གནས་ཆུང་རྡོ་རྗེ་སྒྲ་དབྱངས་གླིང་གཙུག་ལག་ཁང་གི་བསླབ་པ་མཐར་སོན་མཛད་སྒོ་འཚོགས།

ཁྲི་ཟུར་ཟམ་གདོང་རིན་པོ་ཆེ་མཆོག་ནས་རིགས་པའི་ལམ་ནས་དྲངས་པའི་རྣམ་དཔྱོད་ཀྱི་ཤེས་རབ་དེ་ནམ་ཡང་རྨོངས་དད་ཀྱི་རྗེས་སུ་མི་འགྲོ་བར་རིགས་པའི་རྗེས་སུ་འགྲོ་བར་བྱ་དགོས་པ་གལ་ཆེན་པོ་ཡིན་སྐོར་གསུངས་སོང་།

ཁ་སང་ཕྱི་ཚེས་ ༢༠ ཉིན་གངས་སྐྱིད་གནས་ཆུང་རྡོ་རྗེ་སྒྲ་དབྱངས་གླིང་དུ། གཙུག་ལག་ཁང་གི་སྐབས་དྲུག་པ་དང་བདུན་པའི་བསླབ་པ་མཐར་སོན་གྱི་གཟེངས་བསྟོད་མཛད་སྒོ་འཚོགས་ཡོད་ཅིང་། མཛད་སྒོའི་ཐོག་སྐུ་མགྲོན་གཙོ་བོ་བཀའ་བློན་ཁྲི་ཟུར་མཁས་དབང་ཟམ་གདོང་རིན་པོ་ཆེ་མཆོག་དང་། གནས་ཆུང་སྐུ་རྟེན་ཐུབ་བསྟན་དངོས་གྲུབ་མཆོག མཆོག་སྤྲུལ་རིན་པོ་ཆེ་བསྟན་འཛིན་བློ་གསལ་མཆོག བོད་མིའི་སྒྲིག་འཛུགས་ཀྱི་ཆོས་རིག་དྲུང་འཕར་ཀུན་དགའ་རྒྱལ་མཚན་ལགས། དྷ་ས་རིགས་སློབ་མ་ལག་གཉིས་ཀྱི་སྤྱི་ཁྱབ་འགན་འཛིན་བསམ་གཏན་རྒྱ་མཚོ་ལགས་བཅས་གྲྭ་མང་འདུས་སྡེ་གདན་འཛོམས་ཐོག་བསླབ་པ་མཐར་སོན་པ་དགེ་འདུན་པ་བཅུ་ལ་ལག་འཁྱེར་གནང་ཡོད་འདུག

སྐབས་དེར་མཁས་དབང་ཟམ་གདོང་རིན་པོ་ཆེ་མཆོག་གིས། གནས་ཆུང་རྡོ་རྗེ་སྒྲ་དབྱངས་གླིང་ཞེས་པ་འདས་པའི་ལོ་ ༥༠༠ ཡས་མས་ཀྱི་རིང་བོད་གངས་ཅན་ལྗོངས་ལ་གལ་གནད་ཆེ་བ་ཞིག་ཡིན་པ་རེད། འབྲས་སྤུངས་དང་ཐག་ཉེ་བོ་ཡིན་ཞིང་། གྲྭ་ཚང་ནང་དགེ་འདུན་གྱི་ཞལ་གྲངས་མང་པོ་མེད། སྐུ་རྟེན་རྣམ་པ་ཚོ་བརྒྱུད་ནས་ལྷ་རྩེ་ཞུགས་པར་བརྟེན་ནས་གཞུང་མང་གཉིས་ཀྱི་ལས་དོན་ཆེན་པོ་བསྒྲུབ་ཆེད་སྔགས་ཕྱོགས་ཀྱི་གྲྭ་ཚང་ཞིག་ཡིན། མཚན་ལ་གནས་ཆུང་ཞེས་བཏགས་པ་བཞིན་གཞི་རྒྱ་ཆེན་པོ་མེད་ཀྱང་གནད་འགག་ཆེན་པོ་ཞིག་ཆགས་ཡོད། པེ་ཧར་རྒྱལ་བོའི་རྟེན་གཞི་རྩ་ཆེན་ཞིག་ཡིན་ལ། ཟླ་རེའི་ཚེས་པ་གཉིས་ཉིན་འབྲས་སྤུངས་ཀྱི་གྲྭ་བ་རྣམས་ལྷ་རྩེ་ཞུགས་སར་འགྲོ་བཞིན་ཡོད་པས། དེ་ནི་སློབ་གཉེར་སྐབས་བར་ཆད་སེལ་བ་དང་། ལྷ་དང་མི་བར་གྱི་འབྲེལ་བ་འཇོག་སྟངས་གཙོ་བོ་ཞིག་ལ་བརྩི་བཞིན་ཡོད་པ་རེད། ཅེས་གསུངས་སོང་།

ཡང་ཁོང་གིས། བོད་ནང་སྔགས་ཕྱོགས་ཀྱི་གྲྭ་ཚང་སོ་སོའི་ནང་རང་ཉིད་ཀྱི་སྐབས་སུ་བབ་པའི་ལས་འགན་བསྒྲུབ་རྒྱུ་དང་། སོ་སོའི་རྒྱུན་ལྡན་གྱི་ཆོ་ག་ཕྱག་ལེན་གནང་རྒྱུ་ཙམ་མ་གཏོགས་མཚན་ཉིད་ཀྱི་སློབ་གཉེར་ལམ་སྲོལ་མེད་པ་རེད། བོད་ནང་གནས་ཆུང་དགོན་པ་མཚན་ཉིད་ཀྱི་སློབ་གཉེར་གྱི་ལུགས་སྲོལ་ཡོད་ཚེ། འབྲས་སྤུངས་དགོན་པར་གོམ་པ་བརྒྱབ་ནས་སླེབས་ཐུབ་པ་ཞིག་རེད། འོན་ཀྱང་ང་ཚོ་རྒྱ་གར་ནང་སྐྱབས་བཅོལ་དུ་འབྱོར་རྗེས། ༧གོང་ས་རྒྱལ་བ་རིན་པོ་ཆེ་མཆོག་གིས་ཡང་ནས་ཡང་དུ་བཀའ་སློབ་གནང་སྟེ། ཆོས་བརྒྱུད་ཚང་མའི་ནང་གཞུང་ཆེན་མོར་མཚན་ཉིད་ཀྱི་སློབ་གཉེར་བྱེད་པའི་ལམ་སྲོལ་གསར་འཛུགས་གནང་བ་ཞིག་རེད། དེ་ནི་ངས་༧གོང་ས་རྒྱལ་བ་རིན་པོ་ཆེ་མཆོག་གི་ཐུན་མོང་མ་ཡིན་པའི་མཛད་འཕྲིན་ཁྲོད་གལ་ཆེ་བ་ཞིག་ལ་བརྩི་བཞིན་ཡོད། རྒྱུ་མཚན་ནི་ནང་པ་སངས་རྒྱས་པའི་ཆོས་དེ་དད་པའི་རྗེས་འབྲངས་མ་ཡིན་པར་ཤེས་རབ་ཀྱི་རྗེས་འབྲངས་ཤིག་ཆགས་ཡོད། ཡིད་ཆེས་དང་། དད་པར་བརྟེན་པའི་སྨོན་ལམ་གྱིས་ས་ལམ་གྱི་ལམ་བགྲོད་ཐུབ་ཀྱི་མེད་པ་རེད། ལས་དོན་ཅི་ཞིག་བསྒྲུབ་ཀྱང་སོ་སོའི་ཉམས་སུ་བླངས་བའི་འབྲས་བུ་ཞིག་ཐོབ་པ་མ་གཏོགས། ཉམས་ལེན་མ་བྱས་པར་དད་པ་དང་ཡིད་ཆེས་ཀྱི་སྨོན་ལམ་གྱི་ཐོག་ནས་འགྲུབ་པའི་ཆོས་ཞིག་མེད་པ་ཡིན་དུས། སངས་རྒྱས་བསྟན་པར་འཇུག་པའི་རིམ་པ་དང་པོ་ནི་ཚུལ་ཁྲིམས་སྲུང་བ་དང་། དེའི་ཐོག་ཐོས་བསམ་སྒོམ་གསུམ་བྱ་རྒྱུ་དེ་ཡིན། ཞེས་གསུངས་སོང་།

དེ་བཞིན་ཁོང་གིས། བསླབ་པ་མཐར་སོན་པའི་རྗེས་ལ་བསྟན་པའི་ཞབས་འདེགས་ཞུ་བའི་ཚུལ་ག་འདྲ་དགོས་པ་ངས་གསར་པ་ཞུ་རྒྱུ་ཆགས་ཀྱི་མེད། དེ་ཡང་གཞུང་ལུགས་ནང་ལ་གཏན་འཁེལ་བ་ཞིག་རེད། བསྟན་པའི་ཞབས་འདེགས་ཞེས་པ་དེ། སྟོན་པའི་དམ་ཆོས་རྣམ་གཉིས་ཏེ།།ལུང་དང་རྟོགས་པའི་བདག་ཉིད་དོ།།དེ་འཛིན་བྱེད་པ་སྨྲ་བྱེད་པ།།སྒྲུབ་པར་བྱེད་པ་ཁོ་ན་ཡིན།། ཞེས་བསྟན་པའི་བྱ་བ་སྒྲུབ་སྟངས་དེ་ཐོས་བསམ་གྱི་སྒོ་ནས་སློབ་སྦྱོང་བྱ་རྒྱུ་དང་། སྒོམ་པའི་སྒོ་ནས་ཉམས་སུ་ལེན་རྒྱུའམ་སྒྲུབ་པར་བྱ་རྒྱུ་གཉིས་ལས། གཞན་པའི་བསྟན་པའི་བྱ་བ་བྱེད་སྟངས་གཞན་ཞིག་མེད་པ་རེད། དེ་གཉིས་གཙོ་བོ་རེད་ཅེས་མ་གསུངས་པར། སྒྲུབ་པར་བྱེད་པ་ཁོ་ན་ཡིན་ཞེས་པའི་ཁོ་ན་ཞེས་པའི་ཚིག་དེ་གཞན་ལྡན་རྣམ་གཅོད་ཀྱི་ཚིག་རེད། དེ་ལས་གཞན་པའི་ཐབས་ལམ་གཞན་གང་ཡང་ཡོད་མ་རེད།  དེ་འདྲ་ཡིན་དུས་བསླབ་པ་མཐར་སོན་པ་ཞེས་པ་དེ་སློབ་ཚན་དང་འཛིན་གྲྭ་ངེས་ཅན་ཞིག་བརྒྱུད་ནས་ལོ་རེ་ལོ་རེར་སློབ་སྦྱོང་བྱས་ནས་ཚད་གཞི་ཡོད་པའི་གཞུང་ཆེན་བཀའ་པོད་ལྔ་དང་། གཞུང་ཆེན་བཅུ་གསུམ། གཞུང་ཆེན་བཅོ་བརྒྱད་བཅས་གང་ཡིན་ཡང་། ཐོག་མ་ནས་བསླབ་གཞི་ལ་གཏན་འཁེལ་བའི་གཞུང་དེ་དག་མཐར་ཕྱིན་པའི་སྐབས་ལ་བསླབ་པ་མཐར་སོན་པ་དང་དགེ་བཤེས་ཐོན་པ་ཞེས་མིང་བཏགས་ཐོན་པ་ཞེས་སྔོན་མ་ནས་རྒྱ་གར་ནས་བྱུང་བ་ཡོད་ལ། བོད་ལའང་བྱུང་བ་རེད། དེ་ནི་ཕྱིའི་ངག་གི་རང་བཞིན་ལ་བརྟེན་པ་དང་། གཞུང་ལུགས་ལ་བརྟེན་པའི་ཐོས་བསམ་བྱ་བའི་རིམ་པ་དེ་ཚད་གཞི་བཟོ་རྒྱུ་ཡོད་པ་མ་གཏོགས། རང་གི་རྒྱུད་ལ་སྦྱར་ནས་ཐོས་བསམ་སྒོམ་གསུམ་བྱ་བའི་རིམ་པ་དེ་སངས་རྒྱས་ཀྱི་གོ་འཕང་མ་འཐོབ་བར་དུ་མུ་མཐུད་ནས་འགྲོ་དགོས་པ་དང་། དེའི་རྒྱུན་མཐུད་པ་དེ་བསྟན་པའི་བྱ་བ་དང་བསྟན་པའི་ཞབས་འདེགས་ཡིན་པ་བཤད་མི་དགོས་པ་ཞིག་ཆགས་བསྡད་ཡོད། ཅེས་གསུངས་སོང་།

མཇུག་ཏུ་ཁོང་གིས། དེ་རིང་རྒྱུགས་སྤྲོད་གཏོང་མཁན་ཚོ་ཨང་གྲངས་ཧ་ཅང་མཐོ་བོ་རག་འདུག སྤྱིར་ང་ཚོའི་སྲོལ་རྒྱུན་གྱི་རྒྱུགས་སྤྲོད་ནི་རྩོད་རྒྱུགས་དང་ངག་རྒྱུགས་མ་གཏོགས་མེད། དེང་རབས་ཀྱི་འབྲི་རྒྱུགས་ཟེར་བ་དེ་དེང་རབས་ཀྱི་ཤེས་ཡོན་སྤྱི་ཚོགས་ཆགས་ཡོད། བཤད་སྲོལ་ཞིག་ཡོད། དེང་སང་འབྲི་རྒྱུགས་ལ་ཞིབ་འཇུག་བྱས་ཏེ་བརྒྱ་ཆ་ཨང་གྲངས་སྤྲོད་པ་ནུབ་ཕྱོགས་པའི་རྒྱུགས་ལེན་སྟངས་ལམ་སྲོལ་ཞིག་རེད། ད་ལྟ་ང་ཚོས་ལམ་སྲོལ་དེ་བེད་སྤྱོད་གཏོང་བཞིན་ཡོད་པ་རེད། རྒྱུགས་སྤྲོད་དེས་གང་ཤེས་ཀྱི་མེད་པ་ཧ་གོ་བའི་ཆེད་དུ་རེད། དེའི་ཐོག་གང་ཤེས་ཀྱི་ཡོད་པ་ལྟ་ཐུབ་ཀྱི་མ་རེད། རྒྱུགས་ཤོག་དེས་རྒྱུགས་སྤྲོད་མཁན་གྱི་ཤེས་ཡོན་ཚད་མཐོ་བོ་གང་འདྲ་ཡིན་མིན་ཚད་ཐུབ་རྒྱུ་ཁག་པོ་རེད། གང་དང་གང་ཤེས་ཀྱི་མེད་པ་རྩད་གཅོད་གཏོང་བའི་སྲོལ་ལྟ་བུ་ཆགས་ཀྱི་ཡོད་པ་རེད། དེང་སང་རྒྱ་གར་སྤྱི་ཡོངས་ཀྱི་སློབ་གྲྭའི་འགྲོ་སྟངས་ལྟར་ན་ཨང་གྲངས་ ༨༠ དང་ ༩༠ ཧ་ཅང་ཚད་མཐོ་བོ་རེད། སྤྱིར་དྲི་ཤོག་ག་འདྲ་བཟོ་བ་དང་། བརྒྱ་ཆ་སྤྲོད་སྟངས་ལ་རྒྱུས་མེད་ཀྱང་། བརྒྱ་ཆ་ལོན་ཡོད་པས་རྗེས་སུ་ཡི་རངས་བྱ་དགོས་པ་ཞིག་རེད། ཡིན་ནའང་ད་ལྟ་ཐོན་པའི་རྒྱུགས་སྤྲོད་དེ་རྒྱུགས་སྤྲོད་ཀྱི་སྦྱོང་བརྡར་ལྟ་བུ་རེད། མི་ཚེའི་རྒྱུགས་སྤྲོད་ད་ལྟ་གཞི་ནས་བསྡད་ཡོད། མི་ཚེའི་རྒྱུགས་སྤྲོད་དེ་དྲི་བ་དྲིས་ལན་དང་། རྩོད་རྒྱུགས། ངག་རྒྱུགས་ཐོག་ནས་སྤྲོད་རྒྱུ་མེད་ཅིང་། དེ་ནི་མི་ཚེ་བསྐྱལ་ནས་རྒྱུགས་སྤྲོད་དགོས་པ་ཞིག་རེད། མི་ཚེའི་རྒྱུགས་སྤྲོད་ནང་ལ་རྒྱུགས་མ་འཕྲོད་པར་ལྷག་ཚེ་ཧ་ཅང་ཐབས་སྐྱོ་བོ་རེད། མི་ཚེའི་རྒྱུགས་སྤྲོད་ནང་ལ་རྒྱུགས་འཕྲོད་པར་སོ་སོའི་ཐོས་བསམ་སྒོམ་གསུམ་ཡ་མ་བྲལ་བ་དང་། རིགས་པའི་ལམ་ནས་དྲངས་པའི་རྣམ་དཔྱོད་ཀྱི་ཤེས་རབ་དེ། ནམ་ཡང་རྨོངས་དད་ཀྱི་རྗེས་སུ་མི་འགྲོ་བར་རིགས་པའི་རྗེས་སུ་འགྲོ་བར་བྱ་དགོས་པ་གལ་ཆེན་པོ་ཆགས་ཀྱི་ཡོད། ལེགས་པར་བརྟག་ལ་ང་ཡི་བཀའ།།བླང་བར་བྱ་ཡི་གུས་ཕྱིར་མིན།། གསུངས་པ་དེ་ག་དུས་ཡིན་ཡང་ཐུགས་ལ་འཇོག་དགོས་པ་ཞིག་རེད། ཅེས་གསུངས་སོང་།

གསར་འགོད་པ། བྱམས་པ་ཚེ་རིང་། རྩོམ་སྒྲིག་པ། སྐལ་བཟང་སྦྱིན་པ།