འཕར་ཡོད་ཀྱང་།  རྒྱ་ནག་གི་མགོ་ཁྲིད་ཞི་ཅིན་ཕིང་གིས་སྲིད་དབང་བཟུང་བའི་དུས་ཡུན་ནང་དཔལ་འབྱོར་འཕེལ་ཚད་དལ་དུ་ཕྱིན་ཏེ། ཕྱི་ལོ ༢༠༢༡ ལོ་བར་གྱི་ལོ་བཅུ་ཕྲག་གཅིག་གི་རིང་ལ་ཆ་སྙོམས་ཀྱི་བརྒྱ་ཆ་དྲུག་ཚེག་བདུན་ཡས་མས་དང་། ཕྱི་ལོ་ ༢༠༢༣ ལོའི་དཔལ་འབྱོར་གྱི་ཆ་སྙོམས་བརྒྱ་ཆ་ ༥།༢ ཡིན་ཡང་། འདི་ལོའི་ཕྱི་ཟླ་ ༡ ནང་རྒྱ་ནག་གི་གྲངས་རིག་གཞུང་དོན་ལས་ཁུངས་ (National Bureau of Statistics of China) ཀྱིས་ཕྱི་ལོ་ ༢༠༢༤ ལོའི་རྒྱ་ནག་གི་དཔལ་འབྱོར་གྱི་ཆ་སྙོམས་ཀྱི་བརྒྱ་ཆ་ ༤།༦ ཟགས་ཡོད་ཚུལ་བསྒྲགས་ཏེ། འདི་ལོའི་རྒྱ་ནག་རྒྱལ་ཡོངས་ཀྱི་དཔལ་འབྱོར་གྱི་ཆ་སྙོམས་བརྒྱ་ཆ་ ༥ ལ་ཟིན་རྒྱུའི་རེ་བ་བཅང་གི་ཡོད་ཀྱང་། རྒྱལ་སྤྱིའི་ཊམ་ཀའི་ཐེབས་རྩ་ཁང་(International Monetary Fund ) གིས་ཞིབ་འཇུག་བྱས་པ་བརྒྱུད། རྒྱ་ནག་ནང་ཐོན་སྐྱེད་ཞན་པ་དང་རྒས་འཁོགས་སུ་འགྱུར་མུས་ཡིན་པའི་མི་སེར་ཇེ་མང་དུ་འགྲོ་མུས་ཡིན་པའི་དབང་གིས། དཔལ་འབྱོར་ཉམས་ཉེས་སུ་ཕྱིན་ནས་ཕྱི་ལོ ༢༠༢༨ ལོར་བརྒྱ་ཆ་ ༣།༥ ལ་བསླེབ་རྒྱུ་ཡིན་པའི་ཚོད་དཔག་བྱས་ཡོད།

ད་ལན་ཚོགས་ཆེན་ཐོག་བོད་ཁུལ་ནས་ཡོང་བའི་འཐུས་མི་ཁག་ཅིག་གིས་རྒྱ་ནག་གཞུང་གིས་བོད་མཐོ་སྒང་གི་གཙང་གསུམ་གྱི་མགོ་ཁུངས་སུ་ལྟ་ཞིབ་དང་ཚད་ལྡན་ཞིབ་འཇུག་དགོས་སྐོར་དང་། བོད་མཐོ་སྒང་གི་སྲོག་ཆགས་དང་ཁོར་ཡུག དེ་བཞིན་རྩ་ཆེའི་དཔེ་རྙིང་རིགས་ལ་སྲུང་སྐྱོབ་དགོས་པ་སོགས་ཀྱི་གྲོས་གཞི་བཏོན་ཡོད་པ་དང་།  བོད་ཀྱི་གཙང་གསུམ་མགོ་ཁོངས་ཀྱི་ཁོར་ཡུག་ལ་སྲུང་སྐྱོབ་དགོས་སྐོར་གྱི་གྲོས་གཞིའི་ནང་དུ། བོད་ཀྱི་འབྱུང་ཁམས་ཉམས་གསོའི་ལས་གྲྭས་ཡུན་རིང་རང་བཞིན་དང་ཕྱོགས་བསྡུས་རང་བཞིན་གྱི་ལྟ་ཞིབ་ཚད་ལེན་བྱ་རྒྱུར་རྒྱབ་སྐྱོར་བྱ་དགོས་པ་དང་།  གཙང་གསུམ་ཆུ་མགོའི་རྒྱལ་ཁབ་སྤྱི་གླིང་ས་ཁུལ་བདམས་ནས་ཚོད་ལྟ་བྱ་དགོས་པ། གཙང་གསུམ་ཆུ་མགོའི་ཁུལ་གྱི་འབྱུང་ཁམས་ལྟ་ཞིབ་ཤུགས་སྣོན་བརྒྱབ་ནས། རང་བྱུང་ཐོན་ཁུངས་དང་ནགས་རྩྭ། ཞིང་ལས་དང་གྲོང་གསེབ་སོགས་འབྲེལ་ཡོད་སྡེ་ཚན་གྱིས་མཉམ་འགུལ་བྱས་ཏེ་ལྟ་ཞིབ་ཚད་ལེན་གྱི་གཞི་གྲངས་མཉམ་སྤྱོད་ཐུབ་པ་བྱ་དགོས་པ། བོད་ས་མཐོའི་འབྱུང་ཁམས་ཉམས་ཞན་ཁུལ་ཁག་གི་འབྱུང་ཁམས་སླར་གསོ་དང་སྲུང་སྐྱོང་ལས་གྲྭའི་འཛུགས་སྐྲུན་ལ་མུ་མཐུད་ཤུགས་སྣོན་བརྒྱག་དགོས་པ། ལས་གཞི་དེ་དག་ལ་རྒྱ་ནག་གི་འབྱུང་ཁམས་བདེ་འཇགས་ཚོད་ལྟའི་ཚུལ་དུ་རྒྱབ་སྐྱོར་བྱེད་དགོས་སྐོར་སོགས་གསལ་འདུག 

འདས་པའི་ལོ་མང་རིང་བོད་གཙོས་རྒྱ་ནག་གིས་བཙན་འཛུལ་བྱས་པའི་གྲངས་ཉུང་མི་རིགས་ཀྱི་ས་ཁུལ་ཁག་ཏུ་ཚད་ལྡན་གྱི་ཆོས་དད་རང་དབང་དང་མི་མང་སོ་སོར་མགོ་ཁྲིད་གདམ་རྒྱུ་ཡོད་པའི་དྲིལ་བསྒྲགས་ཤུགས་ཆེན་བྱེད་ཀྱི་ཡོད་ཀྱང་། ཟླ་འདིའི་ཕྱི་ཚེས་ ༤ ཉིན་ཨ་རིའི་རྒྱལ་ས་ཝ་ཤིན་ཌོན་དུ་རྟེན་གཞི་བྱས་པའི་རྒྱལ་སྤྱིའི་བོད་དོན་ལས་འགུལ་ཁང་གིས་སྙན་ཐོ་ཞིག་བཏོན་པའི་ནང་། འཐུས་མི ༢༠༥ ལས་གྲུབ་པའི་སྐབས་ཉི་ཤུ་པའི་རྒྱ་ནག་དབུས་དམར་ཤོག་ཚོགས་པའི་རྒྱུན་ལས་ཁོངས་སུ་བོད་མི་གཅིག་ལས་མེད་པ་དང་། ཟླ་འདིའི་ཕྱི་ཚེས་ ༤ ནས་པེ་ཅིན་དུ་བསྡུ་མུས་ཡིན་པའི་རྒྱ་ནག་མི་མང་འཐུས་མི་ཚོགས་ཆེན་དང་། ཆབ་སྲིད་ཚོགས་ཆེན་གཉིས་ཀྱི་ཁོངས་སུ་ཚོགས་གཞོན་གྱི་གོ་གནས་ཡོད་པའི་བོད་མི་གཉིས་ལས་མེད་པ་གསལ་སྟོན་བྱས་ཡོད་ཅིང་། དེ་ནི་རྒྱ་ནག་གཞུང་གིས་བོད་ནང་དུ་བོད་མིའི་མགོ་ཁྲིད་བཞག་ཡོད་པའི་དྲིལ་བསྒྲགས་ལས་ལྡོག་ཟླར་འགྱུར་ཡོད་ཅིང་། ཕྱོགས་ཡོངས་ནས་བོད་ནང་གི་ས་གནས་མང་དག་ཅིག་ཏུ་རྒྱ་ནག་དམར་ཤོག་ཚོགས་པས་མགོ་ཁྲིད་ཐད་ཀར་འདེམས་ནས་མངག་གཏོང་བྱེད་ཀྱི་ཡོད་པ་རེད། 

ད་ལན་གྱི་རྒྱ་ནག་གི་ཚོགས་ཆེན་དང་འབྲེལ་ནས་གནད་དོན་དབྱེ་ཞིབ་པ་ཁག་ཅིག་གིས། ལོ་འཁོར་ཚོགས་ཆེན་ཐོག་རྒྱ་ནག་གི་དཔལ་འབྱོར་གྱི་དར་རྒུད་སྐོར་མང་དག་ཅིག་བཤད་ནས། དཔལ་འབྱོར་འཕེལ་རྒྱས་ཟེར་བ་གཞིགས་ཏེ་དམག་དོན་འཕེལ་རྒྱས་གཏོང་གིན་ཡོད་པ་ལས། དཔལ་འབྱོར་ཉམས་ཉེས་སུ་ཕྱིན་པར་ཕྱི་ནང་གཉིས་ནས་གླེང་སློང་བྱ་དགོས་པའི་གནད་དོན་ཆེན་པོ་ཞིག་མིན་ཏེ། རྒྱ་ནག་ནི་འཛམ་གླིང་གི་ཚོང་གི་ལྟེ་གནས་ཆེ་ཤོས་གཉིས་པ་དེ་ཡིན་པས། རིམ་པས་དཔལ་འབྱོར་དང་ཚོང་དོན་འཕེལ་རྒྱས་འགྲོ་སྲིད་པའི་ཚོད་དཔག་བྱེད་ཀྱི་འདུག 

གསར་འགོད་པ། དཔལ་ལྡན།

རྩོམ་སྒྲིག་པ། པདྨ་མཚོ།