བོད་ཀྱི་ཞོ་སྟོན་སྐབས་ཉེར་བདུན་པ་མགོ་འཛུགས་གནང་སོང་།

སྐབས་ཉེར་བདུན་པའི་བོད་ཀྱི་ཞོ་སྟོན་ཐོག་ལྷ་མོ་ཚོགས་པ་བཅུ་གསུམ་གྱིས་མཉམ་ཞུགས་བྱས་ཏེ་བཞུགས་སྒར་བོད་ཀྱི་ཟློས་གར་ཁང་དུ་ཉིན་གྲངས་བཅུ་གསུམ་རིང་ལྷ་མོའི་གཞུང་མི་འདྲ་བ་བཅུ་ལྷག་འཁྲབ་ཀྱིན་འདུག

དེ་རིང་ཕྱི་ཚེས་ ༡༠ ནས་ཚེས་ ༢༢ ཉིན་གྲངས་བཅུ་གསུམ་རིང་དྷ་ས་བོད་ཀྱི་ཟློས་གར་ཁང་དུ། བོད་ཀྱི་ཞོ་སྟོན་རྒྱས་པ་ཐེངས་ ༢༧ པ་འཚོག་བཞིན་ཡོད་ཅིང་། མཛད་སྒོའི་ཐོག་སྐུ་མགྲོན་གཙོ་བོ་སྐྱབས་རྗེ་ཀུན་བདེ་གླིང་རྟ་ཚག་རྗེས་དྲུང་མཆོག་སྤྲུལ་རིན་པོ་ཆེ་མཆོག་དང་། དམིགས་བསལ་སྐུ་མགྲོན་དུ་བོད་མིའི་སྒྲིག་འཛུགས་ཀྱི་སྲིད་ཚབ་ཤེས་རིག་བཀའ་བློན་ཐར་ལམ་སྒྲོལ་མ་མཆོག བཀའ་ཟུར་ཐུབ་བསྟན་ལུང་རིགས་ལགས། བོད་མི་མང་སྤྱི་འཐུས་ཁག་ཅིག གཞུང་དང་གཞུང་ཁོངས་མིན་པའི་ཚོགས་སྡེ་ཁག་གི་སྐུ་ཚབ། དྷ་ས་ཁུལ་གྱི་སེར་སྐྱ་མི་མང་བཅས་འདུ་འཛོམས་བྱུང་འདུག་ལ། སྐབས་དེར་ཆོས་རིག་ལས་ཁུངས་ཀྱིས་བོད་ཀྱི་ཟློས་གར་ཚོགས་པ་དང་ལྕགས་ཟམ་ལྷ་མོ་ཚོགས་པ་གཉིས་ཕུད་པའི་ཕྱོགས་མཐའ་ཁུལ་ནས་ཕེབས་པའི་ལྷ་མོ་ཚོགས་པ་རེ་རེར་ཧིན་སྒོར་འབུམ་ ༡ རེའི་ཆེ་བསྟོད་བྱ་དགའ་གནང་སོང་།

བོད་ཀྱི་ཟློས་གར་ཁང་གི་སྤྱི་ཁྱབ་འགན་འཛིན་དོན་གྲུབ་ཚེ་རིང་ལགས་ཀྱིས། དེ་རིང་ནི་བོད་ཀྱི་ལོ་རྒྱུས་ཐོག་ལོ་ངོ་བརྒྱ་ཁ་ཤས་ཀྱི་གོང་ནས་སྲུང་གཙི་ཞུ་སྲོལ་ཡོད་པའི་བོད་ཀྱི་ཞོ་སྟོན་གྱི་དུས་ཆེན་ཁྱད་པར་ཅན་དེ་ཡིན། ཞོ་སྟོན་དུས་ཆེན་ནི་སྔ་མོའི་བོད་ཀྱི་སྲོལ་རྒྱུན་ཆོས་ལུགས་ཀྱི་བྱེད་སྒོ་དང་སྒྱུ་རྩལ་འཁྲབ་སྟོན་གཉིས་ཟུང་འབྲེལ་བའི་རྣམ་པ་ལྡན་ཡོད། བོད་ཀྱི་ལྷ་མོའི་ཟློས་གར་ནི་དུས་རབས་བཅུ་བཞི་བའི་སྨད་ཙམ་ལ་གྲུབ་ཆེན་ཐང་སྟོང་རྒྱལ་བོས་གསར་གཏོད་གནང་ཞིང་། དེ་ནས་རིམ་བཞིན་སྒྱུ་རྩལ་གྱི་རྣམ་པར་འཕེལ་རྒྱས་བྱུང་བ་ཞིག་རེད། རྒྱལ་དབང་ལྔ་བ་ཆེན་མོོས་བོད་ཀྱི་ཆོས་སྲིད་གཉིས་ཀྱི་ཐུགས་འགན་བཞེས་བའི་གཞུང་འབྲེལ་གྱི་མཛད་སྒོ་སྐབས། འབྲས་སྤུངས་ཞོ་སྟོན་དང་བསྟུན་ལྷ་མོའི་ཚོགས་པ་ཁ་ཤས་ཀྱིས་བཀྲ་ཤིས་ཤོལ་པ་དང་ལྷ་མོའི་འཁྲབ་གཞུང་གཟིགས་འབུལ་ཞུས་ཡོད་པ་དང་། དེའི་རྗེས་རིམ་བཞིན་ལྷ་མོའི་ཚོགས་པ་མང་པོས་མཉམ་ཞུགས་གནང་སྟེ་ལྷ་མོའི་ཟློས་གར་འཕེལ་རྒྱས་ཆེན་པོ་བྱུང་ཡོད། ཅེས་བརྗོད་སོང་།

ཡང་ཁོང་གིས། ཕྱི་ལོ་ ༡༩༥༩ ལོར་རྒྱ་དམར་གུང་ཁྲན་ཏང་གིས་བོད་ས་ཡོངས་རྫོགས་བཙན་བཟུང་བྱས་རྗེས། ཛ་དྲག་གི་གནས་སྟངས་འོག་ ༧གོང་ས་རྒྱལ་བ་རིན་པོ་ཆེ་མཆོག་དང་བོད་མི་འབོར་ཆེན་ཞིག་རྒྱ་གར་དུ་བཙན་བྱོལ་ཡོང་དགོས་བྱུང་བ་དང་། གནས་སྟངས་ཧ་ཅང་སྐྱོ་བའི་མེ་འཚིག་མེ་གཏུགས་ཀྱིས་དུས་སུ་༧གོང་ས་རྒྱལ་བ་རིན་པོ་མཆོག་གིས་བོད་མི་རིགས་ཀྱི་འཕྲལ་ཕུག་རྒྱང་གསུམ་ལ་གཟིགས་ནས་བོད་མིའི་འཚོ་བའི་གནས་སྟངས་དང་སེམས་ཁམས་སོགས་ལ་ཐུགས་རྗེ་བྱིན་རླབས་འཇུག་པ་དང༌། ལྷག་པར་དུ་བོད་མི་ རིགས་ཀྱི་གཅེས་ནོར་ཆོས་དང་རིག་གཞུང་མི་ཉམས་རྒྱུན་འཛིན་གནང་རྒྱུའི་ཆེད་བོད་ཀྱི་ཟློས་གར་དེ་བཞིན། ཕྱི་ལོ་ ༡༩༥༩ ཟླ་ ༨ ཚེས་ ༡༡ ཉིན་གསར་འཛུགས་གནང་པ་དང་། དེ་ནས་རིམ་བཞིན་རྒྱལ་རབས་དང་གཏམ་བརྗོད། བཟོ་ཞིང་འབྲོག་གསུམ་གྱི་ལས་རྩོལ་བྱེད་སྟངས་ཀྱི་དམངས་གླུ་དང་། ཡུལ་ཚོ་ཡས་མས་ཀྱི་བྲོ་གླུ་གཞས་སོགས་པའི་རྣམ་གྲངས་ཇི་སྙེད་ཅིག་གསར་རྩོམ་དང་འཚོལ་སྒྲུབ་གནང་བ་དང་། དེ་བཞིན་ལོ་རབས་དྲུག་བཅུ་འགོ་སྟོད་ཙམ་ནས་བཙན་བྱོལ་ནང་དུ་བོད་ཀྱི་ལྷ་མོའི་སྒྱུ་རྩལ་སླར་གསོ་ཞུས་ཏེ་བོད་མི་གནས་ཡུལ་ས་གནས་འདྲ་མིན་ནང་འཁྲབ་སྟོན་གནང་ཞིང་། ཕྱི་ལོ་ ༡༩༩༢ ལོར་༧གོང་ས་རྒྱལ་བ་རིན་པོ་ཆེ་མཆོག་གི་བཀའ་སློབ་སྔ་ཕྱི་ཕེབས་པར་བཞིན། ཕྱི་ལོ་ ༡༩༩༣ ལོར་ཕྱོགས་མཐའི་ལྷ་མོ་ཚོགས་པ་བཞི་ནས་དྷ་སར་ཞོ་སྟོན་དུ་མཉམ་ཞུགས་ཀྱིས་བོད་ཀྱི་ཞོ་སྟོན་རྒྱས་པ་ཐོག་མ་དེ་ཉིད་གོ་སྒྲིག་ཞུས་པ་ནས་བཟུང་། ད་བར་ཡག་ཐོག་ཡག་རྩེགས་ཀྱིས་སྔར་སྲོལ་བཟང་པོ་རྣམས་རྒྱུན་འཛིན་ཉམས་མེད་བྱེད་མུས་ཐོག་བོད་ཀྱི་ཞོ་སྟོན་རྒྱས་པ་ཐེངས་ ༢༧ བར་སླེབས་ཡོད། འདི་ལོའི་ཞོ་སྟོན་དུས་ཆེན་རྒྱས་པ་ཐེངས་ ༢༧ པ་ཕྱི་ཟླ་ ༤ ཚེས་ ༡༠ ནས་ཚེས་ ༢༢ བར་ཉིན་གྲངས་བཅུ་གཅིག་རིང་སྲུང་བརྩི་ཞུ་གཏན་འཁེལ་ཡོད་པ་དང་། དེའི་ནང་རྒྱ་བལ་ཨ་རི་བཅས་ནས་ལྷ་ཚོགས་ཁག་བཅུ་གཉིས་འདུ་འཛོམས་ཀྱིས་ལྷ་གཞུང་མི་འདྲ་བ་བཅུ་ཙམ་འཁྲབ་སྟོན་ཞུ་བཞིན་ཡོད་པ་དང་། འཁྲབ་སྟོན་པ་སུམ་བརྒྱ་ལྔ་བཅུ་ལྷག་འདུ་འཛོམས་ཐུབ་པ་བྱུང་ཡོད། ང་ཚོའི་ངོས་ནས་སྔ་མོའི་ལྷ་མོའི་ཁྱད་ཆོས་གཙོ་བཟུང་ཐོག་ལྷ་མོའི་རྣམ་ཐར་དང་། གཞུང་། འཁྲབ་སྟོན་སོགས་གང་ཐུབ་ཅི་ཐུབ་ཀྱིས་རྒྱུད་འཛིན་གང་ལེགས་བྱས་ཡོད་པའི་བདེན་དཔང་ཞུ་རྒྱུ་ཡིན་ལ། རྒྱ་ཆེ་མང་ཚོགས་རྣམས་ཀྱིས་ཀྱང་བོད་ཀྱི་ལྷ་མོའི་ཟློས་གར་མི་ཉམས་རྒྱུད་འཛིན་བྱ་རྒྱུར་མི་རྒྱུ་གཉིས་ཀྱིས་མཐུན་སྦྱོར་ཡོང་བའི་རེ་བ་ཞུ་བཞིན་ཡོད། ཅེས་བརྗོད་སོང་།

མཇུག་ཏུ་སྐུ་མགྲོན་གཙོ་བོ་སྐྱབས་རྗེ་ཀུན་བདེ་གླིང་རྟ་ཚག་རྗེ་དྲུང་མཆོག་སྤྲུལ་རིན་པོ་ཆེ་མཆོག་གིས། བོད་ཀྱི་ལོ་རྒྱུས་ཁྲོད་ཆེས་གཉན་འཕྲེང་ཆེ་བ་དང་། བོད་གཞིས་བྱེས་གཉིས་སུ་གྱེས་ཏེ་བཙན་བྱོལ་དུ་ལོ་ངོ་ ༦༥ ཕྱིན་པའི་སྐབས། བོད་ཀྱི་ཞོ་སྟོན་ཡར་ངོ་ཟླ་ལྟར་འཕེལ་ནས་ལོ་རེར་མཉམ་ཞུགས་པ་ཇེ་མང་དུ་ཕྱིན་ཡོད་པ་མ་ཟད། ད་ལོར་བཙན་བྱོལ་གྱི་ལོ་རྒྱུས་ནང་ལྷ་མོ་འཁྲབ་མཁན་མང་ཤོས་མཉམ་ཞུགས་གནང་ཐུབ་པ་ནི་གཟི་བརྗིད་དང་རྒྱལ་ཁ་ཆེན་པོ་ཞིག་རེད། ལྷག་པར་དུ་ཐེངས་འདིར་བཙན་བྱོལ་གྱི་སློབ་གྲྭ་ཆེ་ཁག་གི་གཞོན་སྐྱེས་མང་པོ་ཞིག་མཉམ་ཞུགས་གནང་ཐུབ་པ་ཧ་ཅང་གལ་ཆེན་པོ་རེད། མ་འོངས་བར་ལྷ་མོའི་སྒྱུ་རྩལ་མི་རབས་ནས་མི་རབས་བར་རྒྱུན་གནས་ཡོང་བར་གལ་འགངས་ཆེན་པོ་རེད། བོད་ཀྱི་གནས་སྟངས་ཛ་དྲག་འོག་ཏུ་ཡོད་ཀྱང་། བོད་ཀྱི་ཆོས་དང་རིག་གཞུང་སྐད་ཡིག་བཅས་པ་འཛམ་གླིང་དུ་གསོན་པོར་གནས་ཐུབ་ཡོད་པ་མ་ཟད། བོད་ཀྱི་རིག་གཞུང་གི་གཟི་བརྗིད་ཀྱི་འོད་སྟོང་འབར་བ་ནི་༧གོང་ས་རྒྱལ་བ་རིན་པོ་ཆེ་མཆོག་གི་ཐུགས་རྗེ་བཀའ་དྲིན་ཉག་གཅིག་ལ་བརྟེན་ནས་བྱུང་བ་ཞིག་རེད།

ཁྱེད་རྣམ་པའི་ཚེ་འདིའི་ལྟོ་གོས་གཏམ་གསུམ་ལ་གྱོང་གུད་ཅིག་རག་གི་ཡོད་ཚེ། དེ་ལས་ལྷག་པའི་རྩ་བའི་བླ་མའི་བཀའ་སྒྲུབ་བཞིན་ཡོད་པ་དང་བླ་མའི་སྐུ་ཚེ་བརྟན་པའི་དགེ་རྩར་འགྲོ་ཡི་ཡོད། ཚེ་རབས་ནས་ཚེ་རབས་བར་དུ་བླ་མ་སྤྱན་རས་གཟིགས་ཀྱི་དགེ་བསགས་རླབས་ཆེན་ཞིག་ཏུ་འགྲོ་ཡི་ཡོད། དེར་བརྟེན་བློས་གཏོང་རིན་ཆོག་པ་དང་རང་མི་རིགས་ཀྱི་རིག་གཞུང་ལ་ཞབས་འདེགས་ཆགས་ཀྱི་ཡོད། ད་ལྟ་ང་ཚོ་མི་རིགས་ཀྱི་རིག་གཞུང་འདི་ཉག་ཕྲ་བའི་དུས་སྐབས་ཤིག་ཏུ་སླེབས་ཡོད་པས། ཁྱེད་རྣམ་པ་རིག་གཞུང་སྤྱི་དང་ཁྱད་པར་དུ་ཉག་ཕྲ་བའི་ལྷ་མོ་སྒྱུ་རྩལ་གྱི་ཚེ་སྲོག་སྐྱོབ་མཁན་གྱི་བྱས་པ་ཅན་ཆགས་ཡོད། དེ་བས་ཁྱེད་རྣམ་པར་ལག་གཉིས་ཐལ་མོ་སྦྱར་ནས་བཀའ་དྲིན་ཆེ་ཞུ་རྒྱུ་དང་མ་འོངས་པའང་དེ་དེ་བཞིན་གྱིས་ཐུགས་ཞུམ་པ་མེད་པའི་ཐོག་ནས་ཧུར་ཐག་གནང་བའི་སྐྱབས་འཇུག་ཞུ་རྒྱུ་ཡིན། ང་ཚོའི་ལྷ་མོའི་རིག་གཞུང་འདི་མི་ཉམས་རྒྱུན་འཛིན་ཡོང་བར་མི་འགའ་ཤས་དང་ཚོགས་པ་རེ་ཟུང་ལ་འགན་འཁྲི་ཡོད་པ་ཙམ་མིན་པར། ང་ཚོ་བོད་མི་སྤྱི་བོ་གནམ་བསྟན་ཡོངས་ལ་འགན་འཁྲི་ཡོད་པ་ཡིན་དུས། ང་ཚོའི་སྤྱི་ཚོགས་ཁྱོན་ཡོངས་ནས་བོད་ཀྱི་ལྷ་མོའི་སྒྱུ་རྩལ་དར་སྤེལ་ཡོང་སླད་ཐུགས་འཁུར་ཆེ་ཙམ་བཞེས་གནང་བའི་འབོད་སྐུལ་ཞུ་རྒྱུ་ཡིན། ཞེས་གསུངས་སོང་།

ཐེངས་འདིའི་བོད་ཀྱི་ཞོ་སྟོན་སྐབས་ཉེར་བདུན་པའི་སྟེང་། ཀ་སྦུབ་ལྷ་མོ་ཚོགས་པ་དང་ཨོ་རི་ས་ལྷ་མོ་ཚོགས་པ། བལ་ཡུལ་ལྷ་མོ་ཚོགས་པ། ལྕགས་ཟམ་པ་ལྷ་མོ་ཚོགས་པ། མ་སུ་རི་ལྷ་མོ་ཚོགས་པ། མན་སྤར་ལྷ་མོ་ཚོགས་པ། ཀོ་ལི་གྷལ་ལྷ་མོ་ཚོགས་པ། སྦེལ་ཀོབ་ལྷ་མོ་ཚོགས་པ། སྦན་རྡ་ར་ལྷ་མོ་ཚོགས་པ། ཅོན་རྡ་ར་བོད་ཁྱིམ་ལྷ་མོ་ཚོགས་པ། རྡ་སྟེང་བོད་ཁྱིམ་ལྷ་མོ་ཚོགས་པ། མོན་གྷོ་ལྷ་མོ་ཚོགས་པ། བོད་ཀྱི་ཟློས་གར་ཚོགས་པ་བཅས་ལྷ་མོ་ཚོགས་པ་ཁྱོན་ ༡༣ མཉམ་ཞུགས་གནང་གི་འདུག འཁྲབ་གཞུང་དུ་ལྷ་གཞུང་འགྲོ་བ་བཟང་མོ་དང་ཆོས་རྒྱལ་དྲི་མེད་ཀུན་ལྡན། གཟུགས་ཀྱི་ཉི་མ། མཁན་སློབ་ཆོས་གསུམ། རྒྱལ་པོ་འཇིག་རྟེན་དབང་ཕྱུག གཅུང་པོ་དོན་ཡོད་དོན་གྲུབ། པདྨ་འོད་འབར། མི་ལ་རས་པ། ཆོས་རྒྱལ་ནོར་བཟང་། རྒྱལ་སྲས་དད་པ་བརྟན་པ་སོགས་འདུག

གསར་འགོད་པ། བྱམས་པ་ཚེ་རིང་། སྐལ་བཟང་སྦྱིན་པ།