རྒྱ་གཞུང་གིས་དྲག་གནོན་ག་ཚོད་བྱས་ཀྱང་བོད་དོན་འཐབ་རྩོད་རྒྱུན་གནས་ཐུབ་ཡོད་པ་ནི་གཟི་བརྗིད་ཅིག་ཡིན་པས་མུ་མཐུད་འབད་བརྩོན་བྱེད་དགོས་པའི་འབོད་སྐུལ་གནང་།
དེ་རིང་ཕྱི་ཟླ་ ༠༣ ཚེས་༡༠ ཉིན་བོད་མིའི་སྒྲིག་འཛུགས་ཕྱི་དྲིལ་ལྷག་པ་ཚེ་རིང་ཚོགས་ཁང་དུ། འཇར་མན་གྲོས་ཚོགས་འཐུས་མི་སྐུ་ཞབས་མེ་ཀལ་བྷ་རན་ཌི་(Michael Karl Brand) མཆོག་དང་། དེ་བཞིན་ཨོ་གླིང་གྲོས་ཚོགས་འཐུས་མི་ལྕམ་སྐུ་དི་བུ་ར་ཨོ་ནིལ་ (Deborah Mary O’Neill) ལགས་དང་། གྲོས་ཚོགས་འཐུས་མི་སྐུ་ཞབས་མ་ཧི་ཀལ་མེག་ཀོར་མེག་ (Michael McCormack)ལགས། གྲོས་ཚོགས་འཐུས་མི་སྐུ་ཞབས་ཊེ་ཝིཊ་ཨི་སི་མིཊ་ (David Smith)ལགས་དང་། གྲོས་ཚོགས་འཐུས་མི་སྐུ་ཞབས་ཊིན་ཨི་སི་མིཊ་ (Dean Anthony Smith) ལགས་བཅས་ཀྱིས་བོད་ཀྱི་འཐབ་རྩོད་ལ་རྒྱབ་སྐྱོར་དང་བོད་མི་རྣམས་ལ་གདུང་སེམས་མཉམ་སྐྱེད་ཀྱི་གསར་འགོད་གསལ་བསྒྲགས་ཤིག་སྤེལ་གནང་སོང་།
གསར་འགོད་གསལ་བསྒྲགས་ཐོག་འཇར་མན་གྱི་གྲོས་ཚོགས་འཐུས་མི་སྐུ་ཞབས་མེ་ཀལ་(Michael Brand) མཆོག་གིས། རྒྱ་ནག་གཞུང་གིས་ཁྲིམས་འགལ་གྱི་ཐོག་ནས་བོད་མི་གཙོས་ཡུ་གུར་བ་དང་། ཧོང་ཀོང་བ་སོགས་ལ་དྲག་གནོན་ཤུགས་ཆེན་བྱེད་བཞིན་པ་ནི་མཉམ་འབྲེལ་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་གི་གནས་བབ་དང་རྦད་དེ་འགལ་ཡོད་པ་མ་ཟད། འདས་པའི་ལོ་ཤས་རིང་རྒྱ་ནག་གཞུང་གིས་ཨུ་རུ་སུ་དང་དྲག་སྤྱོད་རིང་ལུགས་པ་སོགས་ལ་རྒྱབ་སྐྱོར་བྱས་ནས་ཨེ་ཤ་ཡ་དང་དཀྱིལ་ཤར་ཨེ་ཤ་ཡའི་ཁུལ་དུ་དྲག་པོའི་བྱ་སྤྱོད་མང་དག་ཅིག་སྤེལ་མུས་ཡིན་པའི་ཁར། ཧིན་བོད་མཐའ་མཚམས་ཁུལ་དུ་ཡང་དང་བསྐྱར་དུ་རྩོད་རྙོག་མང་དག་ཅིག་སློང་མུས་ཡིན་པས། དེ་ནི་བོད་ཀྱི་གནད་དོན་དང་བོད་མི་གཅིག་པུ་མིན་པར། རྒྱ་གར་གྱི་བདེ་འཇགས་གཙོས། ཨེ་ཤ་ཡའི་བདེ་འཇགས་ལའང་འབྲེལ་བ་ཡོད་སྐོར་དང་། རྒྱ་ནག་གཞུང་གིས་བོད་ནང་དུ་བཅའ་སྡོད་སློབ་གྲྭ་བཙུགས་ནས་བོད་ཕྲུག་རྣམས་བཙན་གྱིས་ཕ་མ་དང་ཁ་བྲལ་དུ་བཅུག་སྟེ་བཅའ་སྡོད་སློབ་གྲྭར་གཏོང་བ་ཚུད་པའི་བོད་ཀྱི་སྐད་ཡིག་དང་། ངོ་བོ། རིག་གཞུང་སོགས་རྩ་མེད་གཏོང་ཐབས་བྱས་དང་བྱེད་མུས་ཡིན་པར་བློ་ཕམ་ཡོད་པའི་སྐོར་གསུངས་སོང་།
འདི་ག་བོད་ཀྱི་དུས་བབ་གསང་ཁང་གི་གསར་འགོད་པས། དེ་རིང་གསུམ་བཅུའི་དུས་དྲན་ཐེངས་ ༦༥ པའི་ཉིན་མོ་དང་བསྟུན། རྒྱ་ནག་གཞུང་གི་བཙན་གནོན་གྱི་འོག་ཏུ་ཡོད་པའི་བོད་མི་རྣམས་ལ་བརྡ་ལན་ག་རེ་ཡོད་མེད་དྲིས་པར། འདས་པའི་ལོ་ངོ་ ༦༥ རིང་བོད་མི་ཚོས་རྒྱ་ནག་གཞུང་གི་དྲག་གནོན་གྱི་སྲིད་ཇུས་ལ་མ་བལྟོས་པར། བོད་ཀྱི་རང་དབང་འཐབ་རྩོད་ཀྱི་ཆེད་དུ། ཞུམ་མེད་ཀྱི་སེམས་ཤུགས་སྐྱེད་ནས་བོད་ཀྱི་འཐབ་རྩོད་དེ་རྒྱུན་གནས་ཐུབ་ཡོད་པས། དེ་ནི་བོད་མིའི་གཟི་བརྗིད་དང་རླབས་ཆེན་གྱི་བྱ་གཞག་ཅིག་ཡིན་པས། བོད་མི་རྣམས་ཀྱིས་མུ་མཐུད་སྙིང་སྟོབས་སྐྱེད་ནས་བོད་དོན་འཐབ་རྩོད་བྱ་རྒྱུ་དེ་ཧ་ཅང་གལ་ཆེན་ཡིན་པའི་སྐོར་དང་། རྒྱལ་སྤྱིའི་སྤྱི་ཚོགས་ཀྱིས་རྒྱ་ནག་གཞུང་གིས་བོད་ནང་དུ་རྒྱལ་སྤྱིའི་ཁྲིམས་སྒྲིག་དང་འགལ་ནས་ཚད་ལས་འདས་པའི་དྲག་གནོན་བྱེད་ཀྱིན་ཡོད་པའི་ཐད་ལ་གནོན་ཤུགས་སྤྲད་རྒྱུ་དང་དེའི་ཐོག་ཤེས་རྟོགས་བྱ་རྒྱུ་ནི་གལ་ཆེན་ཡིན་སྐོར་དང་། མ་འོངས་པར་ཨོ་གླིང་དང་འཇར་མན་གྱི་གྲོས་ཚོགས་འཐུས་མི་རྣམས་ཀྱིས་བོད་ཀྱི་བདེན་པའི་འཐབ་རྩོད་ལ་རྒྱབ་སྐྱོར་དང་བོད་མི་རྣམས་ལ་གདུང་སེམས་ཡོད་སྐོར་སོགས་གསུངས་སོང་།
འཇར་མན་དང་ཨོ་གླིང་གི་གྲོས་ཚོགས་འཐུས་མི་རྣམས་ཀྱིས་དེ་རིང་ཞོགས་པར་༧གོང་ས་རྒྱལ་བ་རིན་པོ་ཆེ་མཆོག་ལ་མཇལ་ཁ་ཞུས་གྲུབ་རྗེས། གསུམ་བཅུའི་དུས་དྲན་ཐེངས་༦༥ པའི་གཞུང་འབྲེལ་མཛད་སྒོ་ལ་ཆེད་ཕེབས་གནང་ཡོད་པ་མ་ཟད། དབུས་བོད་མིའི་སྒྲིག་འཛུགས་ཀྱི་མཛད་གཙོ་རྣམ་པའི་དབུས་གཞུང་ཁོངས་དང་གཞུང་ཁོངས་མ་ཡིན་པའི་ཚོགས་པ་ཁག་གི་སྐུ་ཚབ་ཁག་དང་ཐུག་འཕྲད་གནང་ཡོད་འདུག
གསར་འགོད་པ། དཔལ་ལྡན།
རྩོམ་སྒྲིག་པ། པདྨ་མཚོ།
