ཕྱི་ལོ་ ༢༠༢༣ ལོའི་འགྲོ་བ་མིའི་ཐོབ་ཐང་གི་སྙན་ཐོའི་ནང་བོད་དང་ཡུ་གུར་སོགས་ཀྱི་གནས་སྟངས་གསལ་འདོན་གནང་།

ཨ་རིའི་ཕྱི་ལོ་ ༢༠༢༣ ལོའི་རྒྱལ་སྤྱིའི་འགྲོ་བ་མིའི་ཐོབ་ཐང་གི་སྙན་ཐོའི་ནང་རྒྱ་ནག་གཞུང་གིས་བོད་སོགས་བཙན་བཟུང་བྱས་པའི་ཡུལ་ལུང་ཁག་གི་ནང་བཙན་གནོན་དམ་དྲག་ཤུགས་ཆེན་བྱེད་བཞིན་ཡོད་པ་མ་ཟད་རྒྱལ་མཚམས་ལས་བརྒལ་ཏེ་གནོན་ཤུགས་སྤྲོད་བཞིན་ཡོད་པ་ཐེར་འདོན་གནང་འདུག

ཁ་སང་ཕྱི་ཚེས་ ༢༣ ཉིན་ཨ་རིའི་ཕྱི་སྲིད་ལས་ཁུངས་ཀྱིས་ཕྱི་ལོ་ ༢༠༢༣ ལོའི་ཧོང་ཀོང་དང་། བོད། མེ་ཁའོ་སོགས་ཚུད་པའི་རྒྱ་ནག་དང་འཛམ་གླིང་གི་རྒྱལ་ཁབ་ ༢༠༠ ཡི་འགྲོ་བ་མིའི་ཐོབ་ཐང་སྐོར་ལ་ལོ་འཁོར་སྙན་ཐོ་ཞིག་འདོན་པའི་ནང་། རྒྱ་ནག་གཞུང་གིས་བོད་དང་། ཤར་ཏུ་ཀི་སི་ཐན་སོགས་སུ་ཚད་ལས་འདས་པའི་བཙན་གནོན་དང་། བོད་མི་སོགས་ལ་རྒྱལ་མཚམས་ལས་བརྒལ་ནས་གནོན་ཤུགས་སྤྲོད་ཀྱིན་ཡོད་པ་མ་ཟད། རྒྱ་ནག་གཞུང་གིས་ཁྲིམས་མཐུན་མིན་པའི་ཐོག་ནས་བོད་ཀྱི་རྩོམ་པ་པོ་གྲགས་ཅན་སྒོ་ཤེས་རབ་རྒྱ་མཚོ་ལགས་དང་། ཚོང་དཔོན་རྡོ་རྗེ་བཀྲ་ཤིས་སོགས་བཙོན་འཇུག་བྱས་ཡོད་སྐོར་སོགས་གསལ་འདུག་ལ། ཨ་རིས་འགྲོ་བ་མིའི་ཐོབ་ཐང་རྡོག་རོལ་གཏོང་མཁན་རྣམས་ལ་ངོ་རྒོལ་ཤུགས་ཆེན་ཡོད་སྐོར་སོགས་བསྒྲགས་འདུག  

སྙན་ཐོ་གསལ་བསྒྲགས་གནང་སྐབས་ཨ་རིའི་ཕྱི་སྲིད་བློན་ཆེན་སྐུ་ཞབས་ཨན་ཊོ་ནེ་བྷི་ལིན་ཁིན་(Antony J. Blinken) མཆོག་གིས། སྙན་ཐོ་འདིའི་ནང་རྒྱ་ནག་གཞུང་གིས་བོད་དང་། ཧོང་ཀོང་སོགས་སུ་འགྲོ་བ་མིའི་གཞི་རྩའི་ཐོབ་ཐང་ལ་རྩིས་མེད་རྡོག་རོལ་གཏོང་མུས་ཡིན་པའི་གནད་དོན་དང་། མི་རིགས་རྩ་མེད་གཏོང་བའི་སྲིད་ཇུས་སོགས་ཀྱི་སྐོར་དང་། རྒྱ་ནག་ནང་དམངས་གཙོ་དོན་གཉེར་བ་རྣམས་ལ་དྲག་གནོན་བྱེད་ཀྱི་ཡོད་པའི་གནད་དོན་གྱི་སྐོར་སོགས་གསལ་ཡོད་ལ། ཨ་རི་དང་ཨ་རིའི་མཐུན་ཕྱོགས་རྒྱལ་ཁབ་ཁག་གིས་འགྲོ་བ་མིའི་གཞི་རྩའི་ཐོབ་ཐང་ལ་རྡོག་རོལ་གཏོང་མཁན་ཚོར་ངོ་རྒོལ་ཆེན་པོ་ཡོད་སྐོར་སོགས་གསུངས་འདུག 

དེ་ཡང་སྙན་ཐོའི་ནང་། འདས་པའི་ལོ་ཤས་རིང་རྒྱ་ནག་གཞུང་གིས་བོད་དང་ཡུ་གུར་གཙོས་རྒྱ་ནག་གཞུང་གི་བཙན་གནོན་གྱི་འོག་ཏུ་ཡོད་པའི་མི་རིགས་རྣམས་ལ་ནག་ཉེས་སྣ་ཚོགས་གཡོགས་ནས་འཛིན་བཟུང་བཀག་ཉར་དང་། ཁྲིམས་མཐུན་མིན་པའི་ཐོག་ནས་གསང་བའི་ཁྲིམས་ཐག་གཅོད་ཀྱི་ཡོད་པ། གནམ་སྡེ་སྒོ་མོ་ཆེའི་ཞི་རྒོལ་གྱེན་ལངས་གཙོས་བོད་ཀྱི་ལོ་རྒྱུས་ཐོག་གི་དུས་དྲན་སོགས་སུ་འདུ་འཛོམས་དང་ཕྱིར་བསྐྱོད་རིགས་ལ་སོ་ཉུལ་དང་ལྟ་རྟོག་ནན་མོ་བྱེད་ཀྱི་ཡོད་སྐོར་དང་། རྒྱ་ནག་གཞུང་གིས་འཛིན་བཟུང་བྱས་པའི་སྒོ་ཤེས་རབ་རྒྱ་མཚོ་དང་། ཚོང་དཔོན་རྡོ་རྗེ་བཀྲ་ཤིས་གཙོས་དམངས་གཙོ་དོན་གཉེར་བ་དང་ཤར་ཏུ་ཀི་སི་ཐན་གྱི་ཆབ་སྲིད་བཙོན་པ་མང་དག་ཅིག་ལ་ཉེས་མེད་ཁྲིམས་ཐག་བཅད་ནས་ད་ལྟའི་དངོས་ཡོད་ཀྱི་གནས་སྟངས་གསལ་པོ་ཤེས་རྟོགས་བྱུང་གི་མེད་པའི་ཁར། ཆབ་སྲིད་བཙོན་པ་མང་དག་ཅིག་ཀློད་གྲོལ་ཚར་རྗེས་སུའང་ཁྲིམས་ཀྱི་ཁེ་དབང་མེད་པ་དང་། འདུ་འཛོམས། དཔེ་དེབ་སོགས་འགྲེམས་སྤེལ་གྱི་གཞི་རྩའི་ཐོབ་ཐང་སྤྲོད་ཀྱི་མེད་པ་མ་ཟད། ཡུལ་ལུང་གཞན་དུ་བགྲོད་སྐབས་ཆོག་མཆན་ཞུ་དགོས་སྐོར་སོགས་གསལ་འདུག 

སྙན་ཐོའི་ནང་། རྒྱ་ནག་གཞུང་གིས་གྲངས་ཉུང་མི་རིགས་ཚོར་ཕྱི་རྒྱལ་དུ་ཡོད་པའི་རང་གི་གཉེན་ཉེ་སོགས་སུ་འབྲེལ་བ་བྱེད་པར་དམ་དྲག་དང་། རྒྱལ་ཁབ་གཞན་དུ་གནས་སྡོད་བྱེད་མུས་ཡིན་པའི་བོད་མི་དང་། ཡུ་གུར་བ་སོགས་ལ་ཐོངས་མཆན་མི་སྤྲོད་པའམ། དུས་འགྱངས་བསྐྱར་གསོ་བྱེད་ཀྱི་མེད་སྐོར་དང་། བོད་མི་སོགས་ཀྱིས་ཕྱིའི་རྒྱལ་ཁབ་ཁག་ཏུ་གནས་སྡོད་བྱེད་མུས་ཡིན་པའི་རང་གི་ཉེ་འབྲེལ་སོགས་ལ་སྐད་ཆ་བཤད་སྐབས། དྲ་ལམ་ནས་ཉན་ཞིབ་ནན་མོ་དང་སྐད་ཆ་བཤད་པར་བར་ཆད་གཏོང་བའི་སྒྲ་སོགས་མངགས་ནས་དམ་དྲག་དང་འབྲེལ་ལམ་གཅོད་དུ་འཇུག་པ་སོགས། རྒྱལ་ཁབ་ཀྱི་བདེ་འཇགས་དང་བརྟན་བརླིང་ཟེར་བ་ཞིག་ལ་ཁ་གཡར་ནས་ཕྱི་ནང་གི་འབྲེལ་ལམ་བཙན་གྱིས་གཅོད་དུ་འཇུག་པ་མ་ཟད། རྒྱ་ནག་གཞུང་གི་ལངས་ཕྱོགས་ལ་མི་དགའ་བའི་རྣམ་འགྱུར་སྟོན་མཁན་ཚོར་མིང་ཐོ་ནག་པོའི་ནང་བཅུག་ནས་དམ་དྲག་དང་། རྒྱལ་མཚམས་ལས་བརྒལ་ནས་བོད་མི་སོགས་ལ་སྡིགས་ར་སྐུལ་བ་དང་། སོ་ཉུལ། སུན་གཙེར་ཡང་ཡང་བྱེད་ཀྱི་ཡོད་སྐོར་སོགས་གསལ་འདུག 

མཇུག་ཏུ་སྙན་ཐོའི་ནང་། གསར་འགོད་པ་དང་རྩོམ་པ་པོ་སོགས་ཀྱིས་རང་གི་འདོད་མོས་བཞིན་རྒྱ་ནག་གཞུང་གི་ཚུལ་མཐུན་མིན་པའི་གནད་དོན་ཐེར་འདོན་དང་། དྲང་ཕྱོགས་ཀྱི་གནད་དོན་བྲི་རྒྱུར་དམ་དྲག་ཤུགས་ཆེན་བྱེད་མུས་ཡིན་ལ། རྒྱ་ནག་གཞུང་འབྲེལ་མི་སྣས་སྔོན་ནས་བཀོད་སྒྲིག་ཟིན་པའི་གསར་འགོད་གསལ་བསྒྲགས་བྱེད་པ་ལས། རྒྱལ་སྤྱི་རིམ་པའི་གསར་འགོད་པ་སོགས་ལ་ཐུག་འཕྲད་གཏན་ནས་བྱེད་ཀྱི་མེད་པའི་སྐོར། དེ་བཞིན་རྒྱ་ནག་གཞུང་གིས་ཕྱི་རྒྱལ་གྱི་གནད་ཡོད་མི་སྣ་ཁག་བོད་ཀྱི་ས་ཁུལ་དུ་ཤར་གཏོང་གིས་བོད་མིའི་འཚོ་བ་དངོས་ལ་རྒྱུས་ལོན་བྱ་རྒྱུའི་གོ་སྐབས་གཏན་ནས་སྤྲོད་ཀྱི་མེད་པའི་སྐོར། འདས་པའི་ལོ་ཤས་གོང་ནས་ལྷོ་སོག་དང་། བོད། ཤར་ཏུ་ཀི་སི་ཐན་གཙོས་རང་སྐྱོང་ས་ཁུལ་ཟེར་བ་མང་པོ་ཞིག་ཏུ་རྒྱ་ནག་གི་སྤྱི་སྐད་ཟེར་བའི་རྒྱ་སྐད་བཙན་གྱིས་སྦྱོང་དུ་བཅུག་ནས། མི་རིགས་རང་གི་ཡུལ་སྲོལ་གོམས་གཤིས་དང་། སྐད་ཡིག་སོགས་ལས་ཁ་ཐག་ཇེ་རིང་དུ་གཏོང་ཐབས་བྱེད་ཀྱི་ཡོད་སྐོར་སོགས་གསལ་འདུག

གསར་འགོད་པ། དཔལ་ལྡན།

རྩོམ་སྒྲིག་པ། པདྨ་མཚོ།