འདས་ལོ་ཉི་ཤུའི་དཔལ་འབྱོར་གནས་བབ་སྐོར་གྱི་སྙན་ཐོ་བཏོན།

བོད་མིའི་སྒྲིག་འཛུགས་ལས་ཁུངས་དང་མ་ལག་དང་བཅས་པའི་རྩིས་ལོ་ ༢༠༠༢་་་ ༠༣ ནས་ ༢༠༢༢ ་་་༢༠༢༣ བར་སྔོན་རྩིས། གཏན་འཇགས། ཟུར་བཀོལ་སྤྱིར་བཏང་། ལས་འཆར་མ་དངུལ། བསྒྱུར་དཀའི་མཁར་དབང་བཅས་ཀྱི་བསྡོམས་ཧིན་སྒོར་ས་ཡ་ ༧༣༩༨་༥༨ ཆགས་འདུག

དེ་རིང་བོད་མི་མང་སྤྱི་འཐུས་ལྷན་ཚོགས་ཀྱི་གྲོས་ཚོགས་ཚོགས་དུས་བདུན་པའི་ལས་ཉིན་བཅུ་པའི་ཉིན་དཔལ་འབྱོར་ལས་ཁུངས་ཀྱི་ལས་ཁུངས་མ་ལག་དང་བཅས་པའི་རྩིས་ལོའི་ཐད་གླེང་སློང་བྱས་པ་དང་བསྟུན་ནས། བོད་མིའི་སྒྲིག་འཛུགས་ཀྱི་དབུས་དང་ཁྱབ་ཁོངས་ལས་ཁུངས་ཁག་གི་རྩིས་ལོ་ ༢༠༠༢ –༢༠༠༣ ནས་ ༢༠༢༢– ༢༠༢༣ བར་གྱི་དཔལ་འབྱོར་གྱི་གནས་བབ་ཀྱི་སྙན་ཐོ་ཞིག་འདོན་སྤེལ་བྱས་པའི་ཁྲོད། བོད་མིའི་སྒྲིག་འཛུགས་ལས་ཁུངས་དང་མ་ལག་དང་བཅས་པའི་རྩིས་ལོ་ ༢༠༠༢་་་ ༠༣ ནས་ ༢༠༢༢ ་་་༢༠༢༣ བར་སྔོན་རྩིས། གཏན་འཇགས། ཟུར་བཀོལ་སྤྱིར་བཏང་། ལས་འཆར་མ་དངུལ། བསྒྱུར་དཀའི་མཁར་དབང་བཅས་ཀྱི་བསྡོམས་ཧིན་སྒོར་ས་ཡ་ ༧༣༩༨་༥༨ ཆགས་ཀྱི་འདུག་པ་དང་། རྩིས་ལོ་ ༢༠༡༣ ནས་ ༢༠༢༣ ཟླ་ ༣ ཚེས་ ༣༡ བར་བོད་མིའི་སྒྲིག་འཛུགས་ཀྱི་དཔལ་འབྱོར་གྱི་འཕར་འབབ་བརྒྱ་ཆ་ ༡༩༥།༩༠ ཆགས་ཡོད་འདུག

འདས་པའི་ལོ་བཅུ་རིང་གི་དབུས་བོད་མིའི་སྒྲིག་འཛུགས་ཀྱི་དབུས་དང་ཁྱབ་ཁོངས་ལས་ཁུངས་ཁག་གི་དཔལ་འབྱོར་གྱི་གནས་བབ་མཚོན་པའི་སྙན་ཐོ་དེའི་ཁྲོད། བཙན་བྱོལ་བོད་མིའི་བདེ་དོན་གྱི་ལས་འགན་སྒྲུབ་པར་ལོ་རེའི་་རོགས་དངུལ། དང་བླངས་དཔྱ་དངུལ། སྐྱེད་འབབ་དང་ཙག་ཙིག་ཡོང་འབབ། ཟུར་བཀོལ་སྤྱིར་བཏང་མ་དངུལ་བཅས་ནས་གཏོང་དགོས་ལ་སོང༌། བོད་མི་མི་རེ་ངོ་རེས་སོ་སོའི་ཁྱིམ་ནང་གི་དཔལ་འབྱོར་གནས་སྟངས་རྒྱུས་ལོན་ཐུབ་པ་ཙམ་ཞིག་མ་ཡིན་པར། བོད་མིའི་སྒྲིག་འཛུགས་ཀྱི་དཔལ་འབྱོར་གནས་བབ་མཁྱེན་པ་ཡིན་ན། སོ་སོོས་སྒྲིག་འཛུགས་ནས་རོགས་རམ་ཇི་ཙམ་ཞུ་དགོས་མིན་དང༌། སྒྲིག་འཛུགས་ལ་ཞབས་འདེགས་ཅི་ཞིག་ཞུ་དགོས་མིན་དགོངས་པ་བཞེས་ཕྱོགས་ལ་ཁྱད་པར་འགྲོ་ངེས་དང༌། གྲོས་ཚོགས་དང་མང་ཚོགས་ལ་འགན་འཁུར་བའི་ཐོག་ནས་ཕྱི་གསལ་ནང་གསལ་ཡོང་བར་ཕན་རླབས་ཡོང་ངེས་ཡིན་པས། གྲོས་ཚོགས་ཚོགས་དུས་གསུམ་པར་བཀའ་ཤག་སྐབས་ ༡༦ པས་བོད་མིའི་སྒྲིག་འཛུགས་ཀྱི་དབུས་དང་ཁྱབ་ཁོངས་ལས་ཁུངས་ཁག་གི་མ་དངུལ་གྱི་གནས་བབ་སྙན་ཐོ་འདོན་འབུལ་སྐབས་ལོ་གཉིས་རྗེས་དཔལ་འབྱོར་གནས་བབ་སྙན་ཐོ་འདོན་རྒྱུ་ཡིན་ཞེས་ཁས་ལེན་ཞུས་ཡོད་པ་ལྟར དཔལ་འབྱོར་གནས་བབ་ཀྱི་སྙན་ཐོ་འདི་འབུལ་ལམ་ཞུ་ཡི་ཡོད། ཅེས་འཁོད་འདུག

སྙན་ཐོའི་ནང་དཔལ་འབྱོར་འབབ་གྲོན་གྱི་ཁྲོད། ༡༩༧༦ ལོར་ཡིད་ཆེས་དགེ་རྩ་དཔལ་འབྱོར་ལས་ཁུངས་སུ་ཟླ་བསྒྲིལ་གྱིས་ ༡༩༧༩ ཙམ་ནས་བསྐྱར་དུ་ཚོང་ལས་བརྩམས་ཏེ་ལོ་རེའི་ཁེ་འབབ་ནས་གཞུང་གྲོན་ལ་གང་ཙམ་ཕན་པ་བྱུང་འདུག་ཅིང་། འཕྲོས་ཁ་མ་འདུམ་པ་རྣམས་སྐབས་སོ་སོའི་བཀའ་ཤག་གིས་ཐབས་ཤེས་གནང་འདུག སྐབས་དེ་དུས་དཔལ་འབྱོར་ལས་ཁུངས་ཀྱིས་རྒྱུན་གྲོན་དང་། གཞུང་མཛོད་ནས་གཏོང་དགོས་པའི་ལས་འཆར་མ་གཏོགས་གཞན་ལས་གཞི་ཁག་ལས་ཁུངས་སོ་སོས་ཐབས་ཤེས་ཀྱིས་འགྲོ་གྲོན་བཏང་སྟེ་དངུལ་ལྷག་རྣམས་ཟུར་འཇོག་གིས་དུས་ད་ལྟའང་ཟུར་བཀོལ་སྤྱིར་བཏང་མ་དངུལ་ངོ་བོར་འཁྱེར་བཞིན་འདུག ཕྱི་ལོ་ ༢༠༠༣ ཟླ་ ༣ ཚེས་ ༣༡ ཉིན་སྔོན་རྩིས། གཏན་འཇགས། ཟུར་བཀོལ་སྤྱིར་བཏང་མ་དངུལ། ལས་འཆར་མ་ དངུལ་ལྷག་བསྡད། བསྒྱུར་དཀའི་མཁར་དབང་མ་གནས་བཅས་བསྡོམས་འབོར་ཧིན་སྐོར་ས་ཡ་ ༡༣༥༨།༣༤ ཡོད་ཐོག་ ༢༠༡༣ ཟླ་ ༣ ཚེས་ ༣༡ ཉིན་བར་གྱི་འཕར་འབབ་ཧིན་སྒོར་ས་ཡ་ ༡༡༤༡།༩༨ བསྣན་ཏེ་ཁྱོན་ཧིན་སྒོར་ས་ཡ་ ༢༥༠༠།༣༢ བྱེད་ཀྱི་འདུག་པ་འདས་ལོ་བཅུའི་ནང་འཕར་འབབ་བརྒྱ་ཆ་ ༨༤་༠༧ ཆགས་ཀྱི་འདུག དེའི་ཐོག་ ༢༠༡༢་་་༡༣ ནས་ ༢༠༢་་༢༣ བར་གྱི་འཕར་འབབ་ཧིན་སྒོར་ས་ཡ་ ༤༨༩༨།༢༦ བསྡོམས་ ༢༠༢༣ ཟླ་ ༣ ཚེས་ ༣༡ ཉིན་ཁྱོན་བསྡོམས་ཧིན་སྒོར་ས་ཡ་ ༧༣༩༨།༥༨ བྱེད་ཀྱི་འདུག འདས་ལོ་བཅུའི་ནང་འཕར་འབབ་བརྒྱ་ཆ་ ༡༩༥།༩༠ ཡིན་འདུག

དེ་བཞིན་བོད་མིའི་སྒྲིག་འཛུགས་དཔལ་འབྱོར་ལས་ཁུངས་ཀྱི་རྩིས་ལོའི་ ༢༠༠༢ –༢༠༠༣ ནས་ ༢༠༢༢– ༢༠༢༣ བར་གྱི་དཔལ་འབྱོར་གནས་བབ་ཀྱི་སྙན་ཐོ་ཞིག་འདོན་སྤེལ་བྱས་པའི་ཁྲོད། རྩིས་ལོ་བཅུ་ལྷག་གི་སྤྱི་ཡོངས་ཀྱི་དཔལ་འབྱོར་གྱི་གནས་བབ་འཕར་བའི་རྒྱུ་རྐྱེན་དང་། མ་དངུལ་གྱི་གནས་བབ། ལས་འཆར་མ་དངུལ་ལྷག་བསྡད། བསྒྱུར་དཀའི་མཁར་དབང་། སྔོན་རྩིས་མ་དངུལ། གཏན་འཇགས་མ་དངུལ། ཟུར་བཀོལ་སྤྱིར་བཏང་མ་དངུལ་བཅས་ཀྱི་གནས་བབ་ཀྱི་ཐད་ལ་གསལ་སྟོན་བྱས་འདུག