ཨོ་གླིང་གི་གྲོས་ཚོགས་ནང་འཐུས་མི་ལྕམ་ལི་ཌི་ཡ་ལགས་ཀྱིས་བོད་ནང་གི་བཅའ་སྡོད་སློབ་གྲྭའི་གནས་སྟངས་གླེང་སློང་གནང་སྟེ་བཅའ་སྡོད་སློབ་གྲྭ་མེད་པར་བཟོ་དགོས་པའི་འབོད་སྐུལ་གནང་འདུག
ཨོ་གླིང་གྲོས་ཚོགས་གོང་མའི་འཐུས་མི་ལི་ཌི་ཨ་ (Lidia Thorpe) ལགས་ཀྱིས། རྒྱལ་ཁབ་འདིའི་གདོད་མའི་མི་རིགས་ཤིག་ཡིན་པའི་ཆ་ནས། མི་རིགས་ཤིག་རྩ་མེད་གཏོང་བའི་སྲིད་ཇུས་ལག་བསྟར་འོག་རང་གི་ཕ་མ་དང་ཕྲུ་གུ་ཁ་བྲལ་དུ་གཏོང་བའི་གནད་དོན་ཞིབ་ཚགས་ཤེས་ཀྱི་ཡོད། དེ་ནི་རྩ་མེད་གཏོང་བའི་སྲིད་ཇུས་ཤིག་རེད། རྒྱ་ནག་གཞུང་གིས་ཤར་ཏུར་ཀི་སི་ཐན་ནང་དུའང་མི་རིགས་དང་རིག་གཞུང་རྩ་མེད་གཏོང་ཐབས་ཀྱི་སྲིད་ཇུས་ལག་བསྟར་བྱེད་བཞིན་ཡོད་པ་མ་ཟད། ད་ལྟའི་ཆར་ཡུ་གུར་བ་ས་ཡ་ ༣ ལྷག་དྲང་བདེན་མེད་པ་དང་ཁྲིམས་འགལ་གྱི་ཐོག་ནས་འཛིན་བཟུང་བཙོན་འཇུག་བྱས་ཏེ། ཡུ་གུར་བའི་རིག་གཞུང་དང་སྐད་ཡིག་སོགས་རྩ་མེད་བཟོས་བར་དམིགས་ནས་རྒྱ་སྒྱུར་སློབ་གསོ་སྤྲོད་ཀྱི་ཡོད་པ་རེད། རྩ་མེད་གཏོང་བ་ནི་འགྲོ་བ་མིའི་རིགས་ཀྱི་ནག་ཉེས་ཚབས་ཆེ་ཤོས་ཤིག་རེད། ཅེས་གསུངས་འདུག
ཡང་ཁོང་མོས་མུ་མཐུད་དུ། མི་མང་པོ་ཞིག་གིས་གནད་དོན་དེ་ཕྱིན་ཚར་བ་ཞིག་དང་བསམ་ཡུལ་ལས་འདས་པ་ཞིག་རེད་བསམ་གྱི་ཡོད་པ་རེད། འོན་ཀྱང་། དེ་ནི་དོན་དངོས་སུ་བྱུང་ཡོད་པ་དང་ད་ལྟའང་འབྱུང་གི་ཡོད་པ་རེད། ང་ཚོས་དུས་རྟག་ཏུ་མི་རིགས་སོགས་རྩ་མེད་གཏོང་བའི་ལས་དོན་ལ་ཁ་གཏད་དུ་ལངས་དགོས། བོད་མི་དང་ཡུ་གུར་བ་རྣམས་ཀྱིས་ཀྱང་དེ་ལྟར་བྱ་དགོས་ཀྱི་རེད། དེ་རིང་ངས་བོད་དང་ཤར་ཏུར་ཀི་སི་ཐན་གྱི་གནད་དོན་དང་འབྲེལ་ནས་གདུང་སེམས་མཉམ་སྐྱེད་ཞུ་རྒྱུ་དང་། རྒྱ་ནག་གཞུང་གིས་རིག་གཞུང་རྩ་མེད་གཏོང་བའི་ལས་དོན་ཚང་མ་མེད་པར་བཟོ་དགོས་པའི་རེ་སྐུལ་ཞུ་ཡི་ཡོད། རྒྱ་ནག་དམར་ཤོག་སྲིད་གཞུང་གིས་བོད་ཕྲུག་ས་ཡ་གཅིག་ཙམ་རང་ཉིད་ཀྱི་ཕ་མ་དང་ཁ་བྲལ་དུ་བཏང་སྟེ་བཙན་གྱིས་བཅའ་སྡོད་སློབ་གྲྭར་བཅུག་ནས། སོ་སོའི་རིག་གཞུང་དང་ཆོས་ལུགས་སོགས་རྩ་མེད་བཏང་དང་གཏོང་མུས་ཡིན་པ་རེད། དེར་བརྟེན། ངའི་རེ་བར་ང་ཚོའི་ཕྱི་སྲིད་བློན་ཆེན་གྱིས་གནད་དོན་དེ་གལ་ཆེན་པོར་བརྩིས་ཏེ། ད་ལན་གྱི་ཚོགས་འདུའི་སྟེང་མི་རིགས་དང་རིག་གཞུང་སོགས་རྩ་མེད་གཏོང་བའི་ལས་དོན་དེ་དག་མེད་པར་བཟོ་དགོས་པའི་འབོད་སྐུལ་ཞུ་ཡི་ཡོད། ཅེས་སོགས་གསུངས་འདུག
འདས་ལོའི་ཕྱི་ཟླ་ ༦ ཚེས་ ༢༠ ཉིན་ཨོ་གླིང་གྲོས་ཚོགས་སུ་བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་མཆོག་ལ་ཕེབས་བསུ་ཆེ་བསྟོད་གནང་ཡོད་པ་དང་། སྐབས་དེར་གྲོས་ཚོགས་གོང་མའི་འཐུས་མི་ཇེ་ནེཊ་ར་ཧི་སི་ (Janet Rice) ལགས་དང་གྲོས་ཚོགས་འཐུས་མི་ལིན་ཌ་ (Linda Reynolds) ལགས། དེ་བཞིན་གྲོས་ཚོགས་གོང་མའི་འཐུས་མི་ལི་ཊི་ཡ་ཊོར་ཕི(Lidia Thorpe) ལགས་སོགས་གྲོས་ཚོགས་གོང་མའི་འཐུས་མི་ཁག་ཅིག་གིས་བོད་ནང་གི་ཛ་དྲག་གནས་སྟངས་དང་། རྒྱ་ནག་གིས་བོད་ཀྱི་རིག་གཞུང་རྩ་མེད་གཏོང་སླད་བཅའ་སྡོད་སློབ་གྲྭར་བྱིས་པ་རྣམས་བཅུག་སྟེ་རྒྱ་སྒྱུར་སློབ་གསོ་སྤྲོད་ཀྱི་ཡོད་པའི་གནད་དོན་ཐོག་གླེང་སློང་གནང་ཡོད་པ་མ་ཟད། མཐུན་ཕྱོགས་རྒྱལ་ཁབ་རྣམགས་མཉམ་འབྲེལ་གྱིས་འཛམ་གླིང་མཉམ་འབྲེལ་རྒྱལ་ཚོགས་ཀྱིས་རྒྱ་ནག་གཞུང་གིས་བོད་ཀྱི་རིག་གཞུང་རྩ་མེད་གཏོང་སླད་བཙན་གྱིས་རྒྱ་སྒྱུར་སློབ་གསོ་སྤྲོད་བཞིན་པའི་གནས་སྟངས་ལ་ཞིབ་འཇུག་གནང་བཞིན་པར་རྒྱབ་སྐྱོར་དགོས་པའི་འབོད་སྐུལ་གནང་ཡོད་འདུག
ལི་ཌི་ཡ་ (Lidia Thorpe) ལགས་ནི་ཕྱི་ལོ་ ༡༩༧༣ ལོར་ཨོ་གླིང་གི་མེལ་བྷོན་ (Melbourne) གྲོང་ཁྱེར་གྱི་ཝིག་ཊོ་རི་ཡ་ (Victoria) ས་གནས་སུ་་ཡོད་པའི་ཀལ་ཊོན་ (Carlton) གྲོང་སྡེ་རུ་སྐྱེས་ཤིང་། དེ་སྔོན་ཝིག་ཊོ་རི་ཡའི་གྲོང་སྡེའི་ཚོགས་པ་ཞིག་གི་སློབ་སྟོན་པ་དང་། སིལ་སྤོལ་ཚོགས་པ་ཞིག་ལ་ཚོགས་གཙོ་སོགས་གནང་མྱོང་ཡོད་འདུག ཕྱི་ལོ་ ༢༠༡༧ ཟླ་ ༡༡ ནང་ཁོང་མོས་ཝིག་ཊོ་རི་ཡ་མངའ་སྡེའི་གྲོས་ཚོགས་འཐུས་མིའི་ཕྱག་ལས་གནང་། ཕྱི་ལོ་ ༢༠༢༠ ལོར་ཨོ་གླིང་གྲོས་ཚོགས་གོང་མའི་འཐུས་མིའི་ཕྱག་ལས་གནང་མགོ་བཙུགས་ཡོད་པ་དང་། སྐབས་དེར་ཁོང་མོ་ནི་ཝིག་ཊོ་རི་ཡ་མངའ་སྡེ་ནས་གྲོས་ཚོགས་གོང་མའི་འཐུས་མིའི་ཕྱག་ལས་གནང་མཁན་གདོད་མའི་མི་རིགས་ཀྱི་བུད་མེད་དང་པོ་དེ་ཆགས་ཡོད་འདུག་ལ། ཁོང་མོ་ནི་ཡུན་རིང་ནས་བོད་དོན་ལ་རྒྱབ་སྐྱོར་གནང་མཁན་ཞིག་ཡིན་འདུག
གསར་འགོད་པ། བསྟན་འཛིན་ཕུར་བུ།
རྩོམ་སྒྲིག་པ། པདྨ་མཚོ།
