རྒྱལ་གཅེས་དཔའ་བོ་དཔའ་མོ་རྗེས་དྲན་གྱི་སིལ་སྤོལ་རྩེད་འགྲན་ཐེངས་ཉེར་གཅིག་པ་མགོ་འཛུགས་གནང་སོང་།

བོད་ཀྱི་གཞོན་ནུ་དབུས་ས་གཉིས་ཀྱི་གོ་སྒྲིག་འོག་རྒྱ་གར་རྒྱལ་ཡོངས་རིང་བཞིན་གྱི་སིལ་སྤོལ་རྩེད་འགྲན་ཏེ། རྒྱལ་གཅེས་དཔའ་བོ་དཔའ་མོ་རྗེས་དྲན་གྱི་སིལ་སྤོལ་རྩེད་འགྲན་ཐེངས་ ༢༡ པ་ཉིན་གྲངས་ལྔའི་རིང་རུ་ཁག་ ༡༦ མཉམ་ཞུགས་ཀྱིས་མགོ་འཛུགས་གནང་སོང་།

དེ་རིང་སྔ་དྲོ་ཆུ་ཚོད་ ༩ པ་ཡས་མས་ཙམ་ལ་གངས་སྐྱིད་སིལ་སྤོལ་རྩེད་ཐང་དུ། བོད་ཀྱི་གཞོན་ནུ་ལྷན་ཚོགས་ངོས་ནས་༧ཀུན་གཟིགས་པཎ་ཆེན་སྐུ་ཕྲེང་བཅུ་གཅིག་པ་མཆོག་གི་འཁྲུངས་སྐར་སྲུང་གཙི་དང་འབྲེལ་རྒྱལ་གཅེས་དཔའ་བོ་དཔའ་མོའི་སིལ་སྤོལ་རྩེད་འགྲན་ཐེངས་ ༢༡ པ་མགོ་འཛུགས་གནང་སོང་ལ། ཐེངས་འདིའི་སིལ་སྤོལ་རྩེད་འགྲན་ཐེངས་ཉེར་གཅིག་པའི་རྒྱ་གར་གྱི་ས་གནས་འདྲ་མིན་ནས་མཉམ་ཞུགས་གནང་མཁན་གྱི་སྐྱེས་པའི་སིལ་སྤོལ་རུ་ཁག་ ༡༢ དང་བུད་མེད་རུ་ཁག་ ༤ བཅས་ཁྱོན་རུ་ཁག་ ༡༦ གིས་མཉམ་ཞུགས་གནང་གི་འདུག

དེ་རིང་གི་རྒྱལ་གཅེས་དཔའ་བོ་དཔའ་མོ་རྗེས་དྲན་གྱི་སིལ་སྤོལ་རྩེད་འགྲན་དབུ་འཛུགས་མཛད་རིམ་སྟེང་སྐུ་མགྲོན་གཙོ་བོ་དབུས་གཞོན་ནུ་ལྷན་ཚོགས་ཀྱི་ཚོགས་གཞོན་བཀྲ་ཤིས་དར་རྒྱས་ལགས་ནས་ད་ལྟ་བོད་ནང་དུ་བོད་མི་ཚོས་བོད་ཀྱི་བདེན་པའི་འཐབ་རྩོད་ཆེད་ཉིན་འཁྱོངས་ན་མཚན་མི་འཁྱོངས་པའི་གནས་སྟངས་འོག་དཀའ་ངལ་མྱོང་བཞིན་ཡོད་སྟབས། ད་རེས་སིལ་སྤོལ་རྩེད་འགྲན་བྱེད་པ་དང་ལྷན་དུ་གཞོན་སྐྱེས་ཚོས་མ་འོངས་བོད་ཀྱི་འཐབ་རྩོད་རྒྱུན་སྐྱོང་དང་འགན་འཁུར་དགོས་པ་གལ་ཆེན་ཡིན་སྐོར་བརྗོད་པ་དང་། དེ་བཞིན་གཞོན་ནུ་ལྷན་ཚོགས་ཀྱི་སྤྱི་ཁྱབ་དྲུང་ཆེ་བསོད་ནམས་ཚེ་རིང་ལགས་ཀྱིས་དཔའ་བོ་དཔའ་མོ་རྗེས་དྲན་གྱི་སིལ་སྤོལ་རྩེད་འགྲན་ངོ་སྤྲོད་དང་སྦྲགས་ནས། བོད་ཀྱི་གཞོན་ནུ་ལྷན་ཚོགས་ཀྱིས་ཕྱི་ལོ་ ༡༩༩༨ ལོར་མ་ཤི་བར་ཟས་བཅད་ངོ་རྒོལ་གྱི་ལས་འགུལ་སྤེལ་སྐབས། དཔའ་བོ་ཐུབ་བསྟན་དངོས་གྲུབ་ལགས་ཀྱིས་སྐུ་ལུས་མེ་མཆོད་དུ་ཕུལ་ཏེ་བོད་ཀྱི་མི་རིགས་ཀྱི་འཐབ་རྩོད་བྱས་ཡོད་པས། སིལ་སྤོལ་རྩེད་འགྲན་ནི་རྩེད་འགྲན་ཙམ་མ་ཡིན་པར་རྒྱལ་གཅེས་དཔའ་བོ་དཔའ་མོ་རྣམས་རྗེས་སུ་དྲན་པ་ཞིག་དང་ཆབ་སྲིད་ཀྱི་ལས་འགུལ་ཞིག་ཀྱང་ཆགས་ཡོད་སྐོར་བརྗོད་སོང་།

བོད་ཀྱི་གཞོན་ནུ་ལྷན་ཚོགས་ཀྱི་དྷ་སའི་ས་གནས་དྲུང་ཆེ་བསྟན་འཛིན་བློ་བཟང་ལགས་ཀྱིས་རྩེད་འགྲན་དང་འབྲེལ་བའི་བསྒྲགས་གཏམ་སྒྲོག་སྦྱངས་གནང་སྐབས། དེ་རིང་ནི་༧གོང་ས་རྒྱལ་བ་རིན་པོ་ཆེ་མཆོག་ནས་ངོས་འཛིན་གནང་བའི་༧ཀུན་གཟིགས་པཎ་ཆེན་སྐུ་ཕྲེང་བཅུ་གཅིག་པ་༸ཀུན་གཟིགས་༸པཎ་ཆེན་ཆུང་སྲིད་རིན་པོ་ཆེ་རྗེ་བཙུན་བསྟན་འཛིན་དགེ་འདུན་ཡེ་ཤེས་འཕྲིན་ལས་ཕུན་ཚོགས་དཔལ་བཟང་བོ་མཆོག་དགུང་གྲངས་ ༣༥ ལ་ཕེབས་པའི་སྐུའི་འཁྲུངས་སྐར་ཉིན་མོ་ཡིན་པ་དང་། ཁོང་དགུང་ལོ་དྲུག་ལ་ཕེབས་མཚམས་ནས་རྒྱ་དམར་སྲིད་གཞུང་གིས་འཛིན་བཟུང་བཙོན་འཇུག་གིས་ད་བར་གར་སོང་ཆ་མེད་དུ་སོང་བ་མ་ཟད། ཆུང་སྲིད་ཁོང་ནི་འཛམ་གླིང་གི་ཆབ་སྲིད་བཙོན་པ་ལོ་ན་ཆུང་ཤོས་དེ་ཆགས་ཡོད་པས་རྒྱ་ནག་སྲིད་གཞུང་ནས་ཁོང་ཉིད་གཙོས་པའི་བོད་ཀྱི་ཆབ་སྲིད་བཙོན་པ་རྣམས་ཆ་རྐྱེན་གང་ཡང་མེད་པར་མགྱོགས་ནས་མྱུར་དུ་ཀློད་གོལ་ཡོང་བར་དགོས་འདུན་འདོན་རྒྱུ་དང༌། རྒྱལ་སྤྱིའི་སྤྱི་ཚོགས་ནས་ཀྱང་རྒྱ་ནག་སྲིད་གཞུང་ལ་མུ་མཐུད་གནོན་ཤུགས་སྤྲད་དེ་ྋཔཎ་ཆེན་སྐུ་ཕྲེང་བཅུ་གཅིག་པ་ཆེན་པོ་མཆོག་གདན་ས་བཀྲིས་ལྷུན་པོར་ཞབས་སོར་འཁོད་གནང་ཐུབ་པར་རེ་སྨོན་ཞུ་ཡི་ཡོད་སྐོར་དང་། རྡ་ས་ས་གནས་གཞོན་ལྷན་ནས་ད་བར་རྒྱལ་གཅེས་དཔའ་བོ་དཔའ་མོ་རྗེས་དྲན་གྱི་རྩེད་འགྲན་ཐེངས་ ༢༠ ཙམ་གོ་སྒྲིག་ཞུས་ཟིན་པ་ལྟར། འདི་ལོ་དབུས་ས་ཟུང་སྦྲེལ་གྱིས་རྒྱ་གར་རྒྱལ་ཡོངས་ཀྱི་སིལ་སྤོལ་རྩེད་འགྲན་ཐེངས་དང་པོ་དང༌། རྒྱལ་གཅེས་དཔའ་བོ་དཔའ་མོ་རྗེས་དྲན་གྱི་སིལ་སྤོལ་རྩེད་འགྲན་ཐེངས་ ༢༡ པ་གོ་སྒྲིག་བྱེད་པའི་དགོས་དམིགས་ནི་རང་རིགས་གཞོན་སྐྱེས་རྣམས་ལ་རྒྱལ་གཅེས་དཔའ་བོ་དབའ་མོ་རྣམས་ཀྱི་སྙིང་སྟོབས་དང་མཛད་རྗེས་སོགས ཀྱི་གོ་རྟོགས་གོང་སྤེལ་གཏོང་རྒྱུ་དང༌། བོད་ཀྱི་གཞོན་ནུ་ལྷན་ཚོགས་ཀྱི་ལས་འགུལ་གཙོས་བོད་དོན་འཐབ་རྩོད་ཀྱི་ལས་འགུལ་ནང་རང་རིགས་གཞོན་སྐྱེས་རྣམས་མཉམ་ཞུགས་གང་མང་ཡོང་ཐབས་ལ་དམིགས་ཏེ་ནུས་པ་སྤུངས་སའི་སྡིངས་ཆ་མཁོ་སྤྲོད་བྱ་རྒྱུ། རིགས་གཅིག་ཆོལ་གསུམ་སྤུན་ཟླ་ནང་ཁུལ་མཛའ་བརྩེའི་དམ་ཚིག་གཅིག་སྒྲིལ་དགོས་གལ་གྱི་བརྡ་ལན་སོགས་གཏོང་ཆེད་ཡིན་སོགས་བརྗོད་སོང་།

གསར་འགོད་པ། སྐལ་བཟང་སྦྱིན་པ།