བོད་བལ་གྱི་གནའ་བོའི་ཚོང་ལམ་ ༡༤ བསྐྱར་དུ་སྒོ་འབྱེད་དགོས་ཚུལ་བཤད།

བལ་ཡུལ་སྲིད་བློན་གཞོན་པ་རྒྱ་ནག་ཏུ་ཕྱིན་ཏེ་བོད་བལ་གཉིས་ཀྱི་གནའ་བོའི་ཚོང་ལམ་ ༡༤ བསྐྱར་དུ་སྒོ་འབྱེད་ཀྱིས་མཉམ་ལས་སྔར་ལྷག་བྱ་དགོས་པའི་རེ་བ་བཏོན་ཡོད་འདུག་ལ་རྒྱ་ནག་ཕྱོགས་ནས་ཀྱང་རྒྱུད་གཅིག་ལམ་གཅིག་གི་ལས་གཞི་ཇེ་མགྱོགས་སུ་གཏོང་དགོས་ཚུལ་བརྗོད་ཡོད་འདུག

ཕྱི་ཟླ ༣ ཚེས་ ༢༥ ནས་ཟླ་ ༤ ཚེས་ ༡ བར་བལ་ཡུལ་གྱི་སྲིད་བློན་གཞོན་པ་ཤྲི་སི་ཐཱ་(Narayan Kaji Shrestha) ཟེར་བས་རྒྱ་ནག་དང་བོད་རང་སྐྱོང་ལྗོངས་ཟེར་བ་སོགས་ཀྱི་ནང་གཞུང་འབྲེལ་སྐོར་སྐྱོད་བྱེད་བཞིན་ཡོད་པ་དང་། ཉིན་ཤས་གོང་ཕྱི་ཟླ་ ༣ ཚེས་ ༢༩ ཉིན་བོད་རང་སྐྱོང་ལྗོངས་ཟེར་བའི་རྒྱ་ནག་དམར་ཤོག་དྲུང་ཆེ་ཝང་ཅུན་ཀྲིན་(Wang Junzheng) དང་ཐུག་འཕྲད་བྱས་ཏེ། བོད་བལ་གཉིས་ཀྱི་བར་དུ་ཡོད་པའི་གནའ་བོའི་ཚོང་ལམ་ ༡༤ སྒོ་འབྱེད་ཀྱིས་ཚོང་འབྲེལ་མཉམ་ལས་སྔར་ལྷག་བྱས་ཏེ་མི་མང་གི་འཚོ་བ་ཡར་རྒྱས་གཏོང་དགོས་ཚུལ་སོགས་བཤད་ཡོད་འདུག

ཕྱི་ལོ་ ༡༩༥༩ ལོར་རྒྱ་ནག་གཞུང་གིས་བོད་ས་ཡོངས་སུ་བཙན་བཟུང་བྱས་རྗེས། ཕྱི་ལོ་ ༡༩༦༠ ལོར་རྒྱ་ནག་གཞུང་གིས་སྐབས་དེའི་བལ་གཞུང་ལ་གནའ་བོའི་བོད་བལ་ཚོང་ལམ་ཐད་གྲོས་ཆོད་བཞག་སྟེ། སྤུ་ཧྲེང་རྫོང་སྤུ་ཧྲེང་གྲོང་ཚོའི་འགག་སྒོ་དང་། ལེགས་རྩེ་འགག་སྒོ། སྐྱིད་གྲོང་འགག་སྒོ། འགྲམ་འགག་སྒོ། འདྲེན་ཐང་འགག་སྒོ། རི་འོག་འགག་སྒོ་སོགས་རྒྱལ་སྤྱིའི་འགག་སྒོར་གཏན་འབེབ་བྱས་ཏེ་ཚོང་འབྲེལ་བྱས་ཡོད་ཀྱང་། ཕྱིས་སུ་མང་པོ་ཞིག་སྒོ་བརྒྱབ་ཡོད་འདུག

ཐེངས་འདིའི་སྲིད་བློན་གཞོན་པའི་སྐོར་སྐྱོད་སྐོར་ལ་བོད་ཀྱི་རྒྱལ་ས་ལྷ་སར་ཡོད་པའི་བལ་ཡུལ་དོན་གཅོད་ཁང་( Consulate General of Nepal) གིས་གསར་འགོད་བསྒྲགས་གཏམ་ཞིག་སྤེལ་བའི་ནང་། ཕྱི་ཟླ་ ༣ ཚེས ༢༩ ཉིན་བལ་ཡུལ་གྱི་སྲིད་བློན་གཞོན་པ་བོད་ཀྱི་རྒྱལ་ས་ལྷ་སར་འབྱོར་ནས་བོད་རང་སྐྱོང་ལྗོངས་ཟེར་བའི་དཔོན་རིགས་ཁག་ཅིག་ལ་ཐུག་འཕྲད་བྱས་ཏེ། རྒྱ་ནག་གཞུང་གིས་བོད་བལ་གཉིས་ཀྱི་གནའ་བོའི་ཚོང་ལམ་དག་སྒོ་དབྱེ་རྒྱུ་དང་། རྒྱ་བལ་གཉིས་ཀྱི་མཉམ་འབྲེལ་ཚོང་དོན་ཡར་རྒྱས་བཏང་ནས་ཅ་དངོས་སྐྱེལ་འདྲེན་སྔར་ལས་ཤུགས་ཇེ་ཆེར་གཏང་རྒྱུ།  དེ་བཞིན་ཕྱོགས་གཉིས་ཀྱི་མཐའ་མཚམས་ཁུལ་གྱི་མི་མང་གི་འཚོ་བར་རོགས་འདེགས་དང་། བོད་རང་སྐྱོང་ལྗོངས་སྲིད་གཞུང་ཟེར་བས་བོད་ནས་བལ་ཡུལ་གྱི་རྒྱལ་ས་ཀ་ཐུ་མན་ཌུར་སྐྱོད་པའི་སྤྱི་སྤྱོད་རླངས་འཁོར་གྱི་འགྲོ་བསྐྱོད་བསྐྱར་དུ་མགོ་འཛུགས་དགོས་པ་སོགས་ཀྱི་ཐད་ལ་གླེང་སློང་བྱས་ཡོད་སྐོར་སོགས་གསལ་འདུག

འདི་ལོའི་ཕྱི་ཟླ་ ༣ ཚེས་ ༢༦ ཉིན་བལ་ཡུལ་གྱི་སྲིད་བློན་གཞོན་པ་དེས་རྒྱ་ནག་གི་རྒྱལ་ས་པེ་ཅིན་དུ་ཕྱི་སྲིད་བློན་ཆེན་ཝང་ཡེ་(Wang Yi) དང་ཐུག་འཕྲད་བྱས་ཏེ། རྒྱ་ནག་གཞུང་གིས་རྒྱུད་གཅིག་དང་ལམ་གཅིག་ཟེར་བའི་འཛུགས་སྐྲུན་གྱི་ལས་གཞིའི་འོག་ནས་བལ་ཡུལ་གཞུང་ལ་རོགས་འདེགས་བྱ་རྒྱུ་དང་། ཕྱོགས་གཉིས་ཀྱི་འབྲེལ་ལམ་སྔར་ལས་ཇེ་ཆེར་བཏང་ནས། བལ་ཡུལ་གྱིས་རྒྱ་ནག་ལ་འཚོང་མུས་ཡིན་པའི་རྩྭ་སྐམ་དང་། གླང་ཤ་བཙོས་མ། སྨན་རྩྭའི་རིགས་ཀྱི་ཕྱིར་འདྲེན་སྔར་ལས་ཇེ་མང་དུ་གཏང་བཅུག་དགོས་པའི་རེ་འདུན་བཏོན་ཡོད་འདུག

འདས་པའི་ལོ་ཤས་རིང་རྒྱ་ནག་གཞུང་གིས་ཨེ་ཤ་ཡའི་མཚོ་གླིང་རྒྱལ་ཁབ་ཁག་ཚུད་པའི་རྒྱལ་ཁབ་མང་དག་ཅིག་ནང་འཛུགས་སྐྲུན་མ་འཇོག་དང་རོགས་སྐྱོབ་ཀྱི་མིང་ཐོག་ནས་དངུལ་འབོར་ཆེན་བཏང་སྟེ་གནོན་ཤུགས་སྤྲད་དང་སྤྲོད་མུས་ཡིན་པ་བཞིན། ཕྱི་ལོ་ ༢༠༡༧ ལོར་རྒྱ་བལ་གཉིས་ཀྱི་བར་རྒྱུད་གཅིག་ལམ་གཅིག་གི་ཚོང་ལས་མཉམ་འབྲེལ་གན་རྒྱ་བཞག་ཡོད་ཀྱང་། རྒྱ་ནག་གིས་འཛུགས་སྐྲུན་བྱས་པའི་བལ་ཡུལ་སྤོག་ར་གནམ་ཐང་ཚད་ལྡན་མེད་པ་དང་ལྐོག་ཟ་རུལ་སུངས་ཀྱི་གནད་དོན་བྱུང་ཡོད་པའི་དོགས་གཞིའི་འོག་ཞིབ་འཇུག་བྱེད་བཞིན་ཡོད་པའི་གནས་ཚུལ་ཐོན་ཡོད་པ་དང་། དེ་བཞིན་བལ་གཞུང་གིས་ཡུལ་དེའི་ནང་ཆེས་བྲིན་རྒྱུག་ཆེ་བའི་རྒྱ་ནག་གི་ཊིག་ཊོག་སྤྱི་ཚོགས་དྲ་ལམ་བཀག་སྡོམ་བྱས་པ་སོགས་ཀྱི་གནས་ཚུལ་འཐོན་བཞིན་ཡོད་ཀྱང་།   རྒྱ་ནག་གཞུང་གིས་མུ་མཐུད་རྒྱུད་གཅིག་ལམ་གཅིག་གི་མཉམ་འབྲེལ་ལས་གཞི་ཇེ་མགྱོགས་སུ་གཏོང་དགོས་པ་སོགས་ཀྱི་ཆ་རྐྱེན་འདོན་གྱི་ཡོད་ཀྱང་བལ་ཡུལ་གྲོས་ཚོགས་དང་མི་མང་ནང་དེའི་ཐད་འདོད་མོས་མེད་པའི་རྣམ་འགྱུར་ཤུགས་ཆེན་ཡོང་གི་ཡོད་འདུག

གསར་འགོད་པ། དཔལ་ལྡན།

རྩོམ་སྒྲིག་པ། པདྨ་མཚོ།