བོད་དོན་ལ་དོ་སྣང་ཆེ་རུ་འགྲོ་བཞིན་པའི་སྐབས་སུ་བོད་མི་ཚོས་རང་འཁྲི་དམ་འཛིན་བྱ་རྒྱུ་གལ་ཆེན་ཡིན།

སྲིད་སྐྱོང་སྤེན་པ་ཚེ་རིང་མཆོག་གིས་ཟླ་འདིའི་ཕྱི་ཚེས་ ༤ ནས་ ༢༡ བར་ཉིན་གྲངས་ ༢༡ རིང་ཁེ་ན་ཌ་དང་ཨ་རི་གཉིས་སུ་གཞུང་འབྲེལ་ཕྱོགས་ཕེབས་གནང་མུས་ཡིན་པ་ལྟར་ད་ལྟ་ཁེ་ན་ཌའི་ནང་དུ་གཞུང་འབྲེལ་སྐོར་སྐྱོད་གནང་བཞིན་འདུག

Sikyong Penpa Tsering during his meeting with Tibetan residents of Toronto at Tibetan Canadian Cultural Centre. Photo.Tibet.net

དབུས་བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་མཆོག་གིས་ཟླ་འདིའི་ཕྱི་ཚེས་ ༤ ནས་ ༢༡ བར་ཉིན་གྲངས་ ༢༡ རིང་ཁེ་ན་ཌ་དང་ཨ་རི་གཉིས་སུ་གཞུང་འབྲེལ་ཕྱོགས་ཕེབས་གནང་མུས་ཡིན་པ་ལྟར། ཟླ་འདིའི་ཕྱི་ཚེས་ ༩ ཉིན་སྲིད་སྐྱོང་མཆོག་གིས་ཁེ་ན་ཌའི་གྲོས་ཚོགས་འཐུས་མི་བུ་འཁྲིད་དཀར་པོ་ཆེ་ལགས་གཙོས་ཨོན་ཌོ་རི་ཡོ་(Ontario) ས་གནས་གྲོས་ཚོགས་འཐུས་མི་རྣམས་དང་མཇལ་འཕྲད་གནང་སྟེ། བོད་ནང་གི་བོད་མིའི་མངོན་འདོད་དང་རྒྱ་ནག་གཞུང་གིས་བོད་མི་རྣམས་ལ་བཙན་གནོན་བྱེད་མུས་ཡིན་པའི་སྐོར་ངོ་སྤྲོད་དང་། ཨོན་ཌོ་རི་ཡོ་ས་གནས་ཚུད་པའི་ཁེ་ན་ཌ་གཞུང་ནས་བོད་མི་རྣམས་ལ་རོགས་འདེགས་དང་རྒྱབ་སྐྱོར་གནང་བར་ཐུགས་རྗེ་ཆེ་གསུངས་པ་དང་འབྲེལ། རྒྱ་ནག་གཞུང་གིས་བོད་ནང་དུ་མུ་མཐུད་དུ་གདུག་རྩུབ་ཆེ་བའི་སྲིད་ཇུས་ལག་བསྟར་བྱེད་མུས་ཡིན་པར་གནོན་ཤུགས་སྤྲད་དགོས་པའི་སྐུལ་འདེད་གནང་ཡོད་འདུག

ཟླ་འདིའི་ཕྱི་ཚེས་ ༧ ཉིན་སྲིད་སྐྱོང་མཆོག་གིས། ཁེ་ན་ཌའི་གངས་ལྗོངས་ཆོས་ལྡན་གླིང་ཚོགས་ཁང་དུ་ཀྲོ་རོན་ཊོ་ཁུལ་དུ་ཡོད་པའི་རིས་མེད་ཆོས་བརྒྱུད་ཁག་གི་སྐུ་ཚབ་དང་མཇལ་མོལ་གནང་སྟེ། རྒྱ་ནག་གཞུང་གིས་ཕྱི་ལོ ༢༠༠༧ ཙམ་ནས་༧གོང་ས་རྒྱལ་བ་རིན་པོ་ཆེ་མཆོག་གི་སྐུའི་ཡང་སྲིད་ཐོག་ཐེ་ཇུས་བྱེད་མགོ་བཙུགས་ཏེ་དོ་སྣང་ཆེན་པོ་བྱས་ཡོད་ཀྱང་། རྒྱ་ནག་གཞུང་གི་བསམ་འདོད་བཞིན་ལག་བསྟར་དང་ནུས་པ་ཐོན་མེད། ཕྱི་ལོ་ ༢༠༡༡ ལོར་༧གོང་ས་རྒྱལ་བ་རིན་པོ་ཆེ་མཆོག་གི་སྐུའི་ཡང་སྲིད་དང་འབྲེལ་བའི་ཡོངས་ཁྱབ་གསུང་འཕྲིན་ནང་དང་། ཡང་སྲིད་དང་འབྲེལ་བའི་བཀའ་སློབ་སྩལ་བའི་སྐབས་༧གོང་ས་མཆོག་རྒྱལ་བ་སྐུ་ཕྲེང་དང་པོའི་དགུང་ཚད་དམ་ཡང་ན་དགུང་གྲངས་ ༩༠ ཙམ་ལ་ཕེབས་སྐབས། ༧རྒྱལ་དབང་སྐུ་ཕྲེང་རྒྱུན་མཐུད་དགོས་མིན་བསྐྱར་ཞིབ་དང་ཐག་གཅོད་བྱེད་འཆར་ཡིན། ཞེས་བཀའ་སྩལ་ཡོད་སྐོར་དང་། ༧གོང་ས་རྒྱལ་བ་རིན་པོ་ཆེ་མཆོག་གི་སྐུའི་ཡང་སྲིད་ཀྱི་སྐུ་དབང་དེ་ཆོས་ཚོགས་ཁག་སུ་ལའང་མེད་སྐོར་སོགས་གསུངས་འདུག

Sikyong Penpa Tsering during the meeting with representatives from Toronto-based religious centres. Photo:Tibet.net

ཟླ་འདིའི་ཕྱི་ཚེས ༦ ཉིན་སྲིད་སྐྱོང་མཆོག་གིས་ཊོ་རོན་ཊོའི་གངས་ལྗོངས་ཆོས་ལྡན་གླིང་གི་ཚོགས་ཁང་དུ་ས་གནས་བོད་རིགས་མི་མང་ལ་བོད་མིའི་སྒྲིག་འཛུགས་དང་། རྒྱལ་སྤྱིའི་སྟེང་གི་བོད་དོན་འཐབ་རྩོད་སོགས་ཀྱི་སྐོར་གསུང་བཤད་གནང་བའི་ནང་། ༧གོང་ས་རྒྱལ་བ་རིན་པོ་ཆེ་མཆོག་གི་བཀའ་དྲིན་ཉག་ཅིག་ལས། བོད་མི་རྣམས་བཙན་བྱོལ་དུ་གྱར་ནས་མི་ལོ་ ༦༠ ལྷག་འགྲོ་མུས་ཡིན་ཡང་། བཙན་བྱོལ་བ་གཞན་དང་མི་འདྲ་བར་དམངས་གཙོའི་སྒྲིག་འཛུགས་ཡང་དག་གི་ཐོག་ནས་མུ་མཐུད་འཐབ་རྩོད་བྱེད་མུས་ཡིན་པས། མི་སྒེར་ལ་སོ་སོའི་སེམས་ཁམས་དང་མོས་པ་སོགས་ལ་གཞིགས་ནས་མི་འདྲ་བའི་ཆ་ཡོད་ནའང་། བོད་མི་རྣམས་ནི་རང་དབང་འཐབ་རྩོད་བྱེད་མཁན་ཞིག་ཡིན་པའི་ཆ་ནས་མཐུན་སྒྲིལ་རྡོག་རྩ་གཅིག་སྒྲིལ་བྱ་རྒྱུ་དེ་ཧ་ཅང་གལ་ཆེན་ཡིན་པའི་སྐོར། དེ་བཞིན་དབུ་མའི་ལམ་གྱི་སྲིད་ཇུས་ཀྱི་འཕེལ་རིམ་གྱི་སྐོར། བོད་རྒྱའི་དཀའ་རྙོག་སེལ་དགོས་ན་བོད་རྒྱ་གྲོས་མོལ་བྱ་དགོས་པའི་སྐོར། དེ་བཞིན་རྒྱ་ནག་གཅིག་སྡུད་རིང་ལུགས་ཀྱི་འོག་ནས་བོད་མི་རྣམས་ཀྱི་ཚད་ལས་འདས་པའི་དཀའ་སྡུག་མྱོང་མུས་ཡིན་པའི་སྐོར་སོགས་ལ་གསུང་བཤད་གནང་འདུག

ཡང་ཁོང་གིས་རྒྱལ་སྤྱིའི་སྟེང་བོད་དོན་ཞུ་གཏུག་གནང་ཕྱོགས་དང་འབྲེལ་ནས། ཉེ་ལམ་བཀའ་ཤག་གིས་འཛམ་གླིང་གི་རྒྱལ་ཁབ་སྤྱི་དང་། ལྷག་པར་བོད་དང་འབྲེལ་མཐུད་མ་བྱུང་བའི་རྒྱལ་ཁབ་ཁག་ཏུ་བོད་དོན་གོ་རྟོགས་སྤེལ་སྐབས། རྒྱ་ནག་དང་ཚོང་འབྲེལ་གྱི་དབང་གིས་དོ་གཟབ་བྱ་དགོས་སྐོར་དང་། དེང་གི་ཆར་རྒྱ་ནག་གཞུང་གི་ཧམ་བཤད་ལ་བརྟེན་ནས་རྒྱལ་སྤྱིའི་སྤྱི་ཚོགས་ནང་རྒྱ་ནག་ལ་བཟུང་བའི་ལྟ་ཚུལ་ལ་འགྱུར་བ་ཐེབས་མུས་ཡིན་པ་དང་། བོད་དོན་སྐོར་ལ་དོ་སྣང་བྱེད་མཁན་ཇེ་མང་དུ་འགྲོ་མུས་ཡིན་པས། བོད་མི་ཚོས་རང་འཁྲི་དམ་འཛིན་བྱ་རྒྱུ་གལ་ཆེན་ཡིན་སྐོར་གསུངས་ཡོད་པ་མ་ཟད། ཟླ་འདིའི་ཕྱི་ཚེས་ ༧ ཉིན་གྱི་ཉིན་རྒྱབ་ཏུ་ཊོ་རོན་ཊོ་གངས་ལྗོངས་བོད་ཀྱི་སྐད་ཡིག་དང་རིག་གཞུང་སློབ་གྲྭའི་དགེ་སློབ་རྣམས་དང་མཇལ་འཕྲད་གནང་བ་དང་། ཁུལ་དེར་གནས་སྡོད་བོད་རིགས་གཞོན་སྐྱེས་རྣམས་དང་ཟུར་དུ་ཐུག་འཕྲད་གནང་ཡོད་འདུག

ཟླ་འདིའི་ཚེས་ ༡༤ ཉིན་སྲིད་སྐྱོང་མཆོག་ཝ་ཤིང་ཊོན་སྒྲི་སི་རུ་ཕེབས་ནས་གནད་ཡོད་མི་སྣ་ངོ་མཇལ་གྱིས་ཨ་རིའི་གྲོས་ཚོགས་གོང་མའི་ནང་བོད་རྒྱའི་དཀའ་རྙོག་སེལ་བར་སྐུལ་འདེད་གཏོང་བའི་ཁྲིམས་འཆར་(Promoting a Resolution to the Tibet-China Dispute Act H.R. 533) གཏན་འབེབས་ཡོང་ཐབས་སུ་སྐུལ་འདེད་གནང་རྒྱུ་ཡིན་འདུག

གསར་འགོད་པ་དཔལ་ལྡན་གྱིས་བོད་མིའི་སྒྲིག་འཛུགས་ཀྱི་དྲ་རྒྱ་ནས་བཏུས།

རྩོམ་སྒྲིག་པ། པདྨ་མཚོ།