བལ་ཡུལ་ཇོ་ནང་དགོན་ངེས་དོན་རྟག་བརྟན་བཤད་སྒྲུབ་ཆོས་འཁོར་གླིང་དུ་སྐབས་དང་པོའི་དཀའ་བཅུ་དགེ་བཤེས་ ༡༡ བསླབ་པ་མཐར་སོན་བྱུང་ཡོད་འདུག
ཟླ་འདིའི་ཕྱི་ཚེས་ ༡༣ ནས་ཚེས་ ༡༥ བར་ཉིན་གྲངས་གསུམ་རིང་བལ་ཡུལ་ཇོ་ནང་དགོན་ངེས་དོན་རྟག་བརྟན་བཤད་སྒྲུབ་ཆོས་འཁོར་གླིང་དུ། དཀའ་བཅུ་དགེ་བཤེས་སྐབས་དང་པོའི་མཐར་སོན་མཛད་སྒོ་འཚོགས་ཡོད་ཅིང་། ཐེངས་འདིའི་མཛད་སྒོའི་ཐོག་ཏུ་༧དབུ་འཛིན་མཆོག་སྤྲུལ་རིན་པོ་ཆེ་བཀྲ་ཤིས་རྒྱལ་མཚན་མཆོག་དང་། མཁན་རིན་པོ་ཆེ་ངག་དབང་དགེ་འདུན་རྒྱ་མཚོ་མཆོག་གི་དབུས་ཇོ་ནང་རྒྱལ་ཚབ་རིན་པོ་ཆེ་མཆོག་གི་སྐུ་ཚབ་མཁན་པོ་ཡེ་ཤེས་མཆོག དགེ་བཤེས་ལྷ་རམས་པ་དྲི་མེད་འོད་ཟེར་མཆོག དཀའ་བཅུ་དགེ་བཤེས་ཚུལ་ཁྲིམས་རྣམ་རྒྱལ་མཆོག འཕགས་ཡུལ་སིམ་ལ་ཇོ་ནང་མ་དགོན་གྱི་མཁན་ཟུར་རིན་པོ་ཆེ་ཀུན་དགའ་མཚམས་ཆུང་མཆོག ༧སྐྱབས་རྗེ་སྟེང་རིན་པོ་ཆེ་མཆོག་གི་སྐུ་ཚབ་ཀཿ ཐོག་སྤུལ་སྐུ་བསྟན་འཛིན་འཇིགས་མེད་རྡོ་རྗེ་མཆོག མཁན་པོ་ཆོས་འབྱོར་རྒྱ་མཚོ་མཆོག རྒྱལ་སྤྱིའི་ཇོ་ནང་འགྲོ་ཕན་ལྷན་ཚོགས་ཀྱི་ཚོགས་གཙོ་རྟག་བརྟན་དགེ་བཤེས་བླ་མ་སྦྱིན་པ་བཟང་པོ་མཆོག རྒྱ་གར་དང་བལ་ཡུལ་གྱི་དགོན་སྡེ་ཁག་དང་ཚོགས་སྡེ་ཁག་གི་མཁན་བླ་སྤྲུལ་རྣམ་པ། གྲྭ་མང་འདུས་སྡེ་གདན་འཛོམས་ཐོག་དཀའ་བཅུ་དགེ་བཤེས་རྣམ་པས་གཞུང་བཀའ་པོད་ལྔ་ལ་དམ་བཅའ་ཆེན་མོ་བཞག་ཡོད་འདུག
དེ་རིང་འདི་གའི་གསར་འགོད་པས་ཁ་པར་བརྒྱུད་དགེ་བཤེས་བཟོད་པ་རྣམ་རྒྱལ་ལགས་སུ་དཀའ་བཅུ་དགེ་བཤེས་དེ་གལ་གནད་ཆེན་པོ་ཡིན་པའི་རྒྱུ་མཚན་ག་རེ་ཡིན་སྐོར་དྲིས་པར། ཁོང་གིས། ད་ལོ་དཀའ་བཅུ་དགེ་བཤེས་གལ་གནད་ཆེན་པོ་ཡིན་པའི་རྒྱུ་མཚན་གཙོ་བོ་ནི། ང་ཚོ་དགོན་པ་རང་ལ་མཚོན་ན་དཀའ་བཅུ་དགེ་བཤེས་སྐབས་དང་པོ་ཆགས་ཀྱི་ཡོད་པ་དང་། དཀའ་བཅུ་དགེ་བཤེས་ཟེར་བ་དེ་ལོ་ངོ་སུམ་བརྒྱ་གོང་ལ་ཇོ་ནང་གི་བླ་མ་རྣམས་ཀྱི་མཚན་གནས་ལ་དཀའ་བཅུ་དགེ་བཤེས་ཀྱི་མཚན་གནས་བཞེས་མཁན་མང་པོ་ཡོད་རེད། འོན་ཀྱང་། དེའི་རྗེས་ནས་ཇོ་ནང་དུ་དཀའ་བཅུ་དགེ་བཤེས་ཀྱི་མཚན་གནས་བཞེས་མཁན་ཉམས་སོང་བར་བརྟེན། ད་ལོ་ང་ཚོའི་དགོན་པ་འདི་ནང་དཀའ་བཅུ་དགེ་བཤེས་ཀྱི་མཚན་དེ་ཉམས་པ་སླར་གསོ་བྱས་པ་སོགས་ལ་བརྟེན་ནས་དཀའ་བཅུ་དགེ་བཤེས་དེ་གལ་གནད་ཆེན་པོར་འཛིན་གྱི་ཡོད། ཅེས་བརྗོད་བྱུང་།
ཁ་སང་ཕྱི་ཚེས་ ༡༥ ཉིན་དཀའ་བཅུ་དགེ་བཤེས་ཀྱི་དངོས་གཞིའི་མཛད་སྒོ་ཚོགས་ཏེ། དཀའ་བཅུ་དགེ་བཤེས་མཐར་སོན་པ་ ༡༡ ལ་དཀའ་བཅུ་རབ་འབྱམས་པའི་ཕྱག་འཁྱེར་གནང་ཡོད་འདུག ཇོ་ནང་དགོན་ངེས་དོན་རྟག་བརྟན་བཤད་སྒྲུབ་ཆོས་འཁོར་གླིང་གི་དཀའ་བཅུ་དགེ་བཤེས་སྐབས་དང་པོའི་ནང་དཀའ་བཅུ་དགེ་བཤེས་མཐར་ཐོན་པ་མི་གྲངས་ ༡༡ བྱུང་ཡོད་ཅིང་། དཀའ་བཅུ་དགེ་བཤེས་མཐར་སོན་པ་རྣམས་ཀྱིས་ལོ་ངོ་བཅོ་བརྒྱད་ལྷག་གི་རིང་ལ་ཐུན་མོང་རིག་གནས་དང་། དཔལ་རྒྱལ་བ་ཇོ་ནང་པའི་རང་ལུགས་ཐུན་མོང་མ་ཡིན་པའི་གཞུང་ཆེན་བཀའ་པོད་ལྔ་མཐར་ཕྱིན་ཏེ་དཀའ་བཅུ་དགེ་བཤེས་ཀྱི་བསླབ་པ་མཐར་སོན་པ་ཞིག་ཡིན་འདུག
ཟླ་འདིའི་ཕྱི་ཚེས་ ༡༤ ཉིན་དམ་བཅའ་ཆེན་མོའི་མཛད་རིམ་ལ་༧དབུ་འཛིན་མཆོག་སྤྲུལ་རིན་པོ་ཆེ་བཀྲ་ཤིས་རྒྱལ་མཚན་མཆོག་དང་། མཁན་རིན་པོ་ཆེ་ངག་དབང་དགེ་འདུན་རྒྱ་མཚོ་མཆོག་གི་དབུས་ཇོ་ནང་རྒྱལ་ཚབ་རིན་པོ་ཆེ་མཆོག་གི་སྐུ་ཚབ་མཁན་པོ་ཡེ་ཤེས་མཆོག་སོགས་གྲྭ་མང་འདུས་སྡེ་གདན་འཛོམས་ཐོག དཀའ་བཅུ་དགེ་བཤེས་རྣམ་པས་གཞུང་བཀའ་པོད་ལྔ་ལ་དམ་བཅའ་ཆེན་མོ་འཇོག་པ་དང་འཛིན་གྲྭ་སོ་སོ་ནས་རྟགས་གསལ་བཏང་ཡོད་འདུག ཕྱི་ཚེས་ ༡༣ ཉིན་སྔོན་འགྲོའི་མཛད་རིམ་ལ་དགེ་འདུན་འདུས་མང་ཚོགས་ཁང་ངེས་དོན་ལུང་རྟོགས་ཆོས་ཀྱི་དགའ་ཚལ་དུ། མཁན་རིན་པོ་ཆེ་ངག་དབང་དགེ་འདུན་རྒྱ་མཚོ་མཆོག་དབུ་བཞུགས་ཐོག་མཁན་བླ་སྤྲུལ་དགེ་འདུན་འདུས་མང་ནས་བླ་བརྒྱུད་གསོལ་འདེབས་དང་ཀུན་མཁྱེན་མཆོད་ཆོག་ཚོགས་དང་བཅས་པ་གསུང་གནང་བ་དང་། མཁན་རིན་པོ་ཆེ་ངག་དབང་དགེ་འདུན་རྒྱ་མཚོ་མཆོག་ནས་དགེ་འདུན་འདུས་མང་ཚོགས་དབུས་སུ་དཀའ་བཅུའི་དགེ་བཤེས་ཀྱི་མཚན་གནས་དང་ན་བཟའ་བསྩལ་ཡོད་འདུག
བལ་ཡུལ་ཇོ་ནང་དགོན་ངེས་དོན་རྟག་བརྟན་བཤད་སྒྲུབ་ཆོས་འཁོར་གླིང་ནི་ཕྱི་ལོ་ ༢༠༠༤ ལོར་༧མཆོག་སྤྲུལ་བཀྲ་ཤིས་རྒྱལ་མཚན་མཆོག་གིས་བལ་ཡུལ་གྱི་གནས་མཆོག་མཆོད་རྟེན་བྱ་རུང་ཁ་ཤོར་གྱི་ཉེ་འགྲམ་དུ་གསར་འཛུགས་གནང་བའི་དཔལ་རྒྱལ་བ་ཇོ་ནང་བའི་གདན་ས་ཐོག་མ་ཡིན་འདུག མཆོག་སྤྲུལ་རིན་པོ་ཆེའི་གཟིགས་སྐྱོང་འོག་ད་ལྟའི་ཆར་བལ་ཡུལ་གྱི་དོལ་པོ་དང་། ཀརྨ་ལུང་པ། ཡོར་མོ། མུ་གུམ་བཅས་དང་། རྒྱ་གར་གྱི་མོན་རྟ་དབང་སོགས་ནས་ཕེབས་པའི་དགེ་འདུན་པ་དང་སློབ་ཕྲུག་ ༤༠༠ ཙམ་གྱིས་བོད་ཀྱི་སྐད་ཡིག་རིག་གཞུང་དང་བཅས་པའི་རྒྱལ་བ་ཇོ་ནང་བའི་རང་ལུགས་དབུ་མ་གཞན་སྟོང་གི་གཞུང་ལུགས་ལ་སློབ་གཉེར་བྱེད་བཞིན་ཡོད་པ་རེད།
གསར་འགོད་པ། བྱམས་པ་ཚེ་རིང་། བསྟན་འཛིན་ཕུར་བུ།
