བདེན་པའི་འཐབ་རྩོད་ལས་འགུལ་བ་མགོན་པོ་སྐྱིད་ལགས་ཀྱིས་བོད་རང་སྐྱོང་ལྗོངས་མཐོ་རིམ་མི་མང་ཁྲིམས་ཁང་ཟེར་བའི་མདུན་དུ་རྡོ་རྗེ་བཀྲ་ཤིས་ལགས་ཆེད་དོན་ཚན་གཉིས་ཀྱི་ཐོག་མུ་མཐུད་འབོད་སྐུལ་ཞུ་གཏུག་བྱེད་བཞིན་འདུག
བོད་ཀྱི་ཕྱུག་བདག་ཆེན་མོ་རྡོ་རྗེ་བཀྲ་ཤིས་ལགས་ཀྱི་གཅེན་མོ་བདེན་པའི་འཐབ་རྩོད་པ་མགོན་པོ་སྐྱིད་ལགས་ཀྱིས་བོད་རང་སྐྱོང་ལྗོངས་མི་མང་ཁྲིམས་ཁང་ཟེར་བ་དེས་རྡོ་རྗེ་བཀྲ་ཤིས་ལགས་ལ་དྲང་བདེན་མིན་པའི་ཁྲིམས་ཐག་བཅད་པར་བསྐྱར་དུ་ཁྲིམས་ཞིབ་དགོས་པའི་འབོད་སྐུལ་ལས་འགུལ་མུ་མཐུད་དུ་སྤེལ་བཞིན་ཡོད་པ་ལྟར། ཁ་སང་ཕྱི་ཚེས་ ༡༤ ཉིན་ཁོང་མོས་ཡང་བསྐྱར་བོད་རང་སྐྱོང་ལྗོངས་མཐོ་རིམ་མི་མང་ཁྲིམས་ཁང་ཟེར་བའི་སྒོ་འགྲམ་དུ་ཉལ་ནས་ཞི་བའི་འབོད་སྐུལ་གནང་བཞིན་འདུག
ཁོང་མོའི་འགྲམ་གྱི་མི་ཞིག་གིས་ཡུལ་དངོས་བརྙན་ཐུང་བརྒྱབ་སྟེ། བོད་རང་སྐྱོང་ལྗོངས་མི་མང་ཁྲིམས་ཁང་ལ་རྒྱལ་ཁབ་ཀྱི་རྩ་ཁྲིམས་ཐོག་ནས་རྡོ་རྗེ་བཀྲ་ཤིས་ལགས་ལ་བསྐྱར་དུ་ཁྲིམས་ཞིབ་བྱེད་དགོས་པའི་འབོད་སྐུལ་ལོ་ངོ་མང་པོ་ཞུས་ཡོད་ཀྱང་། རྒྱལ་ཁབ་ཀྱི་རྩ་ཁྲིམས་བཞིན་ཐག་གཅོད་ཅིའང་མ་བྱུང་བར་བརྟེན། ཐེངས་འདིར་བོད་རང་སྐྱོང་ལྗོངས་མཐོ་རིམ་མི་མང་ཁྲིམས་ཁང་གི་མདུན་དུ་མགོན་པོ་སྐྱིད་ལགས་ཀྱིས་རྡོ་རྗེ་བཀྲ་ཤིས་ཀྱི་ཁྲིམས་རྩོད་པར་ཁྲིམས་རྩོད་བྱེད་ཆོག་པ་དང་། ཁྲིམས་ཁང་གིས་བསྐྱར་ཞིབ་ཞུ་དགོས་པའི་ཞུ་འབོད་དོན་ཚན་གཉིས་བྱེད་བཞིན་ཡོད་སྐོར་འགྲེལ་བརྗོད་བྱས་འདུག
དེ་བཞིན་ཟླ་འདིའི་ཕྱི་ཚེས་ ༤ ཉིན་མགོན་པོ་སྐྱིད་ལགས་ཀྱིས་བརྙན་ཐུང་བརྒྱུད་ནས། རྡོ་རྗེ་བཀྲ་ཤིས་ལ་ཁྲིམས་རྩོད་དང་བསྐྱར་ཞིབ་བྱེད་པར་རྩ་ཁྲིམས་ཀྱི་ཐོག་ནས་དབང་ཆ་དང་ཐོབ་ཐང་མ་སྤྲད་པར་བརྟེན། རྡོ་རྗེ་བཀྲ་ཤིས་ལ་བཙོན་ཁང་དུ་བཙོན་འཇུག་བྱས་ཡོད་ཅིང་། ང་ཚོར་བཙོན་ཁང་ཕྱི་རུ་བཙོན་ལས་བྱེད་བཞིན་ཡོད། ང་ཚོ་མི་མང་ལ་གནས་ལུགས་དང་དྲང་བདེན་བཤད་པའི་དབང་ཆ་ཅིའང་མི་འདུག གལ་སྲིད་ང་ཚོར་ཐོབ་ཐང་ཡོད་ཚེ་བཙོན་ལས་བྱེད་དགོས་ཀྱི་མི་འདུག རྒྱལ་ཁབ་ཀྱི་རྩ་ཁྲིམས་ནང་བཞིན་ཁྲིམས་ཞིབ་བྱེད་པའི་དབང་ཆ་དང་ཐོབ་ཐང་མེད་པའི་རྐྱེན་གྱིས་ང་ཚོའང་བཙོན་ལས་བྱེད་ཀྱི་ཡོད་པ་རེད། ཅེས་འགྲེལ་བརྗོད་གནང་འདུག
ཕྱི་ལོ་ ༢༠༢༠ ལོ་སྟེ་རྡོ་རྗེ་བཀྲ་ཤིས་བཙོན་འཇུག་བྱས་ཏེ་ལོ་ ༡༠ ཕྱིན་པའི་སྐབས་དེར་ཁོང་གི་ཁྲིམས་རྩོད་པ་དང་ནང་མི་ཚོས་ཐེངས་མང་དྲང་བདེན་མིན་པའི་ཁྲིམས་ཆད་དེར་བསྐྱར་ཞིབ་དགོས་པའི་རེ་བ་བཏོན་ཡོད་ཀྱང་དོན་འབྲས་ཐོན་མེད་པར་བརྟེན། ཕྱི་ལོ་ ༢༠༢༣ ཟླ་ ༥ ཚེས་ ༡༠ དང་ ༡༦། ཟླ་ ༧ ཚེས་ ༥ དང་ ༡༣། ཕྱི་ཟླ་ ༨ ཚེས་ ༢། ཕྱི་ཟླ་ ༨ ཚེས་ ༢༥ ། ཕྱི་ཟླ་ ༡༢ ཚེས་ ༡༣ བཅས་སུ་མགོན་པོ་སྐྱིད་ལགས་ཀྱིས་ལྷ་ས་འབྲིང་རིམ་མི་མང་ཁྲིམས་ཁང་གི་མདུན་སོགས་ལ་སྔ་གཞུག་ཏུ་ཐེངས་ ༧ ལྷག་ལ་ཟས་བཅད་ངོ་རྒོལ་དང་རྐྱང་ཕྱག་འཚལ་བ་སོགས་བྱས་ནས་ཞུ་འབོད་ལས་འགུལ་སྤེལ་བར་བརྟེན། འདས་ལོའི་ཞི་བའི་ལས་འགུལ་མཐའ་མའི་སྐབས་རྒྱ་གཞུང་གིས་མགོན་པོ་སྐྱིད་ལགས་ཉིན་གྲངས་དགུའི་རིང་འཛིན་བཟུང་བཀག་ཉར་བྱས་ཡོད་པ་དང་། ཁོང་གི་བཟའ་ཟླ་ཆོས་སྐྱོང་ལགས་ཉིན་གྲངས་ལྔའི་རིང་བཀག་ཉར་བྱས་ཏེ་ཕྱིས་སུ་ཀློད་གྲོལ་བཏང་ཡོད་འདུག
འདི་ལོའི་ཕྱི་ཟླ་ ༢ ཚེས་ ༢༠ ཉིན་ནས་བཟུང་ཁོང་མོས་ཡང་བསྐྱར་བོད་རང་སྐྱོང་ལྗོངས་མཐོ་རིམ་མི་མང་ཁྲིམས་ཁང་ཟེར་བའི་སྒོ་འགྲམ་དུ་ཉལ་ནས་ཞི་བའི་འབོད་སྐུལ་གནང་བཞིན་འདུག
གསར་འགོད་པ། བྱམས་པ་ཚེ་རིང་། རྩོམ་སྒྲིག་པ། སྐལ་བཟང་སྦྱིན་པ།
