བོད་མི་ཚོ་རྒྱ་ནག་གི་ལག་ཆར་མི་འགྱུར་བའི་རེ་སྐུལ་གནང་། 

ཕྱི་རྒྱལ་གཙོས་ས་གནས་གང་སར་བཞུགས་པའི་བོད་མི་རྣམས་རྒྱ་ནག་གཞུང་གི་ཆབ་སྲིད་ཀྱི་ལག་ཆ་མི་འགྱུར་རྒྱུར་གཙོ་འདོན་གནང་དགོས་པའི་ལམ་སྟོན་གནང་སོང་། 

སྤྱིར་རྒྱ་ནག་གཞུང་གིས་བཙན་བྱོལ་བོད་མི་རྣམས་དང་རྒྱལ་ཁབ་གཞན་ཁག་གི་མགོ་ཁྲིད་ཚོ་བེད་སྤྱད་ནས་བོད་ནང་གི་དངོས་ཡོད་ཀྱི་གནས་སྟངས་མང་དག་ཅིག་འཁྱོག་བརྗོད་བྱེད་ཐབས་གནང་གི་ཡོད་པ་ལྟར། དེ་རིང་གྲོས་ཚོགས་ཚོགས་དུས་བདུན་པའི་ལས་ཉིན་བཞི་པའི་ཚོགས་དུས་གསུམ་པའི་སྟེང་སུད་སི་སྐུ་ཚབ་དོན་གཅོད་ཀྱི་རྒྱུན་གྲོན་དང་འབྲེལ་ནས། ཉེ་ལམ་རྒྱ་ནག་གཞུང་གིས་བོད་རིགས་གཞན་མ་བདེ་ཆེན་ཤག་ལགས་ཀྱིས་བོད་ནང་དུ་རྒྱ་ནག་གཞུང་གིས་ལག་བསྟར་བྱེད་བཞིན་པའི་བཅའ་སྡོད་སློབ་གྲྭའི་ཕན་ནུས་དང་དགེ་མཚན་སོགས་ཀྱི་ཐད་ལ་གླེང་སློང་བྱས་ཡོད་ལུགས་ཀྱི་དྲིལ་བསྒྲགས་བྱས་ཡོད་པས། སྤྱི་འཐུས་ཁག་ཅིག་གིས་ཕྱིའི་རྒྱལ་ཁབ་ཏུ་ཡོད་པའི་བོད་མི་གཙོས་བོད་མི་རྣམས་རྒྱ་ནག་གཞུང་གི་ཆབ་སྲིད་ཀྱི་ལག་ཆར་མི་འགྱུར་བ་བྱ་དགོས་སྐོར་གསུངས་སོང་། 

དེའི་ཐད་ཡུ་རོབ་སྤྱི་འཐུས་ཚ་ཁོ་ཐུབ་བསྟན་རྒྱ་མཚོ་ལགས་ཀྱིས། ཉེ་ལམ་ལྷན་ཚོགས་ཤིག་གི་ཐོག་རྒྱ་ནག་གཞུང་གིས་བོད་རིགས་སྒྱུ་རྩལ་བ་བདེ་ཆེན་ཤག་ལགས་སུ་སྐར་མ་བཅུ་ལྷག་གི་སྐད་ཆ་བཤད་བཅུག་ཡོད་ཅིང་། རྒྱ་ནག་གཞུང་འབྲེལ་གསར་ཁང་གི་གསར་འགོད་པས་མོས་བཤད་པའི་སྐད་ཆ་དྲིལ་བསྒྲགས་ཤུགས་ཆེན་བྱེད་ཀྱི་འདུག་ཀྱང་། ཁོང་མོས་དོན་དངོས་ཐོག་ག་རེ་བསམ་གྱིན་པའི་འགྲེལ་བཤད་བྱ་རྒྱུ་ཡིན་འདུག་པས། ཚང་མས་རེ་ཞིག་ཁོང་མོའི་གསལ་བཤད་ལ་སྒུག་ནས་གནད་དོན་གཙང་སེལ་བྱ་དགོས་སྐོར་དང་། སྤྱིར་རྒྱ་ནག་གཞུང་གིས་འདས་པའི་ལོ་ཤས་གོང་ནས་ཕྱི་རྒྱལ་བ་ཁག་བེད་སྤྱད་ནས་རྒྱལ་སྤྱིའི་ནང་བོད་ནང་གི་གནད་དོན་མང་དག་ཅིག་འཁྱོག་བརྗོད་དང་རྒྱ་ནག་གི་ལང་ཕྱོགས་དྲིལ་བསྒྲགས་བྱེད་ཀྱི་ཡོད་སྐོར་གསུངས་སོང་། 

སྤྱི་འཐུས་རྡོ་རྗེ་ཚེ་བརྟན་ལགས་ཀྱིས། ཉེ་ལམ་སུད་སི་ནང་ཡོད་པའི་བོད་རིགས་བུད་མེད་ཅིག་གིས་རྒྱ་ནག་གཞུང་གིས་གོ་སྒྲིག་བྱས་པའི་ལྷན་ཚོགས་ཤིག་གི་ཐོག བོད་ནང་གི་བཅའ་སྡོད་སློབ་གྲྭའི་སྐོར་བཤད་པ་དེ་རྒྱ་ནག་གཞུང་གིས་ཕྱི་བསྒྲགས་བྱེད་ཀྱི་ཡོད་ཅིང་། ད་ལན་རྒྱ་ནག་གཞུང་གིས་ཆབ་སྲིད་ཀྱི་ལག་ཆར་གྱུར་ནས་བེད་སྤྱོད་བྱས་ཟིན་ཡོད་ཀྱང་། སྐུ་ཚབ་དོན་གཅོད་ཁང་ཁག་གིས་གཙོས་བོད་མི་རྣམས་ཀྱིས་རྒྱ་ནག་གཞུང་གི་ཆབ་སྲིད་ཀྱི་ལག་ཆ་དང་གཡོ་འོག་ཏུ་མི་ཚུད་པའི་དོགས་ཟོན་བྱ་དགོས་སྐོར་དང་། སྤྱིར་འདས་པའི་ལོ་ཤས་རིང་འབུམ་རམས་པ་རྒན་རྒྱལ་ལོ་ལགས་སོགས་ཀྱིས་སྐུ་ལས་ཚད་མེད་བསྐྱོན་ནས་བོད་ནང་དུ་རྒྱ་ནག་གཞུང་གིས་གཉེར་མུས་ཡིན་པའི་བཅའ་སྡོད་སློབ་གྲྭའི་གནད་དོན་ཐད་རྒྱལ་སྤྱིའི་སྤྱི་ཚོགས་སུ་གླེང་སློང་ཤུགས་ཆེན་བྱེད་ཀྱི་ཡོད་པས། རྒྱ་ནག་གཞུང་གིས་སྲིད་ཇུས་གཞན་ཞིག་གི་ཐོག་ནས་བོད་ནང་གི་བཅའ་སྡོད་སློབ་གྲྭའི་གནད་དོན་གྱི་སྐོར་ལ་དཀར་འདོན་བྱེད་ཐབས་བྱེད་ཀྱི་ཡོད་པས། བོད་མི་ཚོ་རྒྱ་ནག་གི་ལག་ཆར་མི་འགྱུར་རྒྱུ་གཙོ་འདོན་གནང་དགོས་པའི་རེ་སྐུལ་ཞུས་སོང་། 

རྒྱ་ནག་ཉིན་རེའི་གསར་ཁང་(China Daily) གི་ཡུ་རོབ་ཁུལ་གྱི་འགན་འཛིན་ཁྲིན་ཝེ་ཧྥ་(Chen Weihua) ཟེར་བ་ཞིག་གིས་ཨེག་སི་(X) སྤྱི་ཚོགས་དྲ་ལམ་དུ། བོད་རིགས་སྒྱུ་རྩལ་བ་བདེ་ཆེན་ཤག་ཟེར་བ་ཞིག་གིས་སུད་སི་ཇེ་ནི་ཝ་རུ་ཚོགས་པའི་ལྷན་ཚོགས་ཤིག་གི་ཐོག རྒྱ་ནག་གཞུང་གིས་བོད་ནང་སྤེལ་མུས་ཡིན་པའི་བཅའ་སྡོད་སློབ་གྲྭའི་ལས་གཞི་དེ་ལམ་ལྷོང་དང་དོན་འཁྱོངས་ཡོང་བའི་རེ་སྨོན་དང་། དེ་སྔོན་མོ་རང་བོད་ཀྱི་རྒྱལ་ས་ལྷ་སར་རིག་གཞུང་འཁྲབ་སྟོན་དུ་སྐྱོད་སྐབས། ཚང་མས་ས་གནས་གང་སར་བོད་སྐད་བཤད་ཀྱི་ཡོད་པས་དགའ་ཚོར་བྱུང་ཡོད་ལུགས་བཤད་ཡོད་སྐོར་དྲིལ་བསྒྲགས་བྱས་འདུག 

གསར་འགོད་པ། དོན་གྲུབ་བཀྲ་ཤིས། དཔལ་ལྡན། རྩོམ་སྒྲིག་པ་སྐལ་བཟང་སྦྱིན་པ།