༧རྒྱལ་བ་སྨན་རིའི་སྨན་སྒྲུབ་འོད་ཟེར་འཁྱིལ་བའི་སྒྲུབ་ཆེན་ཐེངས་ ༣༤ པ་འཚོག་བཞིན་པ།

གདན་ས་ཆེན་མོ་དཔལ་གཤེན་བསྟན་སྨན་རིའི་གླིང་དུ་༧རྒྱལ་བ་སྨན་རིའི་སྨན་སྒྲུབ་འོད་ཟེར་འཁྱིལ་བའི་སྒྲུབ་ཆེན་ཟླ་ཕྱེད་རིང་འཚོག་བཞིན་ཡོད་པ་དང་དེ་བཞིན་ཉིན་གྲངས་ ༢ རིང་རྒྱལ་སྤྱིའི་ཞང་བོད་རིག་གནས་བགྲོ་གླེང་འཚོག་གཏན་འཁེལ་འདུག

ཁ་སང་ཕྱི་ཚེས་ ༡༡ ནས་ ༢༧ བར་ཧི་མ་ཅལ་མངའ་སྡེའི་༧ཞྭ་དཀར་གཡུང་དྲུང་བོན་གྱི་གདན་ས་ཆེན་མོ་དཔལ་གཤེན་བསྟན་སྨན་རིའི་གླིང་དུ། ༧རྒྱལ་བ་སྨན་རིའི་སྨན་སྒྲུབ་འོད་ཟེར་འཁྱིལ་བའི་སྒྲུབ་ཆེན་ཐེངས་ ༣༤ འཚོག་བཞིན་ཡོད་ཅིང་། དབུ་འཛུགས་ཀྱི་མཛད་སྒོའི་ཐོག་༸ཞྭ་དཀར་གཡུང་དྲུང་བོན་གྱི་བསྟན་པའི་གཙུག་རྒྱན་༧རྒྱལ་བ་སྨན་རི་བའི་ཁྲི་འཛིན་སོ་བཞི་པ་༧སྐྱབས་རྗེ་ལུང་རྟོགས་ཟླ་བ་དར་རྒྱས་དཔལ་བཟང་པོ་མཆོག་གི་དབུས། ༧སྐྱབས་རྗེ་སྨན་རིའི་དཔོན་སློབ་ཡང་སྟོན་འཕྲིན་ལས་ཉི་མ་རིན་པོ་ཆེ་མཆོག  སྐུ་མགྲོན་གཙོ་བོ་ཧི་མ་ཅལ་མངའ་སྡེའི་ཁྲལ་འབབ་དང་རྩི་ཤིང་རིག་པའི་བློན་ཆེན་ཇ་ག་ཏ་སིངྒ་ནེ་གེ་མཆོག་དང་། དམིགས་བསལ་སྐུ་མགྲོན་བོད་མི་མང་སྤྱི་འཐུས་ཚོགས་གཙོ་མཁན་པོ་བསོད་ནམས་བསྟན་འཕེལ་མཆོག བོན་གཞིས་ཉིན་སློབ།  གསོ་རིག་འབུམ་བཞིའི་མཐོ་སློབ་སྨན་རིའི་གླིང་། བཙུན་དགོན་རདྞ་སྨན་གླིང་གི་བཙུན་མ། དཔལ་གཤེན་བསྟན་སྨན་རིའི་གྲྭ་ཚང་གི་འདུས་མང་། བོན་གཞིས་ཀྱི་མི་མང་སོགས་འཛོམས་ཡོད་འདུག

ཧི་མ་ཅལ་མངའ་སྡེའི་ཁྲལ་འབབ་དང་རྩི་ཤིང་རིག་པའི་བློན་ཆེན་ཇ་ག་ཏ་སིངྒ་ནེ་གེ་མཆོག་གིས། བོད་ཀྱི་གནའ་བོའི་གྲུབ་མཐའ་གཡུང་དྲུང་བོན་འདི་ཉིད་མ་ཉམས་རྒྱུད་འཛིན་གྱིས་དར་སྤེལ་བྱེད་ཀྱི་ཡོད་པ་འདི་དགའ་འོས་པ་ཞིག་ཡིན་ལ། ཁོང་གིས་ས་གནས་དེ་རང་ནས་སློབ་སྦྱོང་བྱས་ཏེ་འཚར་ལོངས་བྱུང་བའི་མི་ཞིག་ཡིན་པའི་ཆ་ནས། རང་ཉིད་ཀྱི་མིག་གིས་མཐོང་ས་ནས་༧དཔལ་གཤེན་བསྟན་སྨན་རིའི་གླིང་དགོན་པ་འདི་ཉིད་འཕེལ་རྒྱས་ཆེན་པོ་ཕྱིན་པ་དང་། རྒྱ་གར་གྱི་བཙན་བྱོལ་སྤྱི་ཚོགས་ནང་དུ་བོད་པ་ཉུང་ཤས་ཤིག་ལས་མེད་ཀྱང་། འདས་བའི་ལོ་ངོ་དྲུག་ཅུ་ལྷག་གི་རིང་བོད་པ་རྣམས་ཀྱིས་དཀའ་སྤྱད་འབད་བརྩོན་བྱས་ཏེ། རང་ཉིད་ཀྱི་སྐད་ཡིག་དང་རིག་གཞུང་བདག་ཉར་བྱེད་སྟངས་འདི་ནི་ང་ཚོས་མིག་དཔེ་ལྟ་འོས་པ་ཞིག་ཡིན་སྐོར་སོགས་གསུངས་འདུག

དེ་བཞིན་བོད་མི་མང་སྤྱི་འཐུས་ཚོགས་གཙོ་མཁན་པོ་བསོད་ནམས་བསྟན་འཕེལ་མཆོག་གིས། ང་ལ་མཚོན་ན་གདན་ས་ཆེན་མོ་དཔལ་གཤེན་བསྟན་སྨན་རིའི་གླིང་དུ་བཅར་བ་ཐེངས་བཞི་བ་ཆགས་ཀྱི་ཡོད། ན་ནིང་སྐྱབས་རྗེ་རྒྱལ་བ་སྨན་རི་བའི་ཁྲི་འཛིན་རིན་པོ་ཆེ་མཆོག་གི་ཁྲི་བཞེངས་ཀྱི་མཛད་སྒོའི་སྐབས་སུ་བཅར་རྒྱུའི་སྐལ་བ་བཟང་པོ་བྱུང་སོང་། ད་ནི་སྨན་རིའི་ཁྲི་འཛིན་སྐབས་སོ་བཞི་པའི་ཐུགས་འགན་བཞེས་ཏེ་དུས་ཡུན་ལོ་ལྔ་ལྷག་འགྲོ་བཞིན་འདུག དུས་ཡུན་འདིའི་ནང་དུ་ཁྲི་འཛིན་རིན་པོ་ཆེ་མཆོག་གིས་རྒྱལ་ཁབ་ཕྱི་ནང་ཀུན་དང་། བོད་ཕྱི་ནང་གཉིས། གདན་ས་འདི་གཙོས་༧ཞྭ་དཀར་པཎ་ཆེན་བསྟན་པའི་འཛིན་སྐྱོང་ཐོག་འཐུས་ཤོར་མེད་པར་ཧ་ཅང་ལེགས་པོ་བྱུང་སོང་། དེ་རིང་འདིར་༧སྐྱབས་རྗེ་ཁྲི་འཛིན་རིན་པོ་ཆེ་མཆོག་ལ་དམིགས་བསལ་འཚམས་འདྲི་དང་། དགའ་སྤོབས་ཆེན་པོ་བྱུང་ཞེས་སྙན་སེང་ཞུ་རྒྱུ་ཡིན། ཅེས་གསུངས།

གདན་ས་ཆེན་མོ་དཔལ་གཤེན་བསྟན་སྨན་རིའི་གླིང་ནི་སྐྱབས་རྗེ༧རྒྱལ་བ་སྨན་རིའི་ཁྲི་འཛིན་སོ་གསུམ་པ་ལུང་རྟོགས་བསྟན་པའི་ཉི་མ་དཔལ་བཟང་པོ་མཆོག་གིས་རྒྱ་གར་བྱང་ཕྱོགས་ཧི་མ་ཅལ་གྱི་མངའ་ཁོངས་བོན་གཞིས་ཐོབ་རྒྱལ་གསར་པར་ཕྱག་བཏབ་ཡོད་ཅིང་། ཕྱི་ལོ་ ༡༩༨༨ ལོར་ཁྲི་འཛིན་སོ་གསུམ་པ་མཆོག་གིས་འོད་ཟེར་འཁྱིལ་བ་སྨན་གྱི་སྒྲུབ་ཆེན་དབུ་བཙུགས་གནང་སྟེ། གདན་སའི་ལྷ་སྡེ་མི་མང་རྣམས་དང་། བོད་ཕྱི་ནང་གཉིས། ཕྱོགས་མཐའི་རྒྱལ་ཁབ་ཁག་གི་དད་ལྡན་པར་སྒྲུབ་པ་ཆེན་མོའི་དབང་བྱིན་བསྩལ་ཡོད་འདུག

སྒྲུབ་སྨན་འདིས་ནད་རིགས་སྤྱི་དང་གསང་སྔགས་ཀྱི་ཐོག་ནས་མངོན་པར་སངས་རྒྱས་ཐོབ་པའི་ཕན་ནུས་བསམ་ཡུལ་ལས་འདས་པ་ཞིག་ཡིན་འདུག  རྒྱལ་བ་སྨན་རིའི་སྒྲུབ་ཆེན་གྱི་མཛད་སྒོ་དང་བསྟུན་ནས་ཕྱོགས་མཐའ་ཁག་གི་སྐུ་མགྲོན་རྣམས་ལ་དབང་ལུང་ཁྲིད་གསུམ་གྱི་གདམས་པ་གང་མང་གནང་རྒྱུ་དང་། བོན་ལུགས་ཀྱི་ཐུན་མོང་མ་ཡིན་པའི་ཐེག་དགུའི་མཆོད་ཆ་ཡོ་བྱད་བཅས་ངོ་སྤྲོད་འགྲེམས་སྟོན། བཙུན་དགོན་རཏྞ་སྨན་གླིང་གི་རྟེན་དང་བརྟེན་པ་བཅས་ལ་མཇལ་ཁ་དང་ཁོར་ཡུག་གཟིགས་སྐོར། དམུ་ཁྲི་བཙད་པོ་ཞང་བོད་རིག་གཞུང་སློབ་གཉེར་ཁང་སྨན་རིའི་རིག་གནས་སྡེ་ཚན་གྱི་རིག་པའི་གནས་ལྔའི་སྡེ་ཚན་སོ་སོར་གཟིགས་སྐོར་ངོ་སྤྲོད་གནང་གི་ཡོད་འདུག

ཟླ་འདིའི་ཚེས་ ༡༨ དང་ ༡༩ གཉིས་ལ་གཡུང་དྲུང་བོན་གྱི་དཔེ་མཛོད་ཁང་དུ་རྒྱལ་སྤྱིའི་ཞང་བོད་རིག་གནས་བགྲོ་གླེང་སོགས་གོ་སྒྲིག་གནང་གི་ཡོད་འདུག

གསར་འགོད་པ། བྱམས་པ་ཚེ་རིང་།

རྩོམ་སྒྲིག་པ། པདྨ་མཚོ།