ཟླ་འདིའི་ཕྱི་ཚེས་ ༡ དང་ ༢ ཉིན་གྲངས་གཉིས་རིང་གངས་སྐྱིད་བོད་ཀྱི་དཔེ་མཛོད་ཁང་གི་ཚོགས་ཁང་དུ། རུ་སོག་སྐུ་ཚབ་དོན་གཅོད་ཏེ་ལོ་རིན་པོ་ཆེའི་ཆོས་ཚོགས་དང་། བོད་ཀྱི་སྲིད་བྱུས་ཉམས་ཞིབ་ཁང་། རུ་སོག་དོན་གཅོད་ལས་ཁུངས་གསུམ་གྱི་གོ་སྒྲིག་འོག བོད་སོག་འབྲེལ་ལམ་ཚོགས་འདུ་མཇུག་སྡོམ་གྱི་མཛད་སྒོའི་སྐུ་མགྲོན་གཙོ་བོར་བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་མཆོག་ཕེབས་ཏེ། བོད་མིའི་སྒྲིག་འཛུགས་ཀྱི་ངོས་ནས་བོད་རང་བཙན་གཙང་མའི་རྒྱལ་ཁབ་ཅིག་ཡིན་པའི་ལོ་རྒྱུས་ཀྱི་གནས་བབ་གསལ་འདོན་བྱེད་བཞིན་ཡོད་སྐོར་སོགས་ཀྱི་གསུང་བཤད་གནང་སོང་ལ། དེ་རིང་གི་མཇུག་སྡོམ་མཛད་སྒོའི་སྟེང་རུ་སོག་སྐུ་ཚབ་དོན་གཅོད་ཏེ་ལོ་རིན་པོ་ཆེ་མཆོག་དང་། བོད་ཀྱི་སྲིད་བྱུས་ཉམས་ཞིབ་ཁང་གི་འགན་འཛིན་ཟླ་བ་ཚེ་རིང་ལགས། འགན་འཛིན་གཞོན་པ་འཛམ་ལྷ་བསྟན་པ་རྒྱལ་མཚན་ལགས། བོད་དང་སོག་པའི་གཙུག་ལག་སློབ་གཉེར་ཁག་གི་སློབ་དཔོན་དང་། དགེ་བཤེས། ཉམས་ཞིབ་པ་གྲངས་ ༡༡ དང་། དྷ་ས་ཁུལ་གྱི་བོད་སོག་གི་ཉམས་ཞིབ་པ་དང་སློབ་གཉེར་བ་བཅས་མཉམ་ཞུགས་གནང་འདུག
སྐབས་དེར་རུ་སོག་སྐུ་ཚབ་དོན་གཅོད་ཏེ་ལོ་རིན་པོ་ཆེ་མཆོག་གིས། རང་ཉིད་བོད་སོག་གཉིས་བར་གྱི་ཟམ་པ་ལྟ་བུ་ཞིག་ཡིན་པར་བརྟེན། མ་འོངས་པར་བོད་སོག་གི་འབྲེལ་ལམ་ཡར་རྒྱས་གོང་འཕེལ་གཏོང་ཐབས་སུ་དམིགས་པའི་ལས་ཀ་བྱ་རྒྱུ་ཡིན་སྐོར་དང་། འབྱུང་འགྱུར་ཉིན་གྲངས་འགའི་རིང་དྷ་སར་བསྡད་དེ་སོག་པོའི་མི་ ༧༠ ལྷག་ཙམ་ཡོད་པའི་ཚོགས་པ་ཞིག་བསྡུ་རུབ་བྱས་ཏེ། མི་དེ་དག་ལ་ནང་ཆོས་ངོ་སྤྲོད་དང་། བོད་མིའི་སྒྲིག་འཛུགས་ཀྱི་འཛིན་སྐྱོང་སྒྲིག་གཞི་དང་། བཙན་བྱོལ་ནང་གི་བོད་མིའི་གནས་སྟངས་སོགས་ཀྱི་སྐོར་ལ་གོ་རྟོགས་སྤེལ་རྒྱུའི་ལས་གཞི་སྤེལ་འཆར་སྐོར། ལས་གཞི་དེ་བརྒྱུད་བོད་སོག་གཉིས་ཀྱི་འབྲེལ་ལམ་སྔར་ལྷག་ཡར་རྒྱས་གཏོང་ཐུབ་པ་དང་། མ་འོངས་པར་བོད་སོག་གི་འབྲེལ་ལམ་རྒྱུན་གནས་ཐུབ་པར་ཕན་ཐོགས་ཡོད་པ་ཞིག་ལ་ངོས་འཛིན་བྱེད་ཀྱི་ཡོད་སྐོར་དང་། ད་ལན་གྱི་ཚོགས་འདུ་དེ་བརྒྱུད་བོད་དང་སོག་པོའི་གཙུག་ལག་སློབ་གཉེར་ཁང་གི་སློབ་དཔོན་དང་ཉམས་ཞིབ་པ་སོགས་ལ་ཕན་ཐོགས་ཆེན་པོ་བྱུང་ཡོད་སྐོར་སོགས་གསུངས་སོང་།
མཇུག་ཏུ་སྲིད་སྐྱོང་སྤེན་པ་ཚེ་རིང་མཆོག་གིས། བོད་མིའི་སྒྲིག་འཛུགས་ཀྱི་ལངས་ཕྱོགས་ལམ་དབུ་མ་ཡིན་པ་དང་། ཐབས་བྱུས་ཀྱི་ཐོག་ནས་འགྱུར་བ་བཏང་སྟེ་བོད་ལོ་རྒྱུས་ཀྱི་ཐོག་ནས་རང་བཙན་གཙང་མའི་རྒྱལ་ཁབ་ཅིག་ཡིན་པའི་གནས་བབ་གསལ་འདོན་སླད། ཉེ་བའི་ལོ་གཅིག་དང་ཕྱེད་ཀ་ལྷག་རིང་བཀའ་ཤག་སྐབས་བཅུ་དྲུག་པས་ཨ་རིའི་གྲོས་ཚོགས་ནང་བོད་ཀྱི་ལོ་རྒྱུས་ཀྱི་གནས་བབ་གསལ་འདོན་བཟོ་དགོས་པའི་གྲོས་ཆོད་ཅིག་གཏན་འབེབ་ཡོང་བར་ཤུགས་སྣོན་བསྐྱོན་ཡོད་པ་དང་། གལ་སྲིད་གྲོས་ཆོད་དེ་ཉིད་ཨ་རིའི་ཁྲིམས་སུ་གཏན་འབེབ་བྱས་པ་ཡིན་ན། བོད་མིའི་སྒྲིག་འཛུགས་ཀྱི་ངོས་ནས་འཛམ་གླིང་རྒྱལ་ཁབ་གཞན་གྱི་ནང་དུའང་དེ་མཚུངས་བཞིན་བོད་རང་བཙན་ཡིན་པའི་ལོ་རྒྱུས་ཀྱི་གནས་བབ་གསལ་འདོན་དགོས་པའི་ངོས་འཛིན་གྲོས་ཆོད་གཏན་འབེབ་བྱེད་པའི་འབོད་སྐུལ་ཞུ་རྒྱུ་ཡིན་སྐོར་དང་། ཁྲིམས་འཆར་དེ་བརྒྱུད་རྒྱ་ནག་གཞུང་ལ་བོད་ཀྱི་ལོ་རྒྱུས་ཀྱི་གནས་བབ་ལ་འཁྱོག་བརྗོད་བྱེད་མཚམས་འཇོག་དགོས་པའི་བརྡ་ལན་གཏོང་གི་ཡོད་པ་མ་ཟད། རྒྱལ་སྤྱིའི་སྲིད་གཞུང་ཁག་ནས་ཀྱང་། རྒྱ་ནག་གིས་རྟག་པར་བོད་དེ་རྒྱ་ནག་གི་ཆ་ཤས་ཡིན་ཟེར་བཞིན་པ་སོགས་བོད་ཀྱི་ལོ་རྒྱུས་ཀྱི་གནས་བབ་ལ་འཁྱོག་བརྗོད་བྱེད་བཞིན་པ་མཚམས་འཇོག་དང་བསྐྱར་ཟློས་མི་ཡོང་བར་འབད་བརྩོན་གནང་དགོས་པའི་འབོད་སྐུལ་ཞུ་རྒྱུ་ཡིན་སྐོར་སོགས་གསུངས་སོང་།
སྲིད་བྱུས་ཉམས་ཞིབ་ཁང་གི་འགན་འཛིན་ཟླ་བ་ཚེ་རིང་ལགས་ཀྱིས་འདི་གའི་གསར་འགོད་པར། ཐེངས་འདིའི་ཚོགས་འདུ་ནང་གཙོ་བོ་བརྗོད་གཞི་རིགས་གཉིས་ཀྱི་ཐོག་བགྲོ་གླེང་བྱས་ཡོད། གཙོ་བོ་ལོ་རྒྱུས་ཐོག་གི་བོད་དང་སོག་པའི་འབྲེལ་ལམ་སྐོར་རེད། དེ་ཡང་བོད་སོག་གཉིས་ཀྱིས་ཕན་ཚུན་ལ་ཆོས་ལུགས་དང་རིག་གཞུང་སོགས་ཐོག་ནས་རོགས་པ་གང་བྱས་ཡིན་མིན་སྐོར་རེད། བོད་སོག་གཉིས་ཆོས་ལུགས་དང་རིག་གཞུང་ཐོག་ནས་འབྲེལ་བ་ཡོད་པ་མ་ཟད། ཆབ་སྲིད་ཀྱི་ཐོག་ནས་བཤད་ན་མན་ཇུ་དང་རྒྱ་ནག་གང་ལ་ཐུག་ཀྱང་དཀའ་ངལ་འཕྲད་པའི་ལས་དབང་གཅིག་པ་ཆགས་ཡོད། དེའི་ཐོག་ནས་ང་ཚོ་ཉམས་རྒུད་གང་ཕྱིན་ཡོད་པ་དང་། མ་འོངས་ལས་དོན་བྱེད་ཕྱོགས་སོགས་ཀྱི་ཐོག་བགྲོ་གླེང་བྱས་ཡོད། ཅེས་དང་མ་འོངས་པའི་བོད་སོག་འབྲེལ་ལམ་སྐོར་ལ་ཁོང་གིས། འགྲོ་མགོན་ཆོས་རྒྱལ་འཕགས་པ་དང་སེ་ཆེན་རྒྱལ་པོ་གཉིས་ཀྱི་སྐབས་ནས་མགོ་ཚུགས་ཏེ། རྒྱལ་དབང་སྐུ་ཕྲེང་བ་གསུམ་སོགས་བརྒྱུད་དེ་བོད་སོག་གཉིས་ཀྱི་འབྲེལ་ལམ་ཐད་གཞི་རྩ་ཧ་ཅང་སྤུས་དག་པོ་ཡོད། བར་སྐབས་ཆབ་སྲིད་ཀྱི་རྐྱེན་གྱིས་བོད་ཀྱི་རྒྱལ་ཁབ་རྒྱ་ནག་གི་བཙན་འོག་ཏུ་ཤོར་བ་དང་། སོག་པོའང་དམར་ཤོག་ཚོགས་པའི་འོག་ཏུ་ལོ་ངོ་ ༧༠ རིང་བསྡད་པ་རེད། རྒྱ་ནག་གཞུང་གིས་བོད་སོག་གཉིས་ཀྱི་འབྲེལ་ལམ་ལ་ཐབས་བརྒྱ་ཇུས་སྟོང་གིས་བཀག་འགོག་བྱས་ཡོད། འོན་ཀྱང་སོག་པོའི་ངོས་ནས་ཁལ་ཁ་རྗེ་བཙུན་དམ་པའི་ཡང་སྤྲུལ་ངོས་འཛིན་དང་ཁྲི་སྟོན་སོགས་ཀྱི་ཐད་བློ་ཁོག་ཆེན་པོའོ་ཐོག་ནས་བོད་དང་འབྲེལ་བ་བྱས་ཡོད། ཐེངས་འདིའི་ཚོགས་འདུའི་དམིགས་ཡུལ་ཡང་མ་འོངས་བར་བོད་སོག་གཉིས་ཀྱི་བར་སྒོ་གསར་བ་ཞིག་དང་། མགོ་གསར་བ་བཙུགས་ཏེ་ལམ་ཁ་གསར་བ་ཞིག་ཏུ་འགྲོ་ཐུབ་པའི་རེ་བ་རྒྱག་བཞིན་ཡོད། གལ་སྲིད་ཕྱི་ལོགས་ཀྱི་གནོན་ཤུགས་ལ་གདོང་ལེན་བྱེད་ཐུབ་ཚེ། བོད་སོག་གཉིས་ཀྱི་ཕན་ཚུན་ལ་འབྲེལ་བ་བྱེད་ཐུབ་པ་མ་ཟད། བོད་བརྒྱུད་ནང་བསྟན་རྒྱུད་འཛིན་གྱི་མཉམ་ལས་ཐོག་ནས་འགྲོ་བ་མི་ལ་ཕན་ཐོགས་པ་ཞིག་རེད། ཅེས་འགྲེལ་བརྗོད་གནང་སོང་།
ཉིན་གྲངས་གཉིས་རིང་གི་ཚོགས་འདུའི་ཐོག ཕྱི་ལོ་ ༡༩༠༠ ནས་ ༡༩༡༣ བར་བོད་དང་སོག་པོ་གཉིས་རྒྱ་ནག་མན་ཇུའི་དབང་བསྒྱུར་འོག་ནས་རང་བཙན་ཐོབ་པའི་གནས་བབ་དང། ཕྱི་ལོ་ ༡༩༡༡ ལོར་རྗེ་བཙུན་དམ་པས་སོག་ཡུལ་རང་བཙན་གསལ་བསྒྲགས་བསྐྱངས་བའི་གནས་སྟངས། ༸རྒྱལ་བ་སྐུ་ཕྲེང་བཅུ་གསུམ་པས་བོད་རང་བཙན་གྱི་གནས་བབ་ལ་ངོས་འཛིན་ཐོབ་ཐབས་མཛད་ཚུལ་དང་ཆུ་གླང་རྩ་ཚིག་གི་གལ་གནད་སྐོར། སེ་ར་བྱེས་ཀྱི་སོག་པོའི་གྲྭ་རྒྱུན་དང་ད་ལྟའི་གནས་བབ། ཕྱི་ལོ་ ༡༩༧༩ རྗེས་ཀྱི་འབྲས་སྤུངས་སྒོ་མང་གི་སོག་པོའི་གྲྭ་རྒྱུན་སྐོར། སོག་ཡུལ་མི་སེར་རྒྱལ་ཁབ་ཀྱིས་བོད་དང་གཞུང་འབྲེལ་འབྲེལ་བ་འཛུགས་ཐབས་སྐོར། ཕྱི་ལོ་ ༡༩༧༩ ནས་ ༢༠༡༦ བར་༸གོང་ས་རྒྱལ་བ་རིན་པོ་མཆོག་སོག་ཡུལ་དུ་ཆིབས་བསྒྱུར་བསྐྱངས་བའི་གལ་གནད་སོགས་ཀྱི་སྐོར་བགྲོ་གླེང་གནང་ཡོད།
གསར་འགོད་པ། བྱམས་པ་ཚེ་རིང་། བསྟན་འཛིན་ཕུར་བུ། སྐལ་བཟང་སྦྱིན་པ།
