ཧྥ་རན་སིར་ཞི་ཅིན་ཕིང་ལ་ངོ་རྒོལ་ཤུགས་ཆེན་བྱས།  

ཁ་སང་རྒྱ་ནག་གི་མགོ་ཁྲིད་ཞི་ཅིན་ཕིང་ཧྥ་རན་སིའི་ནང་བསླེབས་པ་དང་བསྟུན་བོད་མི་གཙོས་མི་གྲངས་ ༤༠༠༠ ལྷག་གིས་རྒྱ་ནག་གཞུང་གི་བཙན་གནོན་ལ་ངོ་རྒོལ་ཤུགས་ཆེན་བྱས་ཡོད་འདུག

ཁ་སང་ཕྱི་ཚེས་ ༥ ཉིན་ཧྥ་རན་སི་བོད་རིགས་མཐུན་ཚོགས་ཀྱི་གོ་སྒྲིག་འོག ཧྥ་རན་སིའི་ཚོགས་པ་དྲུག་ཐུན་མོང་གིས་བོད་མི་རིགས་རྩ་མེད་གཏོང་མཁན་སྲིད་དབང་སྒེར་སྤྱོད་པ་ཞི་ཅིན་ཕིང་ལ་ངོ་རྒོལ་ཡོད། ཅེས་པའི་འབོད་སྒྲའི་འོག་ནས་རྒྱ་ནག་གི་མགོ་ཁྲིད་ཞི་ལ་ངོ་རྒོལ་ལས་འགུལ་རྒྱ་ཆེན་པོ་ཞིག་སྤེལ་ཡོད་ཅིང་། ལས་འགུལ་དེའི་ཁྲོད་ཡུ་རོབ་རྒྱལ་ཁབ་གསུམ་ལྷག་ནང་གི་བོད་མི་གཙོས། ཐའེ་ཝན་གྱི་སློབ་ཕྲུག་ཚོགས་པ་དང་། རྒྱ་ནག་གི་དམངས་གཙོ་དོན་གཉེར་བའི་ཚོགས་པ་གཉིས། ལྷོ་ཝེ་ཐི་ནམ་གྱི་དམངས་གཙོ་དོན་གཉེར་བཅས་མི་གྲངས ༤༠༠༠ ལྷག་གིས་མཉམ་ཞུགས་གནང་ཡོད་འདུག

ལས་འགུལ་སྤེལ་སྐབས་གསུང་བཤད་གནང་མཁན་ཡུ་རོབ་སྤྱི་འཐུས་ཚ་ཁོ་ཐུབ་བསྟན་རྒྱ་མཚོ་ལགས་སུ་འདི་གའི་གསར་འགོད་པས་ཁ་པར་བརྒྱུད་དེའི་སྐོར་བཀའ་འདྲི་ཞུས་པར་ཁོང་གིས། རྒྱ་ནག་གི་མགོ་ཁྲིད་ཞི་ཅིན་ཕིང་རྒྱ་ནག་དང་ཧྥ་རན་སིའི་བར་ཚོང་འབྲེལ་བཙུགས་ནས་མི་ལོ་དྲུག་ཅུ་འཁོར་བའི་དུས་དྲན་སྲུང་གཙིའི་སླད་དུ་ཡོང་བ་ནི་ལོ་རྒྱུས་ཀྱི་དངོས་ཡོད་གནས་ཚུལ་ཞིག་ཡིན་ལ། ཧྥ་རན་སིས་རྒྱ་ནག་ནི་རྒྱལ་ཁབ་དེའི་ཕྱི་སྲིད་ཀྱི་འབྲེལ་ལམ་བཙུགས་ས་ཐོག་མ་དེ་ཡིན་སྐོར་བཤད་ཀྱི་ཡོད་ཀྱང་། དོན་དངོས་ཐོག་རྒྱ་ནག་ནི་སྲིད་དབང་གཅིག་བསྡུད་ཀྱི་གཞུང་ཞིག་ཡིན་པ་དང་། རང་གི་མི་རིགས་དང་མི་མང་ལ་སྨྲ་བརྗོད་རང་དབང་མེད་པ། འགྲོ་བ་མིའི་ཐོབ་ཐང་མེད་པ། མི་སེར་སྤེལ་ཡུལ་རིང་ལུགས་ཀྱི་རྒྱལ་ཁབ་ཅིག་ཡིན་ལ། ལྷག་པར་ཕྱི་ལོ་ ༡༩༥༩ ལོར་རྒྱ་ནག་གཞུང་གིས་བོད་ས་བཙན་འཛུལ་བྱས་ནས་བོད་ལ་མི་སེར་སྤེལ་བའི་སྲིད་ཇུས་སོགས་སྤེལ་ཡོད་པ་ནི་ཧྥ་རན་སིའི་མགོ་ཁྲིད་དང་། བརྒྱུད་ལམ། མི་མང་སོགས་ཀྱིས་ངེས་པར་དུ་ཤེས་དགོས་པའི་ཁར། རྒྱ་ནག་གཞུང་གིས་གནམ་སྡེ་སྒོ་མོ་ཆེ་ནས་སློབ་ཕྲུག་སྟོང་ཕྲག་མང་པོ་ཞིག་དམར་གསོད་དང་། ཡུ་གུར་མི་རིགས་ས་ཡ་གཅིག་ལྷག་བཙོན་འཇུག་བྱས་ཏེ། ངལ་རྩོལ་དང་བསམ་བློ་བསྒྱུར་བཀོད་ཁང་སོགས་སུ་བཙན་གྱིས་བཅུག་ཡོད་པ། མི་རིགས་སྡེབ་གསོད་ཀྱི་ལས་དོན་མང་དག་ཅིག་གཉེར་མུས་ཡིན་པ་སོགས་རྒྱ་ནག་ནི་སྨྲ་བརྗོད་རང་དབང་ལ་བརྩི་འཇོག་གཏན་ནས་མི་བྱེད་མཁན་ཞིག་ཡིན་པ་གསལ་བཏོན་བྱས་ཡོད་པས། ཧྥ་རན་སིས་རང་གི་རྒྱལ་ཁབ་དང་། མི་རིགས། དམངས་གཅོའི་རིན་ཐང་སོགས་ལ་གཞིགས་ནས་རྒྱ་ནག་གི་མགོ་ཁྲིད་དང་རྒྱ་ནག་གི་བཙན་གནོན་འོག་ཡོད་པའི་རྒྱལ་ཁབ་ཁག་གི་འགྲོ་བ་མིའི་ཐོབ་ཐང་གི་གནད་དོན་ཐད་ལ་གླེང་སློང་དང་། ལྷག་པར་དུ་ཧྥ་རན་སིས་བོད་རྒྱ་ཞི་མོལ་བསྐྱར་གསོ་ཡོང་རྒྱུར་སྐུལ་མ་དང་རོགས་རམ་གནང་དགོས་པའི་འབོད་སྐུལ་ཞུས་ཡོད་སྐོར་སོགས་འགྲེལ་བརྗོད་གནང་བྱུང་།

དེ་བཞིན་མཛད་སྒོའི་ཐོག་ཚོགས་པ་ཁག་གི་འཐུས་མི་རྣམས་ཀྱིས་རྒྱ་ནག་གི་མགོ་འཁྲིད་ཞི་ཧྥ་རན་སིར་ཡོང་བར་ངོ་རྒོལ་ཆེན་པོ་ཡོད་པ་མ་ཟད། བོད་ནང་དུ་རྒྱ་ནག་གཞུང་གིས་དྲག་གནོན་དང་། བོད་ཕྲུག་རྣམས་བཅའ་སྡོད་སློབ་གྲྭར་མངག་གཏོང་བྱེད་མུས་ཡིན་པའི་སྲིད་ཇུས་ལ་མཐའ་གཅིག་ཏུ་ངོ་རྒོལ་ཡོད་སྐོར་གྱི་གཏམ་བཤད་སྤེལ་ནས། ཆུ་ཚོད་ལྔ་ལྷག་ལ་ཞི་བའི་སྐད་འབོད་ཀྱི་ལས་འགུལ་སྤེལ་འདུག ཟླ་འདིའི་ཕྱི་ཚེས་ ༤ ཉིན་བོད་རང་བཙན་སློབ་ཕྲུག་ཚོགས་པའི་ལས་འགུལ་བ་ཚེ་ལྷ་ལགས་དང་། ཉི་མ་ལགས་གཉིས་ཀྱིས་ལྕགས་སྡོང་དུ་འཛེགས་ནས་ཆུ་ཚོད་གཉིས་ལྷག་རིང་ཞི་བའི་ངོ་རྒོལ་སྤེལ་བར་བརྟེན། ཧྥ་རན་སིའི་ཉེན་རྟོག་པས་འཛིན་བཟུང་བྱས་ནས་ཆུ་ཚོད་བཅུ་ལྷག་བཀག་ཉར་བྱས་རྗེས། ཁ་སང་རེས་གཟའ་ཉི་མའི་ཉིན་ཀློད་གྲོལ་བཏང་འདུག

གཞན་ཡང་། ཉེ་ལམ་རྒྱལ་སྤྱིའི་འགྲོ་བ་མིའི་ཐོབ་ཐང་མཉམ་འབྲེལ་མཐུན་ཚོགས་( the International Federation for Human Rights)དང་།   རྒྱལ་སྤྱིའི་བོད་དོན་ལས་འགུལ་ཁང་། ཧྥ་རན་སིའི་འགྲོ་བ་མིའི་ཐོབ་ཐང་སྲུང་སྐྱོབ་ཀྱི་ཚོགས་པ་(the French Ligue des droits de l’Homme)སོགས་མཉམ་འབྲེལ་ཐོག སྲིད་འཛིན་མེག་ཁོ་རོན་མཆོག་ནས་འགྲོ་བ་མིའི་ཐོབ་ཐང་གི་གནད་དོན་དཀྱིལ་སྙིང་དུ་བཟུང་བའི་ཐོག་ནས་བོད་དང་ཡུ་གུར་སོགས་ཀྱི་གནད་དོན་གླེང་སློང་དགོས་པའི་འབོད་སྐུལ་ཞུས་ཡོད་པ་རེད།

ད་ལན་ཧྥ་རན་སི་དང་རྒྱ་ནག་གི་མགོ་འཁྲིད་གཉིས་ཐུག་འཕྲད་བྱེད་སྐབས། ཨུ་རུ་སུས་ཡུ་ཁེ་རིན་ལ་བཙན་འཛུལ་བྱེད་མུས་ཡིན་པའི་གནད་དོན་དང་། དཀྱིལ་ཤར་ཨེ་ཤ་ཡའི་དམག་འཁྲུག  ཚོང་དོན་གྱི་དཀའ་ངལ། ཚན་རིག་དང་། རིག་གཞུང་། རྩེད་རིགས་མཉམ་ལས་ཚུད་པའི་ཕྱོགས་གཉིས་ཀྱི་ཚོང་དོན་སོགས་ཀྱི་ཐད་ལ་གྲོས་མོལ་བྱ་རྒྱུ་ཡིན་འདུག་ལ། རྒྱ་ནག་གི་མགོ་འཁྲིད་ཞི་ཡིས་ཧཱང་གྷ་རི་དང་སི་བྷི་ཡ་རྒྱལ་ཁབ་གཉིས་ཀྱི་སྲིད་བློན་དང་སྲིད་འཛིན་སོགས་སུ་ཐུག་སྟེ། ཟླ་སྔ་མར་ཧཱང་གྷ་རི་ཡིས་རྒྱ་ནག་གིས་བཟོས་པའི་གློག་འཁོར་མང་དག་ཅིག་ཕྱིར་བསྔུ་བྱས་པའི་སྐོར་སོགས་ཚུད་པའི་ཕྱོགས་གཉིས་ཀྱི་ཚོང་དོན་གྱི་འབྲེལ་ལམ་ཇེ་ཆེར་གཏོང་ཐབས་དང་། རྒྱ་ནག་དང་རྒྱལ་ཁབ་དེ་གཉིས་ཀྱི་མཉམ་ལས་དང་གཉིས་ཕན་ཟེར་བ་ཞིག་གི་ཐོག་ནས་རྒྱུད་གཅིག་ལམ་གཅིག་གི་འཛུགས་སྐྲུན་གྱི་ལས་གཞི་གང་མང་སྤེལ་ཐབས་སོགས་ཀྱི་ཐད་ལ་གྲོས་མོལ་བྱ་འཆར་ཡོད་འདུག

གསར་འགོད་པ། དཔལ་ལྡན།

རྩོམ་སྒྲིག་པ། པདྨ་མཚོ།