རྩིས་ལོ་ ༢༠༢༤ ་་་ ༢༠༢༥ ལོའི་སྔོན་རྩིས་ནང་བཀའ་ཤག་གིས་སྒོར་ས་ཡ་ ༣༠༣༤། ༠༡ གི་འགྲོ་གྲོན་རྒྱབ་གཉེར་ཞུས་པར་སྔོན་རྩིས་ཚོད་དཔག་འཆར་རྩིས་ཚོགས་ཆུང་གིས་གཅོག་ཆ་གཉིས་ལས་གཅིག་ལ་གཅོག་ཆའི་གྲོས་འཆར་ཕུལ་འདུག
དཔལ་འབྱོར་བཀའ་བློན་སྤེན་པ་ཚེ་རིང་མཆོག་གིས་རྩིས་ལོ་ ༢༠༢༤་་་༢༠༢༥ ལོའི་སྔོན་རྩིས་གསུང་བཤད་གནང་བཞིན་པ། ༡༩།༠༣།༢༠༢༤
ཁ་སང་ཕྱི་ཚེས་ ༡༨ དང་ ༡༩ སྟེ་བོད་མིའི་སྒྲིག་འཛུགས་ཀྱི་རྩིས་ལོ་ ༢༠༢༤ དང་ ༢༠༢༥ ཡི་སྔོན་རྩིས་ལས་ཉིན་གཉིས་རིང་། དབུས་བོད་མིའི་སྒྲིག་འཛུགས་ཀྱི་ལས་ཁུངས་མ་ལག་དང་བཅས་པའི་རྩིས་ལོ ༢༠༢༤ ་་་ ༢༠༢༥ ཡི་རྒྱུན་གྲོན་དང་། དམིགས་བསལ། ཟུར་བཀོལ། དམིགས་བཀར་ལས་འཆར་བཅས་ལ་བཀའ་འཁྲོལ་གཏན་འབེབས་སྒོར་ས་ཡ་ ༣༠༣༤། ༠༡ གི་བཀའ་འཁྲོལ་གནང་ཡོད་ཀྱང་། ནང་སྲིད་ལས་ཁུངས་ཀྱི་སྣུམ་འཁོར་གསར་ཉོའི་ཆེད་མཐའ་མའི་འཕར་སྣོན་རིན་ཚད་བརྒྱ་ཆ་ ༢༥ ནས་བརྒྱ་ཆ་༡༨ གཅོག་ཆའི་གྲོས་འཆར་བཏོན་གནང་འདུག
ཁ་སང་གྲོས་ཚོགས་ཚོགས་དུས་བདུན་པའི་ལས་ཉིན་དང་པོའི་ཚོགས་ཐུན་གསུམ་སྟེང་དཔལ་འབྱོོར་བཀའ་བློན་སྤེན་པ་ཚེ་རིང་མཆོག་གིས་བོད་མིའི་སྒྲིག་འཛུགས་ཀྱི་རྩིས་ལོ་ ༢༠༢༤ ་་་ ༢༠༢༥ ལོའི་སྔོན་རྩིས་འགོད་འབུལ་གྱི་གསུང་བཤད་གནང་བའི་ནང་། བཙན་བྱོལ་བོད་མིའི་འདུ་འགོད་དང་། ལོ་འཁོར་སྔོན་རྩིས། སྔོན་རྩིས་སྟངས་འཛིན་བཅས་ཀྱི་སྒྲིག་གཞི་དོན་ཚན་བརྒྱད་པའི་ནང་གསེས་དང་པོ་དང་། བོད་མི་མང་སྤྱི་འཐུས་ལྷན་ཚོགས་ཀྱི་ཚོགས་འདུ་འགྲོ་ལུགས་དང་ལས་དོན་བྱེད་ཕྱོགས་ཀྱི་སྒྲིག་གཞི་དོན་ཚན་དྲུག་ཅུ་རེ་དྲུག་པའི་ནང་གསེས་གསུམ་པའི་དགོངས་དོན། བོད་མིའི་སྒྲིག་འཛུགས་ཀྱི་ལས་ཁུངས་མ་ལག་དང་བཅས་པའི་རྩིས་ལོ་ ༢༠༢༤ ་་་ ༢༠༢༥ ལོའི་བཀག་ཤག་གི་སྔོན་རྩིས་འཆར་འབུལ་གྲོས་ཚོགས་ལ་འཆར་འབུལ་ཞུས་ནས། འཛིན་སྐྱོང་གིས་ངོས་ནས་རྒྱ་བལ་གཉིས་ཀྱི་བོད་མི་རྣམས་ཀྱི་དགོས་འདུན་དང་། བོད་མི་མང་སྤྱི་འཐུས་ལྷན་ཚོགས་ཀྱི་སྤྱི་འཐུས་རྣམས་ཀྱི་གཞུང་འབྲེལ་ཕྱོགས་སྐྱོད་སྐབས། ས་གནས་བོད་མི་རྣམས་ཀྱིས་སྤྱི་འཐུས་རྣམས་ལ་བཏོན་པའི་རེ་འདུན་དང་དགོས་མཁོ་སོགས་ལ་གཞིགས་ནས། ལས་འཆར་བཀོད་ནས་རྩིས་ལོ ༢༠༢༣ དང ༢༠༢༤ ལོའི་ལས་དོན་མང་དག་ཅིག་འགྲོ་དང་འགྲོ་མུས་ཡིན་པའི་སྐོར་གསུངས་སོང་།
ཡང་སྲིད་སྐྱོང་སྤེན་པ་ཚེ་རིང་མཆོག་གིས། རྩིས་ལོ ༢༠༢༤ ་་་ ༢༠༢༥ ཡི་རྩིས་ལོའི་ནང་དབུས་བོད་མིའི་སྒྲིག་འཛུགས་ཀྱི་ལས་དོན་ལྷག་མ་དང་། ལས་གཞི་གསར་པ་ཁག་ཅིག་ཚུད་པ་བྱས་ཡོད་པའི་སྐོར་དང་། འདས་པའི་ལོ་གཅིག་གི་རིང་དབུས་བོད་མི་རིགས་ཀྱི་རོགས་ཁག་ཏུ་འབྲེལ་ལམ་བཙུགས་ནས་ཚོགས་འདུ་ལན་འགར་བསྡུ་སྐོང་བྱས་ནས། རོགས་ཚོགས་ཁག་གི་རོགས་དངུལ་ཁ་བསྒྱུར་སོགས་ཀྱི་ལས་དོན་ཐད་གོ་བསྡུར་དང་མཉམ་ལས་ཀྱི་ལས་དོན་གོང་མཐོར་དང་། བཀའ་ཤག་སྐབས་ ༡༦ པའི་གྲངས་ཐོ་ཞིབ་བཤེར་གྱི་ལས་གཞི་གང་མགྱོགས་ལེགས་གྲུབ་དང་གྲངས་ཐོ་སོགས་ལ་གཞིགས་ནས་མི་མང་གི་བདེ་སྡུག་ལྟ་ཞིབ་བགྱིས་ཏེ་ལས་དོན་ཚགས་ཚུད་ཡོང་རྒྱུར་རེ་འདུན་བཅང་གི་ཡོད་སྐོར་གསུངས་སོང་།
རྩིས་ལོ་གསར་པས་ནང་བོད་མིའི་སྒྲིག་འཛུགས་ཀྱི་ལས་ཁུངས་མ་ལག་དང་བཅས་པའི་རྩིས་ལོ་༢༠༢༤་་་༢༥ ལོའི་རྒྱུན་གྲོན་དང་། དམིགས་བསལ། ཟུར་བཀོལ། དམིགས་བཀར་ལས་འཆར་བཅས་ཀྱི་ཕྱོགས་སྡོམ་གྱི་འགྲོ་གྲོན་དགོས་དངུལ་སྒོར་ས་ཡ་ ༣༣༣༡། ༥༥ འཆར་འབུལ་གནང་ཡོད་ཅིང་། རྩིས་ལོ་༢༠༢༣་་་༢༤ ལོའི་ཐོག་མའི་སྔོན་རྩིས་བཀའ་འཁྲོལ་གཏན་འབེབས་སྒོར་ས་ཡ་ ༣༠༣༤། ༠༡ ལས་སྒོར་ས་ཡ་ ༢༩༧། ༥༤ དང༌། བརྒྱ་ཆ་ ༩། ༨༡ མང་བ་བྱས་ཡོད་འདུག་ལ། སྔོན་རྩིས་འཆར་འགོད་ཚོགས་ཆུང་གིས་ཞིབ་འཇུག་བྱས་པ་བརྒྱུད། རྩིས་ལོ་འདིའི་ནང་སྔ་ལོ་ལས་སྔོན་རྩིས་འཆར་འབུལ་སྒོར་ས་ཡ་ ༢༩༧། ༥༤ དང་བརྒྱ་ཆ་ ༩། ༨༡ སྤར་ཡོད་པ་དེར། བཀའ་ཤག་གི་རྒྱབ་གཉེར་གནང་བའི་འགྲོ་གྲོན་ལ་ཚོགས་ཆུང་གི་ངོས་ནས་ཆེད་གཉེར་གྱིས་སྤར་གཅོག་གང་ཡང་བྱས་མེད་ཀྱང་། ནང་སྲིད་ལས་ཁུངས་ཀྱི་སྣུམ་འཁོར་གསར་ཉོའི་ཆེད་མཐའ་མའི་འཕར་སྣོན་རིན་ཚད་བརྒྱ་ཆ་ ༢༥ ནས་བརྒྱ་ཆ་༡༨ གཅོག་ཆའི་གྲོས་འཆར་ཕུལ་ཡོད་འདུག
ཡང་དེ་རིང་གི་ལས་ཉིན་སྟེང་ཕྱི་ལོ་ ༢༠༢༣ ཟླ་ ༣ པའི་ཚེས་ ༡༦ ཉིན་གྱི་སྔ་དྲོར་བོད་དོན་ཐོག་རྒྱབ་སྐྱོར་ཡུན་རིང་གནང་མཁན་ལ་དྭགས་བླ་མ་བློ་བཟང་མཆོག་དགུང་ལོ་ ༩༣ གྱི་ཐོག་ལྡི་ལིར་སྐུ་ཚེའི་འཕེན་པ་རྫོགས་པའི་ཡིད་སྐྱོའི་གནས་ཚུལ་བྱུང་བར་གཞུང་འབྲེལ་མྱ་ངན་གུས་འདུད་ཀྱི་རྗེས་དྲན་གྲོས་ཆོད་གྲོས་འཆར་ཞིག་བཏོན་གནང་སོང་།
གསར་འགོད་པ། དོན་འགྲུབ་བཀྲ་ཤིས། དཔལ་ལྡན། རྩོམ་སྒྲིག་པ་སྐལ་བཟང་སྦྱིན་པ།
