བོད་ནང་གི་དམར་ཤོག་མགོ་ཁྲིད་གསུམ་ལ་ཞིབ་བཤེར་བྱས་འདུག

བོད་ནང་གི་དམར་ཤོག་ཚོགས་པའི་མགོ་ཁྲིད་གསུམ་ལ་ལྐོག་རྔན་བླངས་པའི་དོགས་གཞི་འོག་ཞིབ་བཤེར་བྱས་འདུག

བོད་རང་སྐྱོང་ལྗོངས་མི་མང་འཐུས་ཚོགས་ཟེར་བའི་མགོ་ཁྲིད་གཞོན་པ་ཅི་གོ་ཀང་གིས་ལྐོག་རྔན་རྒྱ་སྒོར་ཁྲི་ ༤༣༩༨ ལྷག་བླངས་བའི་ཉེས་མིང་འོག་ཞིབ་བཤེར་བྱས་ཡོད་པ་མ་ཟད། མཚོ་སྔོན་ཞིང་ཆེན་ཟི་ལིང་གྲོང་ཁྱེར་གྱི་སྤྱི་ཁྱབ་གཞོན་པ་ཧན་ཞང་ཧུའེ་དང་། མཚོ་སྔོན་ཞིང་ཆེན་དཔལ་འབྱོར་དང་ཆ་འཕྲིན་ལྷན་ཁང་གི་མགོ་ཁྲིད་ཡའོ་ལིན་(姚琳) གཉིས་ཀྱིས་ལྐོག་རྔན་འབོར་ཆེན་བླངས་པའི་དོགས་གཞིའི་འོག་ཞིབ་བཤེར་བྱེད་བཞིན་ཡོད་འདུག

ཞི་ཅིན་ཕིན་གཞུང་གིས་སྟག་དང་སྦྲང་མ་ལེབ་རྡུང་གི་སྲིད་ཇུས་ཟེར་བའི་མིང་འོག་ནས་རྒྱ་ནག་དང་། རྒྱའི་བཙན་བཟུང་འོག་ཡོད་པའི་བོད་དང་ལྷོ་སོག  ཡུ་གུར་སོགས་ཀྱི་དཔོན་རིགས་མང་པོ་ཞིག་ལ་ལྐོག་ཟ་རུལ་སུངས་དང་ལྐོག་རྔན་བླངས་བ། དམར་ཤོག་གཞུང་ལ་བློ་སེམས་མི་དཀར་བ་སོགས་ཀྱི་ནག་ཉེས་འོག་ཁྲིམས་ཆད་ཕོག་གི་ཡོད་པ་ལྟར།  ཟླ་འདིའི་ཕྱི་ཚེས་ ༢༡ ཉིན་སི་ཁྲོན་ཞིང་ཆེན་ཁྲེང་ཏུའུ་གྲོང་ཁྱེར་འབྲིང་རིམ་མི་དམངས་ཁྲིམས་ཁང་ཟེར་བས།  བོད་རང་སྐྱོང་ལྗོངས་ཟེར་བའི་མི་མང་སྲིད་གཞུང་གི་དམར་ཤོག་ཚོགས་པའི་ཚོགས་མི་དང་། མི་མང་འཐུས་ཚོགས་ཀྱི་རྒྱུན་ལས་མགོ་ཁྲིད་གཞོན་པ་ཅི་གོ་ཀང་(纪国刚)ཟེར་བས་ལྐོག་རྔན་རྒྱ་སྒོར་ཁྲི་ ༤༣༩༨ ལྷག་བླངས་བའི་ཉེས་མིང་འོག་ཞིབ་བཤེར་བྱས་ཡོད་འདུག

དེའི་སྐོར་ལ་སི་ཁྲོན་ཞིང་ཆེན་ཁྲེང་ཏུའུ་གྲོང་ཁྱེར་མི་དམངས་ཞིབ་དཔྱོད་ཁང་གིས། ཅི་གོ་ཀང་གིས་ཕྱི་ལོ་ ༢༠༠༢ ནས་ཕྱི་ལོ་ ༢༠༢༢ ལོའི་བར་དུ་རྒྱལ་ཁབ་གོང་འཕེལ་འཆར་འགོད་ཀྱི་མ་འཇོག་ལས་ཁུངས་ཀྱི་ལས་རོགས་སྐོར་ཞིབ་པ་དང་། རྒྱལ་ཁབ་གོང་འཕེལ་བསྒྱུར་བཅོས་ཀྱི་གཏན་འཇགས་རྒྱུ་ནོར་མ་འཇོག་ལས་ཁུངས་ཀྱི་ལས་རོགས་སྐོར་ཞིབ་པ། འགན་འཛིན་གཞོན་པ། བོད་རང་སྐྱོང་ལྗོངས་ཟེར་བའི་མི་མང་སྲིད་གཞུང་གི་དམར་ཤོག་ཚོགས་པའི་ཚོགས་མི། བོད་རང་སྐྱོང་ལྗོངས་ཟེར་བའི་གོང་འཕེལ་དང་བསྒྱུར་བཅོས་ཀྱི་དམར་ཤོག་ཚོགས་པའི་དྲུང་ཡིག་དང་འགན་འཛིན། བོད་ལྗོངས་གསར་སྤེལ་མ་འཇོག་ཚོགས་པའི་ལས་འཛིན་དཔོན། བོད་རང་སྐྱོང་ལྗོངས་ཟེར་བའི་མི་མང་འཐུས་ཚོགས་རྒྱུན་ལས་ཀྱི་མགོ་ཁྲིད་གཞོན་པ་སོགས་ཀྱི་གཞུང་འབྲེལ་གྱི་གོ་གནས་བེད་སྤྱོད་ལོག་པར་བཏང་སྟེ། ལས་གནས་དང་། མི་སྒེར་གྱི་ཁེ་ལས། ལས་གྲྭ་འགན་ལེན། གོ་གནས་སྤར་བ། གྱོད་གཞི་མཐུན་སྦྱོར་སོགས་བྱས་ཡོད་སྐོར་དང་། ཁོས་ལྐོག་རྔན་ཁྱོན་རྒྱ་སྒོར་ཁྲི་ ༤༣༩༨ བླངས་ཡོད་ལུགས་ཀྱི་ནག་ཉེས་བཙུགས་འདུག

ཅི་གོ་ཀང་ནི་ཕྱི་ལོ་ ༡༩༦༢ ལོར་ཅི་ལི་ཐིན་ཅི་རུ་སྐྱེས་ཡོད་ཅིང་། ཕྱི་ལོ་ ༡༩༨༤ ལོར་རྒྱ་ནག་དམར་ཤོག་ཚོགས་པའི་ཁོངས་སུ་ཞུགས་ཡོད་པ་དང་། ཕྱི་ལོ་ ༢༠༠༣ ནས་ ༢༠༡༩ ལོའི་བར་དུ་རྒྱལ་ཁབ་གོང་འཕེལ་འཆར་འགོད་ཀྱི་མ་འཇོག་ལས་ཁུངས་ཀྱི་ལས་རོགས་སྐོར་ཞིབ་པ་དང་། རྒྱལ་ཁབ་གོང་འཕེལ་བསྒྱུར་བཅོས་ཀྱི་གཏན་འཇགས་རྒྱུ་ནོར་མ་འཇོག་ལས་ཁུངས་ཀྱི་ལས་རོགས་སྐོར་ཞིབ་པའི་མགོ་ཁྲིད་གཞོན་པའི་ལས་ཀ་བྱས་ཡོད་འདུག ཕྱི་ལོ་ ༢༠༡༢ ནས་ ༢༠༡༦བར་བོད་རང་སྐྱོང་ལྗོངས་ཟེར་བའི་མི་མང་སྲིད་གཞུང་གི་དམར་ཤོག་ཚོགས་པའི་ཚོགས་མི། བོད་རང་སྐྱོང་ལྗོངས་ཟེར་བའི་གོང་འཕེལ་དང་བསྒྱུར་བཅོས་ཀྱི་དམར་ཤོག་ཚོགས་པའི་དྲུང་ཡིག་དང་འགན་འཛིན། བོད་ལྗོངས་གསར་སྤེལ་མ་འཇོག་ཚོགས་པའི་ལས་འཛིན་དཔོན། བོད་རང་སྐྱོང་ལྗོངས་ཟེར་བའི་མི་མང་འཐུས་ཚོགས་རྒྱུན་ལས་ཀྱི་མགོ་ཁྲིད་གཞོན་པ་སོགས་བྱས་འདུག

མཚོ་སྔོན་ཞིང་ཆེན་འཕྲལ་སྒྲུབ་དོ་དམ་ཁང་གི་དམར་ཤོག་ཚོགས་པའི་དྲུང་ཡིག་དང། མགོ་ཁྲིད་ཧན་ཤང་ཧུའེ་(韩向晖)ཡིས་ལྐོག་རྔན་འབོར་ཆེན་བླངས་བའི་ཉེས་མིང་འོག་དམར་ཤོག་ཚོགས་པའི་ཁོངས་ནས་ཕྱིར་འབུད་དང་། རྒྱུ་དངོས་གཞུང་བཞེས་བྱ་རྒྱུ་ཡིན་པ་མ་ཟད། ཞིབ་དཔྱོད་ཁང་ནས་ཞིབ་བཤེར་བྱེད་མགོ་བཙུགས་འདུག དེའི་སྐོར་ལ་མཚོ་སྔོན་ཞིང་ཆེན་ལྟ་ཞིབ་ལྷན་ཁང་ཟེར་བས། ཧན་ཞང་ཧུའེ་ཟེར་བ་ཕུགས་བསམ་དད་སེམས་ཉམས་པ་དང་། ཐབས་འདུན་དང་འགན་འཁྲི་རྒྱབ་ཏུ་བསྐྱུར་བ། དམར་ཤོག་ཚོགས་པར་བློ་དཀར་སེམས་དཀར་མེད་པ། རྩ་འཛུགས་ཀྱི་ཞིབ་བཤེར་ལ་འགོག་རྒོལ་བྱས་པ།   གཏན་འབེབས་དོན་ཚན་བརྒྱད་ཟེར་བ་སྣང་མེད་དུ་བཏང་བ། གཞུང་གི་དབང་ཆ་སྒེར་སྤྱོད་བྱས་པ། ཁྲིམས་འགལ་ཐོག་རྒྱུ་ནོར་འབོར་ཆེན་བླངས་ཡོད་ལུགས་དང་། དམར་ཤོག་ཚོགས་པ་དང་ལས་གནས་ནས་ཕྱིར་འབུད་བཏང་ཡོད་པ་མ་ཟད། ཞིབ་དཔྱོད་ཁང་དུ་ཞིབ་བཤེར་རྩིས་སྤྲོད་བྱས་ཡོད་འདུག

ཧན་ཞང་ཧུའེ་ནི་ཕྱི་ལོ་ ༡༩༧༣ ལོར་ཧི་ནན་དུ་སྐྱེས་ཡོད་ཅིང་། ཕྱི་ལོ་ ༡༩༩༧ ལོར་རྒྱ་ནག་དམར་ཤོག་ཚོགས་པའི་ཁོངས་སུ་ཞུགས་ཡོད་པ་དང་། ཕྱི་ལོ་ ༡༩༩༥ ནས་ ༢༠༡༡ ལོའི་བར་དུ་མཚོ་སྔོན་ཞིང་ཆེན་ཐད་གཏོགས་སྒྲིག་ཁྲིམས་ལས་དོན་ལྷན་ཁང་དང་། དམར་ཤོག་གཞོན་ནུའི་ཚོགས་པའི་དྲུང་ཡིག ཟི་ལིང་གྲོང་ཁྱེར་ལྷོ་ཁུལ་གྱི་དྲུང་ཡིག སྤྱི་ཁྱབ་གཞོན་པའི་ལས་ཀ་བྱས།   ཕྱི་ལོ་ ༢༠༡༥ ནས་ ༢༠༢༣ ལོའི་བར་མདོ་ལ་རྫོང་གི་དམར་ཤོག་དྲུང་ཡིག་དང་། མཚོ་བྱང་ཁུལ་གྱི་དམར་ཤོག་དྲུང་ཡིག ཟི་ལིང་གྲོང་ཁྱེར་སྲིད་གཞུང་དམར་ཤོག་ཚོགས་པའི་དྲུང་ཡིག གྲོང་ཁྱེར་སྤྱི་ཁྱབ་གཞོན་པ། མཚོ་སྔོན་ཞིང་ཆེན་འཕྲལ་སྒྲུབ་དོ་དམ་ཁང་གི་དམར་ཤོག་ཚོགས་པའི་དྲུང་ཡིག་སོགས་བྱས་ཡོད་འདུག

དེ་བཞིན་མཚོ་སྔོན་ཞིང་ཆེན་དཔལ་འབྱོར་དང་ཆ་འཕྲིན་ལྷན་ཁང་གི་མགོ་ཁྲིད་ཡའོ་ལིན་(姚琳)གྱིས་ལྐོག་རྔན་བླངས་པའི་དོགས་གཞི་འོག་ཞིབ་བཤེར་བྱེད་བཞིན་ཡོད་ཅིང་། དེའི་ཐད་མཚོ་ལྷོ་བོད་རིགས་རང་སྐྱོང་ཁུལ་མི་དམངས་ཞིབ་དཔྱོད་ཁང་གིས། ཡའོ་ལིན་ཕྱི་ལོ་ ༢༠༡༡ ནས་ཕྱི་ལོ་ ༢༠༢༣ ལོའི་བར་དུ་མཚོ་སྔོན་ཟི་ལིང་གྲོང་ཁྱེར་གྱི་རྒྱུན་ལས་དང་། ཟི་ལིང་དཔལ་འབྱོར་ལག་རྩལ་གསར་སྤེལ་ཁུལ་དམར་ཤོག་ཚོགས་པའི་ལས་དོན་ལྷན་ཁང་གི་དྲུང་ཡིག་གཞོན་པ། དོ་དམ་ལྷན་ཁང་གི་རྒྱུན་ལས་མགོ་ཁྲིད་གཞོན་པ་སོགས་གཞུང་འབྲེལ་གྱི་གོ་གནས་བེད་སྤྱོད་ལོག་པར་བཏང་སྟེ།མི་གཞན་ལ་ཁེ་ཕན་བསྒྲུབས་པ་དང་། ལྐོག་རྔན་འབོར་ཆེན་བླངས་པའི་ཉེས་མིང་འོག་མཚོ་ལྷོ་བོད་རིགས་རང་སྐྱོང་ཁུལ་འབྲིང་རིམ་མི་དམངས་ཁྲིམས་ཁང་ལ་གཞུང་གཏུག་བྱས་ཡོད་འདུག

གསར་འགོད་པ། བྱམས་པ་ཚེ་རིང་། རྩོམ་སྒྲིག་པ། སྐལ་བཟང་སྦྱིན་པ།