༧རྒྱལ་བ་སྨན་རིའི་སྨན་སྒྲུབ་འོད་ཟེར་འཁྱིལ་བ་ལེགས་པར་གྲུབ།

༧སྐྱབས་རྗེ་སྨན་རིའི་ཁྲི་འཛིན་རིན་པོ་ཆེ་མཆོག་གིས་༧གོང་ས་རྒྱལ་བ་རིན་པོ་ཆེ་མཆོག་སོགས་ཀྱི་བཀའ་དགོངས་བཞིན་ཕན་ཚུན་འཆམ་མཐུན་གྱིས་འཛམ་གླིང་ཞི་བདེ་བསྐྲུན་དགོས་སྐོར་བཀའ་སློབ་བསྩལ།

དེ་རིང་གདན་ས་ཆེན་མོ་དཔལ་གཤེན་བསྟན་སྨན་རིའི་གླིང་གི་༧རྒྱལ་བ་སྨན་རིའི་སྨན་སྒྲུབ་འོད་ཟེར་འཁྱིལ་བའི་སྒྲུབ་ཆེན་ཐེངས་ ༣༤ པ་ལེགས་གྲུབ་བྱུང་སོང་། མཇུག་བསྡོམས་མཛད་སྒོའི་ཐོག་༧སྐྱབས་རྗེ་སྨན་རིའི་ཁྲི་འཛིན་རིན་པོ་ཆེ་མཆོག་གི་དབུས། ༧སྐྱབས་རྗེ་སྨན་རིའི་དཔོན་སློབ་རིན་པོ་ཆེ་མཆོག སྐུ་མགྲོན་གཙོ་བོ་བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་མཆོག བོད་མི་མང་སྤྱི་འཐུས་ཁག་ཅིག དེ་བཞིན་ཕྱི་རྒྱལ་ཁག་དང་ཕྱོགས་མཐའ་ཁག་ནས་དད་ལྡན་པ་༣༠༠༠ ཙམ་ལྷན་འཛོམས་འདུག

མཛད་སྒོའི་ཐོག་༧སྐྱབས་རྗེ་སྨན་རིའི་ཁྲི་འཛིན་རིན་པོ་ཆེ་མཆོག་གིས། ད་ལན་ང་ཚོ་འདིར་འཛོམས་པའི་སྐལ་བ་བཟང་པོ་བྱུང་། ང་རང་གི་ངོས་ནས་ཚང་མར་བཀའ་དྲིན་ཆེ་ཞུ་འདོད་བྱུང་། ངའི་མིང་ཆེན་པོ་ཞིག་འཁུར་ཏེ་ལས་འགན་མང་པོ་ཞིག་བསྒྲུབ་དགོས་ཀྱི་ཡོད་པས། འདི་ནི་ངའི་ལས་འགན་གཉིས་པ་ཆགས་ཀྱི་ཡོད། ང་རང་ཐོག་མར་སྐྱབས་རྗེ་ཡོངས་འཛིན་རིན་པོ་ཆེ་མཇལ་བཅར་ཞུ་དུས། རིན་པོ་ཆེ་མཆོག་ནས་སྨན་རིའི་ཁྲི་འཛིན་ལ་འགན་གསུམ་ཡོད། ད་ལྟའི་ཆར་འགན་བཞི་ཆགས་ཡོད་ཅེས་ཁོང་གིས་སྐུ་རྩེད་རྩེས་སོང་། འགན་དང་པོ་ནི་ཁྲི་འཛིན་གོང་མའི་སྐུ་གདུང་བཞེངས་བའི་འགན་འཁུར་དགོས་ཀྱི་ཡོད། དེ་དུས་མི་མང་གི་བཀའ་དྲིན་ལས་གྲ་རྒྱས་པོ་བྱུང་སོང་། མི་མང་གི་དད་པ་དམ་ཚིག་ཐོག་ནས་འདི་འདྲ་ཞིག་བཞེངས་ཐུབ་ཡོད། འགན་དང་པོ་དེ་གྲུབ་ཚར་ཡོད། ཅེས་གསུངས་སོང་།

ཡང་ཁྲི་འཛིན་རིན་པོ་ཆེ་མཆོག་གིས། འགན་གཉིས་པ་ནི་སྨན་རིའི་ཁྲི་ཐོག་རེའི་སྐབས་སུ་སྨན་རིའི་སྒྲུབ་ཆེན་འཛུགས་དགོས་ཀྱི་ཡོད། སྔོན་མ་འགྲིམ་འགྲུལ་གྱི་ཆ་རྐྱེན་སོགས་ཀྱི་དབང་གིས་སྨན་རིའི་སྒྲུབ་ཆེན་དེ་བོད་སྟོད་སྨད་བར་གསུམ་དུ་རྒྱ་ཆེན་པོ་ཁྱབ་ཐུབ་ཀྱི་མེད་ཀྱང་། དེང་སང་སྨན་རིའི་ཁྲི་འཛིན་གཅིག་རིང་གི་སྨན་སྒྲུབ་ཀྱི་འདང་གི་མེད་པར་བསྟུན། ཆོ་ག་གཞན་གྱི་ཐོག་ནས་སྨན་སྒྲུབ་བྱེད་དགོས་ཐུག་གི་ཡོད། སྨན་སྒྲུབ་འདི་ཉིད་འཛམ་གླིང་གི་སེམས་ཅན་མང་པོའི་ཁྲོད་ཁྱབ་ཐུབ་པ་དང་། ཕན་ཐོགས་པའི་ཀུན་སློང་འཁྱེར་ནས་བསྒྲུབ་ཏེ་འགྲེམས་སྤེལ་བྱེད་བཞིན་ཡོད། ཟླ་འདིའི་ཕྱི་ཚེས་ ༡༡ ནས་དེ་རིང་གི་བར་དུ་ཚང་མས་འཕྱར་གྲུ་མཉམ་འདེགས་ཀྱིས་ལས་ཀ་ཐམས་ཆད་ཚགས་ཚུད་བྱུང་བར་འབྲེལ་ཡོད་ཚང་མར་བཀའ་དྲིན་ཆེ་ཞུ་འདོད་བྱུང་།འགན་གསུམ་པ་ནི་ངས་མི་མང་ལ་དབང་ལུང་ཁྲིད་གསུམ་ཞུ་རྒྱུ་དེ་ཡིན། དེ་ཡང་བྱས་དང་བྱེད་མུས་ཡིན། ཞེས་གསུངས་སོང་།

དེ་བཞིན་ཁྲི་འཛིན་མཆོག་གིས། ༧གོང་ས་རྒྱལ་བ་རིན་པོ་ཆེ་མཆོག་དང་། ཞིང་གཤེགས་དམ་པ་སྨན་རིའི་ཁྲི་འཛིན་སོ་གསུམ་པ་མཆོག ཡོངས་འཛིན་རིན་པོ་ཆེ་སོགས་ཀྱི་ཐུགས་ཀྱི་བཞེད་དགོངས་ལ་ཞབས་ཞུ་ཇི་ལྟར་བསྒྲུབ་དགོས་པར་དགོངས་པ་བཞེས་དགོས། འཛམ་གླིང་ཐོག་གི་ཆོས་ལུགས་ནང་ཁུལ་དུ་ཕན་ཚུན་མཐུན་སྒྲིལ་བྱེད་དགོས། ད་ལྟའི་དུས་འདིར་སོ་སོ་ཁེར་རྐྱང་དུ་སྡོད་པའི་དུས་ཚོད་ཅིག་མ་རེད། མི་ཕན་ཚུན་གཅིག་ལ་གཅིག་རྟེན་གྱི་མཐུན་ལམ་ཐོག་འཛམ་གླིང་ཞི་བདེ་བསྐྲུན་ཐུབ་ཀྱི་འདུག ཞེས་སོགས་གསུངས་སོང་།

བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་མཆོག་གིས། བོད་གངས་ཅན་གྱི་ལྗོངས་འདིར་གསོ་རིག་གི་བསྟན་པ་དར་ནས་ལོ་རྒྱུས་ཧ་ཅང་རིང་པོ་ཡོད་པའི་བཞེད་སྲོལ་ཡོད་པ་དང་། དེའི་སྒྲུབ་བྱེད་གཅིག་ནི་ཞྭ་དཀར་གཡུང་དྲུང་བོན་གྱི་སྟོན་པ་གཤེན་རབ་མི་བོ་ཆེས་གསོ་རིག་གི་བསྟན་བཅོས་དུ་མ་མཛད་ཡོད་པ་མ་ཟད། ཁོང་གི་སྐུའི་གདུང་སྲས་བརྒྱད་ཀྱི་ནང་ནས་བགྲེས་པ་དཔྱད་བུ་ཁྲི་ཤེས་ཀྱིས་ཀྱང་གསོ་དཔྱད་ཀྱི་བསྟན་བཅོས་ཁག་ཅིག་གསར་རྩོམ་མཛད་དེ་སྔ་རབས་ཞང་ཞུང་གི་གསོ་རིག་བསྟན་པའི་སྒྲོན་མེ་སྦར་ཚུལ་བོད་ཀྱི་གསོ་རིག་ལོ་རྒྱུས་སྐད་གྲགས་ཆེན་པོ་མང་པོའི་ནང་བཀོད་ཡོད། ཆོས་རྒྱལ་ཁྲི་སྲིང་ལྡེའུ་བཙན་གྱི་སྐབས་སུ་བོད་ཀྱི་གསོ་རིག་གི་གནད་ཚད་ཧ་ཅང་ཚད་མཐོན་པོར་སླེབས་ཡོད་པའི་རྟགས་མཚན་ཞིག་ནི། བསམ་ཡས་གཙུག་ལག་ཁང་དུ་ཁྱིམ་མཚེས་རྒྱལ་ཁབ་ཀྱི་སྨན་པ་མཁས་པ་དགུ་གདན་དྲངས་ཏེ་གཡུ་ཐོག་རྙིང་མ་ཡོན་ཏན་མགོན་པོ་དང་ཕན་ཚུན་རྒྱལ་སྤྱིའི་རང་བཞིན་ལྡན་པའི་གསོ་རིག་བགྲོ་གླེང་གནང་བ་དང་། ཀོང་པོ་སྨན་ལུང་དུ་གསོ་རིག་སློབ་གྲྭ་ཆེད་འཛུགས་གནང་བའི་ཡོངས་གྲགས་ཀྱི་ལོ་རྒྱུས་ལས་ཤེས་ཐུབ་ཀྱི་འདུག ལོ་རྒྱུས་ཡུན་རིང་ལྡན་པའི་བོད་ཀྱི་གསོ་བ་རིག་པ་འདི། བོད་གངས་ཅན་གྱི་ལྗོངས་སུ་བྱོན་པའི་མཁས་གྲུབ་མང་པོས་དུས་རབས་སོ་སོར་ལག་ལེན་གྱི་ཉམས་མྱོང་དང་། དཔྱད་བརྡར་གྱི་གྲུབ་དོན་བསྣན་ཏེ་གསོ་དཔྱད་རིག་པའི་བསྟན་བཅོས་བརྒྱ་ཕྲག་དུ་མ་རྩོམ་འབྲི་གནང་ཡོད་པ་དང་། བོད་ཆོལ་ཁ་གསུམ་གྱི་གདན་ས་ཆེ་ཁག་མང་པོའི་ནང་སྨན་པ་གྲྭ་ཚང་ཟུར་འཛུགས་གནང་སྟེ་གསོ་རིག་སློབ་གཉེར་རྒྱུན་སྐྱོང་དང་། གསོ་དཔྱད་ལག་ལེན་རྒྱ་ཁྱབ་ཏུ་གནང་ཡོད་པ་དང་། དེ་ཡང་གསོ་བྱ་དང་གསོ་བྱེད། གསོ་ཐབས། གསོ་མཁན་གྱི་སྒོ་ནས་གཞུང་ལུགས་འཆད་ཉན་དང་ཉམས་ལེན་བྱེད་པ་ཙམ་དུ་མ་ཟད། ཡི་དམ་ལྷ་དང་འབྲེལ་བའི་སྨན་སྒྲུབ་ཀྱི་ཐུན་མོང་མ་ཡིན་པའི་ཕྱག་སྲོལ་ཡང་རྒྱ་ཁྱབ་ཏུ་དར་ཡོད་པ་དེ་དག་གིས་བོད་དང་བོད་མི་རིགས་ལ་ཕན་ཐོགས་རྒྱ་ཆེན་པོ་བསྒྲུབས་ཡོད། གཡུང་དྲུང་བོན་གྱི་གདན་ས་ཁག་ཏུའང་གསོ་རིག་སློབ་གཉེར་དང་ཉམས་ལེན་གྱི་ལམ་སྲོལ་དར་ཁྱབ་ཆེ་བ་མ་ཟད། སྨན་སྒྲུབ་ཀྱི་ཕྱག་སྲོལ་ཡང་དར་སོ་ཆེན་པོ་ཡོད་འདུག་པ་དང༌། ྋརྒྱལ་བ་སྨན་རི་བའི་སྨན་སྒྲུབ་ཀྱི་ཕྱག་བཞེས་འདི་ཡང་རང་ཅག་གི་གསོ་དཔྱད་རིག་པའི་ཕྱག་སྲོལ་ཐུན་མོང་མ་ཡིན་པ་ཞིག་རེད་འདུག ཅེས་གསུངས་སོང་།

ཡང་སྲིད་སྐྱོང་མཆོག་གིས། སྨན་རི་ཁྲི་འཛིན་རིམ་བྱོན་གྱི་སྐུ་ཐོག་རེར་སྨན་རིའི་སྒྲུབ་ཆེན་རེ་འཚོགས་སྲོལ་ཡོད་པ་འདི་ནི་ཞྭ་དཀར་ས་ཆེན་པོ་སྨན་རི་དགོན་ཕྱག་འདེབས་པ་པོ་མཉམ་མེད་ཤེས་རབ་རྒྱལ་མཚན་མཆོག་གཡུང་གིས་དུས་རབས་བཅོ་ལྔ་པའི་སྟོད་ཀྱི་ཆར་(༡༤༠༥)སླར་གསོ་སྲོལ་བཏོད་མཛད་པ་ཞིག་ཡིན་འདུག་པ་ལྟར། གདན་ས་འདིའི་ཁྲི་འཛིན་རིམ་བྱོན་གྱིས་ཉམས་པ་མེད་པའི་སྒོ་ནས་ཕྱག་ལེན་དུ་བསྟར་གནང་འདུག བཙན་བྱོལ་ནང་རྒྱལ་བ་སྨན་རི་བའི་ཁྲི་འཛིན་སོ་གསུམ་པ་ྋལུང་རྟོགས་བསྟན་པའི་ཉི་མ་མཆོག་གིས་ཕྱི་ལོ་ ༡༩༨༨ ལོར་སྨན་རིའི་སྒྲུབ་ཆེན་ཚུགས་ཏེ་སྙན་གྲགས་ཆེན་པོ་རྒྱས་ཡོད་པ་རེད། ད་ཐེངས་༧རྒྱལ་བ་སྨན་རི་བའི་ཁྲི་འཛིན་སོ་བཞི་པ་སྐྱབས་རྗེ་ལུང་རྟོགས་ཟླ་བ་དར་རྒྱས་དཔལ་བཟང་པོ་མཆོག་དབུ་བཞུགས་ཀྱིས། གདན་ས་ཆེན་མོ་འདིར་ཟླ་ཕྱེད་ལྷག་རིང་ཚུགས་པའི་༧རྒྱལ་བ་སྨན་རི་བའི་སྨན་སྒྲུབ་འོད་ཟེར་འཁྱིལ་བའི་སྒྲུབ་ཆེན་ཐེངས་ ༣༤ པ་ལེགས་པར་གྲུབ་པའི་མཛད་སྒོ་གལ་ཆེན་འདི་ལྟ་བུ་ཞིག་ལ་བཅར་ཞུགས་ཐུབ་པ་ནི་སྐལ་བ་བཟང་པོ་ཞིག་ཏུ་སྒོམ་བཞིན་ཡོད། སྒྲུབ་ཆེན་འདིའི་བྱིན་མཐུ་ལ་བརྟེན་ནས། དེ་རིང་གནས་འདིར་འདུས་པའི་སྐལ་ལྡན་པ་རྣམས་དང༌། ཡུལ་ལུང་གང་སར་གནས་པའི་དད་ལྡན་པ་རྣམས་ཀྱི་རྐྱེན་ངན་བར་ཆད་མཐའ་དག་ཞི་བ་དང་། ནད་གདོན་གྱི་འཇིགས་པ་མཐའ་དག་ལས་གྲོལ་ཏེ། ཚེ་བསོད་རླུང་རྟ་དར་བ་དང་། ཡུལ་ལུང་ཀུན་ལ་ཞི་བདེ་ཡོང་བའི་སྐྱབས་སྨོན་ཞུ་བཞིན་ཡོད། ལྷག་དོན་༧སྐྱབས་རྗེ་རྒྱལ་བ་སྨན་རི་བའི་ཁྲི་འཛིན་སོ་གསུམ་པ་མཆོག་ནས། ༧གོང་ས་རྒྱལ་བ་རིན་པོ་ཆེ་མཆོག་གི་བཀའ་དགོངས་ལྟར། ཐུགས་སྟོབས་གོ་ཆ་བཙན་པར་བགོས་ཏེ་ཁྲི་འཛིན་གོང་མའི་རྣམ་ཐར་བདག་གིར་བཞེས་བཞིན། བོད་བསྟན་སྲིད་མི་རིགས་ཀྱི་ཆེད་དུ་རླབས་ཆེན་གྱི་མཛད་འཕྲིན་རྒྱ་ཆེར་སྐྱོང་ཕྱིར་སྐུ་ཚེ་རྒྱལ་མཚན་རི་རབ་བཞིན་དུ་བརྟན་པའི་སྐྱབས་འཇུག་ཞུ་བཞིན་ཡོད། ཅེས་གསུངས་སོང་།

གསར་འགོད་པ་བྱམས་པ་ཚེ་རིང་གིས་སྨན་རི་གླིང་ནས་སྤེལ།