ཕྱི་ལོ་ ༢༠༢༣ ལོའི་བོད་ནང་གི་གནས་སྟངས་སྐོར་གྱི་སྙན་ཐོ་ཞིག་བཏོན།

བོད་ཀྱི་འགྲོ་བ་མིའི་ཐོབ་ཐང་དང་མང་གཙོ་འཕེལ་རྒྱས་ལྟེ་གནས་ཁང་གིས་ཕྱི་ལོ་ ༢༠༢༣ ལོའི་བོད་ནང་གི་འགྲོ་བ་མིའི་ཐོབ་ཐང་གི་གནས་སྟངས་ཀྱི་ལོ་འཁོར་སྙན་ཐོ་ཞིག་འདོན་སྤེལ་གནང་བའི་ནང་འདས་ལོར་རྒྱ་ནག་གཞུང་གིས་ཉུང་མཐར་ཡང་བོད་མི་ ༣༧ ལྷག་འཛིན་བཟུང་བཀག་ཉར་བྱས་ཡོད་འདུག

དེ་རིང་ཕྱི་ཟླ་ ༣ ཚེས ༢༠ ཉིན་བཞུགས་སྒར་དུ་རྟེན་གཞི་བྱས་པའི་བོད་ཀྱི་འགྲོ་བ་མིའི་ཐོབ་ཐང་དང་མང་གཙོ་འཕེལ་རྒྱས་ལྟེ་གནས་ཁང་གིས། ཕྱི་ལོ་ ༢༠༢༣ ལོའི་བོད་ནང་གི་འགྲོ་བ་མིའི་ཐོབ་ཐང་གི་གནས་སྟངས་ཀྱི་ལོ་འཁོར་སྙན་ཐོ་ཞིག་འདོན་སྤེལ་གནང་བའི་ཁྲོད། རྒྱ་ནག་གཞུང་གིས་འདས་ལོར་གཅིག་པུར་བོད་མི་གྲངས་ ༣༧ ལྷག་གང་བྱུང་འཛིན་བཟུང་བཀག་ཉར་དང་། བོད་མི་བཞི་ཀློད་གྲོལ་དང་དྲུག་གར་སོང་ཆ་མེད། གསུམ་འདས་གྲོངས་དང་། དེ་བཞིན་བོད་མི་དྲུག་ལ་ཁྲིམས་ཐག་བཅད་ཡོད་ཀྱང་།  རྒྱ་ནག་གཞུང་གིས་འཛིན་བཟུང་བྱས་པའི་བོད་མི་མང་དག་ཅིག་གི་ད་ལྟའི་དངོས་ཡོད་ཀྱི་གནས་སྟངས་ཤེས་རྟོགས་བྱུང་གི་མེད་པ་རེད་འདུག

ལྟེ་གནས་ཁང་དེས་སྤེལ་བའི་གསལ་འགོད་བསྒྲགས་གཏམ་ནང་། ཕྱི་ལོ་ ༢༠༢༣ ལོའི་ལོ་མགོ་ནས་བཟུང་རྒྱ་ནག་གཞུང་གིས་བོད་ནང་དུ་མུ་མཐུད་སྨྲ་བརྗོད་རང་དབང་དང་ཆོས་དད་རང་དབང་སོགས་འགྲོ་བ་མིའི་ཐོབ་ཐང་ཁག་ལ་བཀག་སྡོམ་སྔར་ལྷག་བྱས་ཐོག གཞིས་བྱེས་བོད་མི་དང་རྒྱལ་སྤྱིའི་སྤྱི་ཚོགས་ནས་བོད་དུ་རིག་གཞུང་བཙན་བསྒྱུར་གྱི་ལས་གཞི་སྤེལ་བཞིན་པ་མཚམས་འཇོག་དགོས་པའི་དགོས་འདུན་ལན་མང་བཏོན་པ་ལ་ཉན་འཇོག་མ་བྱས་པར་མུ་མཐུད་བོད་ནང་དུ་རྒྱ་བསྐྱུར་གྱི་སློབ་གསོའི་ལམ་ལུགས་སྤེལ་ཤུགས་ཇེ་ཆེར་བཏང་ནས་མི་རིགས་རྒྱ་བསྒྱུར་དང་རིག་གཞུང་བཙན་བསྒྱུར་གྱི་ལས་འགུལ་མངོན་གསལ་དོད་པོར་སྤེལ་བཞིན་འདུག རྒྱ་གཞུང་གིས་སྤྱི་ཚོགས་བརྟན་རླིང་དང་དྲྭ་ལམ་གྱི་བདེ་འཇགས་སོགས་ཀྱི་མིང་ཐོག་ནས་བོད་མི་ཚོའི་འདུ་འཛོམས་རང་དབང་ལ་མུ་མཐུད་བཀག་སྡོམ་ཆེས་ཆེར་བྱེད་པར་དྲང་བདེན་མ་ཡིན་པའི་སྲིད་ཇུས་ལག་བསྟར་བྱེད་པར་དྲྭ་ལམ་དང་ཡུལ་དངོས་གཉིས་ནས་བསམ་ཚུལ་འཆད་མཁན་དང་སྐྱོན་བརྗོད་བྱེད་མཁན་གྱི་བོད་མི་ཚོ་འཇུ་བཟུང་མནར་གཅོད་དང་བཙོན་འཇུག་ཁྲིམས་ཆད་སོགས་བྱས་དང་བྱེད་མུས་རེད། ཅེས་བསྒྲགས་འདུག

གསལ་འགོད་བསྒྲགས་གཏམ་ནང་། རྒྱ་ནག་གཞུང་གིས་ཆོས་ལུགས་ཀྱི་བྱེད་སྒོ་སྤེལ་ཡུལ་དོ་དམ་བྱེད་ཐབས་ཀྱི་སྒྲིག་ཁྲིམས་གསར་པ་སོགས་བཟོས་ནས་ཆོས་ཕྱོགས་ཀྱི་ལས་དོན་མཐའ་དག་རྒྱ་གཞུང་རང་གི་དོ་དམ་འོག་བཅུག་སྟེ་བོད་མི་རྣམས་ཀྱི་ཆོས་ལུགས་དད་མོས་རང་དབང་ལ་སྔར་ལྷག་རྡོག་རོལ་ཚབས་ཆེན་གཏོང་བཞིན་ཡོད་པའི་སྐོར་དང་། རྒྱ་ནག་གཞུང་གིས་བཀག་ཉར་འོག་ཏུ་ཡོད་པའི་བོད་མི་རྣམས་ལ་ཁྲིམས་བཤེར་གྱི་ཐོབ་ཐང་དང་། ཁྲིམས་རྩོད་པ་གླས་པ། ཁྲིམས་འགལ་ཐོག་ནས་ཡུན་རིང་བཀག་ཉར་བྱས་པའི་སྐོར། བཙན་གནོན་འོག་ཡོད་པའི་བོད་མི་རྣམས་ལ་གཅར་རྡུང་ཚད་མེད་བཏང་ནས་འདས་གྲོངས་སུ་གྱུར་ཡོད་པའི་གནས་ཚུལ་བཅས་ཀྱི་སྐོར་སོགས་གསལ་འདུག

ཡང་གསལ་འགོད་བསྒྲགས་གཏམ་ནང་། བོད་ནང་གི་འགྲོ་བ་མིའི་ཐོབ་ཐང་གི་གནས་བབ་ཡར་རྒྱས་གཏོང་རྒྱུ་ནི་སྐབས་བབ་ཀྱི་གནད་དོན་གལ་ཆེ་ཤོས་ཤིག་ཡིན་པ་མཟད། བོད་མི་རིགས་ཀྱི་འཚོ་གནས་དང་བོད་ཀྱི་སྐད་ཡིག་དང་རིག་གཞུང་རྒྱུན་གནས་ལ་ཐད་ཀར་འབྲེལ་བ་ཡོད་པས་རྒྱ་ནག་གཞུང་གིས་ངེས་པར་དུ་རྒྱལ་སྤྱིའི་སྤྱི་ཆིངས་དང་རང་གི་རྩ་ཁྲིམས་དང་བཅའ་ཁྲིམས་སོགས་ཀྱིས་བསྐུལ་བའི་ལས་འགན་དག་ཚུལ་བཞིན་བསྒྲུབས་ཏེ་བོད་མི་ཚོའི་འགྲོ་བ་མིའི་ཐོབ་ཐང་ལ་འགན་སྲུང་ནན་པོ་བྱེད་དགོས། ཞེས་འཁོད་འདུག

བོད་ཀྱི་འགྲོ་བ་མིའི་ཐོབ་ཐང་དང་མང་གཙོ་འཕེལ་རྒྱས་ལྟེ་གནས་ཁང་གིས་ཕྱི་ལོ་ ༢༠༢༣ ལོའི་བོད་ནང་གི་འགྲོ་བ་མིའི་ཐོབ་ཐང་གི་གནས་སྟངས་ཀྱི་ལོ་འཁོར་སྙན་ཐོའི་ནང་དོན་ཚན་བརྒྱད་ཡོད་པའི་ཁྲོད། རྒྱ་ནག་གཞུང་གི་དམ་དྲག་དང་བཙན་གནོན་འོག་གི་ཕྱི་ལོ་ ༢༠༢༣ ལོའི་བོད་ནང་གི་སྨྲ་བརྗོད་རང་དབང་གི་གནས་བབ་ཀྱི་སྐོར་དང་། ཤེས་ཡོན་དང་སྐད་ཡིག་གི་ཐོབ་ཐང་། གང་བྱུང་འཇུ་བཟུང་དང་མནར་གཅོད་ཀྱི་སྐོར། བོད་ནང་གི་ཆོས་དད་རང་དབང་གི་གནས་བབ་སོགས་ཀྱི་ཐད་གསལ་སྟོན་བྱས་ཡོད་འདུག

གསར་འགོད་པ། དོན་གྲུབ་བཀྲ་ཤིས། དཔལ་ལྡན། རྩོམ་སྒྲིག་པ་སྐལ་བཟང་སྦྱིན་པ།