ཁ་སང་ཕྱི་ཚེས་ ༡༠ ཉིན་ཉི་ཧོང་གི་སྲིད་བློན་ཧྥུ་མིའོ་ཀི་ཤི་ཌ་མཆོག་དང་ཨ་རིའི་སྲིད་འཛིན་རྗོ་བྷའེ་ཌིན་མཆོག་རྣམ་གཉིས་ཐུག་འཕྲད་ཀྱིས་རྒྱལ་ཁབ་གཉིས་ཀྱི་དམག་ཤུགས་རྒྱ་སྐྱེད་གཏོང་རྒྱུ་སོགས་ཀྱི་སྐོར་ལ་གླེང་སློང་གནང་ཡོད་འདུག
དེ་རིང་རྒྱལ་སྤྱིའི་གསར་འགྱུར་བརྒྱུད་ལམ་ཁག་ཏུ་གནས་ཚུལ་ཐོན་པའི་ནང་། ཟླ་འདིའི་ཕྱི་ཚེས་ ༨ ནས་ ༡༤ བར་ཉིན་གྲངས་བདུན་གྱི་རིང་ཉི་ཧོང་གི་སྲིད་བློན་སྐུ་ཞབས་ཧྥུ་མིའོ་ཀི་ཤི་ཌ་ (Fumio Kishida) མཆོག་ཨ་རིར་གཞུང་འབྲེལ་ཕྱོགས་ཕེབས་གནང་མུས་ཡིན་པ་ལྟར། ཁ་སང་ཕྱི་ཚེས་ ༡༠ ཉིན་ཉི་ཧོང་གི་སྲིད་བློན་སྐུ་ཞབས་ཧྥུ་མིའོ་ཀི་ཤི་ཌ་མཆོག་ཨ་རིའི་རྒྱལ་ས་ཝ་ཤིང་ཊོན་ཌི་སི་ (Washington D.C.) རུ་ཕེབས་ནས་ཨ་རིའི་སྲིད་འཛིན་རྗོ་བྷའེ་ཌིན་ (Joe Biden) མཆོག་དང་དངོས་སུ་ཐུག་འཕྲད་གནང་སྟེ། རྒྱ་ནག་དང་ཐའེ་ཝན་གྱི་གནད་དོན་དང་། མཉམ་འབྲེལ་དམག་སྲིད་རྒྱ་སྐྱེད་སྔར་ལྷག་གཏོང་རྒྱུ། དེ་བཞིན་ཨུ་རུ་སུ་དང་ཡུ་ཁུ་རེན་གྱི་དམག་འཁྲུག་སོགས་གླེང་སློང་བྱས་པ་དང་བསྟུན། རྒྱལ་ཁབ་གཉིས་བར་རྒྱལ་སྲུང་དང་འབྲེལ་བའི་གྲོས་ཆོད་ ༧༠ བཞག་ཡོད་འདུག
དེ་འབྲེལ་ཉི་ཧོང་གི་སྲིད་བློན་དང་ཨ་རིའི་སྲིད་འཛིན་རྣམ་གཉིས་གྱིས་མཉམ་འབྲེལ་གསར་འགོད་གསལ་བསྒྲགས་ཤིག་སྤེལ་བའི་སྐབས། ཨ་རིའི་སྲིད་འཛིན་གྱིས། ཨ་རི་དང་ཉི་ཧོང་གཉིས་ཀྱི་འབྲེལ་ལམ་དེ་ཁ་བྲལ་ཐབས་མེད་པ་ཞིག་ཡིན་པ་དང་། རྒྱལ་ཁབ་གཉིས་མཉམ་ལས་ཀྱིས་འབྲེལ་ལམ་ཡར་རྒྱས་བཏང་སྟེ། རྒྱ་ནག་གཞུང་ལ་ཁ་གཏད་གཅོག་ཐབས་སུ་ཉི་ཧོང་ནང་ཨ་རིའི་དམག་དཔུང་མངག་གཏོང་གིས་ཉི་ཧོང་གི་དམག་ཤུགས་གོང་མཐོར་གཏོང་རྒྱུ་ཡིན་པ་མ་ཟད། ཉི་ཧོང་དང་། ཨ་རི། ཨོ་གླིང་བཅས་རྒྱལ་ཁབ་གསུམ་མཉམ་འབྲེལ་གྱིས་མཁའ་དམག་དང་གོ་མཚོན་སོགས་ཀྱི་དམག་ཤུགས་སྔར་ལྷག་རྒྱ་སྐྱེད་དང་། རྒྱལ་སྲུང་སླད་མཉམ་འབྲེལ་ཐོག་མེ་ཤུགས་འཕུར་མདའ་གསར་བཟོ་སོགས་བྱ་རྒྱུ་ཡིན་ཁར། ད་དུང་ཨ་རི་དང་ཉི་ཧོང་། དབྱིན་ཡུལ་བཅས་རྒྱལ་ཁབ་གསུམ་མཉམ་འབྲེལ་གྱིས་དམག་སྦྱོང་བྱ་འཆར་ཡོད་སྐོར་སོགས་འགྲེལ་བརྗོད་གནང་ཡོད་འདུག
ཉི་ཧོང་གི་སྲིད་བློན་ཧྥུ་མིའོ་ཀི་ཤི་ཌ་མཆོག་གིས། ཐེངས་འདིའི་ཐུག་འཕྲད་སྐབས་ཐའེ་ཝན་དང་རྒྱ་ནག་བར་རྩོད་རྙོག་ཆེ་བའི་གནད་དོན་དང་། ཨུ་རུ་སུ་དང་ཡུ་ཁུ་རེན་གྱི་དམག་འཁྲུག བཅོས་མའི་རིག་རྩལ། དཔལ་འབྱོར་སོགས་ཀྱི་ཐོག་ལ་གླེང་སློང་གནང་ཡོད་སྐོར་དང་། རྒྱལ་ཁབ་གཉིས་མཉམ་འབྲེལ་གྱིས་ཚོང་འབྲེལ་དང་། རྒྱལ་སྲུང་སླད་གོ་མཚོན་ཚུད་པའི་དམག་ཤུགས་རྒྱ་སྐྱེད་གཏོང་རྒྱུ་ཡིན་སྐོར་སོགས་བརྗོད་ཡོད་འདུག
འདས་པའི་ལོ་ཤས་རིང་ཨ་རིའི་མཐུན་ཕྱོགས་རྒྱལ་ཁབ་རྒྱ་གར་དང་། ཉི་ཧོང་། ཨོ་གླིང་བཅས་ཀྱིས་རྒྱ་ནག་གཞུང་ལ་ཁ་གཏད་གཅོག་གི་ཡོད་ཅིང་། རྒྱ་གར་ཞི་བདེ་རྒྱ་མཚོའི་མངའ་ཁུལ་དུ་ཨ་རི་དང་ཉི་ཧོང། རྒྱ་གར། ཨོ་གླིང་བཅས་ནས་མཉམ་འབྲེལ་དམག་སྦྱོང་བྱས་ཏེ། ཨེ་ཤ་ཡའི་ཁུལ་དུ་རྒྱ་ནག་གཞུང་གི་དབང་ཤུགས་སྐྱེད་པར་འགོག་རྒོལ་དང་། རྒྱ་གར་ཞི་བདེ་རྒྱ་མཚོའི་ཁུལ་དུ་བརྟན་བརླིང་ཡོང་ཆེད་མཉམ་ལས་བྱེད་ཀྱི་ཡོད་འདུག དེ་ཡང་འདས་ལོའི་ཕྱི་ཟླ་ ༡ ཚེས་ ༡༦ ནས་ ༢༦ བར་ཉིན་གྲངས་བཅུ་གཅིག་རིང་རྒྱ་གར་དང་ཉི་ཧོང་གཉིས་ཀྱིས་རྒྱ་ནག་ལ་ཁ་གཏད་གཅོག་སླད། ཉི་ཧོང་གི་རྒྱལ་ས་ཊོག་ཡོའི་བྱང་ཤར་ཁུལ་དུ་ཡོད་པའི་མཁའ་དམག་ལྟེ་གནས་སུ་རྒྱལ་ཁབ་གཉིས་མཉམ་འབྲེལ་གྱིས་མཁའ་ལམ་དམག་སྦྱོང་སོགས་བྱས་ཏེ་དམག་ཤུགས་རྒྱ་སྐྱེད་བཏང་དང་གཏོང་མུས་ཡིན་འདུག
གསར་འགོད་པ། བསྟན་འཛིན་ཕུར་བུ།
![AfD party members celebrate victory in Saxony-Anhalt on Sunday [Matthias Schrader/AP]](https://tibettimes.net/wp-content/uploads/2026/09/WhatsApp-Image-2026-09-11-at-4.20.04-PM-360x180.jpeg)
