ཞི་ཅིན་ཕིང་གིས་ཡུ་རོབ་ནང་སྐོར་སྐྱོད་བྱས་ཏེ་ཚོང་འབྲེལ་རྒྱ་སྐྱེད་གཏང་འཆར་ཡོད་འདུག

ལོ་ངོ་ལྔ་ཡི་རྗེས་སུ་རྒྱ་ནག་གི་མགོ་ཁྲིད་ཞི་ཅིན་ཕིང་ཡུ་རོབ་ཏུ་བསྐྱོད་དེ་རྒྱ་ནག་དང་ཡུ་རོབ་མཐུན་ཚོགས་ཀྱི་ཚོང་འབྲེལ་ཚུད་པའི་ཡུ་རོབ་རྒྱལ་ཁབ་ཁག་གི་ནང་ཚོང་ལས་འབྲེལ་བ་སྔར་ལས་ཤུགས་ཆེ་རུ་གཏོང་ཐབས་བྱ་རྒྱུ་ཡིན་འདུག

འདི་ལོའི་ཕྱི་ཟླ་ ༥ ཚེས་ ༥ ནས་ ༡༠ བར་རྒྱ་ནག་གི་མགོ་ཁྲིད་ཞི་ཅིན་ཕིང་གིས་ཧྥ་རན་སི་དང་། སི་བྷི་ཡ། དེ་བཞིན་ཧཱང་གྷ་རི་སོགས་སུ་སྐོར་སྐྱོད་བྱས་ནས་འཛམ་གླིང་གི་ཚོང་ཤག་ཆེ་ཤོས་གཉིས་ཏེ། རྒྱ་ནག་དང་ཡུ་རོབ་ཀྱི་ཚོང་འབྲེལ་ལ་སྔར་ལས་ལྷག་པའི་ཤུགས་སྣོན་བྱས་ནས་རྒྱ་ནག་གི་ཅ་དངོས་ཚོང་འགྲེམས་ཀྱི་ཁྱབ་རྒྱ་ཇེ་ཆེར་གཏོང་ཐབས་བྱ་རྒྱུ་ཡིན་འདུག་ལ།  དེ་ནི་ཞི་ཅིན་ཕིང་ཕྱི་ལོ ༢༠༡༩ ཡི་རྗེས་སུ་ཡུ་རོབ་ཏུ་བསྐྱོད་པ་ཐོག་མ་དེ་ཆགས་ཡོད་ཅིང་། ད་ལན་གྱི་སྐོར་སྐྱོད་དེ་བརྒྱུད་རྒྱ་ནག་དང་ཡུ་རོབ་ཀྱི་ཚོང་དོན་ལ་ནུས་པ་དམིགས་བསལ་ཞིག་ཐོན་པའི་རེ་བའང་བྱེད་ཀྱིན་ཡོད་འདུག

འདི་ལོའི་ཕྱི་ཟླ ༥ ཚེས་ ༥ དང་ ༦ ཉིན་ཏེ་རྒྱ་ནག་དང་ཧྥ་རན་སི་གཉིས་ཚོང་འབྲེལ་བཙུགས་ནས་མི་ལོ ༧༠ འཁོར་བ་དང་བསྟུན། ཞི་ཅིན་ཕིན་གྱིས་ཧྥ་རན་སིའི་སྲིད་འཛིན་མེག་ཁོན་མཆོག་དང་ཐུག་འཕྲད་བྱ་རྒྱུ་ཡིན་ཞིང་། སྐབས་དེར་ཕྱོགས་གཉིས་ཀྱིས་ཨུ་རུ་སུས་ཡུ་ཁེ་རིན་ལ་བཙན་འཛུལ་བྱེད་མུས་ཡིན་པའི་གནད་དོན་དང་། དཀྱིལ་ཤར་ཨེ་ཤ་ཡའི་དམག་འཁྲུག  ཚོང་དོན་གྱི་དཀའ་ངལ། ཚན་རིག་དང་། རིག་གཞུང་། རྩེད་རིགས་མཉམ་ལས་སོགས་ཚུད་པའི་ཕྱོགས་གཉིས་ཀྱི་ཚོང་དོན་སོགས་ཀྱི་ཐད་ལ་གྲོས་མོལ་བྱ་རྒྱུ་ཡིན་འདུག

དེའི་ཐད་ཁ་སང་ཕྱི་ཚེས ༢༩ ཉིན་རྒྱ་ནག་ཕྱི་སྲིད་ལས་ཁུངས་ཀྱི་མགྲིན་ཚབ་པ་ལིན་ཅན་(Lin Jian) གྱིས་རྒྱུན་ལྡན་གྱི་གསར་འགོད་གསལ་བསྒྲགས་ཤིག་གི་སྟེང་། རྒྱ་ནག་དང་ཧྥ་རན་སིའི་ཚོང་དོན་གྱི་མཉམ་ལས་དེར་འཕེལ་རྒྱས་འགྲོ་ཡི་འདུག་པས། ཕྱོགས་གཉིས་ཀར་ཐབས་ཇུས་ལྡན་པའི་འབྲེལ་ལམ་དང་ལག་བསྟར་རང་བཞིན་ལྡན་པའི་མཉམ་ལས་བྱེད་མུས་ཡིན་ལུགས་དང་། ད་ལན་ཡུལ་གཉིས་ཀྱི་མཉམ་ལས་རྒྱ་སྐྱེད་གཏང་རྒྱུ་ཡིན་པ་མ་ཟད། རྒྱ་ནག་དང་ཡུ་རོབ་ཀྱི་ཚོང་འབྲེལ་ཡར་རྒྱས་གོང་འཕེལ་ཡོང་རྒྱུར་དམིགས་ཡོད་ལུགས་སོགས་བརྗོད་འདུག

སྤྱིར་འདི་ལོའི་ཕྱི་ཟླ་གསུམ་པ་ཙམ་ནས་ཡུ་རོབ་མཐུན་ཚོགས་ཀྱིས་རྒྱ་ནག་གིས་བཟོ་སྐྲུན་བྱས་པའི་གོ་ལ་ལྗང་སྒྱུར་བྱེད་ཆེད་ཀྱི་ཅ་དངོས་དག་དང་། ལྟ་ཞིབ་གློག་ཆས་སོགས་ལ་རྒྱུས་ལོན་དང་རྒྱལ་ཁབ་ཀྱི་གསང་བ་རྐུ་འཁྱེར་བྱེད་ཀྱི་ཡོད་མེད་ཀྱི་དྭོགས་གཞིའི་འོག་ནས་ཞིབ་འཇུག་བྱེད་མགོ་བཙུགས་ཡོད་ཅིང་། རྒྱ་ནག་དང་མཉམ་འབྲེལ་གྱིས་བཟོས་པའི་སྨན་རིགས་སོགས་ལའང་ཞིབ་འཇུག་བྱེད་ཀྱིན་ཡོད་འདུག་ལ། བདུན་ཕྲག་སྔ་མ་ནས་ཡུ་རོབ་མཐུན་ཚོགས་ཀྱིས་ཚོགས་ཁོངས་རྒྱལ་ཁབ་ཁག་ནང་ཡོད་པའི་རྒྱ་ནག་གི་ཚོང་ལས་ཁང་དག་དང་། རྒྱ་ནག་གི་མཉེན་ཆས་སོགས་ལའང་ཞིབ་བཤེར་བྱེད་མགོ་བཙུགས་ཏེ་རྒྱ་ནག་དང་ཡུ་རོབ་མཐུན་ཚོགས་ཀྱི་འབྲེལ་ལམ་ཇེ་ཞན་དུ་འགྲོ་མུས་ཡིན་སྟབས། གནད་དོན་དབྱེ་ཞིབ་པ་མང་པོ་ཞིག་གིས། ད་ལན་རྒྱ་ནག་གཞུང་གིས་ཡུ་རོབ་དང་རྒྱ་ནག་གི་ཚོང་འབྲེལ་ཇེ་སྡུག་ཏུ་འགྲོ་མུས་ཡིན་པའི་སྐབས་དང་བསྟུན། ཧྥ་རན་སི་དང་ཚོང་འབྲེལ་ཇེ་བཟང་དུ་བཏང་ནས་སླར་ཡང་ཡུ་རོབ་མཐུན་ཚོགས་དང་ཚོང་དོན་གྱི་འབྲེལ་ལམ་སླར་གསོ་བྱ་རྒྱུར་རེ་བ་བྱེད་ཀྱིན་ཡོད་པའི་ཚོད་དཔག་བྱེད་ཀྱི་འདུག

དེ་བཞིན་རྒྱ་ནག་གི་མགོ་ཁྲིད་ཞི་ཡིས་ཧཱང་གྷ་རི་དང་སི་བྷི་ཡ་རྒྱལ་ཁབ་གཉིས་ཀྱི་སྲིད་བློན་དང་སྲིད་འཛིན་སོགས་སུ་ཐུག་སྟེ། ཟླ་སྔ་མར་ཧཱང་གྷ་རི་ཡིས་རྒྱ་ནག་གིས་བཟོས་པའི་གློག་འཁོར་མང་དག་ཅིག་ཕྱིར་བསྔུ་བྱས་པའི་སྐོར་སོགས་ཚུད་པའི་ཕྱོགས་གཉིས་ཀྱི་ཚོང་དོན་གྱི་འབྲེལ་ལམ་ཇེ་ཆེར་གཏོང་ཐབས་དང་། རྒྱ་ནག་དང་རྒྱལ་ཁབ་དེ་གཉིས་ཀྱི་མཉམ་ལས་དང་གཉིས་ཕན་ཟེར་བ་ཞིག་གི་ཐོག་ནས་རྒྱུད་གཅིག་ལམ་གཅིག་གི་འཛུགས་སྐྲུན་གྱི་ལས་གཞི་གང་མང་སྤེལ་ཐབས་སོགས་ཀྱི་ཐད་ལ་གྲོས་མོལ་བྱ་འཆར་ཡོད་འདུག

འདས་ལོའི་ཕྱི་ཟླ་ ༩  ནང་ཡུ་རོབ་མཐུན་ཚོགས་ཀྱི་ཚོང་དོན་འགན་འཛིན་སྐུ་ཞབས་ཝལ་ཌི་སི་ (Valdis dombrovskis) ལགས་ཀྱིས། རྒྱ་ནག་དང་ཡུ་རོབ་མཐུན་ཚོགས་ཀྱི་ཚོང་དོན་འབྲེལ་ལམ་དེ་གཉན་འཕྲང་ཅན་ཞིག་ཏུ་གྱུར་ཡོད་པ་རེད། ང་ཚོས་ཕྱོགས་གཉིས་ཀར་ཁེ་ཕན་ཡོད་པའི་ལམ་བུ་ཞིག་གདམ་ཆོག་ལ། ང་ཚོས་ལག་པ་དང་ལག་པ་འབྲེལ་ནས་ཕྱི་གསལ་ནང་གསལ་དང་། དྲང་ཚུགས་ལྡན་པའི་ཚོང་འབྲེལ། མ་འཛུགས་སོགས་ཀྱི་ཐོག་ནས་གདོང་ལེན་བྱ་དགོས། ཡང་མིན་ན་ང་ཚོས་ཕྱོགས་གཉིས་ཀ་ག་ལེར་ལོགས་སུ་འགྲོ་བཅུག་པའི་ལམ་བུ་དེ་གདམ་དགོས།  ང་ཚོའི་འདས་པའི་ལོ་བཅུ་ཕྲག་རིང་གི་མཉམ་བགོས་ཁེ་ཕན་ཇེ་ཞན་དང་མེད་པར་གྱུར་ན་མི་མང་དང་ཚོང་དོན་གྱི་འབྲེལ་ལམ་མེད་པར་གཏང་བ་རེད། ཅེས་བརྗོད་ཡོད་པ་རེད།

ཕྱི་ལོ་ ༡༩༧༥ ནས་ཡུ་རོབ་མཐུན་ཚོགས་དང་རྒྱ་ནག་བར་གྱི་མཉམ་འབྲེལ་ཚོང་ལས་མགོ་བརྩམས་ཤིང་། ཕྱི་ལོ་ ༢༠༡༣ ལོར་བཞག་པའི་ཡུ་རོབ་མཐུན་ཚོགས་དང་རྒྱ་ནག་གི་ཚོང་དོན་མ་འཛུགས་གྲོས་ཆོད་དེས་ཕྱོགས་གཉིས་ཀྱི་ཚོང་དོན་མ་འཛུགས་གོང་འཕེལ་གཏོང་ཐབས་ལ་དམིགས་ཡོད་པ་དང་། ཕྱི་ལོ་ ༢༠༡༩ ལོའི་ཚོང་འབྲེལ་གནས་བབ་ལྟར་ན། ཡུ་རོབ་མཐུན་ཚོགས་དང་རྒྱ་ནག་བར་ཁྱོན་ཨ་སྒོར་ཐེར་འབུམ་ ༥༥༩ ཡི་ཚོང་ལས་གཉེར་ཡོད་པ་དང་། དེ་ནི་འཛམ་གླིང་གི་ཚོང་འབྲེལ་ཆེ་ཤོས་ཨང་རིམ་ ༢ པ་དེ་ཆགས་ཡོད་འདུག ཡིན་ནའང་། རྒྱ་ནག་ཝུའུ་ཧན་ནས་ཐོག་མར་མཆེད་པའི་ཏོག་དབྱིབས་གཉན་རིམས་དེ་འཛམ་གླིང་ཡོངས་སུ་ཁྱབ་ནས་བསམ་ཡུལ་ལས་འདས་པའི་ཆག་སྒོ་ཆེན་པོ་བསླངས་ཡོད་པ་མ་ཟད། རྒྱ་ནག་གཞུང་གིས་ཏོག་དབྱིབས་གཙང་སེལ་གྱི་སྲིད་ཇུས་ཟེར་བ་ལག་བསྟར་བྱས་ཏེ་འཛམ་གླིང་ལ་ཚོང་འབྲེལ་རེ་ཞིག་མཚམས་འཇོག་དགོས་བྱུང་བར་བརྟེན།  འཛམ་གླིང་གི་ཚོང་ཤག་ཆེ་ཤོས་གཉིས་ཀྱི་ཚོང་འབྲེལ་ལའང་དོ་ཕོག་ཤུགས་ཆེན་ཕྱིན་ཡོད་པ་རེད།

གསར་འགོད་པ། དཔལ་ལྡན།

རྩོམ་སྒྲིག་པ། པདྨ་མཚོ།