ཡུ་རོབ་མཐུན་ཚོགས་ནས་བོད་ནང་གི་འགྲོ་བ་མིའི་ཐོབ་ཐང་གི་གནས་སྟངས་ལ་བློ་འཚབ་དང་བྱ་བྲལ་རིན་པོ་ཆེ་གཙོས་བོད་ཀྱི་ཆབ་སྲིད་བཙོན་པ་རྣམས་འཕྲལ་དུ་ཀློད་གྲོལ་དགོས་པའི་འབོད་སྐུལ་ཞུས་ཡོད་འདུག
ཕྱི་ཟླ་ ༢ ཚེས་ ༢༦ ཉིན་ནས་ཕྱི་ཟླ་ ༤ ཚེས་ ༥ བར་མཉམ་འབྲེལ་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་ལྷན་ཚོགས་ཀྱི་ཚོགས་འདུ་ཐེངས་ ༥༥ པ་འཚོག་བཞིན་ཡོད་པ་དང་བསྟུན། ཡུ་རོབ་མཐུན་ཚོགས་ནས་བོད་ནང་གི་འགྲོ་བ་མིའི་ཐོབ་ཐང་གི་གནས་སྟངས་དང་། བོད་ནང་གི་བྱིས་པ་རྣམས་བཙན་གྱིས་བཅའ་སྡོད་སློབ་གྲྭར་བཅུག་སྟེ་རྒྱ་སྒྱུར་སློབ་གསོ་སྤྲོད་ཀྱི་ཡོད་པ་དང་། བོད་མིའི་རིགས་རྫས་བསྡུ་རུབ་བྱེད་ཀྱི་ཡོད་པ་སོགས་གསལ་སྟོན་གྱིས་བློ་འཚབ་བསྟན་གནང་འདུག
ཡུ་རོབ་མཐུན་ཚོགས་ཀྱིས་དེ་འབྲེལ་བསྒྲགས་གཏམ་ཞིག་སྤེལ་བའི་ནང་། འགྲོ་བ་མིའི་ཐོབ་ཐང་དོན་གཉེར་བ་དང་། ཁྲིམས་རྩོད་པ། གསར་འགོད་པ། རྩོམ་པ་པོ། ཆེད་མཁས་པ་སོགས་ལ་བསུན་གཙེར་དང་འཇིགས་སྐུལ། དེ་བཞིན་གསང་མྱུལ་བྱས་ཏེ་རྒྱལ་མཚམས་ལས་བརྒལ་བའི་དྲག་གནོན་བྱེད་བཞིན་པ་གསལ་སྟོན་གནང་བ་མ་ཟད། ཡུ་རོབ་མཐུན་ཚོགས་ནས་བཟང་བཙོན་དང་སྡུག་སྦྱོང་མནར་གཅོད། ཁྲིམས་འགལ་གྱི་བཙོན་འཇུག འཛིན་བཟུང་། གར་སོང་ཆ་མེད་དུ་གྱུར་བ། སོ་ཉུལ་བྱེད་པ་སོགས་ལ་གདུང་སེམས་མཉམ་སྐྱེད་དང་འབྲེལ་རྒྱ་ནག་ལ་སྐྱོན་བརྗོད་ཞུ་ཡི་ཡོད། ཅེས་འཁོད་འདུག
ད་དུང་བསྒྲགས་གཏམ་དེའི་ནང་། ཡུ་རོབ་མཐུན་ཚོགས་ཀྱི་ངོས་ནས་རྒྱ་ནག་གཞུང་གིས་རྒྱལ་སྤྱིའི་ཁྲིམས་དང་རྒྱལ་ནང་གི་རྩ་ཁྲིམས་ལ་བརྩི་སྲུང་གིས་བོད་མིའི་འགྲོ་བ་མིའི་ཐོབ་ཐང་ལ་བརྩི་བཀུར་དང་སྲུང་སྐྱོབ་བྱེད་དགོས་པའི་སྐུལ་མ་བཏང་བ་དང་། རྒྱ་གཞུང་གིས་ཁྲིམས་ཀྱི་དབང་སྒྱུར་འོག་རྒྱལ་མཚམས་ལས་བརྒལ་བའི་དྲག་གནོན་བྱེད་བཞིན་པ་རྣམས་མཚམས་འཇོག་དགོས་པའི་འབོད་སྐུལ་དང་། རྒྱ་ནག་ནང་གི་འགྲོ་བ་མིའི་ཐོབ་ཐང་གི་གནས་སྟངས་ལ་ལྟ་ཞིབ་མུ་མཐུད་དུ་བྱ་རྒྱུ་ནན་བརྗོད་གནང་བ་མ་ཟད། བོད་ཀྱི་ཆབ་སྲིད་བཙོན་པ་བྱ་བྲལ་རིན་པོ་ཆེ་དང་། ཨ་ཉག་སེང་སྒྲ། སྒོ་ཤེས་རབ་རྒྱ་མཚོ། མགོ་ལོག་དཔལ་ལྡན། རྡོ་རྗེ་བཀྲ་ཤིས། ཟངས་དཀར་འཇམ་དབྱངས། སེམས་སྐྱིད་སྒྲོལ་མ་ལ་སོགས་པ་རྣམས་ཆ་རྐྱེན་གང་ཡང་མེད་པའི་ཐོག་ནས་གང་མགྱོགས་ཀློད་གྲོལ་གཏོང་དགོས་པའི་འབོད་སྐུལ་ཞུས་འདུག
དེ་འབྲེལ་སྦེལ་ཇམ་སྐུ་ཚབ་དོན་གཅོད་རིག་འཛིན་ཆོས་སྒྲོན་ལགས་ཀྱིས། བོད་ནང་གི་འགྲོ་བ་མིའི་ཐོབ་ཐང་གི་གནས་སྟངས་དང་འབྲེལ་བའི་ཡུ་རོབ་མཐུན་ཚོགས་ཀྱིས་བསྒྲགས་གཏམ་སྤེལ་བར་དགའ་བསུ་ཞུས་པ་དང་། ཡུ་རོབ་མཐུན་ཚོགས་ནས་བྱ་བྲལ་རིན་པོ་ཆེ་གཙོས་པའི་མགོ་ལོག་དཔལ་ལྡན་དང་སེམས་སྐྱིད་སྒྲོལ་མ། ཟངས་དཀར་འཇམ་དབྱངས་སོགས་འཕྲལ་དུ་ཀློད་གྲོལ་དགོས་པའི་འབོད་སྐུལ་གནང་བར་ཐུགས་རྗེ་ཆེ་ཞུ་རྒྱུ་ཡིན། ཞེས་བརྗོད་འདུག
གསར་འགོད་པ། བསྟན་འཛིན་ཕུར་བུ། རྩོམ་སྒྲིག་པ། སྐལ་བཟང་སྦྱིན་པ།
