སྤྱི་འཐུས་ཚོགས་གཙོ་མཁན་པོ་བསོད་ནམས་བསྟན་འཕེལ་མཆོག་གིས་ཨ་རིའི་རྒྱལ་སྲིད་དྲུང་ཆེ་རྒྱ་ནག་ཏུ་བསྐྱོད་སྐབས་བོད་དོན་གླེང་སློང་གནང་དགོས་པའི་སྐུལ་མ་བཏང་འདུག
ཟླ་འདིའི་ཕྱི་ཚེས་ ༢༣ ནས་ཉིན་གྲངས་བཞིའི་རིང་ཨ་རིའི་རྒྱལ་སྲིད་དྲུང་ཆེ་ཨན་ཊོ་ནེ་བྷི་ལི་ཁིན་རྒྱ་ནག་ཏུ་སོང་ནས་ཨ་རྒྱ་གཉིས་བར་གོ་ལའི་ཚོང་འབྲེལ་གྱི་གཙོས་མངའ་ཁུལ་འཐབ་རྩོད་དང་ཡོ་ཁུ་རེན་དང་ཨུ་རུ་སུའི་དམག་འཁྲུག་སོགས་གནད་དོན་མང་པོ་ཞིག་གླེང་སློང་བྱ་འཆར་ཡོད་པར་བརྟེན། བོད་མི་མང་སྤྱི་འཐུས་ལྷན་ཚོགས་ཀྱི་ཚོགས་གཙོ་མཁན་པོ་བསོད་ནམས་བསྟན་འཕེལ་མཆོག་གིས་ཨེག་སི་དྲ་ཚིགས་སྟེང་། ཨ་རིའི་རྒྱལ་སྲིད་དྲུང་ཆེས་རྒྱ་ནག་ཏུ་བསྐྱོད་པ་དང་བསྟུན་བོད་ཀྱི་གཞི་རྩའི་རང་དབང་དང་ཐོབ་ཐང་ལ་རྩིས་མེད་རྡོག་རོལ་གཏོང་བཞིན་པ་སོགས་བོད་དོན་གླེང་སློང་གནང་བའི་སྐུལ་མ་བཏང་འདུག
དེ་འབྲེལ་ཚོགས་གཙོ་མཁན་པོ་བསོད་ནམས་བསྟན་འཕེལ་མཆོག་གི་ཨེག་སི་དྲ་ལམ་སྟེང་དུ། ཟླ་འདིའི་ཕྱི་ཚེས་ ༢༤ ནས་ ༢༦ བར་ཨ་རིའི་རྒྱལ་སྲིད་དྲུང་ཆེ་ཨན་ཊོ་ནེ་བྷི་ལི་ཁིན་མཆོག་རྒྱ་ནག་ཏུ་ཕྱིན་ནས་ཨ་རྒྱ་གཉིས་ཀྱི་འབྲེལ་ལམ་དང་རྒྱལ་སྤྱིའི་གནད་དོན་ཐོག་གྲོས་མོལ་བྱེད་པའི་འཆར་གཞི་ཡོད་སྟབས། ངས་རྒྱལ་སྲིད་དྲུང་ཆེ་མཆོག་ནས་བོད་ཀྱི་རྩ་དོན་དང་བོད་ནང་གཞི་རྩའི་ཐོབ་ཐང་སོགས་རྩིས་མེད་རྡོག་རོལ་གཏོང་བཞིན་པའི་གནས་སྟངས་གླེང་སློང་བྱེད་པའི་སྐུལ་མ་ཞུ་བཞིན་ཡོད། ཅེས་བརྗོད་འདུག
རོའུ་ཊར་གསར་ཁང་གི་གནས་ཚུལ་ལྟར་ན། ཐེངས་འདིར་ཨ་རིའི་རྒྱལ་སྲིད་དྲུང་ཆེ་རྒྱ་ནག་ཏུ་བསྐྱོད་དེ། རྒྱའི་དཔོན་རིགས་ཚོ་དང་ཐུག་འཕྲད་ཀྱིས། རྒྱ་ནག་གིས་ཨུ་རུ་སུར་རོགས་སྐྱོར་བྱས་ཏེ་ཡོ་ཁུ་རེན་གི་དམག་འཁྲུག་ལ་ཤུགས་རྐྱེན་སྤྲོད་བཞིན་པ་དང་། ལྷོ་རྒྱ་ནག་རྒྱ་མཚོའི་ཁུལ་དུ་ཧྥེ་ལི་ཕིན་ལ་དྲག་པོས་འཇིགས་སྐུལ་བྱེད་བཞིན་པ་སོགས་ཀྱི་སྐོར་གླེང་སློང་བྱ་རྒྱུ་ཡིན་སྐོར་བརྗོད་འདུག
འདས་ལོའི་ཕྱི་ཟླ་ ༦ པའི་ནང་ཨ་རིའི་རྒྱལ་སྲིད་དྲུང་ཆེ་རྒྱ་ནག་ཏུ་ཐོག་མར་བསྐྱོད་པ་དང་། ད་ཐེངས་ནི་ཨ་རིའི་རྒྱལ་སྲིད་དྲུང་ཆེ་མཆོག་རྒྱ་ནག་ཏུ་བསྐྱོད་ཐེངས་གཉིས་པ་ཡིན་ཞིང་། རྒྱ་ནག་ཕྱི་སྲིད་ལྷན་ཁང་གི་མགྲིན་ཚབ་པ་ལིན་ཇཱེན་ཟེར་བས། རྒྱ་ནག་གིས་ཨ་རིའི་རྒྱལ་སྲུང་དྲུང་ཆེ་རྒྱ་ནག་ཏུ་ཡོང་བར་དགའ་བསུ་ཞུ་ཡི་ཡོད། ཅེས་དང་། ཨ་རིས་དྲང་བདེན་གྱི་ལམ་ནས་འགྲན་རྩོད་བྱེད་པའི་སྐུལ་མ་གཏོང་གི་ཡོད་པ་མ་ཟད། ཨ་རིས་འཛམ་གླིང་ཚོང་འབྲེལ་ལྷན་ཚོགས་ཀྱི་ཁྲིམས་སྒྲིག་ལ་གུས་བརྩི་བྱས་ཏེ། རྒྱ་ནག་ལ་ཚོང་འབྲེལ་གྱི་ཐབས་ལམ་ཐོག་ནས་དམིགས་འབེན་འཛིན་མཚམས་འཇོག་དགོས། ཞེས་བརྗོད་འདུག
དབྱེ་ཞིབ་པས་བརྗོད་པ་ལྟར་ན། ཉེ་ལམ་ཨ་རིའི་སྲིད་འཛིན་བྷའེ་ཌན་གྱིས་རྒྱ་ནག་གི་ལྕགས་རིགས་དངོས་ཟོག་ཐོག་ཁྲལ་བརྒྱ་ ༢༥ སྤར་སྣོན་བྱེད་པའི་གྲོས་གཞི་བཏོན་ཡོད་ཅིང་། དཔྱ་ཁྲལ་སྤར་སྣོན་གྱི་གྲོས་གཞི་དེ་ནི་དེ་སྔའི་ཨ་རིའི་སྲིད་འཛིན་ཟུར་བ་ཌོ་ནལ་ཊོམ་གྱིས་སྤར་སྣོན་བྱས་པའི་རྒྱ་ནག་གི་ལྕགས་རིགས་དཔྱ་ཁྲལ་སྟེང་བརྒྱ་ཆ་ ༢༥ སྤར་རྒྱུ་ཡིན་སྐོར་བསྒྲགས་ཡོད་པར་བརྟེན། ད་རེས་ཨ་རིའི་རྒྱལ་སྲུང་དྲུང་ཆེ་ཆེད་དུ་རྒྱ་ནག་ཏུ་བསྐྱོད་དེ་ཨ་རྒྱ་གཉིས་བར་དཔྱ་ཁྲལ་སྤར་སྣོན་མཚོན་པའི་ཡོ་ཁུ་རེན་དང་ལྷོ་རྒྱ་ནག་རྒྱ་མཚོའི་ཁུལ་གྱི་དཀའ་ངལ་རིགས་སེལ་ཐབས་བྱ་རྒྱུ་ཡིན་སྐོར་སོགས་བརྗོད་འདུག
གསར་འགོད་པ། སྐལ་བཟང་སྦྱིན་པ།
