སེངྒ་ལ་ནས་སངས་རྒྱས་ཀྱི་རིང་བསྲེལ་ཞིག་བསྣམས་ཕེབས་ཏེ་༧གོང་ས་མཆོག་གིས་འཛམ་གླིང་སྤྱི་དང་ལྷག་པར་སངས་རྒྱས་ཀྱི་བསྟན་པར་མཛད་འཕྲིན་བསྐྱངས་པར་བཀའ་དྲིན་རྗེས་དྲན་མཚོན་སླད་ཕུལ་སོང་།
དེ་རིང་སྔ་དྲོ་ཆུ་ཚོད་ ༨ ཙམ་གྱི་སྟེང་གྷ་གྷལ་གནམ་ཐང་བརྒྱུད་ཐེག་ཆེན་ཆོས་གླིང་གཙུག་ལག་ཁང་གི་བར་དུ་བཞུགས་སྒར་ཁུལ་གྱི་སེར་སྐྱ་མི་མང་གིས་དགའ་དད་སྤྲོ་གསུམ་གྱི་ངང་ནས་སེངྒ་ལ་ནས་བསྣམས་ཕེབས་པའི་སངས་རྒྱས་ཀྱི་ཕྱག་གི་རིང་བསྲེལ་ཞིག་བཞུགས་སྒར་རྒྱལ་བའི་ཕོ་བྲང་དུ་ཕེབས་བསུ་ཞུས་པ་མ་ཟད། སྐབས་དེར་༧གོང་ས་རྒྱལ་བ་རིན་པོ་ཆེ་མཆོག་སྐུ་དངོས་སུ་ཕོ་བྲང་གི་སྒོ་འགྲམ་དུ་ཕེབས་ཏེ། སངས་རྒྱས་ཀྱི་རིང་བསྲེལ་ཕོ་བྲང་དུ་གདན་འདྲེན་ཞུས་གནང་སོང་།
དེ་རིང་བཞུགས་སྒར་དུ་སངས་རྒྱས་ཀྱི་རིང་བསྲེལ་བསྣམས་ཕེབས་མཁན་ནི་སེངྒ་ལའི་ནང་པའི་བླ་ཆེན་ (Waskaduwa Mahindawamsa Nayaka Thero) མཆོག་ཡིན་པ་དང་། དེ་འབྲེལ་ཐད་སྐྱབས་རྗེ་ཡོངས་འཛིན་གླིང་རིན་པོ་ཆེ་མཆོག་གིས། ང་རང་ཕྱི་ལོ་ ༢༠༢༢ ལོར་སེངྒ་ལར་གནས་མཇལ་དུ་ཕྱིན་སྐབས། སེངྒ་ལའི་བླ་ཆེན་ཁོང་གིས་༧གོང་ས་རྒྱལ་བ་རིན་པོ་ཆེ་མཆོག་ནས་འཛམ་གླིང་སྤྱིའི་བདེ་རྩ་དང་ལྷག་དོན་སངས་རྒྱས་ཀྱི་བསྟན་པར་མཛད་འཕྲིན་བསམ་གྱི་མི་ཁྱབ་པ་བསྐྱངས་པར་བཀའ་དྲིན་རྗེས་དྲན་མཚོན་སླད་རིང་བསྲེལ་ཞིག་འབུལ་རྒྱུ་ཡིན་པའི་དགོངས་འཆར་གསུངས་པ་དང་སྦྲགས། སྐྱབས་རྗེ་གླིང་རིན་པོ་ཆེ་མཆོག་ནས་༧གོང་ས་མཆོག་ལ་སྙན་གསེང་ཞུས་ཏེ་རིང་བསྲེལ་འབུལ་ལམ་གྱི་མཐུན་འགྱུར་ཞུ་དགོས་པའི་བཀའ་འདྲི་གནང་དོན་ལྟར། ད་ལན་དངོས་སུ་༧གོང་ས་མཆོག་ལ་ཕུལ་ཐུབ་པའི་བརྒྱུད་རིམ་འདི་བྱུང་ཡོད་སྐོར་གསུངས་སོང་།
དེ་རྗེས་རིང་བསྲེལ་ཕོ་བྲང་དུ་གདན་འདྲེན་ཞུས་ཏེ་༧གོང་ས་མཆོག་ལ་གཟིགས་འབུལ་ཞུས་གྲུབ་མཚམས། ༧མགོན་པོ་གང་ཉིད་མཆོག་གིས། སངས་རྒྱས་སྐུ་འཁྲུངས་པ་ནས་སངས་རྒྱས་ཀྱི་ཆོས་འཛམ་གླིང་ནང་དར་རྒྱས་བྱུང་ཡོད། དམིགས་བསལ་དཔལ་དཔལ་ན་ལནྡྲའི་ཆོས་བརྒྱུད་དར་རྒྱས་བྱུང་ཡོད། ང་ཚོས་མིའི་རྣམ་དཔྱོད་སྤྱད་དེ་སངས་རྒྱས་ཀྱི་ཆོས་ལ་དཔྱད་པ་གཏོང་དགོས་པ་དང་ཚན་རིག་པ་མང་པོས་ནང་ཆོས་ལ་དོ་སྣང་སྤྲོད་ཀྱིན་འདུག སངས་རྒྱས་ཀྱི་ཆོས་ནི་དད་པ་ཙམ་མིན་པར་མིའི་སེམས་ཁམས་དང་འབྲེལ་བ་ཞིག་ཡིན་དུས། ཧ་ཅང་ལེགས་པོ་ཡོད། ཁ་སང་དེ་རིང་ཆོས་ལ་ཡིད་ཆེས་མེད་མཁན་གྱི་ཚན་རིག་པ་ཚོས་ཀྱང་སངས་རྒྱས་ཀྱི་ཆོས་ལ་དོ་སྣང་རྣམ་དག་བྱེད་ཀྱིན་འདུག ཅེས་གསུངས།
གསར་འགོད་པ། དོན་གྲུབ་བཀྲ་ཤིས། སྐལ་བཟང་སྦྱིན་པ།