དེ་རིང་ཐའེ་ཝན་ནང་ཚད་རིམ ༧། ༤ ཅན་གྱི་ས་ཡོམ་བརྒྱབ་འདུག

ཐའེ་ཝན་གྱི་ཧྭ་ལིན་གྲོང་ཁྱེར་དུ་ཚད་རིམ ༧།༤ ཅན་གྱི་ས་ཡོམ་བརྒྱབ་ནས་ཉུང་མཐར་མི་གྲངས་ ༧༠༠ ལྷག་ལ་རྨས་སྐྱོན་བཟོས་བ་སོགས་མི་རྒྱུ་གཉིས་ལ་གནོད་སྐྱོན་ཆེན་པོ་ཐེབས་ཡོད་པས་མྱུར་སྐྱོབ་བྱེད་བཞིན་པའི་སྒང་རེད་འདུག

In this image taken from a video run by TVBS, a partially collapsed building is seen in Hualien, eastern Taiwan on Wednesday, April 3. TVBS/AP

དེ་རིང་རེས་གཟའ་ལྷག་པའི་ཉིན་ཐའེ་ཝན་མཚོ་ཁུལ་གྱི་ཧྭ་ལིན་( Hualien) གྲོང་ཁྱེར་སོགས་སུ་ཚད་རིམ་ ༧།༤ ཅན་གྱི་ས་ཡོམ་བརྒྱབ་སྟེ། ད་བར་རྐྱེན་འདས་སུ་གྱུར་བའི་མི་གྲངས་ཁ་གསལ་མེད་ནའང་ཉུང་མཐར་མི་གྲངས་ ༧ རྐྱེན་འདས་དང་། མི་གྲངས་ ༧༣༠ ལ་རྨས་སྐྱོན། མི་གྲངས ༧༧ ལྷག་རྡིབ་སྐྱོན་བྱུང་བའི་ཁང་པའི་ནང་ལྷག་བསྡད་ཡོད་པས་མྱུར་སྐྱོབ་བྱེད་བཞིན་པའི་སྒང་རེད་འདུག་ལ། ས་ཡོམ་ཁྲོད་སྡོད་ཁང་དང་གཞུང་ལམ་ལ་རྡིབ་སྐྱོབ་བྱུང་བ་དང་། དེ་བཞིན་རི་ཉུལ་བ་སོགས་ཀྱི་གོད་ཆག་ཆེན་པོ་བྱུང་འདུག

ས་ཡོམ་གོད་ཆག་བྱུང་རྗེས་ཐའེ་ཝན་གྱི་སྲིད་འཛིན་ལྕམ་ཚའེ་ཡེན་ཝིན་མཆོག་གིས། ཐའེ་ཝན་དབུས་གཞུང་གི་འབྲེལ་ཡོད་རྣམས་ལ་ས་ཡོམ་གྱི་གོད་ཆག་དང་འབྲེལ་བའི་གནད་དོན་ཐད་ཚད་རིམ་མཐོ་བོའི་རྟོག་ཞིབ་བྱ་དགོས་པའི་བཀོད་ཁྱབ་གནང་བ་དང་སྦྲགས། གོད་ཆག་བྱུང་ཡུལ་གྱི་མི་མང་གི་གནས་སྟངས་གང་མགྱོགས་ཤེས་རྟོགས་དང་རོགས་སྐྱོབ་གང་ལེགས་གནང་དགོས་པའི་འབོད་སྐུལ་གནང་འདུག་ལ། གནོད་སྐྱོན་བྱུང་བའི་མི་མང་ལ་སྨན་བཅོས་དང་འཚོ་བའི་མཐུན་རྐྱེན་འཕྲལ་དུ་སྒྲུབ་སྟེ་རང་བྱུང་གི་གནོད་འཚེ་ཇེ་ཆུང་དུ་གཏོང་ཐབས་བྱ་རྒྱུ་ཡིན་སྐོར་གསུངས་འདུག

དེ་བཞིན་ཉི་ཧོང་གི་སྲིད་བློན་ཧྥུ་མེའོ་ཁི་ཤཱི་ཌ་ (Fumio Kishida) མཆོག་གིས་ཨེག་སི་སྤྱི་ཚོགས་དྲ་ལམ་སྟེང་། ཐའེ་ཝན་ནི་ང་ཚོའི་གལ་གནད་ཆེ་བའི་གྲོགས་པོ་ཞིག་ཡིན་ལ། ཁོང་ཚོས་ང་ཚོར་དུས་ནས་དུས་སུ་རོགས་འདེགས་བྱས་པར་བསྔགས་བརྗོད་བྱེད་ཀྱི་ཡོད། ད་ལན་ང་ཚོའི་ཁྱིམ་མཚེས་མཚོ་གླིང་རྒྱལ་ཁབ་དཀའ་ཁག་ཏུ་ཚུད་སྐབས། ང་ཚོས་ཐའེ་ཝན་ལ་ཉེར་མཁོའི་རིགས་མཐུན་འགྱུར་ཞུ་འདོད་ཡོད། ཅེས་གསུངས་འདུག

དེ་རིང་གི་ས་ཡོམ་དེ་ནི་མི་ལོ ༢༥ ཙམ་གྱི་རྗེས་སུ་ཐའེ་ཝན་དུ་བྱུང་བའི་ཤུགས་ཚད་ཆེ་ཤོས་ཆགས་ཡོད་འདུག ཕྱི་ལོ་ ༡༩༩༩ ལོར་ཐའེ་ཝན་དུ་ཚད་རིམ་ ༧།༦ ཅན་གྱི་ས་ཡོམ་བརྒྱབ་ནས་མི་གྲངས་ ༢༤༠༠ ལྷག་རྐྱེན་འདས་དང་མི་གྲངས་ ༡༠༠༠༠ ཙམ་ལ་རྨས་སྐྱོན་བཟོས་ཡོད་འདུག

བརྒྱུད་ལམ་ཁག་ཏུ་གནས་ཚུལ་ཐོན་པ་ལྟར་ན། དེ་རིང་གི་ས་ཡོམ་ཁྲོད་ཉུང་མཐར་ཁང་རྩེག་གྲངས་ ༡༠༠ ཙམ་ལ་རྡིབ་སྐྱོན་བྱུང་འདུག་ལ། གྲོང་ཁྱེར་ཧྭ་ལིན་ནས་ས་གནས་གཞན་དུ་འགྲོ་བའི་ལམ་མང་པོ་ཞིག་ཏུ་རི་ཉུལ་བ་དང་རྡོ་ཟགས་ནས་འགག་ཡོད་འདུག དེ་བཞིན་ཁུལ་དེའི་སྡོད་ཁང་ ༩༡༠༠༠ ལྷག་ལ་གློག་ཆད་ཡོད་འདུག མི་གྲངས་འབུམ་གཅིག་ལྷག་གི་སྡོད་གནས་སུ་གྱུར་བའི་ཧྭ་ལིན་( Hualien) ནི་ཐའེ་ཝན་མཚོ་གླིང་རྒྱལ་ཁབ་ཀྱི་ཤར་ཕྱོགས་སུ་ཆགས་པའི་མཚོ་ཁུལ་ཆེ་ཤོས་དང་རི་རྒྱུད་སོགས་འཛོམས་པའི་ས་ཁུལ་ཞིག་ཡིན་ཞིང་། ཁུལ་དེར་ལོ་ལྟར་ཡུལ་སྐོར་བ་མང་པོ་ཡོང་གི་ཡོད་འདུག་ལ། དེ་ལན་ས་ཡོམ་དེའི་རྐྱེན་གྱིས་རི་ཁུལ་གྱི་བགྲོད་ལམ་དང་ཕུག་ལམ་མང་པོ་ཞིག་ལ་རྡིབ་སྐྱོན་བྱུང་ཡོད་པ་མ་ཟད། ཆིང་ཤུ་(Qingshui Cliff) ཕུག་ལམ་ཆད་ཡོད་འདུག

གསར་འགོད་པ། དཔལ་ལྡན།

རྩོམ་སྒྲིག་པ། པདྨ་མཚོ།