རྒྱ་ནག་གཞུང་གིས་རྒྱ་དཀར་ནག་གི་ཐིག་མཚམས་ཁུལ་དུ་གྲོང་གསེབ་གསར་པ་ ༡༧༥ གསར་སྐྲུན་བྱས་ཏེ། མ་འོངས་པར་མཐའ་མཚམས་ཁུལ་ནས་རྒྱ་གར་ལ་དཀའ་ངལ་སྤྲོད་སྲིད་སྐོར་བསྒྲགས་འདུག
དེ་འབྲེལ་རྒྱ་གར་གྱི་བརྒྱུད་ལམ་ཁག་ཏུ། རྒྱ་ནག་གཞུང་གིས་གྲོང་གསེབ་དར་རྒྱས་ཀྱི་མིང་འོག་ནས། རྒྱ་དཀར་ནག་བར་གྱི་ས་མཚམས་ཏེ། ཨ་རུ་ན་ཅལ་ཕྱོགས་ཀྱི་ཐིག་མཚམས་ (LAC) དང་ཐག་ཉེ་སར་གྲོང་གསེབ་གསར་པ་ཁྱོན་ ༡༧༥ གསར་སྐྲུན་བྱ་འཆར་ཡོད་པ་དང་། དོན་དངོས་ཐོག་གྲོང་གསེབ་དེ་དག་ནི་རྒྱ་ནག་གིས་མཐའ་མཚམས་སྲུང་སྐྱོབ་དང་རྒྱ་སྐྱེད་ཆེད་བཙུགས་པའི་གྲོང་གསེབ་ཤ་སྟག་ཡིན་སྐོར་སོགས་བརྗོད་འདུག
གྲོང་གསེབ་ ༡༧༥ གསར་སྐྲུན་གྱི་ལས་གཞི་དེ་ནི་རྒྱ་ནག་གཞུང་གིས་རྒྱ་དཀར་ནག་གི་ཐིག་མཚམས་ (LAC) ཁུལ་དུ་གྲོང་གསེབ་ ༩༠༠ འཛུགས་སྐྲུན་བྱེད་འཆར་ཡོད་པའི་འཆར་གཞིའི་གྲས་ཤིག་ཡིན་པ་རེད། འཆར་གཞི་དེའི་ཁྲོད་གྲོང་གསེབ་ ༢༠༠ རྒྱ་གར་གྱི་ས་མཚམས་ཁུལ་དུ་འཛུགས་སྐྲུན་བྱེད་འཆར་ཡོད་འདུག
རྒྱ་དཀར་ནག་གི་ཕྱི་ལོ་ ༢༠༠༥ ལོའི་མཉམ་འབྲེལ་ས་མཚམས་སྲུང་སྐྱོབ་ཀྱི་གྲོས་ཆོད་ནང་། ཕྱོགས་གཉིས་ནས་རང་རང་གི་མཐའ་མཚམས་ཁུལ་གྱི་མི་མང་གི་མངོན་འདོད་སྲུང་སྐྱོབ་སླད་མཐའ་མཚམས་བརྟན་སྲུང་ནན་པོ་བྱ་རྒྱུ་དང་། མཐའ་མཚམས་ཁུལ་དུ་འཚོ་སྡོད་བྱེད་བཞིན་པའི་ཕྱོགས་སོ་སོའི་མི་མང་གི་འཚོ་བར་གནོད་སྐྱོན་བཟོས་མི་ཆོག་ཅེས་བརྗོད་ཡོད་སྟབས། ཕྱོགས་གཉིས་ནས་ཕན་ཚུན་གྱི་མཐའ་མཚམས་ཁུལ་དུ་གནས་པའི་མི་མང་ལ་སུན་གཙེར་བཟོ་མི་ཐུབ་ཅིང་། ད་ལྟ་རྒྱ་དཀར་ནག་གི་ས་མཚམས་ཁུལ་དུ་རྒྱ་ནག་གིས་འཛུགས་སྐྲུན་བྱས་དང་བྱེད་བཞིན་པའི་གྲོང་གསེབ་ཁག་གི་གྲངས་འབོར་དང་བསྡུར་ན། རྒྱ་གར་ཕྱོགས་ནས་ས་མཚམས་ཁུལ་དུ་གནས་སྡོད་བྱེད་བཞིན་པའི་གྲོང་གསེབ་པ་ཧ་ཅང་ཉུང་ཉུང་ཡིན་པ་རེད།
རྒྱ་ནག་གཞུང་གིས་དངོས་ཤུགས་བརྒྱུད་གསུམ་གྱི་ཐོག་ནས་རྒྱ་གར་གཙོས་ཁྱིམ་མཚེས་རྒྱལ་ཁབ་ཁག་གི་ས་མཚམས་སུ་དབང་ཤུགས་རྒྱ་སྐྱེད་གཏོང་ཐབས་བྱས་དང་བྱེད་བཞིན་ཡོད་པ་ལྟར། འདས་ལོའི་ཕྱི་ཟླ་ ༡༢ ནང་རྒྱ་ནག་གཞུང་གིས་མཐའ་མཚམས་བརྟན་སྲུང་ཞེས་པའི་སྲིད་ཇུས་འོག་འབྲུག་ཡུལ་དང་རྒྱ་ནག་གཉིས་ཀྱི་བར་ལ་རྩོད་རྙོག་ཡོད་པའི་མཐའ་མཚམས་ས་ཁུལ་ (Tamalung) ཞེས་པ་རུ། དེ་སྔ་ཁྱིམ་ཚང་ ༧༠ ཙམ་ལས་མེད་ཀྱང་། སྐབས་དེར་གྲོང་གསེབ་དེ་ལྡབ་གཅིག་ལྷག་འཛུགས་སྐྲུན་རྒྱ་སྐྱེད་བཏང་སྟེ་ཁྱིམ་ཚང་ ༢༣༥ ཙམ་གནས་སྤོར་བཏང་ཡོད་པ་དང་། ཕྱི་ལོ་ ༢༠༢༢ ཟླ་ ༡༢ ཚེས་ ༢༨ ཉིན་གྲོང་གསེབ་གསར་པ་དེའི་ནང་བོད་གཞིས་ཀ་རྩེ་ནས་ཡིན་པའི་ཁྱིམ་ཚང་ ༣༧ གནས་སྤོ་རུ་བཅུག་ཡོད་འདུག་ལ། རིམ་གྱིས་གྲོང་གསེབ་དེ་དག་གྲོང་ཁྱེར་ཅན་དུ་བསྒྱུར་འཆར་ཡོད་སྐོར་ཡང་བསྒྲགས་འདུག
དེ་བཞིན། རྒྱ་དཀར་ནག་གི་མཐའ་མཚམས་ཁུལ་དུ་དམག་སྲིད་སྟོབས་ཤུགས་རྒྱ་སྐྱེད་གཏོང་སླད། རྒྱ་ནག་གིས་སྐབས་བཅུ་བཞི་བའི་ལོ་ལྔའི་འཆར་གཞི་ (༢༠༢༡-༢༠༢༥) ཞེས་པའི་སྲིད་ཇུས་འོག སི་ཁྲོན་ནས་ཉིང་ཁྲི་བར་དང་། མངའ་རིས་ནས་ནག་ཆུ་དང་ཆབ་མདོ་བར་དང་། ཧོ་ཐན་ནས་མངའ་རིས་དང་གཞིས་རྩེ། ལྷ་ས། ལྷོ་ཁ། ཉིང་ཁྲི། སེམས་ཀྱི་ཉི་ཟླ། ལི་ཅང་བར། དེ་བཞིན། ཁྲི་ཏུའུ་ནས་ཝུའུ་ཧན་དང་ཧྲང་ཧེ་བར་མེ་འཁོར་ལྕགས་ལམ་མཐུད་ཀྱི་ཡོད་འདུག
གསར་འགོད་པ། སྐལ་བཟང་སྦྱིན་པ།
