བོད་ཀྱི་རིག་གཞུང་ཟབ་སྦྱོང་ཐེངས་བཅུ་བཞི་པ་འཚོག་བཞིན་འདུག

བོད་ཀྱི་རིག་གཞུང་ཟབ་སྦྱོང་ཐེངས་བཅུ་བཞི་པའི་ནང་བོད་ཀྱི་གཞིས་ཆགས་ཁག་ཅིག་དང་། ལ་དྭགས། མོན་རྟ་དབང་། འབྲུག་བཅས་ནས་ཚོགས་བཅར་བ་གྲངས་ ༢༤ མཉམ་ཞུགས་གནང་འདུག

ཁ་སང་ཕྱི་ཚེས་ ༣ ནས་ཕྱི་ཟླ་ ༥ ཚེས་ ༣༡ བར་གངས་སྐྱིད་བོད་ཀྱི་དཔེ་མཛོད་ཁང་གི་གོ་སྒྲིག་འོག བོད་ཀྱི་རིག་གཞུང་ཟབ་སྦྱོང་ཐེངས་བཅུ་བཞི་པ་འཚོག་བཞིན་ཡོད་ཅིང་། དབུ་འབྱེད་མཛད་སྒོའི་ཐོག་བོད་ཀྱི་དཔེ་མཛོད་ཁང་གི་འགན་འཛིན་དགེ་བཤེས་ལྷག་རྡོར་ལགས་དང་། སྤྱི་ཁྱབ་དྲུང་ཆེ་ངག་དབང་ཡེ་ཤེས་ལགས། དགེ་བཤེས་རྒྱལ་མཚན་ཚེ་རིང་ལགས། རིག་གཞུང་ཉམས་ཞིབ་དང་པར་སྐྲུན་སྡེ་ཚན་གྱི་འགན་འཛིན་ན་ག་སངས་རྒྱས་བསྟན་དར་ལགས་སོགས་དང་། ཟབ་སྦྱོང་དགེ་རྒན་རྣམ་པ་དང་། གཞིས་ཆགས་ཁག་ཅིག་ནས་ཡོང་བའི་སློབ་གཉེར་བ་དང་། འབྲུག ལ་དྭགས། མོན་རྟ་དབང་བཅས་ཀྱི་ཚོགས་བཅར་བ་གྲངས་ ༢༤ བཅས་མཉམ་ཞུགས་གནང་འདུག

ཐེངས་འདིའི་ཟབ་སྦྱོང་སྐོར་ལ་རིག་གཞུང་ཉམས་ཞིབ་དང་པར་སྐྲུན་སྡེ་ཚན་གྱི་འགན་འཛིན་ན་ག་སངས་རྒྱས་བསྟན་དར་ལགས་ཀྱིས། ང་ཚོའི་དུས་ཚོད་དང་བརྩོན་འགྲུས་སོགས་བོད་ཀྱི་ཆོས་དང་རིག་གཞུང་ཐོག་ཏུ་གཏོང་ཐུབ་ཚེ། དེས་རིག་གཞུང་གི་གལ་གནད་དང་རིན་ཐང་རྟོགས་ཐུབ་པ་མ་ཟད། རང་བཞིན་གྱིས་རིག་གཞུང་ལ་དབྱིངས་ཞུགས་པ་ཆོས་ཉིད་ཆགས་བསྡད་ཡོད། རིག་གཞུང་ལ་དབྱིངས་མ་ཞུགས་པར་བཙན་ཐབས་བྱས་ན་ཕན་ཐོགས་འབྱུང་རྒྱུ་ཧ་ཅང་ཁག་པོ་རེད། བོད་ཀྱི་སྐད་ཡིག་གི་རང་བཞིན་ཐོག་ནས་བོད་པ་ཞིག་གིས་བསམ་བློ་བཏང་ན་དཀའ་ལས་དེ་འདྲ་མ་རེད། འོན་ཀྱང་། རྒྱུ་མཚན་གཞན་པ་མང་པོ་ཞིག་ལ་བརྟེན་ནས་ང་ཚོས་སྐད་ཡིག་སྦྱོང་བའི་ལམ་དུ་འགྲོ་མ་ཐུབ་པར་འགག་བསྡད་ཡོད། གལ་སྲིད་སོ་སོའི་ངོས་ནས་སྐད་ཡིག་སྦྱོང་བའི་ལམ་དུ་འགྲོ་ཐུབ་ཚེ་གཤོག་པ་བརྐྱངས་པ་དང་གཅིག་པ་རེད། བོད་ཀྱི་སྐད་ཡིག་གི་ཐོག་ནས་རང་གཞན་གཉིས་ལ་ཕན་ཐོགས་བྱུང་ཡོད། འཛམ་གླིང་གི་སྐད་ཡིག་འདྲ་མིན་ནང་དུ་དགོས་མཁོ་ཅན་མང་པོ་ཡོད་ཀྱང་། ཉམས་ཞིབ་པ་རྣམས་ཀྱིས་དམིགས་བསལ་བོད་ཀྱི་ཆོས་དང་རིག་གཞུང་གིས་སྤྱི་ཚོགས་ནང་དུ་ཕན་ཐོགས་པ་གསལ་བོ་མཐོང་སྟེ། དངོས་ཤུགས་བརྒྱུད་གསུམ་ནས་སྲུང་སྐྱོབ་བྱེད་པའི་རོགས་རམ་གནང་བཞིན་ཡོད། དངོས་སུ་བདག་པོ་རྒྱག་མཁན་ང་ཚོ་ཡིན་པ་མ་གཏོགས་གཞན་གྱིས་གནང་ཐུབ་ཀྱི་མ་རེད། གཞན་གྱི་རོགས་རམ་དང་མཐུན་རྐྱེན་ལ་བརྟེན་ནས་ང་ཚོས་རང་ཉིད་ཀྱི་སྐད་ཡིག་གསོན་པོར་གནས་ཐུབ་བྱ་རྒྱུ་ཧ་ཅང་གལ་ཆེན་པོ་རེད།  ཅེས་སོགས་བརྗོད་སོང་།

དགེ་བཤེས་རྒྱལ་མཚན་ཚེ་རིང་ལགས་ཀྱིས། ང་ཚོའི་སྐད་དང་ཡི་གེ་རྩ་ཆེན་པོ་ཡིན་པ་དེའི་ནང་དུ་ཡོད་པའི་ཆོས་དང་རིག་གཞུང་རེད། ༧གོང་ས་རྒྱལ་བ་རིན་པོ་ཆེ་མཆོག་ནས་འཛམ་གླིང་གི་ཚན་རིག་པ་དང་མཁས་པ་མང་པོ་མཉམ་དུ་བགྲོ་གླེང་གནང་མྱོང་། བོད་ཀྱི་སྐད་ཡིག་ནང་ཡོད་པའི་ཆོས་དང་རིག་གཞུང་དེ་བོད་ཀྱི་གཅེས་ནོར་ཡིན་པ་མ་ཟད། འཛམ་གླིང་གི་གཅེས་ནོར་ཞིག་ཆགས་འདུག བོད་ཀྱི་སྐད་ཡིག་ཉམས་རྒུད་དུ་གྱུར་ཚེ་གྱོང་ཆེན་པོ་རེད། ཉམས་པ་སླར་གསོ་དང་མི་ཉམས་རྒྱུན་འཛིན་བྱ་ཐུབ་ན་འཛམ་གླིང་ལ་ཕན་ཐོགས་ཆེན་པོ་འདུག་ལ། ང་ཚོའི་མི་རིགས་ཀྱི་རྩ་བའང་ཆེན་པོ་ཆགས་ཐུབ་ཀྱི་འདུག་ཅེས་གསུངས་ཡོད། ང་ཚོས་བརྟན་བཞུགས་ཕུལ་ཏེ་སྐྱབས་སུ་མཆི་ཞུས་པ་ཙམ་གྱིས་འགྲིག་གི་མེད། གཙོ་ཆེ་ཤོས་བཀའ་བཞིན་བསྒྲུབ་དགོས། ང་ཚོ་ཚང་མས་ཤུགས་བརྒྱབ་པ་ཡིན་ན་ཕྱོགས་གཅིག་ནས་མི་རིགས་ཀྱི་ངོ་བོ་སྲུང་སྐྱོང་བྱེད་ཐུབ་ཀྱི་ཡོད་པ་དང་། ཕྱོགས་གཅིག་ནས་བླ་མའི་ཞབས་པད་བརྟན་པར་བརྟན་བཞུགས་དེ་ལས་ལྷག་ཅིག་མེད་པ་རེད། ཅེས་བརྗོད་སོང་།

བོད་ཀྱི་དཔེ་མཛོད་ཁང་གི་འགན་འཛིན་དགེ་བཤེས་ལྷག་རྡོར་ལགས་ཀྱིས། ད་ལྟའི་བོད་ཀྱི་སྐད་དང་ཡི་གེའི་གནས་སྟངས་ག་རེ་ཆགས་ཡོད་ཟེར་ན། རྒྱ་གཞུང་གིས་བོད་ནང་གི་སློབ་གྲྭ་ཁག་ཏུ་ཆེད་དུ་བོད་ཡིག་མེད་པ་བཟོས་ཏེ་རྒྱ་ཡིག་ཐོག་སློབ་ཁྲིད་བྱེད་བཞིན་ཡོད། བཙན་བྱོལ་དུ་བོད་པ་འབུམ་གཅིག་ལྷག་ཡོད་པའི་ཁྲོད་ཕྱེད་ཀ་ཕྱི་རྒྱལ་ཁག་ཏུ་སླེབས་ཚར་ཡོད། ཕྱི་རྒྱལ་ཏུ་བོད་ཡིག་སྦྱངས་དགོས་པའི་དོ་སྣང་སླེབས་ཀྱང་ཅུང་ཙམ་འཕྱི་དྲགས་ཡོད། ཕྱི་རྒྱལ་ནས་ཁྱིམ་མ་གཏོགས་བོད་སྐད་བཤད་ས་མེད་པ་རེད། གཟའ་མཇུག་གི་སློབ་གྲྭ་ཡོད་ཀྱང་ནུས་པ་ཐོན་རྒྱུ་ཁག་པོ་རེད། དེ་བས་ཁྱེད་ཚོར་དམིགས་བསལ་གྱི་གོ་སྐབས་ཤིག་ཐོབ་ཡོད། ཅེས་གསུངས་སོང་།

ཡང་ཁོང་གིས། ཕྱི་རྒྱལ་དུ་འགྲོ་མཁན་རྣམས་སྡུག་ཅག་རེད་ཟེར་གྱི་མེད་ཀྱང་། ཕྱི་རྒྱལ་དུ་ཡོད་པའི་མི་རབས་རྒན་པ་རྣམས་ཀྱིས་ད་ལྟ་སྐད་ཡིག་ཐོག་དོ་སྣང་བྱེད་ཀྱི་ཡོད་པ་མ་ཟད། དུས་ཚོད་མེད་ཀྱང་ཕྲུ་གུ་རྣམས་བོད་ཡིག་སློབ་སྦྱོང་བྱེད་དུ་འཁྲིད་ཡོང་གི་ཡོད། རྒྱ་གར་ནང་སྡོད་མཁན་རྣམས་ལ་སོ་སོའི་སྐད་ཡིག་སྲུང་སྐྱོབ་བྱེད་པའི་གོ་སྐབས་ཡོད། ཅེས་དང་། ང་ཚོས་རྒྱ་ནག་གཞུང་གིས་བོད་ཀྱི་ཆོས་དང་རིག་གཞུང་རྩ་གཏོར་གཏོང་གི་འདུག་ཅེས་བཤད་ཀྱི་ཡོད་ཀྱང་། རང་ཉིད་ཀྱིས་སྐད་ཡིག་སྲུང་སྐྱོབ་ཐོག་དོ་སྣང་མ་བྱས་ན་རྩ་གཏོར་གཏོང་བ་དང་གཅིག་པ་འགྱུར་རྒྱུ་རེད། ང་ཚོས་སྐད་ཡིག་སྦྱང་དགོས་དོན་ནི་རང་ཉིད་ཀྱི་ངོ་བོ་སྲུང་སྐྱོབ་བྱེད་པའི་ཆེད་ཡིན། ཅེས་གསུངས་སོང་།

བོད་མི་རྣམས་བཙན་བྱོལ་དུ་འབྱོར་ནས་མི་ལོ་ལྔ་བཅུ་འཁོར་བའི་དུས་དྲན་དང་བསྟུན། བོད་ཀྱི་དཔེ་མཛོད་ཁང་གི་ལས་འགུལ་གང་མང་སྤེལ་བའི་ཁྲོད། རིག་གཞུང་ཉམས་ཞིབ་དང་པར་སྐྲུན་སྡེ་ཚན་གྱིས་སྤྱི་ལོ་ ༢༠༠༩ ལོ་ནས་བཟུང་བོད་ཀྱི་དཔེ་མཛོད་ཁང་གི་གོ་སྒྲིག་འོག་ཟླ་གཉིས་རིང་གི་བོད་ཀྱི་རིག་གཞུང་ཟབ་སྦྱོང་མགོ་འཛུགས་གནང་ཡོད་པ་དང་། ཟབ་སྦྱོང་གི་དམིགས་ཡུལ་ནི་དུས་ཚོད་ཐུང་ཐུང་ཞིག་གི་ནང་དུ་བོད་ཀྱི་གཞོན་སྐྱེས་རྣམས་ཀྱི་སྐད་ཡིག་དང་ལོ་རྒྱུས་སོགས་ཡར་རྒྱས་གཏོང་ཆེད་དུ་དམིགས་པ་ཞིག་ཡིན་འདུག་ལ། ད་ལྟ་བར་དུ་ཟབ་སྦྱོང་དེའི་ནང་མཉམ་ཞུགས་བྱེད་མཁན་བོད་མི་ཁྱོན་ ༣༠༠ ལྷག་བྱུང་ཡོད་འདུག

གསར་འགོད་པ། བྱམས་པ་ཚེ་རིང་།

རྩོམ་སྒྲིག་པ། པདྨ་མཚོ།